Caaⁿꞌmaⁿnguaꞌá nī caavā núsꞌuu
3
Maaⁿ ní yeⁿꞌe nducuéⁿꞌē, ndísꞌtiī hermanos yeⁿꞌé ꞌnū caaⁿꞌmaⁿnguaꞌá nī cucáávā núsꞌuu chi niiⁿnúúⁿ nūuⁿ cuuvi candɛɛ́ ꞌnū nduudu cuaacu yeⁿꞌé Ndyuūs na núúⁿmáⁿ cuaaⁿ. Ní ꞌiiⁿꞌyāⁿ cuuvi cuꞌtéénu yā nduudu cuaacu miiⁿ ní cuuvi dinꞌdaacá yā ní diíⁿ yā chiiⁿ chi Ndyuūs neⁿꞌé yā tanꞌdúúcā chi ndísꞌtiī diíⁿ nī. 2 Caaⁿꞌmaⁿnguaꞌá nī ntúūⁿ chi cuuví nadanguáⁿꞌai ꞌnū yeⁿꞌe ꞌiiⁿꞌyāⁿ chi nguɛ́ɛ́ nꞌdaacā idiíⁿ yā chi perverso yā caati nguɛ́ɛ́ nducyaaca ꞌiiⁿꞌyāⁿ iꞌtéénu yā Señor Jesucristo. 3 Naati Señor Jesucristo ní dámaāⁿ nꞌdaacā diíⁿ yā ní nducuéⁿꞌē tiempo nginneé yā ndísꞌtiī chi ꞌáámá canee nī ndúúcū chi iꞌtéénu nī. Ní candɛɛ yā cuidado ndísꞌtiī yeⁿꞌe denduꞌū chi nguɛɛ nꞌdaacā. 4 Ni vɛ́ɛ́ ꞌviichꞌɛɛtínūuⁿ yeⁿꞌé ꞌnū ndúúcū Señor ndúúcū ndísꞌtiī caati ndísꞌtiī ní idiíⁿ nī nducuéⁿꞌē chi caⁿꞌa ꞌnū nduucú nī chi canee chi diíⁿ nī ní ꞌtíícā caⁿꞌá nī diíⁿ nī. 5 Neⁿꞌé ꞌnū chi Señor Jesucristo cunneé yā ndísꞌtiī chi cuuvi deenú nī na staava yeⁿꞌé nī dɛꞌɛ̄ chi vaadī neⁿꞌe yeⁿꞌé Ndyuūs. Ní cuuví yeⁿꞌe nī maāⁿ ꞌviichꞌɛɛtínuūⁿ chi yeⁿꞌe Cristo. Ní cuuvi cuchɛɛ́ nī yeⁿꞌe tanducuéⁿꞌē chi cuchii.Canee chi diiⁿ yú ntiiⁿnyuⁿ
6 Maaⁿ ní ndísꞌtiī hermanos yeⁿꞌe yú, itée ꞌnū orden ndísꞌtiī ndúúcū chi dúúchí Señor Jesucristo chi divíi nī yeⁿꞌe hermanos yeⁿꞌe yú chi nguɛ́ɛ́ neⁿꞌé yā diíⁿ yā ntiiⁿnyuⁿ ní nguɛ́ɛ́ diíⁿ yā tanꞌdúúcā chi núsꞌuu chiꞌcueéⁿ ꞌnū ꞌiiⁿꞌyāⁿ. 7 Ndísꞌtiī ní deenú nī tanꞌdúúcā chi cánéé chi chꞌɛɛtineé nī. Ní diíⁿ nī ntiiⁿnyuⁿ tanꞌdúúcā chi diíⁿ ꞌnū taachi sneé ꞌnū ndúúcu nī ní diíⁿ ꞌnū ntiiⁿnyuⁿ. 