Ndyuūs dichóꞌo yā Pablo chi ngaⁿꞌa yā evangelio chí nduudu ngai yeⁿꞌe Jesucristo nanááⁿ ꞌiiⁿꞌyāⁿ chi nguɛ́ɛ́ yeⁿꞌe ndaata Israel
3
Cáávā chuū ꞌúú Pablo caneé preso ná vácūū ti dichííꞌvɛ ꞌúú Jesucristo ní ngaⁿꞌá nduudu cuaacu yeⁿꞌé yā cucáávā ndísꞌtiī chi nguɛɛ yeⁿꞌe ꞌiiⁿꞌyāⁿ yeⁿꞌē ndaata Israel. Ní ngaⁿꞌanguaꞌá cáávā ndísꞌtiī. 2 Cuaacu nííⁿnyúⁿ ꞌāā deenú nī chi Ndyuūs chi nꞌdai taavi cá yā dichóꞌo yā ꞌúú chi ngaⁿꞌá ngīi ndísꞌtiī chi Ndyuūs neⁿꞌe taavi cá yā ndísꞌtiī. 3 Ndyuūs chꞌiⁿꞌí yā ꞌúú denduꞌū yeⁿꞌe yā chi canúúⁿ nꞌdeꞌei ní diíⁿ yā chi deenú chi canúúⁿ nꞌdeꞌei tanꞌdúúcā chi ꞌāā dinguúⁿ yeⁿꞌé nī ndúúcū duūꞌvī nduudu. 4 Ní taachi ndísꞌtiī chꞌeéⁿ nī caacá ꞌcūū chídinguúⁿ tuuꞌmi ní cuuvi deenú nī chi ꞌúú deenú chiiⁿ chi canúúⁿ nꞌdeꞌei yeⁿꞌé Ndyuūs, chiiⁿ chi yeⁿꞌē Jesucristo. 5 Ní tiempo chi ꞌāā chóꞌōo Ndyuūs nguɛ́ɛ́ chꞌiⁿꞌí yā mar ꞌáámá ꞌiiⁿꞌyāⁿ nduudu yeⁿꞌé yā chi canúúⁿ nꞌdeꞌei naati tiempo miiⁿ Ndyuūs chꞌiⁿꞌí yā chuū apóstoles chi didɛɛvɛ́ yā yeⁿꞌe nuuⁿndi yeⁿꞌé yā ndúúcū profetas chi ngaⁿꞌa nduudu yeⁿꞌé yā cucáávā Espíritu Nꞌdai yeⁿꞌé yā. 6 Ní chuū chi canúúⁿ nꞌdeꞌei cáávā nduudu cuaacu chí nduudu ngai yeⁿꞌe Jesucristo. ꞌIiⁿꞌyāⁿ chi nguɛ́ɛ́ yeⁿꞌe ndaata Israel chi yeⁿꞌe Jesucristo, ꞌiiⁿꞌyāⁿ sꞌeeⁿ ní cuuvi yeⁿꞌé yā dáámá dáámá ndúúcū chi cuuvi ꞌiiⁿꞌyāⁿ yeⁿꞌe Israel. Ní dáámá canée yā ndúúcū ꞌiiⁿꞌyāⁿ Israel. Ní sneé yā tanꞌdúúcā ꞌáámá cuerpo yeⁿꞌe Cristo. Ní vɛ́ɛ́ ꞌáámá parte yeⁿꞌé yā yeⁿꞌe compromiso chi Ndyuūs diíⁿ yā. 7 Ní ꞌúú nguɛ́ɛ́ nꞌdaaca ca ꞌúú naatí Ndyuūs tee yā privilegio ꞌúú chi caaⁿꞌmáⁿ nduudu yeⁿꞌe yā cucáávā poder yeⁿꞌé yā. 8 Ní ꞌúú chí ꞌlííⁿ chuundí nguaaⁿ nducyáácá ꞌiiⁿꞌyāⁿ chi yeⁿꞌé Ndyuūs naati Ndyuūs tee yā ꞌúú privilegio ꞌcūū chi ꞌúú ngaⁿꞌá nduudu cuaacu yeⁿꞌé yā nanááⁿ ꞌiiⁿꞌyāⁿ chi nguɛ́ɛ́ yeⁿꞌē ndaata judíos chi Israel. Ní ngaⁿꞌá nduudu cuaacu yeⁿꞌē nꞌdeee nꞌdáí vaadī ꞌcuiica taavi ca yeⁿꞌe Cristo. Ní nguɛ́ɛ́ cuuvi diiⁿ yú cuenta yeⁿꞌe vaadī ꞌcuiica miiⁿ. 9 Ní ngaⁿꞌá nduudu cuaacu yeⁿꞌé yā. Ní ꞌíícú nducyaaca ꞌiiⁿꞌyāⁿ cuuvi deenu yā tanꞌdúúcā Ndyuūs caⁿꞌá yā diíⁿ yā yeⁿꞌe chi canúúⁿ nꞌdeꞌei yeⁿꞌé yā. Ní Ndyuūs chi dinꞌdái yā nducuéⁿꞌē chi vɛ́ɛ́ ní chiꞌneeⁿ nꞌdeꞌéí yā chuū nducuéⁿꞌē tiempo chi ꞌāā chóꞌōo. 