Canéé chí diiⁿ yú cuidado yeⁿꞌe chi Ndyuūs nadanguáⁿꞌai yā sꞌuuúⁿ
2
Ní cucáávā chi Cristo nadanguáⁿꞌai yā sꞌuuúⁿ canéé chí candɛɛ yú cuidado yeⁿꞌé nduudu cuaacu chí nꞌgiindiveeⁿ yú ti nguɛ́ɛ́ iꞌneeⁿ yú cucáávā nduudu chí n̄ꞌdaaⁿ ní maaⁿ ní nguɛ́ɛ́ caⁿꞌa yú táámá yúúní. 2 Nduudu cuaacu chi ꞌāā ngaⁿꞌa ángeles ní nduudu chi chꞌiⁿꞌi nanááⁿ ꞌiiⁿꞌyāⁿ chi cuaacu nííⁿnyúⁿ chí nduudu cuaacu. Ní ꞌiiⁿꞌyāⁿ chi nguɛ́ɛ́ nꞌgiindiveéⁿ yā nduudu cuaacu miiⁿ ní vɛ́ɛ́ nuuⁿndi yeⁿꞌé yā ꞌāā cūneé yā na castigo caati ꞌtíícā cuuvi. 3 Ní maaⁿ ní ¿táácā cuuví nanguaⁿꞌāī sꞌuuúⁿ yeⁿꞌe castigo nduuti chi nguɛ́ɛ́ diiⁿ yú cuidado yeⁿꞌē chi nadanguáⁿꞌai yā sꞌuuúⁿ? Vmnááⁿ vmnaaⁿ Señor Jesucristo ngaⁿꞌá yā chi nadanguáⁿꞌai yā ꞌiiⁿꞌyāⁿ. Cuayiivi miiⁿ ní ꞌiiⁿꞌyāⁿ chi chꞌiindiveéⁿ yā nduudu miiⁿ diíⁿ yā chꞌiⁿꞌí yā sꞌuuúⁿ ndúúcū pruebas chi nduudu miiⁿ ní nduudu cuaacu. 4 ꞌTiicá ntúūⁿ tiempo maaⁿ Ndyuūs chꞌiⁿꞌí yā sꞌuuúⁿ chi cuaacu chi nduudu miiⁿ ní cuaacu caati diíⁿ yā señas ndúúcū vaadī nꞌgiinu chi chꞌɛɛtɛ. Ní chꞌiⁿꞌí yā poder yeⁿꞌé yā ní diíⁿ yā milagros. Ní caꞌa yā nꞌdeee nꞌdáí ntiiⁿnyuⁿ yeⁿꞌé Espíritu Nꞌdai yeⁿꞌé yā ꞌiiⁿꞌyāⁿ chi yeⁿꞌe yā caati ꞌtíícā neⁿꞌé yā diiⁿ yā.Jesucristo chꞌiindiyáaⁿ yā tanꞌdúúcā ꞌáámá saⁿꞌā yeⁿꞌe íⁿꞌyeeⁿdī
5 Ndyuūs nguɛ́ɛ́ cuuvi sꞌneéⁿ yā chi ángeles miiⁿ ngaⁿꞌá yā ntiiⁿnyuⁿ yeⁿꞌe íⁿꞌyeeⁿdī chi cuayiivi caⁿꞌá yā dinꞌdái yā. Ní yeⁿꞌe iⁿꞌyeeⁿdi miiⁿ chííⁿ chi ngaⁿꞌa yú. 6 Nguɛ́ɛ́ diíⁿ yā ꞌtíícā. Ná libro yeⁿꞌe Ndyuūs chi canéé nguūⁿ ní ꞌáámá yā ngaⁿꞌa yā ꞌtíícā:
Nꞌdii, Ndyuūs, ¿dɛ́ꞌɛ̄ chi saⁿꞌā sꞌeeⁿ chi snéē na iⁿꞌyeeⁿdí ꞌcūū chi nanꞌgaacu nī yeⁿꞌē sa? ¿Dɛ́ꞌɛ̄ chi saⁿꞌā sꞌeeⁿ chi snéē na iⁿꞌyeeⁿdí ꞌcūū chi diíⁿ nī cuidado yeⁿꞌe saⁿꞌā sꞌeeⁿ?
