Jesucristo ní chꞌɛɛtɛ taavi cá yā nguɛ́ɛ́ ti Moisés
3
Ndísꞌtiī, hermanos yeⁿꞌē yú chi Cristo didɛɛvɛ́ yā ní ndísꞌtiī ntúūⁿ Ndyuūs yaaꞌví yā ndísꞌtiī chi cuuvi yeⁿꞌé yā. Maaⁿ ní nadicádíínuuⁿ nꞌdai nī yeⁿꞌe Jesucristo chi apóstol chi dichóꞌo Ndyuūs ti Jesucristo miiⁿ ní chiiduú chꞌɛɛtɛ cá yeⁿꞌé ꞌiiⁿꞌyāⁿ chi iꞌtéénu yā Jesucristo tanꞌdúúcā sꞌuuúⁿ. 2 Jesucristo miiⁿ ꞌáámá caneé yā ndúúcū Ndyuūs ní diíⁿ yā tanducuéⁿꞌē denduꞌū. Ní diíⁿ yā tanducuéⁿꞌē denduꞌū chi Ndyuūs dineⁿꞌé yā. Ní tanꞌdúúcā Moisés dinꞌdaacá yā ntiiⁿnyuⁿ chi Ndyuūs caꞌa yā, ꞌtiicá ntúūⁿ Jesucristo dinꞌdaacá yā tanducuéⁿꞌē ntiiⁿnyuⁿ yeⁿꞌē vaꞌai yeⁿꞌé Ndyuūs chi Ndyuūs caꞌa yā. 3 Ní ꞌáámá ꞌiiⁿꞌyāⁿ chi dinꞌdái yā ꞌaama vaꞌāī ní chꞌɛɛtɛ cá yā nguɛ́ɛ́ ti vaꞌāī miiⁿ. ꞌTíícā Jesucristo ní chꞌɛɛtɛ taavi cá yā nguɛ́ɛ́ ti Moisés. 4 Deenu yú chi vɛ́ɛ́ ꞌiiⁿꞌyāⁿ chi dinꞌdái yā caꞌáámá cāꞌaama vaꞌāī naati Ndyuūs dinꞌdái yā nducuéⁿꞌē denduꞌū chi vɛ́ɛ́. 5 Moisés miiⁿ dichííꞌvɛ yā Ndyuūs ní nꞌdááca taavi idiiⁿ sa ntiiⁿnyuⁿ yeⁿꞌē vaacu Ndyuūs. Ní Moisés diíⁿ yā ntiiⁿnyuⁿ chi ngaⁿꞌa yā nduudu yeⁿꞌé Ndyuūs chi Ndyuūs caⁿꞌa yā chi caaⁿꞌmáⁿ yā cuayiivi. 6 Naati Cristo chi daiyá Dendyuūs ni ꞌáámá diiⁿ yā ntiiⁿnyuⁿ ti ꞌiiⁿꞌyāⁿ ndii tiíⁿ yā yeⁿꞌe vaacu Dendyuūs. Ní sꞌuuúⁿ tanꞌdúúcā vaacu Ndyuūs ꞌtíícā sꞌuuúⁿ nduuti chi canéé diitu yú ndúúcū chi iꞌteenu yú. Ní yeenu yú ndúúcū chi cuuvi yeⁿꞌe yú ndíí tiempo chi ꞌcuūvi yú.Vɛ́ɛ́ tiempo chi ntaaviꞌtuunúūⁿ ꞌiiⁿꞌyāⁿ chi yeⁿꞌé Ndyuūs
7 Ní chuū Espíritu Nꞌdai yeⁿꞌé Ndyuūs ngaⁿꞌa yā ꞌtúúcā naachi canéé nguūⁿ na libro yeⁿꞌé Ndyuūs:
Maaⁿnguuvi miiⁿ nduuti chi ndísꞌtiī ꞌcaandiveéⁿ nī nduudu yeⁿꞌé Ndyuūs:
8 Nguɛ́ɛ́ dichɛɛchí nī staava yeⁿꞌé nī chí ditaáⁿ nī tanꞌdúúcā chi diíⁿ ꞌiiⁿꞌyāⁿ tiempo chi ꞌāā chóꞌōo taachi ꞌiiⁿꞌyāⁿ sꞌeeⁿ diíⁿ yā nꞌdiichineéⁿ yā Ndyuūs ndúúcū nuuⁿndi chi diíⁿ yā na yáⁿꞌāa cuuⁿmáⁿ naachi nguɛ́ɛ́ chꞌɛɛtinéé ꞌiiⁿꞌyāⁿ. 9 Ní Ndyuūs ngaⁿꞌá yā ngīi yā ꞌiiⁿꞌyāⁿ:
Tiempo chi chóꞌōo na yáⁿꞌāa cuuⁿmáⁿ naachi nguɛ́ɛ́ chꞌɛɛtinéé ꞌiiⁿꞌyāⁿ, ꞌiiⁿꞌyāⁿ sꞌeeⁿ yeⁿꞌē ndaata yeⁿꞌé nī nꞌdiichinééⁿ ntúuⁿ yā ꞌúú ꞌáárá chí nꞌdiichí yā nducuéⁿꞌē chi ꞌúú diíⁿ ndúúcu yā ꞌnaaⁿ chí ꞌuūvī ngɛɛcu nduuyū.
