4
Maaⁿ ní Ndyuūs tee yā promesa sꞌuuúⁿ chi cuuvi cundaa yú lugar yeⁿꞌé yā ní cuuvi ntaaviꞌtuunúūⁿ yú ndúúcu Ndyuūs. Canéé chí candɛɛ yú cuidado caati ꞌaatīī ꞌaama chɛ́ɛ́ ndisꞌtiī nguɛ́ɛ́ cuchɛɛ́ nī tanducuéⁿꞌē denduꞌū ní nguɛ́ɛ́ cuuvi cundaa nī lugar miiⁿ. 2 Caati ꞌiiⁿꞌyāⁿ yeⁿꞌé Jesucristo ndɛɛ́ yā nduudu cuaacu yeⁿꞌé Jesucristo nanááⁿ sꞌuuúⁿ, ꞌtiicá ntúūⁿ nanááⁿ ꞌiiⁿꞌyāⁿ sꞌeeⁿ chi chꞌīi yā na yáⁿꞌāa cuuⁿmáⁿ naachi nguɛ́ɛ́ chꞌɛɛtinéé ꞌiiⁿꞌyāⁿ. Ní nguɛ́ɛ́ dichííꞌvɛ̄ nduudu cuaacu yeⁿꞌé Ndyuūs nguaaⁿ ꞌiiⁿꞌyāⁿ sꞌeeⁿ ti taachi chꞌiindiveéⁿ yā nduudu miiⁿ nguɛ́ɛ́ sꞌtéénu yā yeⁿꞌē. 3 Naati sꞌuuúⁿ chi iꞌteenu yú nduudu miiⁿ, sꞌuuúⁿ ní cuuvi ndaa yú naachi caⁿꞌa Ndyuūs chi ntaaviꞌtuunúūⁿ yú ndúúcu yā. ꞌTíícā ngaⁿꞌa Ndyuūs na libro yeⁿꞌé yā naachi canéé nguūⁿ:Cáávā chi diíⁿ ꞌiiⁿꞌyāⁿ sꞌeeⁿ ꞌúú nguɛ́ɛ́ yiinú yeⁿꞌe yā. Ní cuaacú ngaⁿꞌá nduudu ndúúcū maāáⁿ chi duuchí. Nguɛ́ɛ́ cuuvi ndaa yā nduucú na lugar yeⁿꞌé naachi ntaaviꞌtuunuúⁿ.
Ní Ndyuūs diꞌcuiinú yā ntiiⁿnyuⁿ yeⁿꞌé yā taachi dinꞌdái yā iⁿꞌyeeⁿdí ꞌcūū. 4 Ní ꞌáámá cuaaⁿ yeⁿꞌē libro yeⁿꞌé Ndyuūs naachi canéé nguūⁿ ní ngaⁿꞌa yeⁿꞌē ndíí chí ndɛɛ̄chɛ̄ nguuvi chi ntaaviꞌtuunúūⁿ ꞌiiⁿꞌyāⁿ:
Ndyuūs ní ndíí chí ndɛɛ̄chɛ̄ nguuvi ntaaviꞌtuunúuⁿ yā yeⁿꞌē tanducuéⁿꞌē ntiiⁿnyuⁿ yeⁿꞌé yā. 5 Ní canee táámá vmneⁿꞌēe na libro yeⁿꞌe Ndyuūs ꞌtíícā:
ꞌIiⁿꞌyāⁿ sꞌeeⁿ nguɛ́ɛ́ cuuvi cūndaa yā ní ntaaviꞌtuunúuⁿ yā nduucú. 6 Maaⁿ ní vɛ́ɛ́ nꞌduuvi ꞌiiⁿꞌyāⁿ chi canéé chi cundaa yā na lugar naachi ntaaviꞌtuunúuⁿ ꞌiiⁿꞌyāⁿ. Naati ꞌiiⁿꞌyāⁿ chi vmnááⁿ vmnaaⁿ nꞌgiindiveéⁿ yā nduudu cuaacu miiⁿ nguɛ́ɛ́ sndaa yā ti nguɛ́ɛ́ sꞌtéénu yā Ndyuūs. 7 Taama vmnéⁿꞌēe Ndyuūs sꞌneéⁿ yā ꞌáámá nguuvi ní ngaⁿꞌa yā chi nguuvi ní maaⁿnguuvi. Ní Ndyuūs ngaⁿꞌa yā yeⁿꞌē nduudu miiⁿ cuayiivi taachí ꞌāā chóꞌōo chuū. ꞌĀā ꞌnaaⁿ tiempo nguuvi chi David ngaⁿꞌa sa yeⁿꞌē. Ní ꞌtíícā canéé nguūⁿ na libro yeⁿꞌé Ndyuūs yeⁿꞌē nguuvi miiⁿ:
