Sꞌuuúⁿ cunnee yú ꞌaama yú ndúúcū taama yú
6
Ndísꞌtiī hermanos yeⁿꞌé chi diíⁿ nī tanꞌdúúcā chi chꞌiⁿꞌi Espíritu Nꞌdai yeⁿꞌé Ndyuūs, nduuti chi ꞌáámá hermano yeⁿꞌe yú ꞌāā diíⁿ yā nuuⁿndi ndísꞌtiī canéé chí cunnee nī hermano miiⁿ. Diiⁿ nꞌdaacá nī ndúúcu yā. Ní chꞌiⁿꞌi nī hermano miiⁿ chɛɛ̄ nuuⁿndi chi diíⁿ yā caati cuuvi nguɛɛcúndii yā yeⁿꞌe nuuⁿndi yeⁿꞌe yā. Ndísꞌtiī ntúūⁿ ꞌcuɛɛtinée nī cáácá nī ndúúcū cuidado ti nguɛ́ɛ́ dinuuⁿndí nī. 2 Cunnée yú ꞌaama yú taama yú ní yaꞌāī ꞌiinu yú hermanos caava denduꞌū vaadī yaꞌāī chi yeⁿꞌē ꞌaama yú taama yú. ꞌTíícā ní diiⁿ yú tanꞌdúúcā chi Cristo caⁿꞌa ntiiⁿnyúⁿ yā sꞌuuúⁿ.3 Nduuti chí ꞌáámá saⁿꞌā nadacadíínuuⁿ sa chí neené chꞌɛɛtɛ sa ní nguɛɛ ꞌtíícā, saⁿꞌā miiⁿ nginncheꞌéí máaⁿ sa saⁿꞌā. 4 Caꞌáámá caꞌaama sꞌuuúⁿ ní canee chí tuumicádíínuuⁿ yú nducuéⁿꞌē chi diiⁿ yú. Tuuꞌmi ní cuuvi yeenu yú ti nꞌdaacā cosas chi diiⁿ yú. Ní nguɛ́ɛ́ nadacadíínuuⁿ yú yeⁿꞌē ntiiⁿnyuⁿ yeⁿꞌē taama ꞌiiⁿꞌyāⁿ táácā chi diiⁿ yā. 5 Caati caꞌáámá caꞌaama sꞌuuúⁿ canee chi cuchɛɛ yú yeⁿꞌe nducuéⁿꞌē chi chóꞌōo yeⁿꞌē maaⁿ yú ní diiⁿ yú cuenta yeⁿꞌē maaⁿ yú yeⁿꞌe chi diiⁿ yú nguɛ́ɛ́ yeⁿꞌē taamá yā.
6 ꞌIiⁿꞌyāⁿ chi nꞌgeēⁿ nduudu yeⁿꞌé Ndyuūs canéé chí cunneé yā tanáⁿꞌā ꞌiiⁿꞌyāⁿ chi ngiꞌcueeⁿ nduudu miiⁿ.
7 Ndísꞌtiī nguɛ́ɛ́ canee chi canncheꞌéí nī maaⁿ nī. Ndyuūs nꞌdiichí yā ndísꞌtiī ní nguɛ́ɛ́ cuuví canncheꞌéí nī Ndyuūs. Nducuéⁿꞌē cosa chi idiiⁿ saⁿꞌā tanꞌdúúcā chi cúunū sa, ní chiīⁿ ntúūⁿ cútaꞌā sa cosecha yeⁿꞌē sa. 8 Nduuti chi diiⁿ yú tanꞌdúúcā chi neⁿꞌe cuerpo yeⁿꞌē yú chi dinuuⁿndi yú tuuꞌmi ní dindai yú ní canee yú tanꞌdúúcā ꞌáámá cosecha chi ngiīnū chi ngoꞌoó yeⁿꞌē. Naati nduuti chi diiⁿ yú cosas chi chꞌiⁿꞌi Espíritu Nꞌdai yeⁿꞌé Ndyuūs sꞌuuúⁿ tuuꞌmi ní Espíritu Nꞌdai yeⁿꞌé Ndyuūs tée yā sꞌuuúⁿ vida cueⁿꞌe daāⁿmaⁿ. Ní denduꞌū tanꞌdúúcā cosecha yeⁿꞌē chi diiⁿ yú tée yā sꞌuuúⁿ. 9 Cáávā chuū nguɛ́ɛ́ canee chi cuuví ꞌdaānꞌdi yú chi diiⁿ yú nducueⁿꞌē chi nꞌdaācā. ti ndaá nguuvi yeⁿꞌē chi cuuvi cutaꞌa yú cosecha yeⁿꞌē chi nꞌdaacā idiiⁿ yú nduuti chi nguɛ́ɛ́ cuūnu yú. 10 Tanꞌdúúcā chi vɛ́ɛ́ yaaⁿ yú dinꞌdaāca yú ndúúcū nducyaaca ꞌiiⁿꞌyāⁿ. ꞌTiicá ntúūⁿ dinꞌdaāca ca yú ndúúcū hermanos yeⁿꞌe yú chi iꞌtéénu yā Jesucristo.
