2 Ndísꞌtiī ꞌcaandiveéⁿ nī. ꞌÚú, Pablo, ngaⁿꞌá ngīi ndísꞌtiī. Nduuti chi ndísꞌtii saⁿꞌā caꞌa nī lugar chí ꞌiiⁿꞌyāⁿ diíⁿ yā circuncidar ndísꞌtiī tuuꞌmi ni nguɛ́ɛ́ cuuvi cutaꞌá nī yeⁿꞌē vaadī nꞌdai chi Cristo neⁿꞌé yā tée yā ndísꞌtiī. 3 Ngaⁿꞌá ntuūⁿ chi nducyaaca saⁿꞌā chi canéé sá circuncidado canéé chi diiⁿ sa cumplir nducuéⁿꞌē chi ngaⁿꞌa ley miiⁿ. 4 Nduuti chi nadacadíínuuⁿ nī chi ndísꞌtiī nanguáⁿꞌai nī yeⁿꞌe nuuⁿndi yeⁿꞌe nī cucáávā ley miiⁿ tuuꞌmi ní ꞌāā divíi nī Cristo ꞌáámá lado. Ní Cristo miiⁿ nguɛ́ɛ́ tée yā ndísꞌtiī dendúꞌū chi nꞌdai ca yeⁿꞌe yā cucáávā chi dineⁿꞌe cá yā sꞌuuúⁿ. 5 Ti sꞌuuúⁿ chi iꞌteenu yú Jesucristo canée yú ndúúcū Espíritu Nꞌdai yeⁿꞌé Ndyuūs chi nginnee sꞌuuúⁿ. Ní canee ngiinu yú chi nguɛ́ɛ́ vɛ́ɛ́ nuuⁿndi yeⁿꞌe yú nanááⁿ Ndyuūs. 6 Sꞌuuúⁿ chi saⁿꞌā sꞌuuúⁿ nguɛ́ɛ́ dichííꞌvɛ̄ nduuti chi ꞌiiⁿꞌyāⁿ diíⁿ yā circuncidar sꞌuuúⁿ o nguɛ́ɛ́. Chuū dichííꞌvɛ̄ chi iꞌteenu yú Jesucristo. Ní cáávā chuū neⁿꞌe yú ꞌiiⁿꞌyāⁿ.

7 Nguuvi chi chóꞌōo ndísꞌtiī nꞌdaacā iꞌtéénu nī Jesucristo naati maaⁿ ní nguɛɛ ꞌtíícā. ¿Duꞌú diꞌvaachi yeⁿꞌe nī chi nguɛɛ nꞌgiindiveéⁿ nī nduudu cuaacu yeⁿꞌé Cristo? 8 Ndyuūs nguɛ́ɛ́ díꞌvaāchi yā ndísꞌtiī ti Ndyuūs miiⁿ yaaꞌví yā ndísꞌtiī chi cuuvi yeⁿꞌé yā ndísꞌtiī. 9 ꞌIiⁿꞌyāⁿ chi diꞌvaachí yā ndísꞌtiī ní tanꞌduucā ta ꞌlííⁿ chúúndí levadura chí nadicuéeⁿ tanducuéⁿꞌē yaāchī, ꞌtííca yā. 10 Vɛ́ɛ́ confianza yeⁿꞌé ndúúcū Señor Jesucristo ní ꞌúú ní deenú chi ndísꞌtiī nguɛ́ɛ́ nꞌgiindiveéⁿ nī nduudu yeⁿꞌe ꞌiiⁿꞌyāⁿ chí diꞌvaachi yā ndísꞌtiī. Ndyuūs diíⁿ yā castigar ꞌāā duꞌú nūuⁿ ꞌiiⁿꞌyāⁿ chí diꞌvaachi ndísꞌtiī.

11 Ndísꞌtiī hermanos yeⁿꞌé, nduuti chi ndíí maaⁿ ꞌúú ngaⁿꞌá chi saⁿꞌā gentiles canee chi canéé circuncidado tuuꞌmi ní ꞌiiⁿꞌyāⁿ Israel chí judío sꞌeeⁿ nguɛ́ɛ́ canꞌdáa yā ꞌúú chi yaꞌāī ꞌúú. Nguɛ́ɛ́ ꞌtíícā. ꞌIiⁿꞌyāⁿ Israel sꞌeeⁿ canꞌdáa yā ꞌúú ti ꞌúú ngaⁿꞌá chi Jesucristo nadanguáⁿꞌai yā ꞌiiⁿꞌyāⁿ ti chꞌīi yā na cruz cáávā nuuⁿndi yeⁿꞌé yā. 12 Nꞌdaacā chi ꞌiiⁿꞌyāⁿ chi diꞌvaachi yā ndísꞌtiī divíi yā yeⁿꞌē nguaaⁿ ndísꞌtiī.

