Pablo dingúūⁿ diitú yā yeⁿꞌe ꞌiiⁿꞌyāⁿ yeⁿꞌe yáāⁿ Corinto ní ngaⁿꞌá yā: Nꞌdai ndísꞌtiī
13
Chuū ní ndii ꞌíínú cuuvi chi caⁿꞌá ndaá nanááⁿ ndísꞌtiī ní taachi ndaá nduuti chi ꞌiiⁿꞌyāⁿ caaⁿꞌmaⁿ nuuⁿndi yeⁿꞌē táámá ꞌiiⁿꞌyāⁿ canéé chi vɛ́ɛ́ ꞌuūvī o ꞌiinū testigo ndúúcu yā. Ní cunee nꞌdaacā nduudu miiⁿ tanꞌdúúcā chi canéé nguūⁿ na libro yeⁿꞌé Ndyuūs. 2 ꞌĀā ngaⁿꞌá cuááⁿ vmnaaⁿ taachi cānee nduucú nī ndúúcū ꞌiiⁿꞌyāⁿ chi dinuuⁿndí yā ní ndúúcū nducyaacá nī. Maaⁿ ní chi canee yaꞌáí yeⁿꞌē ndísꞌtiī dinguúⁿ taama vmnéⁿꞌēe yeⁿꞌe chúū tanꞌdúúcā chi ngaⁿꞌá cuaaⁿ vmnaaⁿ nanááⁿ ndísꞌtiī. Taachi ndaá nanááⁿ ndísꞌtiī taama vmnéⁿꞌēe nꞌdiichí nuuⁿndi yeⁿꞌē nducyaaca hermanos. 3 Ní ꞌúú idiíⁿ ti ndísꞌtiī cadiinuuⁿ nī nduuti chi Cristo yeⁿꞌē yú chꞌiⁿꞌí yā ꞌúú nduudu chi ngaⁿꞌá o nguɛ́ɛ́. Ní Cristo yeⁿꞌe yú nguɛ́ɛ́ duūvā taachi diíⁿ yā tratar nduucú nī. Caⁿꞌá yā chꞌiⁿꞌí yā chi dítiīnú yā nguɛ́ɛ́ ti ndisꞌtiī. 4 Cuáácú chi ꞌiiⁿꞌyāⁿ chiꞌnééⁿngaꞌá yā Cristo tanꞌdúúcā chi Cristo ní ꞌaama ꞌiiⁿꞌyāⁿ chi duuvā, naati maaⁿ ní Cristo miiⁿ canduuchí yā yeⁿꞌē nguaaⁿ tináⁿꞌā cucáávā poder yeⁿꞌé Ndyuūs. ꞌTiicá ntúūⁿ núsꞌuu ní yeⁿꞌe Cristo. Núsꞌuu ní duūvá ꞌnū naati poder yeⁿꞌe Ndyuūs canee ndúúcu ꞌnū. Ní cáávā chuū cuuví nꞌdiichi ꞌnū nuuⁿndi yeⁿꞌé nī ní dichííꞌvɛ ꞌnū ndísꞌtiī.5 Maaⁿ ní ndísꞌtiī nꞌdiichi maáⁿ nī nduuti chi ndísꞌtiī ꞌāā canee diitú nī ndúúcū chi iꞌtéénu nī yeⁿꞌē Cristo. Nꞌdiichi maáⁿ nī chí cuaacu chi iꞌtéénu nī. ¿ꞌÁá nguɛ́ɛ́ déénú ndísꞌtiī nduuti chi Cristo canee nduucú nī o nguɛ́ɛ́? Ní nduuti chi cuaacu chi nguɛ́ɛ́ iꞌtéénu nī cáávā nuuⁿndi yeⁿꞌé nī tuuꞌmi ní nguɛ́ɛ́ yeⁿꞌé Ndyuūs ndísꞌtiī. 