3
Maaⁿ ní chi ndísꞌtiī ní ꞌāā nduuchí nī yeⁿꞌē nguaaⁿ tináⁿꞌā dáámá ndúúcū Jesucristo, ndísꞌtiī inꞌnuúⁿ nī denduꞌū chi yeⁿꞌē vaꞌai chɛɛti nguuvi naachi Cristo vɛɛ́ yā lado yeⁿꞌe honor yeⁿꞌē Ndyuūs chí lado tá cuaacú yā. 2 Ní nadacadíínuuⁿ nī yeⁿꞌe nducuéⁿꞌē chi yeⁿꞌe Ndyuūs ní nguɛ́ɛ́ yeⁿꞌē nducuéⁿꞌē chi vɛ́ɛ́ iⁿꞌyeeⁿdí ꞌcūū. 3 ꞌTíícā ndísꞌtiī ní chꞌīi nī dáámá ndúúcū Cristo ní caneé nī tanꞌduucā chi chꞌiī cuerpo yeⁿꞌé nī. Maaⁿ ní canúúⁿ nꞌdeꞌei vida yeⁿꞌé nī ndúúcū Cristo nanááⁿ Ndyuūs. 4 Maaⁿ vida yeⁿꞌe yú ní cuaacu chí Cristo. Ní taachi ndaa Cristo taama vmnéⁿꞌēe tuuꞌmi ní sꞌuuúⁿ ndaa yú nduucú yā ní vɛ́ɛ́ parte yeⁿꞌe yú nduucú yā na vaꞌai chɛɛti nguuvi.Yeⁿꞌe vida ndiicúū yeⁿꞌē yú ní yeⁿꞌe vidā ngai yeⁿꞌē yú
5 Maaⁿ ní diiⁿ yú cuenta chi chꞌiī cuerpo yeⁿꞌe yú ní ꞌāā ntɛ́ɛ́ diiⁿ yú nuuⁿndi. Nꞌdiichí nī, vɛ́ɛ́ nuuⁿndi nguaáⁿ nī. Neⁿꞌé nī ꞌáámá saⁿꞌā o ꞌaama nꞌdaataá chi nguɛ́ɛ́ yeⁿꞌé nī. Ní neⁿꞌé nī diíⁿ nī cosa chi nguɛ́ɛ́ yeⁿꞌé Ndyuūs. Ní neⁿꞌé nī nꞌdiichí nī ꞌáámá nꞌdaataá o ꞌáámá sáⁿꞌā chi nguɛ́ɛ́ yeⁿꞌé nī. Ní neⁿꞌé nī denduꞌū chi nguɛ́ɛ́ yeⁿꞌe nī. ꞌTiicá nī. Ní canee nī tanꞌdúúcā chi iꞌtéénu nī ídolos chi imágenes. 6 Nducuéⁿꞌē chuū ní nuuⁿndi. Ní Ndyuūs diíⁿ yā castigar nducyáácá ꞌiiⁿꞌyāⁿ chi nguɛ́ɛ́ diíⁿ yā tanꞌdúúcā chi ngaⁿꞌa yā. 7 ꞌTíícā ꞌāā dinuuⁿndí ndísꞌtiī tiempo chi ꞌāā chóꞌōo. 8 Maaⁿ ní ꞌāā ntɛ́ɛ́ diíⁿ nī nuuⁿndi. Nguɛ́ɛ́ ditaáⁿ nī, nguɛ́ɛ́ caaⁿꞌmaⁿ taáⁿ nī. Nguɛ́ɛ́ diíⁿ nī cosas chi nguɛɛ nꞌdaācā ꞌaamá nī ndúúcū taamá nī. Nguɛ́ɛ́ caaⁿꞌmáⁿ nī ꞌiiⁿꞌyāⁿ chííⁿ chi nguɛ́ɛ́ nꞌdaāca chi maáⁿ yā diíⁿ yā. Nguɛ́ɛ́ caaⁿꞌmáⁿ nī mar ꞌáámá nduudu chi nguɛ́ɛ́ nꞌdaacā. 