2 ꞌÚú diꞌcuíitú táⁿꞌā Euodias ní diꞌcuíitú táⁿꞌā Síntique chi diíⁿ yā chi dáámá nūuⁿ cuuví vaanicadíínūuⁿ yeⁿꞌé yā tanꞌdúúcā chi canee chi diiⁿ hermanos chi iꞌtéénu yā Señor Jesucristo yeⁿꞌē yú. 3 Ní diꞌcuíitú nꞌdiī, saⁿꞌā chi ꞌáámá canee nduucú na ntiiⁿnyuⁿ chi cúnnee nī nꞌdaataá hermanas chi diíⁿ yā ntiiⁿnyuⁿ nduucú. Nꞌdaataá sꞌeeⁿ ní dichííꞌvɛ yā ꞌúú naachi ꞌúú ngaⁿꞌá nduudu ngai yeⁿꞌé Cristo chi nadanguáⁿꞌai yā nducyaaca ꞌiiⁿꞌyāⁿ. Ní cúnneé nī saⁿꞌā Clemente ndúúcū tanáⁿꞌa yā chi nginneé yā ꞌúú ní ꞌiiⁿꞌyāⁿ sꞌeeⁿ chi duuchí yā ní canéé nguūⁿ na libro yeⁿꞌé Ndyuūs naachi canéé nguūⁿ chi dúúchí nducyáácá ꞌiiⁿꞌyāⁿ chi canduuchí yā cueⁿꞌe daāⁿmaⁿ.

4 Ndísꞌtiī canéé chi yeenú nī nducuéⁿꞌē tiempo caati ndísꞌtiī ní yeⁿꞌe Señor Jesucristo ndísꞌtiī. Ní ꞌtíícā caaⁿꞌmáⁿ ntuúⁿ taama vmnéⁿꞌēe chi canee chi cuuví yeenú nī. 5 Ní nducyaaca ꞌiiⁿꞌyāⁿ cuuvi snaáⁿ yā ndísꞌtiī chi ꞌiiⁿꞌyāⁿ nꞌdáí taavi ndísꞌtiī. Ní ndísꞌtiī deenú nī chí niiⁿnuúⁿ canee Señor Jesucristo yeⁿꞌē yú.

6 Ní nguɛ́ɛ́ dɛꞌɛ̄ vɛɛ nadicadíínuuⁿ nī yeⁿꞌe tanducuéⁿꞌē. Ní taachi caaⁿꞌmaⁿnguaꞌá nī cuuví nī Ndyuūs nducuéⁿꞌē chi neⁿꞌé nī. Ní taachi caacá nī Ndyuūs cucáávā chiiⁿ chi neⁿꞌé nī ní caꞌa ntuúⁿ nī gracias Ndyuūs. 7 Tuuꞌmi ní Ndyuūs tée yā vaadī ꞌdiiíⁿ yeⁿꞌé yā chí chꞌɛɛtɛ ca chi nguɛ́ɛ́ cuuvi tuumicadíínuuⁿ nī yeⁿꞌē. Níícú vaadī ꞌdiiíⁿ miiⁿ ní nguáínꞌdai nī na staava yeⁿꞌé nī ndúúcū vaanīcadíínuuⁿ yeⁿꞌé nī caati ndísꞌtiī ní yeⁿꞌe Cristo ndísꞌtiī.

8 Ní ndísꞌtiī ní yeⁿꞌe nducuéⁿꞌē dendúꞌū nadacadíínuuⁿ nī yeⁿꞌe nducuéⁿꞌē chi nduudu cuaacu, ní yeⁿꞌe nducuéⁿꞌē chí nꞌdai chi diiⁿ yú respetar, ní yeⁿꞌe nducuéⁿꞌē vaadī cuaacu, ní yeⁿꞌe nducuéⁿꞌē chí dɛɛvɛ, ní yeⁿꞌe nducuéⁿꞌē chi neⁿꞌe Ndyuūs chi nadacadíínuuⁿ nī, ní yeⁿꞌe nducuéⁿꞌe chi ꞌiiⁿꞌyāⁿ deenu nꞌdái yā chi nꞌdaacā. Ní nadacadíínuuⁿ nī yeⁿꞌe tanducuéⁿꞌē chi nꞌdaacā ca chi cuuví nī caaⁿꞌmáⁿ nī yeⁿꞌe ꞌtíícā, dɛꞌɛ chúúcā nꞌdaacā chuū.

