4 Cueⁿꞌé daāⁿmaⁿ ngaⁿꞌá gracias Ndyuūs cáávā cosa chi nꞌdaacā nꞌdai yeⁿꞌé Ndyuūs chi dátee yā sꞌuūúⁿ chi yeⁿꞌe Jesucristo. 5 Dendyuūs dateé yā tanducuéⁿꞌē denduꞌū chi vɛ́ɛ́ yeⁿꞌé yā ti maaⁿ ní ndísꞌtiī ní yeⁿꞌe Cristo ndisꞌtiī. Ní Ndyuūs chinnee yā ndísꞌtiī chi caaⁿꞌmáⁿ nī nduudu yeⁿꞌé yā, ní teé yā ndísꞌtiī vaadī deenu. 6 ꞌTíícā chiiⁿ chi ꞌúú ngaⁿꞌá nduudu cuaacu miiⁿ yeⁿꞌē Jesucristo miiⁿ. Ní ndísꞌtiī nꞌgiindiveéⁿ nī ní diíⁿ nī ꞌtíícā, ní chꞌiⁿꞌí nī chi nduudu miiⁿ chi cuaacu. 7 Ní cuuvi yeⁿꞌé nī nducuéⁿꞌē chi dateé Ndyuūs, ní ndísꞌtiī nguɛ́ɛ́ diiⁿ faltar mar ꞌáámá. Neⁿꞌé chi ndísꞌtiī ꞌcuɛɛtinéé ngiinu nī Señor Jesucristo yeⁿꞌē yú chi ndaa yā taama vmnéⁿꞌēe. 8 Ní Cristo miiⁿ ní tée yā fuerzas ndísꞌtiī, ní ꞌcuɛɛtinée nī nꞌdaacā ndíí nguuvi chí Jesucristo ndaa ntuúⁿ yā. Ní nguɛ́ɛ́ vɛ́ɛ́ nuuⁿndi yeⁿꞌé nī nguuvi chí ndaā Señor Jesucristo yeⁿꞌe yú. 9 Ndyuūs ní diíⁿ yā chí caⁿꞌa yā chi diíⁿ yā. Ní yaaꞌví yā ndísꞌtiī chí ꞌcuɛɛtineé nī ndúúcū daiyá yā chi Señor Jesucristo yeⁿꞌē yú.

10 Ndísꞌtiī hermanos yeⁿꞌé, ꞌúú ngiicá ndísꞌtiī cáávā chi duuchi Señor Jesucristo yeⁿꞌē yú chi ꞌcuɛɛtinéé ngíínú nī, ní nguɛ́ɛ́ vɛ́ɛ́ divisiones nguaaⁿ ndísꞌtiī. Nꞌdáácā nꞌdai ꞌcuɛɛtinée nī ní daama daamá nī ndúúcū ꞌaama vaanicadiinūūⁿ yeⁿꞌe ndísꞌtiī chi nꞌdaacā ndúúcū tanducuéⁿꞌē chi diíⁿ nī. 11 Nꞌduuví ꞌiiⁿꞌyāⁿ yeⁿꞌē familia yeⁿꞌe nꞌdaataá Cloé yaaꞌví yā ꞌúú yeⁿꞌe ndísꞌtiī hermanos yeⁿꞌé. Ní ngaⁿꞌá yā chi ndísꞌtiī nꞌgɛɛcu cheendí nī. 12 Chuū chí yeⁿꞌē chí caaⁿꞌmáⁿ. ꞌÁámá