9 Nguɛ́ɛ́ caaⁿꞌmáⁿ nī nduudu yaadi ꞌaama nī ndúúcū taama nī. Nguɛ́ɛ́ diíⁿ nī ꞌtúúcā caati ꞌāā dicuenta nī tanꞌdúúcā chi ꞌāā chꞌiī cuerpo yeⁿꞌé nī ndúúcū nducuéⁿꞌē chi nguɛ́ɛ́ nꞌdááca chi ꞌāā diíⁿ nī. 10 Ní maaⁿ ní cuerpo yeⁿꞌé nī ní tanꞌdúúcā cuerpo chi ngai chi Ndyuūs dinꞌdái yā. Ní nguuvi nguuvi diíⁿ yā chi ndísꞌtiī cuuví nī tanꞌdúúcā Ndyuūs, ꞌtiicá nī. Ní ꞌíícú Ndyuūs diíⁿ yā chi cuuvi deenu cá nī yeⁿꞌé Ndyuūs. 11 Caati nanááⁿ Jesucristo miiⁿ nguɛ́ɛ́ dɛꞌɛ̄ vɛɛ nduuti chi ꞌiiⁿꞌyāⁿ nguɛ́ɛ́ yeⁿꞌē ndaata ꞌiiⁿꞌyāⁿ Israel o ꞌiiⁿꞌyāⁿ chi yeⁿꞌe ndaata ꞌiiⁿꞌyāⁿ Israel. Nguɛ́ɛ́ dɛꞌɛ̄ vɛɛ nduuti chi ꞌiiⁿꞌyāⁿ ní circuncidado yā o nguɛ́ɛ́ circuncidado yā. Nguɛ́ɛ́ dɛꞌɛ̄ vɛɛ nduuti chi ꞌiiⁿꞌyāⁿ tanꞌdúúcā chi snéé yúúní, o nduuti chi ꞌiiⁿꞌyāⁿ tanꞌdúúcā chi ꞌiitī ꞌcuɛɛti. Nguɛ́ɛ́ dɛꞌɛ̄ vɛɛ nduuti chi ꞌiiⁿꞌyāⁿ chi dichííꞌvɛ̄ ꞌiivi yeⁿꞌé yā, o ꞌiiⁿꞌyāⁿ chi snéé libre yā. Dámaāⁿ dichííꞌvɛ̄ chi ꞌiiⁿꞌyāⁿ sꞌeeⁿ ní yeⁿꞌe Cristo ní Cristo caneé yā nduucú yā.
12 Ndísꞌtiī ní yeⁿꞌé Ndyuūs ndísꞌtiī. Ní Ndyuūs dineⁿꞌé yā ndísꞌtiī ní nndɛɛvɛ yā ndísꞌtiī chi cuuvi yeⁿꞌé yā ndísꞌtiī. Maaⁿ ní ndísꞌtiī canee chi diyaꞌáí nī ꞌiiⁿꞌyāⁿ ní dinꞌdaāca cá nī. Nguɛ́ɛ́ dichꞌɛɛtɛ́ nī maáⁿ nī naati diíⁿ nī nducuéⁿꞌē ndúúcū vaadī ndiicúúⁿ. 13 Ní nginneé nī ꞌaamá nī taama nī. Ní cuchɛɛ́ nī yeⁿꞌe nducuéⁿꞌē. Ní nadachꞌɛɛcú nī ꞌiiⁿꞌyāⁿ chí diíⁿ yā ꞌáámá falta ndúúcu nī. Ní tanꞌdúúcā chi Cristo nadachꞌɛɛcú yā nuuⁿndi yeⁿꞌé nī, ꞌtiicá ntúūⁿ nadachꞌɛɛcú nī yeⁿꞌe ꞌaama nī ndúúcū taama nī. 14 Nguaaⁿ nducuéⁿꞌē chí diíⁿ nī, dineⁿꞌe taavi cá nī ꞌiiⁿꞌyāⁿ ti taachi diíⁿ nī ꞌtúúcā caneé nī tanꞌdúúcā chi nduuvidaamá nī yeⁿꞌē nducuéⁿꞌē chi vɛ́ɛ́. Ní diíⁿ nī cumplir nducuéⁿꞌē denduꞌū. 15 Ní vaadī ꞌdiiíⁿ chi Ndyuūs itée yā ndísꞌtiī na staava yeⁿꞌé nī canee chi chꞌiⁿꞌī ndísꞌtiī nducuéⁿꞌē chi diíⁿ nī caati Ndyuūs yaaꞌví yā nducyáácá ndísꞌtiī chi cuuvi yeⁿꞌé nī vaadī ꞌdiīiⁿ miiⁿ. Ní nducyáácá nī ní caneé nī tanꞌdúúcā ꞌáámá cuerpo nūuⁿ, ꞌtiicá nī. Maaⁿ ní caꞌá nī gracias Ndyuūs caavā chuū.