9 Níícú diíⁿ nī denduꞌū chí chꞌeeⁿ nī yeⁿꞌé tanꞌdúúcā chi chꞌiⁿꞌí ndísꞌtiī. Ní diíⁿ nī tanꞌdúúcā chi chꞌiindiveéⁿ nī yeⁿꞌé chi nꞌgeéⁿ ndísꞌtiī ní tanꞌdúúcā chi nꞌdiichí nī chi ꞌúú idiíⁿ. Diíⁿ nī nducuéⁿꞌē chuū. Ndyuūs chi canee ndúúcū vaadī ꞌdiiíⁿ yeⁿꞌé yā ní canée yā ndúúcū ndísꞌtiī ndúúcū vaadī ꞌdiiíⁿ yeⁿꞌé yā.

10 ꞌUú ní yeenú taavi ti yeⁿꞌé Señor Jesucristo ní caati ndísꞌtiī ní ꞌāā nꞌgaacu ntúuⁿ nī ní nadicadíínuuⁿ nī yeⁿꞌē ꞌúú. Deenú chi ndísꞌtiī ꞌāā nꞌgaacú nī yeⁿꞌe tiempo chi chóꞌōo naati nguɛ́ɛ́ cuuvi cunneé nī ꞌúú, ꞌáárá chi neⁿꞌé nī. 11 Ní ꞌúú nguɛ́ɛ́ ngaⁿꞌá ndísꞌtiī yeⁿꞌē chi nguɛɛ vɛ́ɛ́ yeⁿꞌé caati maaⁿ ní ꞌāā deenú chi cuuvi yeenú ndúúcū dɛꞌɛ̄ chi vɛ́ɛ́ yeⁿꞌé. 12 Ní ꞌāā deenú táácā chi diíⁿ taachi pobre ꞌúú, ní ꞌāā deenú táácā chi diíⁿ taachi vɛ́ɛ́ cá yeⁿꞌé. Ní ꞌāā deenú ntúūⁿ táácā chi cuneé ndúúcū ꞌāā dɛꞌɛ́ nūuⁿ chí cúchiī yeⁿꞌé, nduuti chi vɛ́ɛ́ cá chí cheꞌé o nduuti chi nguɛ́ɛ́ vɛ́ɛ́ chi cheꞌé, o nduuti chi vɛ́ɛ́ taavi ca yeⁿꞌé o nduuti chi nguɛ́ɛ́ dɛꞌɛ̄ vɛɛ yeⁿꞌé. Ní yeⁿꞌē taanduvɛ́ɛ́ chuū ní deenú táácā cuuvi diíⁿ. 13 Ní ꞌúú ní cuuví diíⁿ tanducuéⁿꞌē chi choꞌō yeⁿꞌé caati Cristo itée yā fuerzas ꞌúú. 14 Ní ndísꞌtiī ní nꞌdaacā idiíⁿ nī chi chinnee nī ꞌúú taachi nꞌgeenú ngii.