ꞌáámá ndísꞌtiī ngaⁿꞌá nī yeⁿꞌē ꞌáámá saⁿꞌā ꞌtíícā. ꞌÁámá yā ní ngaⁿꞌa yā: ꞌÚú yeⁿꞌē saⁿꞌa Pablo; taamá yā ní ngaⁿꞌa yā: ꞌÚú yeⁿꞌē saⁿꞌa Apolos; taamá yā ní ngaⁿꞌa yā: ꞌÚú yeⁿꞌē saⁿꞌa Pedro; taamá yā ní ngaⁿꞌa yā: ꞌÚú yeⁿꞌe Cristo. 13 ¿ꞌÁá cuaacu chi Cristo yeⁿꞌē yú chi ꞌyaaⁿ yā? Nguɛ́ɛ́ ꞌtíícā. ¿ꞌÁá caꞌneeⁿngáꞌāa Pablo cáávā nuuⁿndi yeⁿꞌē ndísꞌtiī? Nguɛ́ɛ́. ¿ꞌÁá chɛɛdinuūⁿniⁿ nī ndúúcū chi duuchi Pablo? Nguɛ́ɛ́ ꞌtíícā. 14 ꞌÚú cāⁿꞌa: Gracias Dendyuūs, ti ꞌúú chi Pablo, nguɛ́ɛ́ chɛɛdinúuⁿníⁿ mar ꞌáámá ndísꞌtiī. Dámaāⁿ chɛɛdínuūⁿniⁿ saⁿꞌā Crispo ndúúcū saⁿꞌā Gayo. 15 Maaⁿ ní mar ꞌáámá ndísꞌtiī nguɛ́ɛ́ cuuvi caaⁿꞌmáⁿ nī chi ndɛɛdínuūⁿniⁿ ndúúcū chi duūchí. 16 Chɛɛ̄dinuūⁿniⁿ ntúúⁿ ꞌiiⁿꞌyāⁿ yeⁿꞌe familia yeⁿꞌe saⁿꞌā Estéfanas. Ní yeⁿꞌe tanáⁿꞌā ꞌiiⁿꞌyāⁿ ꞌúú nguɛ́ɛ́ deenú chi ndɛɛdínuūⁿniⁿ duꞌū ca táámá ꞌiiⁿꞌyāⁿ. 17 Cristo nguɛ́ɛ́ dichóꞌo yā ꞌúú chi cuɛɛ̄dínuūⁿniⁿ ꞌiiⁿꞌyāⁿ caati dichóꞌo yā ꞌúú chí caāⁿꞌmáⁿ nduudu yeⁿꞌē evangelio chí nduudu ngai yeⁿꞌe Cristo. ꞌÚú nguɛ́ɛ́ caaⁿꞌmáⁿ ndúúcū nduudu deenu yeⁿꞌe saⁿꞌā yeⁿꞌē iⁿꞌyeeⁿdí ꞌcūū, ní ꞌiicu nducuéⁿꞌē chi ngaⁿꞌá ní yeⁿꞌe poder yeⁿꞌē Cristo chí chꞌīi yā na cruz.

18 ꞌÚú deenú chí taachi ꞌiiⁿꞌyāⁿ chi nguɛ́ɛ́ deenú yā duꞌū chi Cristo miiⁿ ní nꞌgiindiveéⁿ yā nduudu yeⁿꞌē cruz, ꞌiiⁿꞌyāⁿ miiⁿ nacadíínuuⁿ yā chi ꞌáámá cosa chí duuchi. Sꞌuūúⁿ chí nanguaⁿꞌāī yú, deenu yú chí Ndyuūs chꞌiⁿꞌí yā poder yeⁿꞌé yā cucáávā nduudu yeⁿꞌé yā. 19 Naati canéé nguūⁿ na libro yeⁿꞌé Ndyuūs ndíí vmnaaⁿ chi ngaⁿꞌa ꞌtíícā:

