5
Tiempo chi chóꞌōo ꞌiiⁿꞌyāⁿ chi snée yā iⁿꞌyeeⁿdí ꞌcūū ndɛɛvɛ́ yā caꞌáámá cāꞌaama chiiduú chꞌɛɛtɛ chi canéé chi diíⁿ yā ntiiⁿnyuⁿ yeⁿꞌé Ndyuūs cucáávā ꞌiiⁿꞌyāⁿ sꞌeeⁿ. Ní caꞌá yā ofrendas ní ꞌcaaⁿꞌnúⁿ yā ꞌiiti chi candɛɛ ꞌiiⁿꞌyāⁿ sꞌeeⁿ ti ofrenda caavā nuuⁿndi yeⁿꞌé yā. 2 Ní chiiduú chꞌɛɛtɛ ca ní dinuuⁿndí yā tanꞌdúúcā nducyáácá ꞌiiⁿꞌyāⁿ. Ní cáávā chuū vɛ́ɛ́ paciencia yeⁿꞌé yā ndúúcū ꞌiiⁿꞌyāⁿ chi tonto ní ndúúcū ꞌiiⁿꞌyāⁿ chi dinuuⁿndí yā. 3 Ní chiiduú chꞌɛɛtɛ ca cáávā chi dinuuⁿndi yā canéé chí ꞌcaaⁿꞌnúⁿ yā ꞌiiti chi ofrenda yeⁿꞌe maáⁿ yā cáávā nuuⁿndi yeⁿꞌe maáⁿ yā tanꞌdúúcā chi diíⁿ tanáⁿꞌā ꞌiiⁿꞌyāⁿ cáávā nuuⁿndi yeⁿꞌé yā.4 Ní mar ꞌáámá saⁿꞌā cuuví diiⁿ sa nombrar maaⁿ sa lado yeⁿꞌē chiiduú chꞌɛɛtɛ ca cáávā chi maāⁿ sa neⁿꞌe sa ti Ndyuūs yaaꞌví yā saⁿꞌā chi cuuvi chiiduú chꞌɛɛtɛ ca chi diiⁿ sa ntiiⁿnyuⁿ yeⁿꞌé yā tanꞌdúúcā chi yaaꞌví yā saⁿꞌā Aarón chi cuuvi chiiduú chꞌɛɛtɛ ca tiempo chi ꞌāā chóꞌōo. 5 ꞌTiicá ntúūⁿ chóꞌōo yeⁿꞌe Cristo. Cristo miiⁿ nguɛ́ɛ́ diíⁿ yā nombrar maáⁿ yā chi cuuvi chiiduú chꞌɛɛtɛ ca. Ndyuūs yaaꞌví yā Cristo chi cuuvi chiiduú chꞌɛɛtɛ ca. Ní ꞌtíícā canéé nguūⁿ na libro yeⁿꞌé Ndyuūs:
Dii ní daiyá, ꞌúú ní chiida di ní cuaacu chí dii ní daiyá. 6 Ngaⁿꞌa ntúūⁿ táámá ni canéé nguūⁿ na libro yeⁿꞌé Ndyuūs ꞌtíícā:
Díí ní daiyá ní cuéⁿꞌé daāⁿmaⁿ canee di chiiduú chꞌɛɛtɛ ca. Tanꞌdúúcā chi tiempo chi ꞌāā chóꞌōo chiiduú chꞌɛɛtɛ ca chi nguuvi Melquisedec ꞌtiicá nī ti yeⁿꞌē ndaata yeⁿꞌé yā. 7 Ní taachi Jesús canee yā iⁿꞌyeeⁿdí ꞌcūū caⁿꞌanguaꞌá yā nanááⁿ Ndyuūs chiidá yā ní ngaⁿꞌa yā: Nꞌdií Ndyuūs diíⁿ nī chiiⁿ chi neⁿꞌé nī. Ní ꞌcaī diitú yā neⁿꞌe chi chɛɛ̄cú yā: Nꞌdiī, Ndyuūs, cuuvi nadanguáⁿꞌai nī ꞌúú chi nguɛ́ɛ́ ꞌcuūví nduuti chi neⁿꞌé nī diíⁿ nī ꞌtíícā. Ní Ndyuūs chꞌiindiveéⁿ yā nduudu yeⁿꞌe Jesús taachi ngaⁿꞌanguaꞌá yā ti dichꞌɛɛtɛ́ yā Ndyuūs. Ní Ndyuūs caꞌá yā fuerzas Jesús. 