10 Ní ꞌtíícā diíⁿ Ndyuūs caati maaⁿ ní nducyáácá chi canée na vaꞌai chɛɛti nguuvi chí ngaⁿꞌā ntiiⁿnyuⁿ o chi ꞌiiⁿntyéⁿꞌē cuuvi nꞌdiichi nducuéⁿꞌē vaadī deenu yeⁿꞌé Ndyuūs cucáávā vaadī nꞌgiinu yeⁿꞌé Ndyuūs chi diíⁿ yā ndúúcū ꞌiiⁿꞌyāⁿ ná iⁿꞌyeeⁿdí ꞌcūū, ꞌiiⁿꞌyāⁿ chi iꞌtéénu yā Cristo ní caⁿꞌá yā yaācū yeⁿꞌé yā. 11 Ní ꞌtúúcā diiⁿ Ndyuūs ti tanꞌdúúcā chi neⁿꞌé yā diíⁿ yā ndii vmnááⁿ vmnaaⁿ. Ní diíⁿ yā chi cuaacu yeⁿꞌē cucáávā Jesucristo chi ꞌiivi yú. 12 Ní caavā chi sꞌuuúⁿ ní yeⁿꞌe Cristo sꞌuuúⁿ ní cáávā chi iꞌteenu yú Jesucristo, cuuví ndaā yú nanááⁿ Ndyuūs ndúúcū confianza. 13 Cáávā chuū ꞌúú diꞌcuíítūu ndísꞌtiī chi nguɛ́ɛ́ cuuvi ngáaⁿ nī cucaavā chi ꞌúú nꞌgeenú ngii ti chuū chi nꞌgeenú ngii ní cosa chi nꞌdaacā chi cuuví ndísꞌtiī ní canee chi yeenú nī.Cristo neⁿꞌé yā nducyaaca ꞌiiⁿꞌyāⁿ
14 Ní cucaavā chuū ꞌúú caꞌá gracias Ndyuūs ní ꞌúú ní ngiīntiiꞌyá nanááⁿ Ndyuūs Chiidá Señor Jesucristo yeⁿꞌē yú. 15 Ndyuūs ní Chiida nduucyaaca yú ní cuaacu Chiida nducyaaca ꞌiiⁿꞌyāⁿ yeⁿꞌé yā chi snéé nanguuvi, ꞌtiicá ntúūⁿ nducyaaca ꞌiiⁿꞌyāⁿ yeⁿꞌé yā chi snéé iⁿꞌyeeⁿdí ꞌcūū. 16 Caⁿꞌanguaꞌá ní ngiicá Ndyuūs Chiida yú chi yeⁿꞌē nééné nꞌdeee nꞌdáí chi nꞌdaacā yeⁿꞌé yā ní tée yā ndísꞌtiī fuerza na staava yeⁿꞌé nī chi ditiinú nī cucáávā Espíritu Nꞌdai yeⁿꞌé yā. 17 Ní ngiicá Ndyuūs chi Cristo canée yā na staava yeⁿꞌé nī cáávā chi iꞌtéénu nī Cristo. Ní ꞌíícú ndísꞌtiī snee diitú nī ndúúcū vaadī neⁿꞌe yeⁿꞌe Cristo. Ní snee nī tanꞌdúúcā chi vɛ́ɛ́ diiꞌyu na yáⁿꞌāa yeⁿꞌē ꞌáámá yáⁿꞌá. ꞌTíícā cunéé vaadī neⁿꞌe yeⁿꞌé Cristo na staava yeⁿꞌé nī. ꞌTíícā snee nī. 18 Tuuꞌmí ndísꞌtiī ndúúcū nducyaaca ꞌiiⁿꞌyāⁿ chi iꞌtéénu yā Cristo nꞌdaacā cuuvi cádiinuuⁿ nī yeⁿꞌē chi vaadī neⁿꞌe yeⁿꞌé Cristo ní tanꞌdúúcā Cristo neⁿꞌé taavi cá yā nducyaaca ꞌiiⁿꞌyāⁿ. 19 Ní ngiicá Ndyuūs chi ndísꞌtiī ní cádiinuuⁿ nī chɛɛ̄ chí vaadī neⁿꞌe yeⁿꞌé Cristo, ꞌáárá chí chꞌɛɛtɛ taavi ca chi nguɛ́ɛ́ cuuvi deenu yú nducuéⁿꞌē yeⁿꞌē. Ní ngiicá chi staava yeⁿꞌe ndísꞌtiī ní canee diitú ndúúcū nducuéⁿꞌē chi nꞌdaacā nꞌdai taavi caavā chí ndísꞌtiī ní yeⁿꞌe Ndyuūs ndísꞌtiī.
20 Ní Ndyuūs yeⁿꞌe yú cuuvi diíⁿ yā tanducuéⁿꞌē ní nꞌdeēe ca cuuvi diíⁿ ya ní nguɛ́ɛ́ tí chi ngiica yú o chí tuumicádiīnuuⁿ yú. Tanꞌdúúcā chi nꞌdeee nꞌdáí idiíⁿ yā cucáávā poder yeⁿꞌé yā ꞌtíícā idiíⁿ yā ntiiⁿnyuⁿ yeⁿꞌé yā ndúúcū sꞌuūúⁿ. 21 Maaⁿ ní nducuéⁿꞌē tiempo ní cueⁿꞌe daāⁿmaⁿ canéé Ndyuūs chi chꞌɛɛtɛ taavi ca ní dɛɛvɛ taavi cá yā nanááⁿ ꞌiiⁿꞌyāⁿ chi caⁿꞌá yā yaācū yeⁿꞌé yā. ꞌTiicá ntúūⁿ nanááⁿ Cristo.