20 ¿Dɛꞌɛ̄ dichííꞌvɛ̄ vaadī deenu yeⁿꞌe ꞌiiⁿꞌyāⁿ chi deenu? ¿Dɛꞌɛ̄ dichííꞌvɛ̄ vaadī deenu yeⁿꞌē maestro chi deenu taavi? ¿Dɛꞌɛ̄ dichííꞌvɛ̄ vaadī deenu yeⁿꞌé ꞌiiⁿꞌyāⁿ chi deenu taavi ní caaⁿꞌmáⁿ yā ndúúcū compañeros yeⁿꞌé yā yeⁿꞌe cosas chi vɛ́ɛ́ iⁿꞌyeeⁿdí ꞌcūū? Ndyuūs chꞌiⁿꞌi yā chí vaadī deenu yeⁿꞌe iⁿꞌyeeⁿdí ꞌcūū ni dúúꞌvī vɛɛ ní nguɛ́ɛ́ dɛꞌɛ̄ vɛɛ. 21 ꞌIiⁿꞌyāⁿ yeⁿꞌe iⁿꞌyeeⁿdí ꞌcūū nguɛ́ɛ́ cuuvi nꞌdiichí yā Dendyuūs cucáávā vaadī deenu yeⁿꞌé iⁿꞌyeeⁿdí ꞌcūū. Ndyuūs canee yiinú yā ní nadanguaⁿꞌáí yā ꞌiiⁿꞌyāⁿ chi iꞌtéénu yā nduudu cuaacu yeⁿꞌé yā, naati tanáⁿꞌā ꞌiiⁿꞌyāⁿ yeⁿꞌe iⁿꞌyeeⁿdí ꞌcūū ngaⁿꞌá yā chí nduudu cuaacu miiⁿ ní tanꞌdúúcā ꞌáámá cosa chí duuchi.

22 ꞌIiⁿꞌyāⁿ Israel sꞌeeⁿ chi judíos ngiicá yā señales Ndyuūs ní ꞌiicu ꞌiiⁿꞌyāⁿ griegos ní inꞌnuuⁿ cá yā vaadī deenu yeⁿꞌe iⁿꞌyeeⁿdí ꞌcūū. 23 Sꞌuūúⁿ ní caꞌcueeⁿ yú yeⁿꞌe Cristo chi caꞌnééⁿngaꞌāa na cruz cáávā nuūⁿndī yeⁿꞌe nducyáácá ꞌiiⁿꞌyāⁿ. ꞌIiⁿꞌyāⁿ Israel sꞌeeⁿ nguɛ́ɛ́ neⁿꞌe ꞌcaandiveéⁿ yā nduudú ꞌcūū, ní tanáⁿꞌā ꞌiiⁿꞌyāⁿ staꞌá yā nduudú ꞌcūū tanꞌdúúcā ꞌáámá cosa chí duuchi. 24 Nduuti chí ꞌiiⁿꞌyāⁿ Israel sꞌeeⁿ o nduuti chí ꞌiiⁿꞌyāⁿ griegos, Ndyuūs yaaꞌví yā ꞌiiⁿꞌyāⁿ sꞌeeⁿ chi cuuvi yeⁿꞌé yā ꞌiiⁿꞌyāⁿ. Cristo ní poder yeⁿꞌé Ndyuūs ní Cristo miiⁿ vaadī deenu yeⁿꞌé Ndyuūs cucááva nducyaaca ꞌiiⁿꞌyāⁿ. 