5 Ní nguaaⁿ ndísꞌtiī ní tanꞌdúúcā chi Cristo nadacadíínuuⁿ yā yeⁿꞌē maáⁿ ya ꞌtiicá ntúūⁿ ndísꞌtiī canee chi nadacadíínuuⁿ nī yeⁿꞌe maaⁿ nī. 6 Ní nꞌdáá rá chí Cristo miiⁿ ti Ndyuūs ꞌyā, Cristo nguɛ́ɛ́ ꞌāā fuerza diíⁿ yā chi cuuvi daamá yā ndúúcū Ndyuūs Chiidá yā. 7 Naati Cristo sꞌneeⁿ yā chi chꞌɛɛtɛ yeⁿꞌé yā tanducuéⁿꞌe chi canéé na vaꞌai chɛɛti nguuvi. Ní tanꞌdúúcā sꞌuūúⁿ ꞌtiicá yā. Ní tanꞌdúúcā ꞌáámá saⁿꞌā chi dichííꞌvɛ̄ ꞌiiⁿꞌyāⁿ, ꞌtiicā núúⁿ yā. Ní chꞌiindiyáaⁿ yā tanꞌdúúcā ꞌáámá saⁿꞌa yeⁿꞌē iⁿꞌyeeⁿdí ꞌcūū. 8 Ní taachi caneé yā tanꞌdúúcā saⁿꞌa na iⁿꞌyeeⁿdí ꞌcūū ndiicúúⁿ nꞌdai diíⁿ yā ní chꞌiindiveéⁿ yā taanduvɛ́ɛ chi ngaⁿꞌā Chiidá yā chi canéé na vaꞌai chɛɛti nguuvi. ꞌÁárá chí chꞌīi yā na cruz, chꞌiindiveéⁿ yā nduudu yeⁿꞌe Chiidá yā ní caꞌá yā lugar ꞌiiⁿꞌyāⁿ sꞌeeⁿ chi ꞌcaaⁿꞌnúⁿ yā ꞌiiⁿꞌyāⁿ. 9 Ní cáávā chi diiⁿ Jesús, Ndyuūs diíⁿ yā chi Jesús ní chꞌɛɛtɛ cundaá yā na vaꞌai chɛɛti nguuvi. Ní Ndyuūs caꞌá yā ꞌáámá chi duuchí yā chi chꞌɛɛtɛ nꞌdai nguɛ́ɛ́ ti tanáⁿꞌā ꞌiiⁿꞌyāⁿ yeⁿꞌe iⁿꞌyeeⁿdí ꞌcūū. 10 Ní nducyáácá yā canéé chi caāntiiꞌya yā taachi ꞌcaandiveéⁿ yā chi duuchi Jesús miiⁿ. ꞌTiicá ntúūⁿ nducyaacá yā chi snee yā na vaꞌai chꞌɛɛti nguuvi. ꞌTiicá ntúūⁿ nducyaaca yā chi snee yā na yáⁿꞌāa. ꞌTiicá ntúūⁿ nducyaaca yā chi snee yā na infierno. 11 ꞌTiicá ntúūⁿ canee chi caaⁿꞌmaⁿ cuaacú yā chi Jesucristo miiⁿ ní ꞌiivú Ndyuūs. Ní caaⁿꞌmaⁿ cuaacú yā chi nééné chꞌɛɛtɛ nꞌdai Ndyuūs chi Chiida yú.

12 Maaⁿ ní ndísꞌtiī hermanos yeⁿꞌé chi neⁿꞌe taaví, tanꞌdúúcā chi cueⁿꞌe daāⁿmaⁿ iꞌtéénu nī nduudu yeⁿꞌé Ndyuūs taachi caneé ndúúcū ndísꞌtiī, maaⁿ ní iꞌtéénu nī taachi ꞌāā yaⁿꞌai caneé yeⁿꞌé ndísꞌtiī. Maaⁿ ní ꞌvaꞌá nī Ndyuūs. Ní ndísꞌtiī diíⁿ nꞌdaacá nī ti Ndyuūs nadinguáⁿꞌai yā ndísꞌtiī ní diíⁿ nꞌdaacá nī ndúúcū cuidado yeⁿꞌe nducuéⁿꞌē. 13 Cuaacu chi Ndyuūs diíⁿ yā chi ndísꞌtiī neⁿꞌé nī diíⁿ nī nducuéⁿꞌē chi nꞌdaacā. Ní Ndyuūs cunneé yā ndísꞌtiī chi diíⁿ nī. Ní ꞌcuiinú nī chiiⁿ chi diíⁿ nī tanꞌdúúcā chi neⁿꞌé yā chííⁿ chí nꞌdaacā nꞌdai.

