CARTA YEⁿꞌE SAⁿꞌĀ FILEMÓN
1
ꞌÚú Pablo, saⁿꞌā chi canuúⁿ vácūū cáávā chi diíⁿ ntiiⁿnyuⁿ yeⁿꞌē Jesucristo. ꞌÚú ndúúcū hermano Timoteo idingúuⁿ ꞌnū carta ꞌcūū yeⁿꞌē dii Filemón chi nééné neⁿꞌe ꞌnū dii compañero yeⁿꞌe yú viꞌī chi dáámá idiiⁿ yú ntiiⁿnyuⁿ ndúúcū víꞌi. 2 Ní idinguúⁿ yeⁿꞌe ꞌiiⁿꞌyāⁿ chi yeⁿꞌe yaācū chi nduuvidaamá yā ná vaacu di ní yeⁿꞌē hermana Apia ní yeⁿꞌē hermano Arquipo chi diiⁿ sa luchar nduucú ꞌnū na ntiiⁿnyuⁿ chi diiⁿ ꞌnū. 3 Neⁿꞌé chi Ndyuūs chiida yú ndúúcū Señor Jesucristo tée yā ndísꞌtiī nducuéⁿꞌē denduꞌū chi nꞌdai taavi yeⁿꞌé yā ndúúcū vaadī ꞌdiīiⁿ.Filemón dinéⁿꞌe yā ꞌiiⁿꞌyāⁿ ni iꞌtéénu yā Ndyuūs
4 Cueⁿꞌe daāⁿmaⁿ ꞌúú caꞌá gracias Ndyuūs taachi nꞌgaacú yeⁿꞌe di ꞌnaaⁿ chi ngaⁿꞌānguaꞌá. 5 Caati hermanos yeⁿꞌe yú ngaⁿꞌa yā yeⁿꞌe di tanꞌdúúcā chi neⁿꞌe di Señor Jesucristo yeⁿꞌe yú ndúúcū nducyaaca ꞌiiⁿꞌyāⁿ chi yeⁿꞌé Jesucristo, ní tanꞌdúúcā chi iꞌtéénu di Señor Jesucristo. 6 ꞌÚú ngiicá Ndyuūs caava ꞌiiⁿꞌyāⁿ chi iꞌtéénu yā caati candɛɛ di nduudu cuaacu yeⁿꞌé Jesucristo nanáaⁿ yā. Ní ngiicá chi cuuvi tuumicadíínuuⁿ yā yeⁿꞌe tanducuéⁿꞌē chi nꞌdaacā chi Jesucristo itée yā sꞌuuúⁿ. 7 Ní ꞌúú yeenu taaví ní vɛ́ɛ́ ꞌviichꞌɛɛtínūuⁿ yeⁿꞌé caati dinéⁿꞌe di nducyaaca ꞌiiⁿꞌyāⁿ. Ní caꞌa di consuelo ꞌiiⁿꞌyāⁿ chi iꞌtéénu yā Ndyuūs.
Pablo ngiicá yā ꞌáámá favor caavā esclavo Onésimo
8 ꞌÁárá chí cuuví dichoꞌó orden yeⁿꞌē di caati ꞌúú apóstol ꞌúú chí candɛɛ́ nduudu yeⁿꞌé Ndyuūs, 9 naati neⁿꞌé diꞌcuiitú dii cucáávā chi neⁿꞌe yú Cristo. ꞌÚú Pablo ꞌāā ndiicúú maaⁿ ní canuúⁿ vácūū cucáávā chi diíⁿ ntiiⁿnyuⁿ yeⁿꞌe Cristo. 10 Ní ngiicá ꞌáámá favor caavā Onésimo chi tanꞌdúúcā daiyá cucáávā chi iꞌtéénu sa nduudu cuaacu yeⁿꞌé Ndyuūs chi ꞌúú ngaⁿꞌá taachi canuúⁿ vácūū.
