4 Ní ¿dɛꞌɛ̄ yeⁿꞌe ꞌiiⁿꞌyāⁿ chi ꞌāā staꞌá yā dɛɛvɛ chi Cristo, ní staꞌá yā cosas chi nꞌdai taavi chi Cristo caꞌa yā, ní ꞌāā staꞌá yā Espíritu Nꞌdai yeⁿꞌe Cristo, 5 ní deēnú yā nduudu cuaacu chí nꞌdai chí yeⁿꞌé Ndyuūs ndúúcū poder chi yeⁿꞌe táámá iⁿꞌyeeⁿdi chi cuchiī? 6 Ní nduuti chi ꞌiiⁿꞌyāⁿ sꞌeeⁿ ndaacadaamí yā yeⁿꞌe Cristo ní dinuuⁿndí yā, nguɛ́ɛ́ cuuvi diíⁿ yā ndaa yā nanááⁿ Cristo chi nadachꞌɛɛcú yā nuuⁿndi yeⁿꞌé yā, tí ꞌiiⁿꞌyāⁿ sꞌeeⁿ diíⁿ yā tanꞌdúúcā chi sꞌnééⁿngaꞌá yā daiyá Ndyuūs miiⁿ taama vmnéⁿꞌēe. Ní diíⁿ yā chi Cristo miiⁿ ꞌcuináaⁿ yā nguaaⁿ ꞌyááⁿ nꞌdáí ꞌiiⁿꞌyāⁿ. 7 Ndyuūs diíⁿ yā ndúúcū ꞌiiⁿꞌyāⁿ sꞌeeⁿ tanꞌdúúcā chi diíⁿ yā ndúúcū yáⁿꞌāa taachi nꞌdeee cuuví ngeeⁿ cuūvi vmnááⁿ yáⁿꞌāa ni yáⁿꞌāa staꞌā nuūⁿnīⁿ miiⁿ ꞌáámá ꞌáámá vmnéⁿꞌēe chi ngeeⁿ cúúvī. Ndyuūs caꞌá yā yáⁿꞌāa miiⁿ cosecha chi nꞌdai ꞌiiⁿꞌyāⁿ chí ngiīnú yā ndaataá. 8 Naati nduuti chi yáⁿꞌāa miiⁿ ní ngii yááⁿ yeⁿꞌē ndúúcū yaata chi nguɛ́ɛ́ dichííꞌvɛ̄ tuuꞌmi ní nguɛ́ɛ́ dichííꞌvɛ̄. Ní Ndyuūs nguɛ́ɛ́ caꞌá yā cosecha nꞌdai yeⁿꞌē níícú cuayiivi ꞌiiⁿꞌyāⁿ ní ꞌneeⁿ yáⁿꞌa yā yáⁿꞌāa miiⁿ.

9 Maaⁿ ní ꞌáárá chi ngaⁿꞌá ꞌnū ꞌtíícā yeⁿꞌe ndísꞌtiī, hermanos, deenu ꞌnū chi vɛ́ɛ́ cosas chi nꞌdai taavi ca yeⁿꞌé nī ti yeⁿꞌé Cristo ndísꞌtiī ní Ndyuūs nadanguáⁿꞌai yā ndísꞌtiī. 10 Ndyuūs dámaāⁿ diíⁿ yā denduꞌū chí cuaacu. Nnꞌgaacú yā yeⁿꞌē ntiiⁿnyuⁿ chi diíⁿ nī ní táácā nneé nī hermanos yeⁿꞌē yú caati dineⁿꞌé nī hermanos chi iꞌtéénu yā Jesucristo. Ní ꞌtíícā ní diíⁿ nī nguuvi nguuvi. 11 Maaⁿ ní neⁿꞌé ꞌnū chi caꞌáámá caꞌáámá ndísꞌtiī daamá nūuⁿ idiíⁿ ní ndúúcū núúⁿmáⁿ staava yeⁿꞌé nī tanꞌdúúcā chi diíⁿ nī taachi cáámá iꞌtéénu nī. Ní diíⁿ nī ndíí tiempo chi chꞌīi nī. Ní ꞌtíícā cuuvi cuaacu chi vɛ́ɛ́ chi cuuvi yeⁿꞌé nī. 12 Nguɛ́ɛ́ neⁿꞌé ꞌnū chi nduuví ꞌdaanꞌdi nī naati neⁿꞌé ꞌnū chi dinꞌdaacá nī tanꞌdúúcā tanáⁿꞌa cā ꞌiiⁿꞌyāⁿ chi iꞌtéénu yā. Ní cunee ngiinú yā yeⁿꞌe vaadī nꞌdai chí Ndyuūs caꞌá yā ꞌiiⁿꞌyāⁿ sꞌeeⁿ chi Ndyuūs ngaⁿꞌá yā chi cuuvi yeⁿꞌé yā ꞌiiⁿꞌyāⁿ sꞌeeⁿ.

