Yeⁿꞌé ꞌáámá ꞌiiⁿꞌyāⁿ chi dinuuⁿndi yā
2
Maaⁿ ní hermanos yeⁿꞌé diꞌcuiitú ꞌnū ndísꞌtiī chi cūnee ngiinú nī yeⁿꞌe tiempo chí nindaa Señor Jesucristo ní yeⁿꞌe taachi nduuvidaama yú ndúúcu yā. 2 Diꞌcuiitú ꞌnū chi nguɛ́ɛ́ naꞌdaaⁿ nī chííⁿ chi nadacádíínuuⁿ nī. Nguɛ́ɛ́ diiⁿ ꞌvaꞌá nī yeⁿꞌe chi ꞌiiⁿꞌyāⁿ ngaⁿꞌá yā chi Cristo ꞌāā ndaá yā taama vmnéⁿꞌēe ti ngaⁿꞌá yā tanꞌdúúcā chi cáávā Espíritu Nꞌdai yeⁿꞌé Ndyuūs, naati nguɛ́ɛ́ ꞌtíícā. Ndíí nguɛ́ɛ́ ndúú ꞌvaꞌa nī yeⁿꞌē táámá nduudu chi nꞌgiindiveéⁿ nī yeⁿꞌe chuū. Ndíí nguɛ́ɛ́ ndúú caavā carta chi staꞌá nī chi tanꞌdúúcā chi dinguúⁿ ꞌnū yeⁿꞌe nī naati nguɛ́ɛ́ ꞌtíícā. Ní yeⁿꞌe nducuéⁿꞌē chuū ní chiiⁿ chi ngaⁿꞌā chí ꞌāā ndaā Señor Jesucristo yeⁿꞌē yú, nguɛ́ɛ́ ꞌvaꞌá nī. 3 Nguɛ́ɛ́ caꞌá nī lugar ꞌiiⁿꞌyāⁿ chi cuuvi canncheꞌéí yā ndísꞌtiī mar ꞌáámá vmnéⁿꞌēe. Vmnaaⁿ chi ndaa tiempo chi cuuvi nindaá Jesucristo taama vmnéⁿꞌēe, ꞌiiⁿꞌyāⁿ na iⁿꞌyeeⁿdí ꞌcūū canéé chi ndaacadaamí yā yeⁿꞌe Señor ní canee yā contra yeⁿꞌe Señor. Tuuꞌmi ní ndaā ꞌáámá Saⁿꞌā Nuuⁿndi, saⁿꞌā chi Ndyuūs ngaⁿꞌá yā chi ꞌāā condenado sa ní caⁿꞌa sa infierno. 4 Saⁿꞌā miiⁿ ní caaca taaⁿ sa ní contra nducuéⁿꞌē chi yeⁿꞌé Ndyuūs ndúúcū nducuéⁿꞌē chi ꞌiiⁿꞌyāⁿ iꞌtéénu yā. Saⁿꞌā miiⁿ ní dichꞌɛɛtɛ sa maaⁿ sa nguɛ́ɛ́ tanꞌdúúcā tanáⁿꞌā ꞌiiⁿꞌyāⁿ. Ní ndaa sa cuaaⁿ chɛɛti yaācū templo yeⁿꞌé Ndyuūs ní ꞌcuūndī sa. Ní máaⁿ sa staꞌa sa lugar yeⁿꞌé Ndyuūs. Ní diiⁿ sa máaⁿ sa chi cuꞌtéénu ꞌiiⁿꞌyāⁿ saⁿꞌā. Ní diiⁿ sa tanꞌdúúcā Ndyuūs saⁿꞌā.5 ¿ꞌÁá nguɛ́ɛ́ nꞌgaacú nī ndísꞌtiī yeⁿꞌe tiempo chi caneé nduucú nī ní caⁿꞌá chīi ndísꞌtiī nduudú ꞌcūū? 6 Maaⁿ ní ꞌāā deenú nī dɛꞌɛ̄ idiīiⁿ chi ꞌāā ꞌcuɛ́ɛ́ ndaa saⁿꞌā miiⁿ caati cuuvi ndaa saⁿꞌā miiⁿ taachi ndaa tiempo yeⁿꞌē sa chi ndaā sa. 7 Niicu maaⁿ poder yeⁿꞌe nuuⁿndi chi idiīiⁿ chi ꞌiiⁿꞌyāⁿ dinuuⁿndí yā ní ꞌāā ngii. Chííⁿ chi diīiⁿ chi Saⁿꞌā Nuuⁿndi nguɛ́ɛ́ cuuvi ꞌcuuⁿꞌmiⁿ sa maaⁿ sa chi Saⁿꞌā Nuuⁿndi. ꞌTííca rā vaa ndii tiempo chi ꞌiiⁿꞌyāⁿ chi diiⁿ chi nguɛ́ɛ́ cuuvi ꞌcuuⁿꞌmiⁿ Saⁿꞌā Nuuⁿndi, ꞌiiⁿꞌyāⁿ miiⁿ caⁿꞌá yā táámá lado. 8 Tuuꞌmi ní ndaa Saⁿꞌꞌā Nuuⁿndi ní ꞌiiⁿꞌyāⁿ cuuvi nꞌdiichí yā saⁿꞌā níícú Señor Jesucristo caⁿꞌá yā ꞌcaaⁿꞌnúⁿ yā Saⁿꞌā Nuuⁿndi ndúúcū ꞌyúúné chi candaā yeⁿꞌe cheendí yā ní diꞌcuiinú yā Saⁿꞌā Nuuⁿndi miiⁿ ndúúcū dɛɛvɛ́ yeⁿꞌé yā taachi nndaa yā. 9 Ní Saⁿꞌā Nuuⁿndi miiⁿ ndaa sa ndúúcū nꞌdeee nꞌdáí poder yeⁿꞌe Satanás chi yááⁿnꞌguiinūuⁿ. Ní diiⁿ sa vaadī nꞌgiinu ndúúcū milagros chi nguɛ́ɛ́ vaādī cuaacu. 