Pablo yaaꞌví yā contra yeⁿꞌe ꞌiiⁿꞌyāⁿ Israel chi necio yeⁿꞌe ley yeⁿꞌé yā
3
Maaⁿ ní ndísꞌtiī hermanos yeⁿꞌé ngaⁿꞌá ngīi ndísꞌtiī chi canéé chi cuuvi yeenú nī ti yeⁿꞌe Señor Jesucristo ndísꞌtiī. Ní cáávā ꞌúú nguɛ́ɛ́ dɛꞌɛ̄ vɛɛ chí diꞌvaachi ꞌúú taachi dinguúⁿ yeⁿꞌe ndísꞌtiī táámá vmnéⁿꞌēe chi cuuvi yeenú nī, ti canéé chí diíⁿ nī cáávā chi choꞌōo nꞌdai yeⁿꞌé nī. 2 Ndísꞌtiī ní diíⁿ nī cuidado yeⁿꞌe ꞌiiⁿꞌyāⁿ chi tanꞌdúúcā ꞌyaānā ti ꞌtiicá yā ti neⁿꞌé yā circuncidar cuerpo yeⁿꞌe saⁿꞌa chi nguɛ́ɛ́ saⁿꞌā Israel sa. Nguɛ́ɛ́ nꞌdaacā diíⁿ yā chi nadacadíínuuⁿ yā chi canee chi dií yā circuncidar cuerpo yeⁿꞌe saⁿꞌā sꞌeeⁿ. 3 Ní cuaacu nííⁿnyúⁿ sꞌuuúⁿ ní tanꞌdúúcā chi ꞌāā circuncidado sꞌuuúⁿ caati sꞌuuúⁿ dichꞌɛɛtɛ yú Ndyuūs ndúúcū espíritu yeⁿꞌe maāⁿ yú. Ní sꞌuuúⁿ ní yeenu yú ti yeⁿꞌe Señor Jesucristo sꞌuuúⁿ. Ní nguɛ́ɛ́ vɛ́ɛ́ confianza yeⁿꞌē yú yeⁿꞌe tanꞌdúúcā chi ꞌāā circuncidado cuerpo yeⁿꞌe yú. 4 Ni ꞌúú dendúꞌū cuuví cuneé ndúúcū confianza na vida yeⁿꞌé nanááⁿ ꞌiiⁿꞌyāⁿ tí ꞌúú canéé circuncidado. Ní nguɛɛ vɛɛ mar ꞌáámá ꞌiiⁿꞌyāⁿ chi cuuvi nadacadíínuuⁿ cá yā yeⁿꞌe nducuéⁿꞌē chuū ndúúcū confianza tanꞌdúúcā chi cuuvi ꞌúú. 5 Caati taachi chií niiⁿníⁿ nguuvi chi chꞌiidiyaáⁿ ꞌiiⁿꞌyāⁿ diíⁿ yā circuncidar ꞌúú ní ꞌcaacá yā seña na cuerpo yeⁿꞌé tanꞌdúúcā chi diíⁿ yā ndúúcū nducyaaca saⁿꞌā ꞌlííⁿ yeⁿꞌe ndaata Israel chí judíos. Ní ꞌúú ní yeⁿꞌe ꞌiiⁿꞌyāⁿ Benjamín ꞌúú. Ní ꞌúú ní saⁿꞌa yeⁿꞌe ꞌiiⁿꞌyāⁿ hebreo o Israel ꞌúú ndíí taachi chꞌiindiyaáⁿ caati chiidá ní saⁿꞌā hebreo yā. Ní ꞌúú ní saⁿꞌa fariseo ꞌúú ní diíⁿ ndúúcū núúⁿmáⁿ staava yeⁿꞌé chiiⁿ chi ngaⁿꞌa ley yeⁿꞌe ꞌiiⁿꞌyāⁿ yeⁿꞌē ndaata yeⁿꞌé. 6 Ní ꞌúú ní neené necio ꞌúú chi diíⁿ ntiiⁿnyuⁿ yeⁿꞌe yaācū yeⁿꞌe ndaata yeⁿꞌé. Ní ꞌúú iꞌnuuⁿcaꞌáí ꞌiiⁿꞌyāⁿ chi ngeⁿꞌe yaācū yeⁿꞌe ꞌiiⁿꞌyāⁿ chi iꞌtéénu yā Cristo. Ní diíⁿ nducuéⁿꞌē chi ngaⁿꞌa ley yeⁿꞌē yú. Ní ꞌiiⁿꞌyāⁿ nguɛ́ɛ́ cuuvi caaⁿꞌmáⁿ yā chi vɛ́ɛ́ nuuⁿndi yeⁿꞌé. 7 Naati nducuéⁿꞌē chuū chí nadacadíínuúⁿ chi cosas chi chꞌɛɛtɛ chi neené dichííꞌvɛ̄ caavā ꞌúú, ní nducuéⁿꞌē denduꞌū yeⁿꞌé ꞌāā chiꞌneéⁿ. Ní maaⁿ ní dichííꞌvɛ̄ ꞌúú chi iꞌteenú Jesucristo. 