13 ꞌĀā ꞌnááⁿ tiempo chi chóꞌōo Ndyuūs diíⁿ yā ꞌáámá compromiso ndúúcū Abraham ní Ndyuūs ngaⁿꞌá yā cáávā chi duuchi maáⁿ yā chi ꞌtíícā caⁿꞌá yā diíⁿ yā caati nguɛ́ɛ́ cá táámá ꞌiiⁿꞌyāⁿ chi chꞌɛɛtɛ cá yā ti Ndyuūs. 14 Ní caⁿꞌa yā: Díí, Abraham, cuaacu nííⁿnyúⁿ diꞌviicú dii ní diíⁿ chi cuuvi nꞌdeee nꞌdáí daiyá ꞌiiⁿꞌyāⁿ yeⁿꞌē di cuaaⁿ naachi cuchiī. 15 Abraham cūnee ngiinú yā compromiso yeⁿꞌé Ndyuūs ndúúcū vaadī ngiīnū ní tunée yā compromiso chi Ndyuūs caⁿꞌa yā chi caꞌá yā Abraham miiⁿ. 16 Maaⁿ ní taachi ꞌiiⁿꞌyāⁿ yeⁿꞌe iⁿꞌyeeⁿdí ꞌcūū ngaⁿꞌá yā chi cuaacu nííⁿnyúⁿ caⁿꞌá yā diiⁿ yā, ngaⁿꞌá yā “Por Dios” cucáávā ꞌáámá yā chi chꞌɛɛtɛ cá yā nguɛ́ɛ́ ti ꞌiiⁿꞌyāⁿ sꞌeeⁿ. Níícú taachi ꞌiiⁿꞌyāⁿ sꞌeeⁿ ngaⁿꞌá yā chi ꞌtíícā caⁿꞌá yā diíⁿ yā cáávā ꞌiiⁿꞌyāⁿ miiⁿ chí chꞌɛɛtɛ ca tuuꞌmi ní nguɛ́ɛ́ vɛ́ɛ́ más cā chi cuuvi caaⁿꞌmáⁿ yā yeⁿꞌē. 17 Ní ꞌtíícā Ndyuūs neⁿꞌé yā chꞌiⁿꞌí yā ꞌiiⁿꞌyāⁿ sꞌeeⁿ yeⁿꞌe Abraham chi cuaacu nííⁿnyúⁿ diíⁿ yā cumplir compromiso yeⁿꞌé yā. Ní nguɛ́ɛ́ n̄ꞌdaaⁿ mar ꞌáámá nduudu yeⁿꞌé yā. Ní cáávā chuū ngaⁿꞌá yā cucáávā chi duuchi maáⁿ yā. 18 Ní cáávā chuū vɛ́ɛ́ ꞌúúví denduꞌū chi nguɛ́ɛ́ cuuvi n̄ꞌdaaⁿ. Ndyuūs ní nguɛ́ɛ́ cuuvi cuꞌneéⁿ yā táámá cosa lugar yeⁿꞌē ꞌuuvī compromiso yeⁿꞌé Ndyuūs ndúúcū chi ngaⁿꞌá yā chi caⁿꞌá yā diíⁿ yā cáávā chi duuchi maáⁿ yā. Ndyuūs nguɛ́ɛ́ cuuvi caaⁿꞌmáⁿ yā nduudu yaadi. Ní ndúúcū compromiso yeⁿꞌé yā, Ndyuūs tee yā sꞌuuúⁿ ꞌviichꞌɛɛtíínūuⁿ chꞌɛɛtɛ yeⁿꞌe yú caati sꞌuuúⁿ nꞌnuuⁿ yú Ndyuūs ní iꞌtéénu yú ꞌyā ní yeⁿꞌē chi Ndyuūs tée yā chi cuuvi yeⁿꞌē yú. 19 Chííⁿ chí iꞌtéénu yú cáávā alma yeⁿꞌe yú ní tanꞌdúúcā ꞌáámá ancla yeⁿꞌe barco ti iꞌnēēⁿ diíⁿ barco chi ꞌāā ntɛ́ɛ́ ínuⁿꞌu. ꞌTíícā sꞌuuúⁿ ndúúcū chí iꞌtéénu yú cuuvi ndáá niiⁿnuⁿ yú nanááⁿ Ndyuūs. 20 Jesucristo ꞌāā ndaá yā nanááⁿ Ndyuūs vmnááⁿ vmnaaⁿ yeⁿꞌē sꞌuuúⁿ. Ní maaⁿ ní cááva yā cuuvi ndaa yú nanááⁿ Ndyuūs. Ní maaⁿ ní Jesucristo miiⁿ ní chiiduú chꞌɛɛtɛ ca yeⁿꞌe yú chi ꞌáámá cūnee ná ntiiⁿnyuⁿ miiⁿ. Ní tanꞌdúúcā chiiduú chꞌɛɛtɛ ca Melquisedec chi ꞌáámá cūnee na ntiiⁿnyuⁿ ꞌāā tiicá nūuⁿ Jesucristo.