16 Ní ꞌáámá canéé nꞌdaacā na staava yeⁿꞌé nī nducuéⁿꞌē nduudu cuaacu chí nꞌdaacā taavi ní yeⁿꞌe Ndyuūs. Caꞌcueéⁿ nī ní chꞌiⁿꞌí nī ꞌáámá nī taama nī ndúúcū nducuéⁿꞌē vaadī deenu. Ngiitá nī salmos ndúúcū himnos ndúúcū canciones chi ngaⁿꞌā yeⁿꞌé Ndyuūs. Ní ndúúcū núúⁿmáⁿ staava yeⁿꞌé nī ncaꞌá nī gracias Ndyuūs. 17 Níícú nducuéⁿꞌē cosa chi diiⁿ nī ꞌáárá chí caaⁿꞌmáⁿ nī o diíⁿ nī ntiiⁿnyuⁿ, diíⁿ nī nducuéⁿꞌē caavā Señor Jesús ní ncaꞌá nī gracias Ndyuūs Chiida yú cáávā Cristo.
Tanꞌdúúcā chi canee chi diiⁿ yú ti yeⁿꞌe Cristo sꞌuuúⁿ
18 Ndísꞌtiī nꞌdaataá chi ꞌníínívaacu, cuꞌteenú nī yeⁿꞌe isaⁿꞌā yeⁿꞌé nī caati ꞌtíícā canee chi diíⁿ nī ti yeⁿꞌé Ndyuūs ndísꞌtiī. 19 ꞌTiicá ntúūⁿ isaⁿꞌa yeⁿꞌé yā, dinéⁿꞌe nī nꞌdaataá yeⁿꞌé nī ní nguɛ́ɛ́ nduuvi taáⁿ nī ndúúcū nꞌdaataá yeⁿꞌé nī. 20 Ndísꞌtiī daiyá yā chi yeⁿꞌe Cristo ꞌcaandiveéⁿ nī yeⁿꞌe chiidá nī ní chɛɛcu nī yeⁿꞌe tanducuéⁿꞌē caati ꞌtíícā neⁿꞌe Ndyuūs. 21 Ní ndísꞌtiī chi vɛ́ɛ́ daiyá nī, nguɛ́ɛ́ diíⁿ nī chi nduuvi táaⁿ daiyá nī caati cuayiivi ní nguɛ́ɛ́ cuꞌtéénu yā chɛɛ chi caaⁿꞌmáⁿ nī yeⁿꞌe yā. 22 Ndísꞌtiī chi dichííꞌvɛ̄ ꞌiiⁿꞌyāⁿ, ꞌcaandiveéⁿ nī yeⁿꞌē tanducuéⁿꞌē chi ngaⁿꞌā ꞌiiví nī yeⁿꞌē iⁿꞌyeeⁿdí ꞌcūū. Nguɛ́ɛ́ diíⁿ nī tanꞌdúúcā chi neⁿꞌé yā dámaaⁿ taachi nanáaⁿ yā ndísꞌtiī. Ní ꞌiiví nī cuuvi deenú yā chi nꞌdaacā idiíⁿ nī, naati diíⁿ nī nducuéⁿꞌē ntiiⁿnyuⁿ ndúúcū núúⁿmáⁿ staava yeⁿꞌé nī. Ní ꞌvaꞌá nī Ndyuūs. 23 Ní tanducuéⁿꞌē chi diíⁿ nī, diíⁿ nī ndúúcū núúⁿmáⁿ staava yeⁿꞌé nī. Ní diíⁿ nī ntiiⁿnyuⁿ miiⁿ tanꞌdúúcā chi ntiiⁿnyuⁿ yeⁿꞌé Ndyuūs ní nguɛ́ɛ́ ntiiⁿnyuⁿ yeⁿꞌē ꞌiiví nī. 24 Ní ndísꞌtiī deenú nī chi cuuvi cutaꞌá nī yeⁿꞌe chi vɛ́ɛ́ yeⁿꞌé nī chííⁿ chi tée Cristo ndísꞌtiī. Cuaacu chi ndísꞌtiī dichííꞌvɛ nī Jesucristo ní cuaacu nííⁿnyúⁿ Cristo ní ꞌiiví nī. 25 Ní ꞌiiⁿꞌyāⁿ chi nguɛ́ɛ́ nꞌdaāca idiíⁿ yā caⁿꞌá yā cutaꞌá yā ná dííꞌvɛ yā yeⁿꞌē chi diíⁿ yā chi nguɛ́ɛ́ nꞌdaācā. Ndyuūs ꞌāā daamá nūuⁿ diíⁿ yā tratar ndúúcū nducyáácá ꞌiiⁿꞌyāⁿ.