2
ꞌÚú neⁿꞌé chi ndísꞌtiī cadíínuuⁿ nī chi díítuú diíⁿ ntiiⁿnyuⁿ caavā ndísꞌtiī ní cáávā ꞌiiⁿꞌyāⁿ chi snéé na yáāⁿ Laodicea, ní cáávā ꞌiiⁿꞌyāⁿ chi nguɛ́ɛ́ nꞌdiichi tandii yā naáⁿ. 2 Neⁿꞌé chi nducyáácá ꞌiiⁿꞌyāⁿ sꞌeeⁿ ndúúcū ndísꞌtiī cuuvi diitú nī ndúúcū staava yeⁿꞌé nī. Ní nguɛ́ɛ́ ꞌvaꞌá nī. Ní dáámá nadacadíínuuⁿ nī, ni dineⁿꞌé nī ꞌaamá nī taama nī. Ní deenu cá nī yeⁿꞌe nducuéⁿꞌē vaadī cuaacu, ní diituu caneé nī ndúúcū chi iꞌtéénu nī. Ní ꞌíícú cuuvi deenu cá nī chiiⁿ chi Ndyuūs cunuuⁿ nꞌdeꞌéí yā chi yeⁿꞌe maaⁿ Jesucristo miiⁿ. Ní ꞌíícú cuuvi diituu cá nī ndúúcū chi iꞌtéénu nī yeⁿꞌe Jesucristo. 3 Caati ndúúcū Cristo miiⁿ tanducuéⁿꞌē chi vɛ́ɛ́ yeⁿꞌē vaadī deenu ndúúcū vaadī cadiinuuⁿ ní yeⁿꞌé yā ndúúcū nducueⁿꞌē cosa chi cunúúⁿ nꞌdeꞌei yeⁿꞌe nducyáácá ꞌiiⁿꞌyāⁿ. 4 Ní nducuéⁿꞌē chuū ngaⁿꞌá chi nguɛ́ɛ́ duꞌū vɛɛ canncheꞌei ndísꞌtiī ndúúcū nduūdū yaadi yeⁿꞌé yā. 5 Ní chuū ngaⁿꞌá caati ꞌáárá chi nguɛɛ caneé ndúúcū ndísꞌtiī cuuvi deenú nī chi nadacadíínuúⁿ taavi yeⁿꞌe ndísꞌtiī. Ní yeenú taavi ꞌúú taachi nꞌgiindiveéⁿ chi nꞌdaacā idiíⁿ nī ní díítuu caneé nī ndúúcū nduudu cuaacu yeⁿꞌe Cristo chi iꞌtéénu nī.6 Maaⁿ ní tanꞌdúúcā chi iꞌtéénu nī Señor Jesucristo yeⁿꞌē yú ꞌtiicá ntúūⁿ ndísꞌtiī chi yeⁿꞌé Cristo canéé chi nꞌgɛɛtinéé nꞌdaacá nī cáávā Señor Jesucristo yeⁿꞌē yú nginnee yā ndísꞌtiī. 7 Ní canéé chi diiⁿ nꞌdaacá nī ndúúcū nducuéⁿꞌē caati cuꞌtéénu cá nī Jesucristo. Ní cuꞌtéénu cá nī nguuvi nguuvi tanꞌdúúcā chi chꞌeēⁿ ndísꞌtiī. Ní nguɛ́ɛ́ ndaacadaamí nī yeⁿꞌe chi iꞌteenú nī. Ní cuéⁿꞌé daāⁿmaⁿ ngaⁿꞌá nī, gracias Ndyuūs ti yeⁿꞌé yā ndísꞌtiī.