7 Ta ꞌlííⁿ tiempo nūuⁿ nꞌdii, Ndyuūs, sꞌnééⁿ nī saⁿꞌā Daiyá nī chi nguɛ́ɛ́ chꞌɛɛtɛ cá yā tanꞌdúúca ángeles. Ní teé nī saⁿꞌā daiyá nī chi chꞌɛɛtɛ́ yā ndúúcū honra yeⁿꞌé yā tanꞌdúúcā chi saⁿꞌā rey ꞌtííca yā. Ní chiꞌnéeⁿ nī saⁿꞌa miiⁿ chi caaⁿꞌmaⁿ ntiiⁿnyuⁿ yā yeⁿꞌe tanducuéⁿꞌē chi nadinꞌdái nī.
8 Ní sꞌnéeⁿ nī tanducuéⁿꞌē denduꞌū maaⁿ taꞌá yā.
Ní ꞌtííca rā va ti Ndyuūs sꞌnéeⁿ yā tanducuéⁿꞌē denduꞌū chi saⁿꞌā miiⁿ caaⁿꞌmáⁿ yā ntiiⁿnyuⁿ yeⁿꞌē. Maaⁿ ní nguɛ́ɛ́ inaaⁿ yú chi saⁿꞌā miiⁿ ngaⁿꞌa ntiiⁿnyúⁿ yā yeⁿꞌe tanducuéⁿꞌē. 9 Naati maaⁿ ní snaaⁿ yú chi Ndyuūs diíⁿ yā chi Jesucristo nguɛ́ɛ́ chꞌɛɛtɛ́ yā tanꞌdúúcā ángeles dúúꞌví tiempo nūuⁿ. Ní Ndyuūs neene yaꞌai ꞌiinú yā ꞌiiⁿꞌyāⁿ yeⁿꞌe iⁿꞌyeeⁿdí ꞌcūū chi neⁿꞌé yā chi Jesucristo chꞌīi yā lugar yeⁿꞌe nducyaaca yú. Maaⁿ ní vɛ́ɛ́ dɛɛvɛ́ yeⁿꞌe Jesucristo ní vɛ́ɛ́ honra yeⁿꞌé yā cucáávā chí chꞌīi yā na cruz.
10 Ní Ndyuūs dinꞌdái yā tanducuéⁿꞌē denduꞌū ní diíⁿ yā cuidado yeⁿꞌē. Ní nꞌdaacā diiⁿ Ndyuūs taachi diiⁿ chi Jesucristo miiⁿ ní saⁿꞌā perfecto yā chí chichɛ́ɛ́ yā yeⁿꞌe nducuéⁿꞌē chi nꞌgeenu yā ngii. Ní Ndyuūs nꞌdiichí yā chi nꞌdaācā idiíⁿ yā. ꞌTíícā diiⁿ Ndyuūs caati cuuvi yeⁿꞌé yā nꞌdeee nꞌdáí daiyá yā. Ní cuuvi caꞌa yā ꞌiiⁿꞌyāⁿ sꞌeeⁿ parte chi cuuvi yeⁿꞌé yā ndúúcū vaadī dɛɛvɛ nꞌdai yeⁿꞌé yā. Jesucristo ní saⁿꞌā chi nadanguáⁿꞌai yā ꞌiiⁿꞌyāⁿ yeⁿꞌe iⁿꞌyeeⁿdí ꞌcūū. 11 Ní Jesucristo ní didɛɛvɛ́ yā ꞌiiⁿꞌyāⁿ yeⁿꞌe nuuⁿndi yeⁿꞌé yā ní ꞌiiⁿꞌyāⁿ chí ndúúví dɛɛvɛ́ yā ní tanꞌdúúcā Jesucristo miiⁿ. Vɛ́ɛ́ ꞌáámá nūuⁿ chiida nducyaaca ꞌiiⁿꞌyā. Cáávā chuū Jesucristo nguɛ́ɛ́ ꞌcuinaáⁿ yā chi caaⁿꞌmáⁿ yā chi ꞌiiⁿꞌyāⁿ sꞌeeⁿ ní víꞌi yā. 12 Ní ꞌtíícā Jesucristo ngaⁿꞌá yā ngii yā ꞌiiⁿꞌyāⁿ sꞌeeⁿ ní canéé nguūⁿ:
Nꞌdiī Ndyuūs, ꞌúú caaⁿꞌmáⁿ yeⁿꞌé nꞌdiī nanááⁿ hermanos yeⁿꞌé ní caātá himnos chi cantos chi ngaⁿꞌā chi chꞌɛɛtɛ́ nī nanááⁿ ꞌiiⁿꞌyāⁿ yeⁿꞌé nī taachi nduuvidaamá yā. 13 Taama vmnéⁿꞌēe Jesucristo caⁿꞌa yā ꞌtiicā:
ꞌÚú ní canéé confianza yeⁿꞌé ndúúcū Ndyuūs.