8 Ní ꞌáárá chí Jesús miiⁿ ní daiyá Dendyuūs chꞌeeⁿ yā cáávā dendúꞌū chi canéé chí chꞌeenú yā chiī ní chꞌiindiveéⁿ yā yeⁿꞌe nducuéⁿꞌē. 9 Ní taachi Ndyuūs nꞌdiichineéⁿ yā Jesús, Jesús miiⁿ ní diíⁿ yā nducuéⁿꞌē chi neⁿꞌe Ndyuūs. Ní ꞌíícú Jesús miiⁿ cuuví yā nadanguáⁿꞌai yā nducyaaca sꞌuuúⁿ chi nꞌgiindiveeⁿ yú yeⁿꞌe yā. 10 Ní Ndyuūs diíⁿ yā chi Jesús cuuvi chiiduú chꞌɛɛtɛ ca tanꞌdúúcā tiempo chi chóꞌōo chiiduú chꞌɛɛtɛ ca chi nguuvi Melquisedec, ꞌtiicá yā.
Vɛ́ɛ́ peligro yeⁿꞌe yú chi ngaⁿꞌa yú chi ꞌāā ntɛ́ɛ́ iꞌteenu yú Jesucristo
11 Maaⁿ ní vɛ́ɛ́ cá chi neⁿꞌé ꞌnū caaⁿꞌmáⁿ ꞌnū yeⁿꞌe Melquisedec chi chiiduú chꞌɛɛtɛ ca naati ngii nꞌdáí caaⁿꞌmáⁿ ꞌnū yeⁿꞌē ti ndísꞌtiī ní nguɛ́ɛ́ ituumicadiinuuⁿ nī. 12 ꞌĀā chóꞌōo tiempo chi ndísꞌtiī ꞌāā sꞌtéénu nī ní maaⁿ ní ndísꞌtiī canéé chí caꞌcueéⁿ nī ꞌiiⁿꞌyāⁿ naati ndíí maaⁿ ꞌāā neⁿꞌé nī taama vmnéⁿꞌēe chi ꞌáámá ꞌiiⁿꞌyāⁿ caꞌcueéⁿ yā ndísꞌtiī denduꞌū chi vmnááⁿ vmnaaⁿ yeⁿꞌé Ndyuūs. Ní ndísꞌtiī ní ꞌāā débil nī. Ní tanꞌdúúcā dacuáꞌāa chi neⁿꞌe leche ní nguɛ́ɛ́ neⁿꞌe comida chi ditiīnú, ꞌtiicá nī. 13 Ní ꞌiiⁿꞌyāⁿ chi dámaāⁿ ngiꞌi leche ní tanꞌdúúcā dacuáꞌāa ꞌtiicá yā. Ní nguɛ́ɛ́ deenú yā dɛꞌɛ̄ chi nꞌdaacā o dɛꞌɛ̄ chi nguɛ́ɛ́ nꞌdaacā. 14 Ní comida chí ditiīnu ní cheꞌé ꞌiiⁿꞌyāⁿ nꞌgɛɛ̄tɛ́ chi ꞌāā deenú yā inꞌnuú yā chɛ́ɛ́ chí nꞌdaacā o chɛ́ɛ́ chi nguɛ́ɛ́ nꞌdaacā caati ꞌtíícā costumbre yeⁿꞌé yā chi diíⁿ yā.