13 Ndísꞌtiī hermanos yeⁿꞌé, Ndyuūs yaaꞌví yā sꞌuuúⁿ ní nguɛ́ɛ́ canée yú maaⁿ poder yeⁿꞌe ley ti libre yú. Maaⁿ ní chi libre yú nguɛ́ɛ́ diiⁿ yú denduꞌū chi neⁿꞌe yú yeⁿꞌe cosas chi vɛ́ɛ́ iⁿꞌyeeⁿdī, naati dineⁿꞌe yú ꞌaama yú ndúúcū taama yú. Ní cunnee yú viꞌī cucáávā chi neⁿꞌe yú viꞌī. 14 Sꞌuuúⁿ cuuvi diiⁿ yú nducuéⁿꞌē chi ngaⁿꞌa ley ndúúti chí diiⁿ yú tanꞌdúúcā chí ngaⁿꞌa ꞌtíícā: Dinéⁿꞌe yú nducyaaca ꞌiiⁿꞌyāⁿ tanꞌduucā chi dinéⁿꞌe yú maāⁿ yú. 15 Ndúúti chi nguɛ́ɛ́ neⁿꞌe yú ꞌaama yú taama yú tuuꞌmi ní diiⁿ yú tanꞌdúúcā chi cheꞌe yú ꞌaama yú taama yú; cuinꞌdiichi yú ti cuuvi ituuvi yú ꞌaama yú taama yú.

16 ꞌCaandiveéⁿ nī chuū chi ngaⁿꞌá: Canee yú chí ꞌcuɛɛti chiicá yú tanꞌdúúcā chi Espíritu Nꞌdai yeⁿꞌé Ndyuūs chꞌiⁿꞌi sꞌuuúⁿ. Ní nguɛ́ɛ́ diiⁿ yú tanꞌdúúcā chi neⁿꞌe cuerpo yeⁿꞌē yú. 17 Ti chííⁿ chí neⁿꞌe cuerpo yeⁿꞌe yú chi diiⁿ yú nguɛ́ɛ́ tanꞌdúúcā chi neⁿꞌe Espíritu Nꞌdai yeⁿꞌé Ndyuūs chi diiⁿ yú. Ní Espíritu Nꞌdai yeⁿꞌé Ndyuūs ndúúcū chi neⁿꞌe diiⁿ cuerpo yeⁿꞌe yú nguɛ́ɛ́ neⁿꞌe ꞌaama taama na staava yeⁿꞌē yú. Chííⁿ chí nguɛ́ɛ́ cuuvi diiⁿ yú ní chííⁿ chí neⁿꞌe yú diiⁿ yú. 18 Nduuti chi sꞌuuuⁿ idiiⁿ yú tanꞌdúúcā chi chꞌiⁿꞌi Espíritu Nꞌdai yeⁿꞌé Ndyuūs sꞌuuúⁿ tuuꞌmi ní nguɛ́ɛ́ canee yú maaⁿ poder yeⁿꞌe ley.