Yeⁿꞌé vida ngai yeⁿꞌé ꞌiiⁿꞌyāⁿ chi yeⁿꞌe Cristo
8 Maaⁿ ní diíⁿ nī cuidado ndísꞌtiī yeⁿꞌe maáⁿ nī chí mar ꞌáámá saⁿꞌā nguɛ́ɛ́ castaⁿꞌa sa ndísꞌtiī caavā vaanicadíínuūⁿ chꞌɛɛtɛ́ yeⁿꞌē sa ndúúcū nduudu yaadi yeⁿꞌē sa. Ní nguɛ́ɛ́ canncheꞌei sa ndísꞌtiī caati nduudu yeⁿꞌē sa chí staꞌa sa yeⁿꞌe vaanicadíínūuⁿ yeⁿꞌe ꞌiiⁿꞌyāⁿ ní yeⁿꞌe costumbre yeⁿꞌé ꞌiiⁿꞌyāⁿ yeⁿꞌé iⁿꞌyeēⁿdī. Ndíí nguɛ́ɛ́ staꞌa sa yeⁿꞌē vaanicadíínūuⁿ yeⁿꞌé Cristo.
9 Caati nducuéⁿꞌē chi vɛ́ɛ́ ní yeⁿꞌe Ndyuūs ndúúcū daiya yā Jesucristo. Jesucristo miiⁿ ní Ndyuūs ꞌyā ní dáámá yā ndúúcū chiidá yā. ꞌTííca yā. 10 Ní nducuéⁿꞌē chi vɛ́ɛ́ ní yeⁿꞌe ndísꞌtiī caati ndísꞌtiī ní yeⁿꞌe Cristo ndísꞌtiī. Jesucristo miiⁿ ní ndíí tiiⁿ yā yeⁿꞌe tanducuéⁿꞌē ꞌiiⁿꞌyāⁿ ní yeⁿꞌe tanducuéⁿꞌē ꞌiiⁿntyéⁿꞌē yeⁿꞌe tanducuéⁿꞌē nación ní yeⁿꞌe tanducuéⁿꞌē poder yeⁿꞌe yááⁿnꞌguiinūuⁿ chi vɛ́ɛ́ na iⁿꞌyeeⁿdí ꞌcūū. 11 Ndísꞌtiī nguɛ́ɛ́ ꞌiiⁿꞌyāⁿ circuncidado yā na cuerpo yeⁿꞌé yā. Naati cáávā chi ndísꞌtiī ní yeⁿꞌe Jesucristo ndísꞌtiī, Cristo ní diíⁿ yā cuenta chi ndísꞌtiī tanꞌdúúcā ꞌiiⁿꞌyāⁿ chí circuncidado yā ndísꞌtiī taachi Jesucristo nadanguáⁿꞌai yā ndísꞌtiī yeⁿꞌe poder yeⁿꞌe nuūⁿndī chi vɛ́ɛ́ na cuerpo yeⁿꞌé nī. 12 Ní taachi chɛɛdinuūⁿniⁿ yā ndísꞌtiī, tuuꞌmi ní caneé nī tanꞌdúúcā chí chꞌɛɛchí nī na yáinyāⁿ ndúúcū Cristo ní caneé nī tanꞌdúúcā chi nadacueéⁿ nī yeⁿꞌē nguaaⁿ tináⁿꞌā ndúúcū Cristo. ꞌTííca rā váá caati iꞌtéénu nī poder yeⁿꞌe Ndyuūs chi diiⁿ chi nacueeⁿ Jesucristo yeⁿꞌē nguaaⁿ tináⁿꞌā. 