8 Ní nguɛ́ɛ́ nadacadííuuⁿ cá yeⁿꞌe nducuéⁿꞌē denduꞌū yeⁿꞌé chi ꞌúú chiꞌneéⁿ ti diíⁿ cuenta chí dindaí nducuéⁿꞌē denduꞌū yeⁿꞌé cáávā chi nꞌdai taavi ca chi maaⁿ ní iꞌteenú Jesucristo chi ꞌiivú. Ní diíⁿ cuenta chi nducuéⁿꞌē denduꞌū yeⁿꞌé ní tanꞌdúúcā yaācáa, ꞌtíícā vɛɛ, cáávā chi n̄ꞌdaáⁿ nducuéⁿꞌē denduꞌū yeⁿꞌé cáávā chi iꞌteenú Cristo. Ní staꞌá Cristo tanꞌdúúcā chi ꞌiivú ꞌtííca yā . 9 Ní ꞌtíícā idiíⁿ ti maaⁿ ní ꞌúú ní yeⁿꞌe Cristo ꞌúú. Maaⁿ ní caneé nꞌdaacā nanááⁿ Ndyuūs. Nguɛ́ɛ́ cucáávā chi neⁿꞌé caneé nꞌdaacā nanááⁿ Ndyuūs cucáávā ley miiⁿ naati cucáávā chi iꞌteenú Cristo. Ní ꞌúú ní nꞌdaacā ca ꞌúú nanááⁿ Ndyuūs caati neⁿꞌé Jesucristo. 10 Níícú ꞌúú ní dámaāⁿ neⁿꞌe chi ꞌúú snaáⁿ Cristo ní canee cuuⁿmiⁿ chi canee ndúúcū maaⁿ poder chi diiiⁿ chi nduuchi Cristo yeⁿꞌē nguaaⁿ tináⁿꞌā. Níícú cuuví daamá nduucú yā chi ꞌcueenú cuuvi tanꞌdúúcā chi Cristo chꞌeenú yā chiī ndíí cuuví ꞌcuūvi tanꞌdúúcā Cristo chꞌīi yā. 11 Ní ꞌtiicá ntúūⁿ ꞌúú cuuvi deenú chi ꞌāā cuuví nnduuchí yeⁿꞌē nguaaⁿ tináⁿꞌā.Diiⁿ yú luchar cáávā premio chi Ndyuūs caⁿꞌa yā tée yā sꞌuūuⁿ
12 ꞌÚú nguɛ́ɛ́ neⁿꞌé caaⁿꞌmáⁿ ndísꞌtiī chí ꞌāā tuneéⁿ tanducuéⁿꞌe chuū caati ꞌāā cuɛ́ɛ́ ndaa nꞌdaacā ꞌúú. Naati ꞌúú candií cá cuááⁿ vmnaaⁿ ndúúcū chi iꞌteenú ní ngiīnú ndíí taanduvɛ́ɛ́ tuneéⁿ yeⁿꞌe premio chi cuuvi yeⁿꞌé. Ní vmnááⁿ vmnaaⁿ Cristo miiⁿ diíⁿ yā chi ꞌúú ní yeⁿꞌé yā ꞌúú, caati cuuvi cutaꞌá premio miiⁿ. 13 Ní ndísꞌtiī hermanos yeⁿꞌé, ꞌúú māaⁿ nguɛ́ɛ́ nacadíínuúⁿ chi ꞌāā tuneéⁿ dendúꞌu ꞌcūū. Naati chuū idiíⁿ chi cuuvi naáⁿ nducuéⁿꞌē chi ꞌāā diíⁿ nguuvi chi chóꞌōo. Ní diíⁿ chi cuuvi tuneé nducuéⁿꞌē chi cuuvi yeⁿꞌé nguuvi chi cuchiī. 14 Ní ꞌíícú ꞌúú cuuvi diíⁿ nducuéⁿꞌē caati cuuvi diíⁿ ganar vida cueⁿꞌe daāⁿmaⁿ chi premio chi cuuvi yeⁿꞌé chi cūneé na vaꞌai chɛɛti nguuvi ndúúcū Ndyuūs. Ndyuūs chi canéé na vaꞌai chɛɛti nguuvi yaaꞌví yā sꞌuuúⁿ chí dátee yā sꞌuuúⁿ chi cuuvi yeⁿꞌe yú vida cueⁿꞌe daāⁿmaⁿ caati sꞌuuúⁿ ní yeⁿꞌé Cristo sꞌuuúⁿ.