Maaⁿnguuvi nduuti chi ndísꞌtiī ꞌcaandiveéⁿ nī nduudu chi Ndyuūs ngaⁿꞌá yā: Nguɛ́ɛ́ dichɛɛchí nī staava yeⁿꞌé nī. 8 Ní nduuti chi saⁿꞌā Josué chi saⁿꞌā ndíí tiīiⁿ yeⁿꞌe ꞌiiⁿꞌyāⁿ Israel sꞌeeⁿ cuuvi sa caꞌa sa ꞌiiⁿꞌyāⁿ Israel sꞌeeⁿ chí ntaaviꞌtuunúuⁿ yā tuuꞌmi ní Ndyuūs nguɛ́ɛ́ canee chi caaⁿꞌmáⁿ yā taama vmnéⁿꞌēe yeⁿꞌē táámá nguuvi. 9 Maaⁿ ní cáávā chuū vɛ́ɛ́ chi ntaaviꞌtuunúuⁿ ꞌiiⁿꞌyāⁿ chi yeⁿꞌé Ndyuūs. 10 Ní ꞌiiⁿꞌyāⁿ chi sndaá yā naachi Ndyuūs ntaaviꞌtuunúuⁿ yā ꞌāā ntɛ́ɛ́ idiíⁿ yā ntiiⁿnyuⁿ tanꞌdúúcā chi Ndyuūs ꞌāā ntɛ́ɛ́ idiíⁿ yā ntiiⁿnyuⁿ. 11 Maaⁿ ní canéé chí diꞌcuíítu yú chi cuuvi cūndaā yú lugar naachi ntaaviꞌtuunúūⁿ yú ní ꞌaatīī tanáⁿꞌā yú diiⁿ yú chi nguɛ́ɛ́ iꞌtéénu yú tanꞌdúúcā ꞌiiⁿꞌyāⁿ sꞌeeⁿ chi nguɛ́ɛ́ chiꞌtéénu yā.
12 Ní nduudu cuaacu yeⁿꞌé Ndyuūs ní canduuchi ní neené ditiīnú. Ní vɛɛ ca ꞌcaāiⁿ yeⁿꞌē nguɛ́ɛ́ ti ꞌáámá machete chi ꞌcaāiⁿ nduu ꞌuuvī lados. ꞌTíícā nduudu cuaacu yeⁿꞌé Ndyuūs. Ndaā na coo yeⁿꞌe cuerpo yeⁿꞌe yú naachi canee alma yeⁿꞌe yú ndúúcū espíritu yeⁿꞌe yú ndíí túútɛ̄ yeⁿꞌe yú. Ní déénu chɛɛ chi tumicadíínuuⁿ yú ndúúcū chɛɛ chi neⁿꞌe yú diiⁿ yú chi ngiīcā yeⁿꞌe staava yeⁿꞌe yú. 13 Nguɛ́ɛ́ dɛꞌɛ̄ vɛɛ chi vɛ́ɛ́ chi cuuvi cunúúⁿ nꞌdeꞌei yeⁿꞌé Ndyuūs. Ndyuūs dinꞌdái yā tanducuéⁿꞌē denduꞌū chi vɛ́ɛ́ ní inaáⁿ yā nducuéⁿꞌē tanꞌdúúcā chi canee nanáaⁿ yā. Ní canéé chí caꞌa yú cuenta yeⁿꞌe vida yeⁿꞌe yú taachi ndaa yú nanáaⁿ yā.
Jesús ni chiiduú chꞌɛɛtɛ taavi ca yeⁿꞌe yú
14 Jesús chi daiyá Dendyuūs ní chiiduú chꞌɛɛtɛ taavi ca yeⁿꞌe yú. Ní cunaⁿꞌa yā vaꞌai chɛɛti nguuvi ní ndaá yā nanááⁿ Ndyuūs. Ní cáávā chuū canee chi ꞌáámá canee yú ndúúcū chi iꞌteenu yú Ndyuūs. 15 Ní chiiduú chꞌɛɛtɛ taavi ca yeⁿꞌe yú yaꞌai ꞌiinú yā sꞌuuúⁿ taachi nꞌgeenu yú ngii caati Jesús miiⁿ ní chꞌeenú yā chii tanducuéⁿꞌē tanꞌdúúcā sꞌuuúⁿ naati nguɛ́ɛ́ dinuuⁿndí yā mar ꞌáámá vmnéⁿꞌēe. 16 Ní cáávā chuū cuuvi ndaa yú nanááⁿ trono yeⁿꞌé Ndyuūs yeⁿꞌe yú ndúúcū confianza ti dineⁿꞌé yā sꞌuuúⁿ. Ní ꞌíícú Ndyuūs cuuvi yaꞌai ꞌiinú yā yeⁿꞌe sꞌuuúⁿ ní cunnee yā sꞌuuúⁿ taachi, vɛ́ɛ́ necesidades yeⁿꞌe yú. Ní itée yā sꞌuuúⁿ denduⁿꞌū chi nꞌdaacā nꞌdai yeⁿꞌé yā.