14 Maaⁿ ní ndísꞌtiī diíⁿ nī nducuéⁿꞌē ní nguɛ́ɛ́ cueēⁿdiitú nī ndíí nguɛ́ɛ́ ꞌcuuⁿꞌmáⁿ nī. 15 Ní ndúúti chi diíⁿ nī ꞌtuucā mar ꞌáámá ꞌiiⁿꞌyāⁿ nguɛ́ɛ́ cuuvi caaⁿꞌmáⁿ yā nuuⁿndi yeⁿꞌé nī o nguɛ́ɛ́ nꞌdaacā idiíⁿ nī caati deenú yā chi ndísꞌtiī daiyá Dendyuūs ndísꞌtiī. Ní nguɛ́ɛ́ vɛ́ɛ́ nuuⁿndi yeⁿꞌé nī nguaaⁿ ꞌiiⁿꞌyāⁿ chi nguɛ́ɛ́ iꞌtéénu yā Ndyuūs ní nguɛ́ɛ́ nꞌdaacā idiíⁿ yā. Ní tanꞌdúúcā ꞌáámá ꞌííⁿnyúⁿ ngíí yáⁿꞌāa taachi maāiⁿ ꞌtiicá nī. 16 Ní candɛɛ́ nī nduudu cuaacu yeⁿꞌe Cristo nanááⁿ ꞌiiⁿꞌyāⁿ ti nduudu miiⁿ diiⁿ chi ꞌiiⁿꞌyāⁿ cuuvi cunduuchí yā cueⁿꞌe daāⁿmaⁿ caati ꞌúú ní cuuví yeenú taavi nguuvi chi ndaa Cristo taama vmnéⁿꞌēe. Ní deenú chi nguɛ́ɛ́ tandii rá diíⁿ nduꞌú ꞌúú ndíí nguɛ́ɛ́ nduu tandii rá diíⁿ ntiiⁿnyuⁿ yeⁿꞌé Ndyuūs nguaaⁿ ndísꞌtiī. 17 Ndúúti chi ncaꞌá vida yeⁿꞌe maáⁿ ní chꞌiī caavā ntiiⁿnyuⁿ yeⁿꞌé Ndyuūs, tuuꞌmi ní cáávā chi ꞌāā itéénu nī Ndyuūs ní diíⁿ nī ntiiⁿnyuⁿ yeⁿꞌé yā, tanducuéⁿꞌē chuū ní tanꞌdúúcā ꞌáámá ofrenda nanááⁿ Ndyuūs ꞌtíícā. Ní ꞌúú ní yeenú, ní cuuvi yeenú ndúúcu nī. 18 ꞌTiicá ntúūⁿ cáávā chuū ndísꞌtiī cuuvi yeenú nī. Ní cuuvi yeenú ntúuⁿ nī nduucú.