10 Ní ndúúcū nducuéⁿꞌē chi nguɛ́ɛ́ nꞌdaacā idiiⁿ sa ntiiⁿnyuⁿ yeⁿꞌē sa ní nginncheꞌei sa ꞌiiⁿꞌyāⁿ caati cuuvi diiⁿ sa ganar ꞌiiⁿꞌyāⁿ lado yeⁿꞌé yā, ꞌiiⁿꞌyāⁿ chi caⁿꞌá yā infierno. Ni chóꞌōo nducuéⁿꞌē chuū caati ꞌiiⁿꞌyāⁿ nguɛ́ɛ́ neⁿꞌé yā ꞌcaandiveéⁿ yā nduudu cuaacu yeⁿꞌé Ndyuūs, nduudu chi diiⁿ chi ninguáⁿꞌai yā. 11 Níícú cucáávā chi diíⁿ yā ꞌtúúcā, Ndyuūs caⁿꞌá yā diíⁿ yā ndúúcū ꞌiiⁿꞌyāⁿ sꞌeeⁿ chi cuꞌtéénu yā nduudu yaadi yeⁿꞌe Saⁿꞌā Nuuⁿndi. 12 Ní nducyáácá ꞌiiⁿꞌyāⁿ chi nguɛ́ɛ́ neⁿꞌé yā cuꞌtéénu yā nduudu cuaacu caati neⁿꞌe ca yā cosas chi nguɛ́ɛ́ nꞌdaacā ní cuuví yā condenado.
Ndyuūs ndɛɛvɛ́ yā nducyaaca ꞌiiⁿꞌyāⁿ chi nadanguáⁿꞌai yā ꞌiiⁿꞌyāⁿ
13 Níícú ndísꞌtiī hermanos yeⁿꞌe yú, Señor neⁿꞌé yā ndísꞌtiī. Ní núsꞌuu ní cuéⁿꞌé daāⁿmaⁿ caꞌá ꞌnū gracias Ndyuūs cucáávā ndísꞌtiī caati Ndyuūs ndɛɛvɛ́ yā ndísꞌtiī vmnááⁿ vmnaaⁿ chi cuuvi nadanguáⁿꞌai yā ndísꞌtiī cucáávā Espíritu Nꞌdai yeⁿꞌé yā. Espíritu Nꞌdai yeⁿꞌé Ndyuūs miiⁿ ní cuuvi didɛɛvɛ ndísꞌtiī caati ndísꞌtiī cuuvi cuꞌtéénu nī nduudu cuaacu yeⁿꞌé Ndyuūs. 14 Ní Ndyuūs yaaꞌví yā ndísꞌtiī chi cuuvi yeⁿꞌé yā ndísꞌtiī cucáávā nduudu cuaacu yeⁿꞌé yā chi nꞌgiindiveéⁿ nī ní diīiⁿ chi cuuví nanguáⁿꞌai nī. Ní nduudu cuaacu miiⁿ núsꞌuu ngaⁿꞌá ꞌnū nanááⁿ ndísꞌtiī. Ní Ndyuūs neⁿꞌé yā chi ndísꞌtiī tunéeⁿ nī chi cuuví canee nī tanꞌdúúcā Señor Jesucristo yeⁿꞌe yú.
15 ꞌTíícā maaⁿ ní ꞌcuɛɛtinéé nꞌdaacá nī ndúúcū chi iꞌtéénu nī. Nꞌgaacú nī yeⁿꞌe chi ngiꞌcueéⁿ ꞌnū ndísꞌtiī taachi sneé ꞌnū nduucú nī ní yeⁿꞌē chi idinguúⁿ ꞌnū yeⁿꞌé nī. 16 Maaⁿ Señor Jesucristo yeⁿꞌē yú ndúúcū Ndyuūs Chiida yú dinéⁿꞌe yā sꞌuuúⁿ caati Ndyuūs ní nꞌdai taavi. Ní cueⁿꞌe daāⁿmaⁿ itée yā sꞌuuúⁿ ꞌviichꞌɛɛtíínūuⁿ ní cānee ngiinu yú vaadī nꞌdai taavi yeⁿꞌé Ndyuūs chi Ndyuūs caⁿꞌa yā chi tée yā sꞌuuúⁿ. 17 Neⁿꞌé chi Ndyuūs ní tée yā ꞌviichꞌɛɛtíínuūⁿ ndísꞌtiī na staava yeⁿꞌé nī ní tée yā fuerzas nꞌdísꞌtiī caati ndísꞌtiī ní cuuvi diíⁿ nī nducuéⁿꞌē chi nꞌdaacā ní caaⁿꞌmáⁿ nī dámaāⁿ nduudu chi nꞌdaacā.