15 Ní nducyaaca yú chí nꞌdaacā snée yú ndúúcū chi iꞌteenu yú, canee cuuⁿmiⁿ chi nadacadíínuuⁿ yú ꞌtíícā chi nguɛ́ɛ́ tuneeⁿ yú. Ní nduuti chi tanáⁿꞌa ndísꞌtiī nguɛ́ɛ́ nadacadíínuuⁿ nī ꞌtíícā, tuuꞌmi ní Ndyuūs ní ꞌcuuⁿꞌmíⁿ yā ndísꞌtiī chɛɛ̄ chi cuaacu. 16 Níícú chuū ní nééné neⁿꞌe cunéé chí dáámá nūuⁿ cadiīnuuⁿ yú nꞌdaacā ní ꞌcuɛɛtinee yú nꞌdaacā ndúúcū chi ꞌāā deenu yú yeⁿꞌé Ndyuūs.
17 Ndísꞌtiī hermanos yeⁿꞌé diíⁿ nī tanꞌdúúcā chi ꞌúú idiíⁿ. Ní nadacadíínuuⁿ nꞌdai nī yeⁿꞌe ꞌiiⁿꞌyāⁿ chi ꞌcuɛɛtinee nꞌdaacá yā tanꞌdúúcā chi chꞌiⁿꞌí ꞌnū ꞌiiⁿꞌyāⁿ ní ꞌtiicá ntúūⁿ chꞌiⁿꞌí ꞌnū ndísꞌtiī. 18 Ní nééné nꞌdeee cuuví caⁿꞌá ndísꞌtiī chi vɛ́ɛ́ ꞌyaaⁿ taavi ꞌiiⁿꞌyāⁿ chi neⁿꞌé yā diíⁿ yā tanꞌdúúcā chi maáⁿ yā neⁿꞌé yā. Ní nguɛ́ɛ́ neⁿꞌe yā Cristo chi maáⁿ yā chꞌīi yā na cruz. Maaⁿ ní ngaⁿꞌá chuū taama vmnéⁿꞌēe ní nééné yaꞌāī ꞌiinu ndíí chi ngɛɛcú yeⁿꞌē. 19 Ní cáávā ꞌiiⁿꞌyāⁿ sꞌeeⁿ ndaā tiempo chí ndái yā. ꞌIiⁿꞌyāⁿ sꞌeeⁿ ní dámaāⁿ neⁿꞌé yā nꞌnuuⁿ yā chi cheꞌe yā ndúúcū nducuéⁿꞌē chi neⁿꞌe yā. Ní dichꞌɛɛtɛ maáⁿ yā ꞌiiⁿꞌyāⁿ taachi canee chi ꞌcuinaáⁿ yā caavā chi diíⁿ yā. ꞌIiⁿꞌyāⁿ sꞌeeⁿ dámaāⁿ nadacadíínuuⁿ yā yeⁿꞌe nducuéⁿꞌē vicio chi vɛ́ɛ́ iⁿꞌyeeⁿdí ꞌcūū. 20 Naati sꞌuuúⁿ chi yeⁿꞌe Cristo ní yáāⁿ vaacu yú ní vaꞌai chɛɛti nguuvi. Ní snéé ngiinu yú Señor Jesucristo yeⁿꞌe vaꞌai chɛɛti nguuvi chi ndaa yā taama vmnéⁿꞌēe ní nadinguáⁿꞌáí yā sꞌuuúⁿ. 21 Ní taachi Cristo ndaa yā, tuuꞌmi ní n̄ꞌdááⁿ yā cuerpo yeⁿꞌe yú chi cuerpo ndúúcū nuūⁿndī ndii cuerpo ngai yeⁿꞌe yú chí tanꞌdúúcā cuerpo yeⁿꞌé yā chi dɛɛvɛ nꞌdai, ꞌtíícā cuerpo sꞌuuúⁿ. Ní ꞌtíícā Cristo caⁿꞌa yā chi diíⁿ yā ndúúcū dáámá poder yeⁿꞌē maáⁿ yā chi yeⁿꞌē chi ngaⁿꞌa ntiiⁿnyuⁿ yā yeⁿꞌe taanduvɛ́ɛ́ chi vɛ́ɛ́.