6 Neⁿꞌé chi ndísꞌtiī cadiinúuⁿ nī chi núsꞌuu ní dichiiꞌvɛ́ ꞌnū Ndyuūs ní ti yeⁿꞌé Ndyuūs núsꞌuu. Nguɛ́ɛ́ falso ꞌnū. 7 Maaⁿ ní ngaⁿꞌanguaꞌá ꞌnū Ndyuūs caavā ndísꞌtiī chi ndísꞌtiī nguɛ́ɛ́ dinuuⁿndí nī yeⁿꞌe mar ꞌáámá chi nguɛ́ɛ́ nꞌdaacā. Neⁿꞌé ꞌnū chi ndísꞌtiī ní diíⁿ nī nducuéⁿꞌē chi nꞌdaacā. Nguɛ́ɛ́ ti cuuvi ꞌcuuⁿꞌmíⁿ ꞌnū chi diíⁿ ꞌnū ntiiⁿnyuⁿ chi nꞌdaacā. ꞌIiⁿꞌyāⁿ ní cuuvi nꞌdiichí yā ntiiⁿnyuⁿ yeⁿꞌé ꞌnū, ní caaⁿꞌmáⁿ yā chi nguɛ́ɛ́ nꞌdaacā idiíⁿ ꞌnū. Dámaāⁿ neⁿꞌé ꞌnū chi ndísꞌtiī dinꞌdaacá nī. 8 Núsꞌuū ní nguɛ́ɛ́ dɛꞌɛ̄ vɛɛ diíⁿ ꞌnū chi contra yeⁿꞌe nduudu cuaacú naati nducuéⁿꞌē chi diíⁿ ꞌnū ní yeⁿꞌē nduudu cuaacu miiⁿ. 9 Cáávā chuū núsꞌuu ní yeenú taaví ꞌnū taachi duūva ꞌnū ní taachi ndísꞌtiī ditiinú nī ndúúcū chi iꞌtéénu nī. Ní ngaⁿꞌanguaꞌa cá ꞌnū ní ngiicá ꞌnū Ndyuūs chi ndísꞌtiī cuuvi diíⁿ nī chi nꞌdaacā nꞌdai ní ꞌcuɛɛtineé nī tanꞌdúúcā chi Jesucristo neⁿꞌé yā chi diíⁿ nī. 10 Idingúuⁿ ꞌnū yeⁿꞌe ndísꞌtiī vmnaaⁿ taachi ꞌāā cuɛ́ɛ́ ndaá ꞌnū nanááⁿ ndísꞌtiī caati taachi ndáa ꞌnū nanááⁿ ndísꞌtiī nguɛ́ɛ́ chɛɛchi caaⁿꞌmáⁿ ndúúcu nī cucáávā poder chi Señor Jesucristo tee yā ꞌúú. Ní Señor yeⁿꞌē yú tee yā poder ꞌúú caavā chi ndísꞌtiī ní cuuvi cuꞌtéénu cá nī nguɛ́ɛ́ caava chi cuuvi ndái nī.
11 Maaⁿ ní ꞌcuiīnū carta yeⁿꞌé. Ni na carta yeⁿꞌé ní ngaⁿꞌá ti nꞌdai taavi ndísꞌtiī ní diíⁿ nī chi ꞌcuɛɛtinéé nꞌdaacá nī ndúúcū vaadī ꞌdiīiⁿ na vida yeⁿꞌe nī. Níícú cunée nī ndúúcū dáámá vaanicádiinūuⁿ yeⁿꞌé nī ní Ndyuūs chi vɛ́ɛ́ vaadī ꞌdiiíⁿ yeⁿꞌe yā ní dinéⁿꞌe yā ndísꞌtiī Ndyuūs miiⁿ canee nduucú nī. 12 Ní nguaaⁿ maáⁿ nī diíⁿ nī saludar ꞌáámá nī ndúúcū taamá nī. Caaⁿꞌmáⁿ nī chi nꞌdai hermano yeⁿꞌé nī ní túúꞌví nī cheendi hermano yeⁿꞌé nī tanꞌdúúcā costumbre yeⁿꞌé nī ti yeⁿꞌé Ndyuūs ndísꞌtiī. 13 Nducyáácá ꞌiiⁿꞌyāⁿ chi iꞌteenú yā Jesucristo yeⁿꞌe yú dichóꞌo yā saludos na carta ꞌcūū yeⁿꞌé nī ní ngaⁿꞌá yā: Nꞌdai ndísꞌtiī.
14 Ní neⁿꞌé chi Señor Jesucristo tée yā ndísꞌtiī vaadī nꞌdai taavi yeⁿꞌé yā. Ní vaadī neⁿꞌe yeⁿꞌé Ndyuūs ní Espíritu Nꞌdai yeⁿꞌé Ndyuūs canéé nduucú nī. Chuū carta chi ꞌúú Pablo dinguúⁿ yeⁿꞌe nī. ꞌTíícā chii.