Consejo yeⁿꞌe Pablo ndúúcū saludos yeⁿꞌé ꞌiiⁿꞌyāⁿ
11 Nꞌdiichí nī ꞌtɛ́ɛ́ chɛɛtɛ ꞌáámá caaca dinguúⁿ yeⁿꞌé nī ndúúcū taꞌá. 12 ꞌIiⁿꞌyāⁿ sꞌeeⁿ chi ngaⁿꞌa yā ndísꞌtii chi canéé chi cuuví nī circuncidado, ꞌiiⁿꞌyāⁿ sꞌeeⁿ diíⁿ yā ꞌtúúcā, ti neⁿꞌé yā caⁿꞌá yā favor yeⁿꞌe ꞌiiⁿꞌyāⁿ judíos chi Israel chi yeⁿꞌe circuncisión chi canéé ndúúcū ley yeⁿꞌe yā. Ní nguɛ́ɛ́ neⁿꞌé yā chí ꞌcueenu yā cuuvi cáávā Jesucristo chí chꞌīi yā na cruz. 13 Saⁿꞌa Israel sꞌeeⁿ chi ꞌāā circuncidado yā ní mar ꞌáámá yā nguɛ́ɛ́ cuuvi diíⁿ yā tanducuéⁿꞌe chi canéé nguūⁿ na ley yeⁿꞌé yā. Neⁿꞌé yā chi ndísꞌtiī saⁿꞌā cuuví nī circuncidado. Ní ꞌiiⁿꞌyāⁿ sꞌeeⁿ cuuvi yeenú yā ní ngaⁿꞌá yā chi dichꞌɛɛtɛ yā maaⁿ yā ꞌiiⁿꞌyāⁿ tí ndísꞌtiī ntúūⁿ diíⁿ nī tanꞌduucā chi diíⁿ yā, ní candɛɛ nī marca yeⁿꞌe circuncisión na cuerpo yeⁿꞌe nī. 14 ꞌÚú nguɛ́ɛ́ neⁿꞌé caaⁿꞌmáⁿ chi chꞌɛɛtɛ yeⁿꞌē mar ꞌáámá denduꞌū yeⁿꞌē iⁿꞌyeeⁿdí ꞌcūū. Neⁿꞌé caaⁿꞌmáⁿ chi Jesucristo chꞌīi yā na cruz caava nuuⁿndi yeⁿꞌē nducyáácá ꞌiiⁿꞌyāⁿ. Taachi Cristo chꞌīi yā na cruz, ꞌtíícā tanꞌduucā chi cuerpo yeⁿꞌé chꞌiī ntúūⁿ. ꞌTiicá ntúūⁿ ní caavā ꞌúú nducuéⁿꞌē chi yeⁿꞌe iⁿꞌyeeⁿdī canee tanꞌduucā chi nꞌdíí. 15 Maaⁿ ní sꞌuuúⁿ saⁿꞌā chi iꞌteenu yú Señor Jesucristo yeⁿꞌe yú nguɛ́ɛ́ dichííꞌvɛ̄ nduuti chi vɛ́ɛ́ marca yeⁿꞌe circuncisión na cuerpo yeⁿꞌe yú o nguɛ́ɛ́. Chuū ni dichííꞌvɛ̄ chi ꞌiiⁿꞌyāⁿ ngaī sꞌuuúⁿ ní vɛ́ɛ́ vida ngai yeⁿꞌe yú tanꞌdúúcā chi nuuⁿmaⁿ chꞌiindiyáāⁿ ntúūⁿ yú táámá. 16 Nducyaaca yú chi ꞌcuɛɛti chiicá yú tanꞌdúúcā chi chꞌiⁿꞌí ndísꞌtiī tuuꞌmi ni Ndyuūs tée yā vaadī ꞌdiiíⁿ na staava yeⁿꞌe yú. Ní Ndyuūs yaꞌai ꞌiinú yā caavā ndísꞌtiī. Ní nducyaaca sꞌuuúⁿ chi iꞌteenu yú Jesucristo, sꞌuuúⁿ ní yeⁿꞌé ndaata yeⁿꞌe Ndyuūs chi cuaacu nííⁿnyúⁿ ndaata yeⁿꞌe ꞌiiⁿꞌyāⁿ Israel chi judíos.
17 Ndíí maaⁿ ndíí cuaaⁿ chi cuchiī nguɛ́ɛ́ neⁿꞌé chi mar ꞌáámá ꞌiiⁿꞌyāⁿ dííⁿ nndúꞌu yā ꞌúú, caati ꞌúú ndɛɛ́ yaātū na cuerpo yeⁿꞌé naachi ꞌiiⁿꞌyāⁿ chꞌeⁿꞌé yā ꞌúú, ti ꞌúú idiíⁿ ntiiⁿnyuⁿ yeⁿꞌē Señor Jesucristo yeⁿꞌē yú.
18 Ndísꞌtiī hermanos yeⁿꞌé, Señor Jesucristo yeⁿꞌe yú canée yā nduucú nī ní cueⁿꞌe daāⁿmaⁿ itée yā ndísꞌtiī nducuéⁿꞌē chi nꞌdaacā nꞌdai yeⁿꞌé yā. ꞌTíícā cuuvi.