8 Ní nguɛ́ɛ́ staꞌá ꞌnū pan yeⁿꞌe mar ꞌáámá ndísꞌtiī chi nguɛ́ɛ́ cái ꞌnū. Naati ꞌtííca diíⁿ ꞌnū. Diíⁿ ꞌnū ntiiⁿnyú ndii nguuvi ndíí nꞌgaaⁿ chi nguɛ́ɛ́ diꞌvaachí ꞌnū mar ꞌáámá ndísꞌtiī. 9 Ní ꞌáárá chí cuuvi ngiicá ndisꞌtiī chi tée nī necesidades yeⁿꞌé ꞌnū nguɛɛ diíⁿ ꞌnū ꞌtíícā. Idiiⁿ ꞌnū ntiiⁿnyúⁿ chi neⁿꞌé ꞌnū cuꞌneéⁿ ꞌnū cáávā ꞌáámá ejemplo nanááⁿ ndísꞌtiī caati cuuvi diíⁿ nī tanꞌdúúcā chi diíⁿ ꞌnū. 10 Ní taachi chꞌɛɛtineé ꞌnū ndúúcū ndísꞌtiī caⁿꞌa ꞌnū nduucú nī nduudú ꞌcūū. ꞌIiⁿꞌyāⁿ chi nguɛ́ɛ́ neⁿꞌé yā diíⁿ yā ntiiⁿnyuⁿ nguɛ́ɛ́ cheꞌé yā. 11 Chꞌiindiveéⁿ ꞌnū chi duuꞌvi ꞌiiⁿꞌyāⁿ chiicá yā nguaaⁿ ndísꞌtiī nguɛ́ɛ́ chiicá nꞌdaaca yā ti nguɛ́ɛ́ idiíⁿ yā ntiiⁿnyuⁿ ní neené nꞌdeee nꞌdáí diíⁿ yā cosas chi nguɛ́ɛ́ dichííꞌvɛ̄. 12 ꞌIiⁿꞌyāⁿ chi diiⁿ ꞌtíícā, caꞌá ꞌnū orden ní diꞌcuíítu ꞌnū ꞌiiⁿꞌyāⁿ ndúúcū chi duuchi Señor Jesucristo yeⁿꞌē yú chi diíⁿ yā ntiiⁿnyuⁿ ndúúcū vaadī yeenú. Níícú diíⁿ yā ganar cáávā gastos yeⁿꞌé yā.
13 Ndísꞌtiī hermanos yeⁿꞌé ꞌnū nguɛ́ɛ́ cánéé chi cuuvi ꞌdaanꞌdí nī chi diíⁿ nī denduꞌū chi nꞌdaacā. 14 Ndúútí chi ꞌáámá ꞌiiⁿꞌyāⁿ nguɛ́ɛ́ cuꞌneeⁿveéⁿ yā nduudu chí idinguúⁿ ꞌnū na carta ꞌcūū, nꞌdiichí nī duꞌu chi ꞌiiⁿꞌyāⁿ miiⁿ ní nguɛ́ɛ́ diíⁿ nī dɛꞌɛ̄ vɛɛ ndúúcu yā. ꞌTíícā ní cuuvi ꞌcuináaⁿ yā. 15 Ní nguɛ́ɛ́ diíⁿ nī ndúúcu yā tanꞌdúúcā chi contra yeⁿꞌé nī naati caꞌá nī consejo ꞌiiⁿꞌyāⁿ miiⁿ tanꞌdúúcā chi ꞌdíínu nī ꞌiiⁿꞌyāⁿ.
Yeⁿꞌe vaadī nꞌdai yeⁿꞌé Ndyuūs
16 Neⁿꞌé chi maaⁿ Señor Jesucristo chi vɛɛ vaadī ꞌdiīiⁿ yeⁿꞌé yā cueⁿꞌe daāⁿmaⁿ itée yā ndísꞌtiī vaadī ꞌdiīiⁿ nducuéⁿꞌē tiempo ní nducuéⁿꞌē cuaaⁿ. Señor miiⁿ ní cunéé yā ndúúcū nducyaaca ndísꞌtiī.