19 Nduuti chi Señor Jesucristo neⁿꞌé yā chi ꞌúú idiíⁿ chiiⁿ chi nadacadíínuúⁿ chi diíⁿ, tuuꞌmi ní caⁿꞌá dichoꞌó Timoteo nanááⁿ ndísꞌtiī nguuvi chi cuchiī. Maaⁿ níícú cuuvi yeenú taachi cadiinúúⁿ ní cuuvi deenú táácā snee ndísꞌtiī. 20 Ti nguɛ́ɛ́ vɛ́ɛ́ táámá compañero yeⁿꞌé chi dáámá nadacadíínuuⁿ sa nduucú tanꞌdúúcā Timoteo miiⁿ. Ní nꞌdaacā idiiⁿ sa cuidado yeⁿꞌé ndísꞌtiī. 21 Nꞌdeee nꞌdáí ꞌiiⁿꞌyāⁿ iꞌnuúⁿ yā chi nꞌdaacā yeⁿꞌē maáⁿ yā ní nguɛ́ɛ́ diíⁿ yā denduꞌū chi ntiiⁿnyuⁿ yeⁿꞌe Cristo Jesús. 22 Naati ndísꞌtiī ní deenú nī yeⁿꞌe Timoteo chi nꞌdaacā canee sa yeⁿꞌe nducuéⁿꞌē. Ní deenú nī chi saⁿꞌa miiⁿ tanꞌdúúcā daiyá chi dichííꞌvɛ sa ꞌúú, ꞌtíícā sa taachi ngaⁿꞌá ꞌnū evangelio chí nduudu ngai yeⁿꞌé Cristo. 23 Sáⁿꞌa ꞌcūū nadacadíínuúⁿ chi dichoꞌó saⁿꞌā nanááⁿ ndísꞌtiī naati neⁿꞌé cadiinuúⁿ vmnaaⁿ táácā ꞌcueenú asuntos yeⁿꞌé núúⁿ niiⁿyūⁿ. 24 Maaⁿ ní vɛ́ɛ́ confianza yeⁿꞌé ndúúcū Ndyuūs chi núúⁿ niiⁿyūⁿ cuuví ndaá maáⁿ ní nꞌdiichí ndísꞌtiī.

25 Ní nadicadíínúúⁿ ntúūⁿ chi dichoꞌó yeⁿꞌe ndísꞌtiī hermano Epafrodito. Saⁿꞌā miiⁿ idiiⁿ sa ntiiⁿnyuⁿ nduucú ní diiⁿ sá luchar nduucú. Saⁿꞌā miiⁿ ndísꞌtiī maáⁿ nī dichoꞌó nī saⁿꞌā nanaáⁿ chi cuuvi cunnee sa ꞌúú ndúúcū necesidades yeⁿꞌé. 26 Saⁿꞌā miiⁿ neené neⁿꞌe sa nꞌdiichi sa nducyaaca ndísꞌtiī ní neené nadacádíínuuⁿ sa yeⁿꞌe ndísꞌtiī caati ndísꞌtiī nꞌgiindiveéⁿ nī chí ngíítā sa. 27 Cuaacu nííⁿnyúⁿ chí nééné yaꞌai chiītā sa ti ꞌāā cháa ꞌcuūvī sa. Naati Ndyuūs ní yaꞌāī ꞌiinú yā saⁿꞌā ní nguɛ́ɛ́ dámaāⁿ saⁿꞌā miiⁿ caati ndúúcū ꞌúú ti ꞌúú nguɛɛ cunee ndaāchī yiinú cá dɛꞌɛ̄ ca chi canéé yeⁿꞌé. 28 Ní cáávā chuū neⁿꞌe cá dichoꞌó saⁿꞌā Epafrodito nanááⁿ ndísꞌtiī ní ndísꞌtiī cuuvi yeenú nī taachi snaaⁿ nī taama vmnéⁿꞌēe saⁿꞌā. Ní ꞌtiicá ntúūⁿ ꞌúú nguɛ́ɛ́ nadacadíínuuⁿ ndaachí yeⁿꞌé nī. 29 Ní taachi ndaa sa nanááⁿ ndísꞌtiī, ꞌcuáaⁿ nī Epafrodito ndúúcū vaadī yeenú caati saⁿꞌā miiⁿ hermano yeⁿꞌé nī ti iꞌtéénu sa Señor Jesucristo yeⁿꞌe yú. Ní diíⁿ nī honrar tanáⁿꞌa yā chi diíⁿ yā ntiiⁿnyuⁿ yeⁿꞌé Ndyuūs tanꞌdúúcā saⁿꞌā miiⁿ. 30 Caati ꞌáárá chí nééné chíítā sa ni ꞌāā cháa ꞌcuūvī sa cucáávā chi diiⁿ sa ntiiⁿnyuⁿ yeⁿꞌē Cristo, nguɛ́ɛ́ nadacádíínuuⁿ sa yeⁿꞌe vida yeⁿꞌe maāⁿ sa ndúúcū peligro chi cuuvi ꞌcuūvī sa caati dichííꞌvɛ̄ sa ꞌúú. Ní diiⁿ sa ntiiⁿnyuⁿ yeⁿꞌé chi ndísꞌtiī maáⁿ nī neⁿꞌé nī diíⁿ nī naati nguɛɛ cuuvi diíⁿ nī.