Ní táámá caⁿꞌa yā:
ꞌMuuⁿ caneé ndúúcū daiyá chi Ndyuūs tee yā ꞌúú.
14 ꞌTíícā, ꞌiiⁿꞌyāⁿ yeⁿꞌe ꞌáámá familia ní ꞌáámá yuūtɛ̄ yeⁿꞌé yā ní ꞌáámá yuūuⁿ ntúūⁿ va. Ní ꞌtiicá ntúūⁿ Jesucristo miiⁿ chꞌiindiyáaⁿ yā ndúúcū cuerpo ndúúcū yuūúⁿ tanꞌdúúcā sꞌuuúⁿ. Ní ꞌtiicá ntúūⁿ Jesucristo chꞌīi yā caati cuuvi diꞌcuiinú yā yááⁿnꞌguiinūuⁿ caavā chi diiⁿ sa chi nducyaaca yú ní nꞌgii yú. 15 ꞌTiicá ntúūⁿ Jesucristo diíⁿ yā chi nguɛ́ɛ́ ꞌvaꞌa yú yeⁿꞌe tiempo chí ꞌcuūvi yú. 16 Cuaacu chi Jesucristo nguɛ́ɛ́ ndaá yā nanááⁿ ángeles chi chinnee yā ángeles naati nanááⁿ ꞌiiⁿꞌyāⁿ yeⁿꞌe ndaata yeⁿꞌe Abraham cáávā chi nadanguáⁿꞌai yā ꞌiiⁿꞌyāⁿ. 17 Cáávā chuū Jesucristo canéé chi chꞌiindiyáaⁿ yā tanꞌdúúcā nducyaaca hermanos yeⁿꞌé yā ní ꞌíícú maáⁿ yā cuuvi cūneé yā chiiduú chꞌɛɛtɛ ca chi ꞌáámá cānee yeⁿꞌe ntiiⁿnyuⁿ yeⁿꞌe Ndyuūs. Ní yaꞌai ꞌiinú yā ꞌiiⁿꞌyāⁿ. Ní ꞌíícú cuuví nadachꞌɛɛ̄cú yā nuuⁿndi yeⁿꞌe ꞌiiⁿꞌyāⁿ ti nadííꞌvɛ yā nducuéⁿꞌē nuuⁿndi yeⁿꞌe ꞌiiⁿꞌyāⁿ. 18 Ní Jesucristo maáⁿ yā chꞌeenú yā chiī ní chichɛɛ yā taachi ndaá yááⁿnꞌguiinūuⁿ chí nꞌdiichineeⁿ sa ꞌyā. Ní cáávā chuū maaⁿ ní Jesucristo cuuvi cūnnee yā ꞌiiⁿꞌyāⁿ sꞌeeⁿ taachi nꞌgeenú yā ngii ní nadanguáⁿꞌai yā ꞌiiⁿꞌyāⁿ sꞌeeⁿ yeⁿꞌe yááⁿnꞌguiinūuⁿ taachi ndaa sa nꞌdiichineeⁿ sa ꞌiiⁿꞌyāⁿ sꞌeeⁿ.