11 Tiempo chi chóꞌōo sáⁿꞌa ꞌcūū ꞌáámá esclavo yeⁿꞌē di. Ní chéenū sa yeⁿꞌē di. Ní nguɛ́ɛ́ dɛꞌɛ̄ vɛɛ dichííꞌvɛ̄ sa dii naati maaⁿ ní dichííꞌvɛ̄ sa dii tanꞌdúúcā chi dichííꞌvɛ̄ sa ꞌúú. 12 ꞌÚú dichoꞌó sáⁿꞌa ꞌcūū nanááⁿ dii. Dii ní ꞌcuáaⁿ di sáⁿꞌa ꞌcūū tanꞌdúúcā chi maáⁿ ꞌúú. 13 ꞌÚú neⁿꞌé chi cunee sa nduucú caati cuuvi sa dichííꞌvɛ̄ sa ꞌúú lado yeⁿꞌē di neⁿꞌe chi canuúⁿ vácūū cucáávā chi idiíⁿ ntiiⁿnyuⁿ yeⁿꞌé Ndyuūs. 14 Naati nguɛ́ɛ́ dɛꞌɛ̄ vɛɛ neⁿꞌé chi a fuerza canee chi diiⁿ di nduuti chi nguɛ́ɛ́ neⁿꞌe di. Naati neⁿꞌé chi dii cunee yiīnū di. Neⁿꞌé chi diiⁿ di ꞌáámá favor nduucú, nguɛ́ɛ́ ꞌaama cosa chi diꞌcuiitú dii naati cosa chí maaⁿ di neⁿꞌe di diiⁿ di. 15 Nééné dīvíi sa yeⁿꞌe di ꞌáámá tiempo nūuⁿ caati cuuvi cutaꞌa di saⁿꞌá ꞌcūū chi dichííꞌvɛ̄ sa dii cueⁿꞌe daāⁿmaⁿ. 16 Naati maaⁿ ní nguɛ́ɛ́ cutaꞌa di saⁿꞌá ꞌcūū tanꞌdúúcā esclavo chi ꞌáámá cānee sa dichííꞌvɛ̄ sa dii naati tanꞌdúúcā chi ꞌaama saⁿꞌā nꞌdaacā ca, nguɛ́ɛ́ ti ꞌaama esclavo caati maaⁿ ní Onésimo ꞌcūū ꞌáámá hermano yeⁿꞌe yú chi neené neⁿꞌé ꞌnū. ꞌÚú neⁿꞌé taavi hermano Onésimo naati dii canee chi dinéⁿꞌe taavi ca di saⁿꞌā. Nguɛ́ɛ́ dámaāⁿ chi saⁿꞌā esclavo naati chi hermano yeⁿꞌe yú ti saⁿꞌā miiⁿ ntúūⁿ ní yeⁿꞌe Señor Jesucristo yeⁿꞌe yú.
17 Maaⁿ ní nduuti chi dii staꞌa di ꞌúú chi compañero yeⁿꞌe di tuuꞌmi ní ꞌcuaaⁿ di Onésimo tanꞌdúúcā chi ꞌúú nūuⁿ. 18 Ní nduuti chi vɛɛ chi nguɛɛ nꞌdaacā idiiⁿ sa ndúúcu di o nduuti chi canꞌdíícu sa yeⁿꞌe di tuuꞌmi ní cuꞌneeⁿ dí cuenta yeⁿꞌē ꞌúú. 19 ꞌÚú maáⁿ idinguúⁿ carta yeⁿꞌe di ndúúcū taꞌá ní ndúúcū letra yeⁿꞌé. ꞌÚú nadiiꞌvɛ́ yeⁿꞌē di. Nguɛ́ɛ́ canee chi ꞌcuuví dii ti maaⁿ vida yeⁿꞌē di canꞌdiīcu di yeⁿꞌé cáávā chi caⁿꞌá nduudu cuaacu yeⁿꞌē di. 20 Maaⁿ ní dii Filemón, diꞌcuíítu ca dii chi diiⁿ di favor ꞌcūū nduucú chi ꞌcuaaⁿ di Onésimo caati sꞌuuúⁿ hermanos yeⁿꞌe yú viꞌī cucáávā chi iꞌtéénu yú Señor Jesucristo. Tée di ꞌviichꞌɛɛtínūuⁿ na staava yeⁿꞌé tanꞌdúúcā hermano yeⁿꞌe yú viꞌī chi yeⁿꞌe Cristo.
21 Maaⁿ ní idinguúⁿ yeⁿꞌē di ti seguro cāneé chi nꞌgiindiveeⁿ di nduudu yeⁿꞌé. ꞌÚú ní deenú chi idiiⁿ di ní nꞌdaacā ca idiiⁿ di nguɛ́ɛ́ ti chi ngiicá dii. 22 Ní taachi ꞌúú ndaá cuꞌneeⁿ yaaⁿ di ꞌaama cuarto yeⁿꞌé. Cunee ngiinú chi Ndyuūs caⁿꞌá yā diíⁿ yā chiiⁿ chi ngaⁿꞌanguaꞌá nī cáávā ꞌúú ní Ndyuūs neⁿꞌe yā chi chií ní nꞌdiichí ndísꞌtiī.
ꞌCuiīnū carta ndúúcū saludos ndúúcū vaadī nꞌdai yeⁿꞌe Jesucristo
23 Saⁿꞌā Epafras chi yeⁿꞌe Jesucristo ní compañero yeⁿꞌé ní canee sa vácūū nduucú: Nꞌdai di, ngaⁿꞌa sa. 24 ꞌTiicá ntúūⁿ hermanos Marcos ndúúcū Aristarco ndúúcū Demas ndúúcū Lucas, hermanos chi diíⁿ yā dáámá ntiiⁿnyuⁿ nduucú: Nꞌdai di, ngaⁿꞌá yā.
25 Neⁿꞌé chi Señor Jesucristo yeⁿꞌe yú tée yā vaadī nꞌdai yeⁿꞌé yā nducyaaca ndísꞌtiī. ꞌTíícā cuuvi.