10 Ní cáávā chuū ꞌúú, Ndyuūs, ditaáⁿ ndúúcū ꞌiiⁿꞌyāⁿ sꞌeeⁿ. Ní ꞌtúúcā ngaⁿꞌá ngīi ꞌiiⁿꞌyāⁿ sꞌeeⁿ: Ndisꞌtiī, nducuéⁿꞌē tiempo nguɛ́ɛ́ nꞌdaacā nadacadíínuuⁿ nī na staava yeⁿꞌé nī. Ní nguɛ́ɛ́ nꞌdiichí nī yúúní yeⁿꞌé.
11 Ní cáávā chi diiⁿ ꞌiiⁿꞌyāⁿ sꞌeeⁿ ꞌúú ní nguɛ́ɛ́ canee yiinú yeⁿꞌe yā ní caⁿꞌa ꞌtúúcā: Cuáácú chí ꞌiiⁿꞌyāⁿ sꞌeeⁿ nguɛ́ɛ́ cuuví ndaa yā naachi canéé chí ntaaviꞌtuunúūⁿ ꞌiiⁿꞌyāⁿ yeⁿꞌe ndaata yeⁿꞌé nī.
12 Maaⁿ ní ndísꞌtiī, hermanos yeⁿꞌé, cundɛ́ɛ nī cuidado chi nguɛ́ɛ́ ꞌáámá ndísꞌtiī chi nguɛ́ɛ́ nꞌdaacā staava yeⁿꞌé nī chi nguɛ́ɛ́ iꞌtéénu nī ní nguɛ́ɛ́ divíi nī yeⁿꞌé Ndyuūs chi canduuchi. 13 Ní ndísꞌtiī ní yaaꞌví nī víꞌi nī ꞌáámá nī taama nī nguuvi nguuvi taachi maaⁿnguuvi ní ꞌíícú mar ꞌáámá ndísꞌtiī nguɛ́ɛ́ dichɛɛchí nī staava yeⁿꞌé nī cáávā nuuⁿndi chi nginncheꞌēī ndísꞌtiī. 14 Ní vɛ́ɛ́ ꞌáámá cuaaⁿ yeⁿꞌē yú ndúúcū Cristo nduuti chi sꞌuuúⁿ ní ꞌáámá canee yú ndúúcū chi iꞌtéénu yú vmnááⁿ vmnaaⁿ yeⁿꞌe Cristo ndíí tiempo chi ꞌcuūvi yú.
15 ꞌTíícā canéé nguuⁿ na libro yeⁿꞌé Ndyuūs:
Nguɛ́ɛ́ dichɛɛchí nī staava yeⁿꞌé nī chi ditaáⁿ nī tanꞌdúúcā chi diiⁿ ꞌiiⁿꞌyāⁿ na yáⁿꞌāa cuūⁿmáⁿ naachi nguɛ́ɛ́ chꞌɛɛtinéé ꞌiiⁿꞌyāⁿ tiempo chi chóꞌōo taachi nꞌdiichineeⁿ yā ꞌúú chi Ndyuūs. 16 ¿Duꞌú ꞌiiⁿꞌyāⁿ chi chꞌiindiveéⁿ yā nduudu yeⁿꞌé Ndyuūs ní cuayiivi nduuvitaáⁿ yā? ꞌTúúcā diiⁿ nducyaaca ꞌiiⁿꞌyāⁿ chi cueⁿꞌé yā ndúúcū Moisés yeⁿꞌe yáⁿꞌāa Egipto. Nducyaacá yā nduuvitaáⁿ yā. 17 ¿Duꞌú ꞌiiⁿꞌyāⁿ chi Ndyuūs nguɛ́ɛ́ yiinú yā nduucú yā ꞌuūvī ngɛɛcu nduuyu? ꞌTúúcā nguɛɛ yiinú yā ndúúcū ꞌiiⁿꞌyāⁿ chi dinuuⁿndí yā ní chꞌīi yā na yáⁿꞌāa cuūⁿmáⁿ naachi nguɛ́ɛ́ chꞌɛɛtinéé ꞌiiⁿꞌyāⁿ. 18 ¿Duꞌú ꞌiiⁿꞌyāⁿ chi Ndyuūs ngaⁿꞌá yā caavā maaⁿ chi duuchí yā chi ꞌiiⁿꞌyāⁿ sꞌeeⁿ nguɛ́ɛ́ cuuví cundaa yā lugar naachi ntaaviꞌtuunúuⁿ ꞌiiⁿꞌyāⁿ yeⁿꞌe yā? ꞌTúúcā ngaⁿꞌá yā yeⁿꞌe ꞌiiⁿꞌyāⁿ chi nguɛ́ɛ́ nꞌgiindiveéⁿ yā nduudu yeⁿꞌe yā. 19 Maaⁿ ní deenu yú ti ꞌiiⁿꞌyāⁿ sꞌeeⁿ nguɛ́ɛ́ cuuvi cundaa yā lugar yeⁿꞌe Ndyuūs ti nguɛ́ɛ́ iꞌtéénu yā Ndyuūs.