19 Ti nuuⁿndi yeⁿꞌe cuerpo chí ꞌiiⁿꞌyāⁿ diiⁿ yā ní inaaⁿ yú, ní chúū: ꞌiiⁿꞌyāⁿ chi nꞌgiindivaacú yā ngaⁿꞌá yā ndúúcū nꞌdaataá o saⁿꞌā yeⁿꞌe taama yā. Saⁿꞌā daꞌcaiyáā caⁿꞌá sa ndúúcū ꞌáámá nꞌdaataá chi duuchi née sa taⁿꞌā. ꞌIiⁿꞌyāⁿ chi diíⁿ yā denduꞌū chi nguɛ́ɛ́ nꞌdaacā, ꞌiiⁿꞌyāⁿ sꞌeeⁿ ní nguɛ́ɛ́ nadacadíínūuⁿ yā taacā chi diíⁿ yā. 20 ꞌIiⁿꞌyāⁿ iꞌteenú yā ídolos ndúúcū cosas chi nguɛ́ɛ́ Ndyuūs ndúúcū nducueⁿꞌē chí diiⁿ ꞌiiⁿꞌyāⁿ chí yeⁿꞌe chíngaatu. ꞌIiⁿꞌyāⁿ nduuvitaáⁿ yā ní nꞌdíítɛ yā. Ní taáⁿ yā ní inꞌnuúⁿ yā vaadī ꞌcaaꞌva. ꞌIiⁿꞌyāⁿ ꞌiiꞌnuⁿ cheendí yā ní ꞌiiⁿꞌyāⁿ diíⁿ yā chi vɛ́ɛ́ divisiones nguaaⁿ viꞌi yā. Ní diíⁿ yā chi vɛ́ɛ́ vaadī ꞌcaaꞌva. 21 ꞌIiⁿꞌyāⁿ neⁿꞌé yā cosas tanꞌdúúcā chi vɛ́ɛ́ yeⁿꞌē tanáⁿꞌa yā. Ní ꞌiiⁿꞌyāⁿ nꞌgiīⁿꞌnúⁿ yā ꞌiiⁿꞌyāⁿ. Ní ꞌiiⁿꞌyāⁿ chi cúúꞌví ndúúcū ꞌiiⁿꞌyāⁿ chi nꞌdeee nꞌdáí ngeꞌe ní idiíⁿ yā dendúꞌū chi nguɛ́ɛ́ nꞌdaacā chi tanꞌdúúcā chuū. ꞌÚú ní ngaⁿꞌá ngīi ndísꞌtiī chi divíi nī yeⁿꞌe denduꞌū chuū tanꞌdúúcā chí ꞌāā ngaⁿꞌá nguuvi chí ꞌāā choꞌōo. ꞌIiⁿꞌyāⁿ chi idiíⁿ yā sꞌtuucā nguɛ́ɛ́ dɛꞌɛ̄ vɛɛ cuuvi yeⁿꞌé yā naachi Ndyuūs ngaⁿꞌa ntiiⁿnyúⁿ yā.

22 Naati nduuti chí ꞌcuɛɛti chiicá yú tanꞌdúúcā chi chꞌiⁿꞌi Espíritu Nꞌdai yeⁿꞌé Ndyuūs sꞌuuúⁿ tuuꞌmi ní dineⁿꞌe yú ꞌiiⁿꞌyāⁿ. Ni yeenú taavi yú. Ní canéé vaadī ꞌdiiiⁿ na staava yeⁿꞌe yú. Ní cuchɛɛ yú yeⁿꞌe tanducuéⁿꞌē chi nꞌgɛɛnu yú ngii. Ní dinꞌdaaca yú ndúúcū viꞌī ní diiⁿ yú nducuéⁿꞌē chi nꞌdai ndúúcū viꞌī. Ní ꞌáámá canee yú ndúúcū chi iꞌteenu yú. 23 Ní canee yú ndiicúúⁿ. Ní diiⁿ yú cuidado chi diiⁿ yú cosas chi nꞌdaacā. Espíritu Nꞌdai yeⁿꞌé Ndyuūs nginnee sꞌuuúⁿ chi diiⁿ yú nducuéⁿꞌē chuū chí nꞌdaacā. Ní ley yeⁿꞌe Moisés miiⁿ nguɛ́ɛ́ ngaⁿꞌa chi nguɛ́ɛ́ cuuvi diiⁿ yú sꞌtúúcā. 24 Sꞌuuúⁿ chi ꞌāā iꞌteenu yú Señor Jesucristo yeⁿꞌe yú nguɛ́ɛ́ diiⁿ yú tanꞌduucā chi neⁿꞌe cuerpo yeⁿꞌe yú. Ní canee yú tanꞌdúúcā chi ꞌāā caꞌneeⁿngaꞌā yú nducueⁿꞌē chi nguɛ́ɛ́ nꞌdaacā chi neⁿꞌe diiiⁿ cuerpo yeⁿꞌe yú, ꞌtíícā canee yú. 25 Nduuti chi candúúchí yú ndúúcū Espíritu Nꞌdai yeⁿꞌé Ndyuūs tuuꞌmi ní canéé chi ꞌcuɛɛti chiicá yú tanꞌdúúcā chi nꞌgiⁿꞌi Espíritu Nꞌdai yeⁿꞌé Ndyuūs sꞌuuúⁿ.

26 Nguɛ́ɛ́ canéé chi dinꞌgɛɛtɛ yú chi vɛ́ɛ́ vaadī ꞌcaaꞌva nguaaⁿ sꞌuuúⁿ. Ní nguɛ́ɛ́ nguee yú ꞌaama yú taama yú.