15 Ní ndísꞌtiī ꞌiiⁿꞌyāⁿ yeⁿꞌe yáāⁿ Filipos deenu nꞌdaacá nī taachi choꞌó na yáⁿꞌāa Macedonia ní tucaꞌá cāⁿꞌa nduudu yeⁿꞌe Cristo chi nadanguáⁿꞌai yā ꞌiiⁿꞌyāⁿ na yáⁿꞌāa Macedonia miiⁿ. Deenú nī chi taachi canꞌdaá cueⁿꞌé chi dámaāⁿ ndísꞌtiī chi yeⁿꞌé yaācū Filipos tee nī ꞌúú tuumi chi ofrenda yeⁿꞌe yaācū yeⁿꞌé nī chi nnee nī ꞌúú. 16 Ní taachi ꞌúú caneé na yáāⁿ Tesalónica, ndísꞌtiī ní tee nī ꞌáámá ꞌuūví cuuvi ayuda ndúúcū tuumī taachi ꞌāā vɛ́ɛ́ necesidades yeⁿꞌé. 17 Nguɛ́ɛ́ dámaāⁿ nacadíínuúⁿ yeⁿꞌe chi cutaꞌá dɛꞌɛ tuūmī chi ndísꞌtiī tée nī ꞌúú naati neⁿꞌé chi snāaⁿ chi cuuvi vɛ́ɛ́ cá yeⁿꞌe ndísꞌtiī, chiiⁿ chi Ndyuūs caⁿꞌá yā tée yā ndísꞌtiī cucáávā chi ndísꞌtiī nneé nī ꞌúú. 18 ꞌÚú ní yaaꞌví ndísꞌtiī chi ꞌāā staꞌá nducuéⁿꞌē chi tee nī ꞌúú ní ngoꞌo ca cáávā necesidades yeⁿꞌé. Ní maaⁿ ní chi staꞌá yeⁿꞌe hermano Epafrodito denduꞌū ofrenda chi dichoꞌo ndísꞌtiī. Ndúúcū chuū ní vɛ́ɛ́ cá yeⁿꞌé. Ní nducuéⁿꞌē ofrenda chi dichoꞌo ndísꞌtiī ꞌúú, ní chuū ní ꞌáámá ofrenda chi nꞌdai taavi nanááⁿ Dendyuūs. Ní tanꞌdúúcā ꞌáámá ofrenda chi caꞌá nī Ndyuūs, tíícā ofrenda yeⁿꞌé nī. Ní ofrenda miiⁿ cosas chi Ndyuūs neⁿꞌe taavi yā. 19 Ní maaⁿ ní Ndyuūs yeⁿꞌē yú tée yā ndísꞌtiī nducuéⁿꞌē denduꞌū chi necesidades yeⁿꞌé nī yeⁿꞌē vaadī ꞌcuiica nꞌdai chi vɛ́ɛ́ yeⁿꞌé yā chi nꞌdeee taavi ca. Chuū ní Ndyuūs diíⁿ yā ti sꞌuuúⁿ ní yeⁿꞌé Cristo Jesús sꞌuuúⁿ. 20 Maaⁿ ní caaⁿꞌmaⁿ yú chi Ndyuūs Chiida yú, ni chꞌɛɛtɛ ca ní ndɛɛ̄vɛ̄ nꞌdáí cá caati cueⁿꞌe daāⁿmaⁿ ꞌtiicá yā.

21 Maaⁿ ní ngaⁿꞌá ndúúcū nducyaaca ndísꞌtiī chi iꞌtéénu nī Jesucristo: Nꞌdaí nī, ngaⁿꞌá. Hermanos yeⁿꞌē yú chi canéé nduucú: Nꞌdaí ndísꞌtiī, ngaⁿꞌa yā. 22 Ní nducyáácá ꞌiiⁿꞌyāⁿ chi snée yā ꞌmuuⁿ nduucú ní iꞌtéénu yā Cristo: Nꞌdai ndísꞌtiī, ngaⁿꞌa yā. ꞌTiicá ntúūⁿ ꞌiiⁿꞌyāⁿ chi snéé na vaꞌai yeⁿꞌe César chi emperador yeⁿꞌe Roma: Nꞌdai ndísꞌtiī, ngaⁿꞌá yā.

23 Ní Jesucristo yeⁿꞌe yú itée yā nducyaaca ndísꞌtiī nducuéⁿꞌē chi nꞌdai taavi ca yeⁿꞌé yā. ꞌTíícā cuuvi.