13 Ní tiempo chi chóꞌōo espíritu yeⁿꞌe ndísꞌtiī ní nꞌdiī cucáávā nuuⁿndi chi diíⁿ nī. Ní nguɛ́ɛ́ ndísꞌtiī ꞌiiⁿꞌyāⁿ circuncidado yā ndísꞌtiī. Naati maaⁿ ní Ndyuūs tee yā vida cueⁿꞌe daāⁿmaⁿ ndísꞌtiī dáámá dáámá ndúúcū Cristo ti Ndyuūs nadanchꞌɛɛcú yā yeⁿꞌē tanducuéⁿꞌē nuuⁿndi yeⁿꞌé nī. 14 Cuááⁿ vmnaaⁿ canee yú ndúúcū nducuéⁿꞌē cuenta yeⁿꞌe nuuⁿndi yeⁿꞌe yú ti nguɛɛ diiⁿ yú tanꞌdúúcā chi ngaⁿꞌa ley yeⁿꞌé Ndyuūs. Ní cáávā ley miiⁿ ní cuenta yeⁿꞌe nuuⁿndi yeⁿꞌe yú diiⁿ condenar sꞌuuúⁿ. Naati Cristo nadííꞌvɛ yā ꞌáámá vmnéⁿꞌēe cuenta yeⁿꞌe nuuⁿndi yú taachi chꞌīi yā na cruz cáávā sꞌuuúⁿ. Ní cáávā chi chꞌīi yā cáávā sꞌuuúⁿ ní tanꞌdúúcā chi nadatuūví yā ley miiⁿ ti nguɛ́ɛ́ cuuvi condenar sꞌuuuⁿ. 15 Ní taachi Cristo chꞌīi yā na cruz cuchɛɛ́ yā yeⁿꞌe nducuéⁿꞌē ꞌiiⁿntyéⁿꞌē yeⁿꞌe espíritu chi nguɛ́ɛ́ nꞌdaacā ndúúcū poder yeⁿꞌé yā. Ní diíⁿ yā chi ꞌcuinaaⁿ espíritu sꞌeeⁿ nanááⁿ nducyáácá espíritus. Ní Cristo chꞌiⁿꞌí yā nducyáácá ꞌiiⁿꞌyāⁿ chi chɛ́ɛ yā yeⁿꞌe espíritus.
Inꞌnuúⁿ nī nducuéⁿꞌē chi yeⁿꞌē vaꞌai chɛɛti nguuvi
16 Maaⁿ ní nguɛ́ɛ́ nacadíínuuⁿ nī yeⁿꞌe ꞌiiⁿꞌyāⁿ chi diíⁿ yā condenar ndísꞌtiī caavā denduꞌū chi nguɛ́ɛ́ chi ngeꞌé nī ndúúcū chi ngiꞌi nī o ndúúcū yeⁿꞌē chi diíⁿ nī taachi vɛ́ɛ́ ꞌviicu sꞌeeⁿ ndúúcū ꞌviicu yeⁿꞌe ꞌiiyū ngai ndúúcū ꞌviicu yeⁿꞌe sábado chí nguuvi chi ntaavíꞌtuunúūⁿ ꞌiiⁿꞌyāⁿ. 17 Nducuéⁿꞌē ꞌviicu ndúúcū chi diíⁿ ꞌiiⁿꞌyāⁿ ní chꞌiⁿꞌi yeⁿꞌe Cristo chi cuchiī, naati nducuéⁿꞌē chuū cuaacu nííⁿnyúⁿ ngaⁿꞌā chi yeⁿꞌe Cristo miiⁿ. 18 Nguɛ́ɛ́ nadacadíínuuⁿ nī yeⁿꞌe ꞌiiⁿꞌyāⁿ chi diíⁿ yā condenar ndísꞌtiī caati ngaⁿꞌa yā chí nꞌdiichí yā visiones. ꞌIiⁿꞌyāⁿ sꞌeeⁿ nadacadíínuuⁿ yā chi nꞌgɛɛtɛ maáⁿ yā caavā cosas chi nꞌdiichí yā. ꞌIiⁿꞌyāⁿ sꞌeeⁿ ngaⁿꞌa yā chi canee chi ndiicuúⁿ nī maáⁿ nī ní dichꞌɛɛtɛ́ nī ángeles. ꞌIiⁿꞌyāⁿ sꞌeeⁿ diíⁿ yā cosas chi nguɛ́ɛ́ deenú yā yeⁿꞌē ní nꞌgɛɛtɛ maáⁿ yā caavā chi nadacadíínuuⁿ yā yeⁿꞌe cosas chi candɛɛ̄ yeⁿꞌē maaⁿ tiíⁿ yā. 19 ꞌIiⁿꞌyāⁿ sꞌeeⁿ nguɛ́ɛ́ caneé yā ndúúcū nduudu cuaacu yeⁿꞌé Jesucristo. Cristo miiⁿ ní tiiiⁿ yeⁿꞌe cuerpo yeⁿꞌé yā chi ꞌiiⁿꞌyāⁿ chi iꞌtéénu yā ꞌyā. Ní Cristo miiⁿ ní diíⁿ yā chi nducuéⁿꞌē ꞌiiⁿꞌyāⁿ yeⁿꞌé yā ní nꞌgiita yā caati iꞌtéénu cá yā yeⁿꞌé yā. Ní Cristo miiⁿ diíⁿ yā chi nducyaaca ꞌiiⁿꞌyāⁿ yeⁿꞌé yā caneé yā tanꞌdúúcā chi nduuvi daamá yā tanꞌdúúcā cuerpo yeⁿꞌe yú nduuvidaama yeⁿꞌē ndúúcū ꞌiini ndíí nduū. ꞌTíícā diíⁿ Cristo tanꞌdúúcā chi neⁿꞌe Ndyuūs.
20 Maaⁿ ní ndísꞌtiī ꞌāā chꞌīi nī taachi chꞌiī Jesucristo. Ní canée nī libre yeⁿꞌe reglas yeⁿꞌe iⁿꞌyeeⁿdí ꞌcūū. Maaⁿ ní, ¿dɛ́ꞌɛ̄ cuuvi chi nꞌgɛɛtinéé ndísꞌtiī tanꞌdúúcā chi yeⁿꞌe iⁿꞌyeeⁿdí ꞌcūū ndísꞌtiī? ¿Dɛ́ꞌɛ̄ cuuvi chi iꞌtéénu nī reglas yeⁿꞌē iⁿꞌyeeⁿdí ꞌcūū chi ngaⁿꞌa ꞌtíícā? 21 Nguɛ́ɛ́ tuuꞌví nī chuū, nguɛ́ɛ́ cheꞌé nī cosa ꞌcūū, ní nguɛ́ɛ́ cutaꞌá nī cosa ꞌcūū na taꞌá nī. 22 Ní reglas miiⁿ chííⁿ chi ꞌiiⁿꞌyāⁿ dinꞌdái yā ní chííⁿ chí caꞌcueeⁿ yā ꞌiiⁿꞌyāⁿ. Nducuéⁿꞌē reglas ꞌcūū nguɛ́ɛ́ dichííꞌvɛ̄ caati Ndyuūs caꞌá yā ꞌiiⁿꞌyāⁿ cosas caati cuuvi cheꞌé yā yeⁿꞌē. 23 Cuaacu chi ꞌiiⁿꞌyāⁿ staꞌá yā reglas miiⁿ tanꞌdúúcā chi chꞌiⁿꞌi chi yeⁿꞌē vaadī deenu yeⁿꞌé ꞌiiⁿꞌyāⁿ. Reglas miiⁿ chꞌiⁿꞌi chi yeⁿꞌē religión chi ngaⁿꞌā chi ꞌiiⁿꞌyāⁿ canéé chí dichꞌɛɛtɛ́ yā ángeles. Ní reglas miiⁿ chꞌiⁿꞌī chí ꞌiiⁿꞌyāⁿ canéé chí ndiicuúⁿ yā maáⁿ yā ní chꞌiⁿꞌi chi ꞌiiⁿꞌyāⁿ canéé chí ꞌcueenú yā cuuvi na cuerpo yeⁿꞌe yā. Naati nguɛ́ɛ́ dichííꞌvɛ̄ mar ꞌáámá regla yeⁿꞌē chí diiⁿ ayudar ꞌiiⁿꞌyāⁿ caati nguɛɛ dinuuⁿndí yā tanꞌdúúcā chi neⁿꞌe diiⁿ cuerpo yeⁿꞌé yā.