25 Nduudu yeⁿꞌé Ndyuūs chi ꞌiiⁿꞌyāⁿ ngaⁿꞌá yā chi cosa chí duuchi, nduudu miiⁿ nduudu déénú ca nguɛ́ɛ́ tí nduudu yeⁿꞌe saⁿꞌā yeⁿꞌe iⁿꞌyeeⁿdí ꞌcūū. Ní cosa chi staꞌá yā tanꞌdúúcā chi duuvā yeⁿꞌé Dendyuūs chííⁿ chi ditiīnú ca, nguɛ́ɛ́ ti yeⁿꞌe ꞌiiⁿꞌyāⁿ yeⁿꞌe iⁿꞌyeeⁿdí ꞌcūū. 26 Ndísꞌtiī hermanos yeⁿꞌé, nadacádiinúúⁿ nī yeⁿꞌē maáⁿ nī. Nguɛ́ɛ́ ꞌyaaⁿ ndísꞌtiī ꞌiiⁿꞌyāⁿ chi deenu taavi, nguɛ́ɛ́ ꞌyaaⁿ ndísꞌtiī ꞌiiⁿꞌyāⁿ ndíí tiīiⁿ, ndíí nguɛ́ɛ́ ꞌyaaⁿ ndísꞌtiī ꞌiiⁿꞌyāⁿ ꞌcuiica. 27 Ndyuūs ndɛɛvɛ́ yā ꞌiiⁿꞌyāⁿ chi nguɛɛ deenu taaví yā ní ꞌíícú ꞌiiⁿꞌyāⁿ chi deenu taaví yā cuuví ꞌcuináaⁿ yā. Ní Ndyuūs ndɛɛvɛ́ yā ꞌiiⁿꞌyāⁿ yeⁿꞌē iⁿꞌyeeⁿdí ꞌcūū chi vɛ́ɛ́ duuꞌvīī fuerzas yeⁿꞌé yā ní ꞌíícú ꞌiiⁿꞌyāⁿ chi vɛ́ɛ́ fuerza yeⁿꞌé yā cuuví ꞌcuináaⁿ yā. 28 Ndyuūs ndɛɛvɛ́ yā ꞌiiⁿꞌyāⁿ chi nguɛ́ɛ́ duꞌū vɛɛ nanááⁿ ꞌiiⁿꞌyāⁿ yeⁿꞌē iⁿꞌyeeⁿdí ꞌcūū ní ndɛɛvɛ́ yā ꞌiiⁿꞌyāⁿ chi nguɛ́ɛ́ inuuⁿndi ní yaꞌai ꞌiinú yā ꞌiiⁿꞌyāⁿ. Ní ꞌiicu Ndyuūs diíⁿ yā chi nguɛ́ɛ́ dɛꞌɛ̄ vɛɛ cosa chi chꞌɛɛtɛ chí ꞌiiⁿꞌyāⁿ yeⁿꞌē iⁿꞌyeeⁿdí ꞌcūū diíⁿ yā. 29 ꞌTíícā Ndyuūs idiíⁿ yā ti mar ꞌáámá ꞌiiⁿꞌyāⁿ nguɛ́ɛ́ cuuvi dichꞌɛɛtɛ́ yā ꞌiiⁿꞌyāⁿ nanááⁿ Dendyuūs. 30 ꞌTíícā Dendyuūs maáⁿ yā teé yā vida cueⁿꞌe daāⁿmaⁿ yeⁿꞌe ndísꞌtiī tí iꞌteenú nī Cristo Jesús. Ndyuūs dichóꞌo yā Jesucristo iⁿꞌyeeⁿdí ꞌcūū chi cuuvi deenu yú nducuéⁿꞌe cáávā Cristo. Ní cáávā Cristo miiⁿ nguɛ́ɛ́ nuuⁿndi yeⁿꞌē yú nanááⁿ Ndyuūs ti Cristo miiⁿ chꞌīi yā na cruz cucáávā nuuⁿndi yeⁿꞌē nducyaaca ꞌiiⁿꞌyāⁿ, ní ꞌiicu sꞌuūuⁿ chi cuuvi yeⁿꞌé yā sꞌuūuⁿ. 31 Cáávā chuū canéé nguūⁿ na libro yeⁿꞌé Ndyuūs ndíí vmnaaⁿ ꞌtíícā: ꞌIiⁿꞌyāⁿ chi ngaⁿꞌa chi idichꞌɛɛtɛ́ maáⁿ yā ꞌiiⁿꞌyāⁿ, nguɛ́ɛ́ nꞌdaacā idiíⁿ yā. Dámaāⁿ canéé chi dichꞌɛɛtɛ́ yā ꞌiivú Ndyuūs.