Hebreos 1

CARTA YEⁿꞌE ꞌIIⁿꞌYĀⁿ HEBREOS

Ndyuūs dichóꞌo yā daiyá yā chi caaⁿꞌmáⁿ yā lado yeⁿꞌé yā

Tiempo chi ꞌāā chóꞌōo, Ndyuūs caⁿꞌa yā nꞌdeee cūūví tiempo ndúúcū neené nꞌdeee nááⁿ taachi profetas chi candɛɛ́ yā nduudu yeⁿꞌe Ndyuūs ngaⁿꞌá yā lado yeⁿꞌé yā. 2 Ní maaⁿ ní tiempo ꞌcūū Ndyuūs dichóꞌo yā daiyá yā Jesucristo chi ngaⁿꞌá yā ndúúcū sꞌuuúⁿ. Ní Ndyuūs ndúúcū daiyá yā dinꞌdái yā tanducuéⁿꞌē chi vɛ́ɛ́ ní Ndyuūs caꞌá yā tanducuéⁿꞌē chi yeⁿꞌē daiyá yā. 3 Ní daiyá Dendyuūs miiⁿ ní ngíí nꞌgai yā yeⁿꞌē chidɛɛvɛ́ nꞌdai yeⁿꞌé Ndyuūs. Ní tanꞌdúúcā Ndyuūs miiⁿ ꞌāā ꞌtiicá nūuⁿ daiyá yā. Daiyá yā ní ndúúcū nduudu chi ngaⁿꞌa yā, diíⁿ yā chi tanducuéⁿꞌē denduꞌū snéé na lugar yeⁿꞌē. Ní cuayiivi chi daiyá yā diíⁿ yā chi nadachꞌɛɛcú yā yeⁿꞌe ꞌiiⁿꞌyāⁿ yeⁿꞌe nuuⁿndi yeⁿꞌé yā tuuꞌmi ní chꞌiindí yā ná vaꞌai chɛɛti nguuvi na lado tá cuaacú chiidá yā chi lado yeⁿꞌe honor. Ndyuūs miiⁿ ní poder chi chꞌɛɛtɛ ca yeⁿꞌē tanducuéⁿꞌē poder.

Daiya Ndyuūs ní chꞌɛɛtɛ ca nguɛ́ɛ́ ti ángeles

4 Ní daiya Dendyuūs ní neené chꞌɛɛtɛ ca nguɛ́ɛ́ ti ángeles. Ní chi duuchí yā ndúúcū chi vɛ́ɛ́ yeⁿꞌé yā ní neené chꞌɛɛtɛ ca nguɛ́ɛ́ ti ángeles. 5 Caati mar ꞌáámá vmnéⁿꞌēe nguɛ́ɛ́ caⁿꞌa Ndyuūs ndúúcū mar ꞌáámá ángel tanꞌdúúcā chi ngaⁿꞌa yā ndúúcū daiyá yā Jesucristo:

Díí ní daiyá; maaⁿ caꞌá vida yeⁿꞌé nī.

Ní nguɛ́ɛ́ caⁿꞌa yā ndúúcū mar ꞌáámá ángel ꞌtíícā:

ꞌÚú ní chiida di ꞌúú; niicu díí ní daiyá dii. 6 Ní taachi Ndyuūs dichóꞌo yā ꞌáámá nꞌdyaⁿꞌā daiyá yā iⁿꞌyeeⁿdí ꞌcūū ngaⁿꞌa yā ꞌtíícā:

Nducyaaca ángeles yeⁿꞌé Ndyuūs canéé chi dichꞌɛɛtɛ́ yā daiya Ndyuūs. 7 Ní Ndyuūs ngaⁿꞌa yā yeⁿꞌe ángeles yeⁿꞌe yā ꞌtíícā:

ꞌÚú diíⁿ chi ángeles yeⁿꞌé ní tanꞌdúúcā espíritu sꞌeeⁿ, ꞌtiicá yā. Ní diíⁿ chi ángeles dichííꞌvɛ yā ꞌúú. Ní tanꞌdúúcā ꞌáámá nguuchi yaⁿꞌā ꞌtíícā ángeles yeⁿꞌé. 8 Naati Ndyuūs ngaⁿꞌá yā yeⁿꞌe daiya yā Jesucristo ꞌtíícā:

Dii Ndyuūs, trono yeⁿꞌe di ni ꞌáámá cūnee. Ní ngaⁿꞌa ntiiⁿnyuⁿ di yeⁿꞌē tanducuéⁿꞌē ndúúcū vaadī cuaacu.

9 Dii ní neⁿꞌe di cosas chi cuaacu, ní nguɛ́ɛ́ neⁿꞌe di chɛɛ chi nguɛ́ɛ́ cuaacu. Cucáávā chuū Ndyuūs yeⁿꞌe di chi chiida di ní tee yā dii vaadī yeenu taavi nguɛ́ɛ́ ti caꞌa yā ꞌiiⁿꞌyāⁿ chi yeⁿꞌé nī. 10 ꞌTiicá ntúūⁿ Ndyuūs ngaⁿꞌa yā yeⁿꞌē daiyá yā Jesucristo:

Díí, Señor, ndii cuááⁿ vmnaaⁿ sꞌnúuⁿ di cimiento yeⁿꞌe iⁿꞌyeeⁿdí ꞌcūū, ní dinꞌdái di nanguuvi ndúúcū taꞌa di.

11 Iⁿꞌyeēⁿdi ndúúcū nánguuvi ní díꞌcuiinu naati díí ꞌáámá cūnee di. Ní tanducuéⁿꞌē chuū cuuvi ndiicúū tanꞌdúúcā catecai yú, ꞌtíícā ndiicúū.

12 Ní diíⁿ nī nꞌcánnduu nī nducuéⁿꞌē tanꞌdúúcā ꞌiiⁿꞌyāⁿ diíⁿ yā chí nꞌcannduu yā catecaí yā. Ní n̄ꞌdaaⁿ di nducuéⁿꞌē tanꞌdúúcā ꞌiiⁿꞌyāⁿ n̄ꞌdaaⁿ yā catecaí yā. Naati dii Jesucristo daiyá Ndyuūs ꞌāā daamá nūuⁿ canee di nduuyu nduuyu. Ní ꞌáámá cūnee di cueⁿꞌe daāⁿmaⁿ. 13 Ndyuūs nguɛ́ɛ́ caⁿꞌá yā mar ꞌáámá ángel mar ꞌáámá vmnéⁿꞌēe tanꞌdꞌúúcā chi ngii yā daiyá yā Jesucristo ꞌtíícā:

ꞌCuūndī di lado ta cuaācú ndíí ꞌúú diíⁿ chi nducyaacá yā chi taáⁿ yā yeⁿꞌē di canée yā maaⁿ caꞌa di tanꞌdúúcā ꞌáámá banco ꞌlíí ꞌtííca yā chí chɛɛ́ dí yeⁿꞌé yā. 14 Nducyáácá ángeles ní espíritu sꞌeeⁿ chi diíⁿ yā ntiiⁿnyuⁿ yeⁿꞌé Ndyuūs. Ní Ndyuūs dichóꞌo yā ángeles chí innee yā ꞌiiⁿꞌyāⁿ na iⁿꞌyeeⁿdí ꞌcūū chi Ndyuūs nadinguáⁿꞌai yā.