Pablo dichoꞌó yā, Nꞌdai ndísꞌtiī, hermanos yeⁿꞌé yā
16
ꞌÚú ní ngaⁿꞌá ngīi ndísꞌtiī chi ꞌcuaáⁿ nī Febe chi hermana yeⁿꞌe yú. Nꞌdaata miiⁿ dichííꞌvɛ yā ꞌiiⁿꞌyāⁿ yeⁿꞌe yáacū chi canéé na yáāⁿ Cencrea. 2 Ní nꞌdaacā ꞌcuaáⁿ nī nꞌdaata miiⁿ ndúúcū chi duuchi Señor yeⁿꞌe yú, tanꞌdúúcā chi canéé chi ꞌcuaáⁿ nī hermanos yeⁿꞌe yú chi iꞌtéénu yā Cristo. Ní cunneé nī nꞌdaata miiⁿ yeⁿꞌe tanducuéⁿꞌē chi neⁿꞌe tá ti nꞌdaata miiⁿ neené ꞌyaaⁿ ꞌiiⁿꞌyāⁿ chinnee tá ꞌiiⁿꞌyāⁿ. ꞌTiicá ntúūⁿ chinnee tá ꞌúú.3 Ní nꞌdísꞌtiī caaⁿꞌmáⁿ nī hermano Aquila ndúúcū nꞌdaataá Priscila chi nꞌdaata yeⁿꞌé yā, Nꞌdaí ndísꞌtiī. ꞌIiⁿꞌyāⁿ sꞌeeⁿ idiíⁿ yā ntiiⁿnyuⁿ yeⁿꞌe Señor Jesucristo dáámá nduucú. 4 ꞌIiⁿꞌyāⁿ sꞌeeⁿ nꞌgeenú yā ngii cáávā ꞌúú ndíí chi cuuvi ꞌcuūvi yā cáávā chi cuuvi nadanguáⁿꞌai yā ꞌúú. Ní ꞌúú ní caꞌá ꞌiiⁿꞌyāⁿ sꞌeeⁿ gracias. Ní nguɛ́ɛ́ dámaāⁿ ꞌúú, ꞌtiicá ntúūⁿ diiⁿ nducyaaca hermanos yeⁿꞌe yú chi nguɛ́ɛ́ naⁿꞌá yā yaācú yeⁿꞌe ꞌiiⁿꞌyāⁿ Israel sꞌeeⁿ. 5 Ní ꞌiiⁿꞌyāⁿ yeⁿꞌe yaācū chi nduuvidaamá yā na vaacu táⁿꞌā Priscila ndúúcū isáⁿꞌā yeⁿꞌé yā chi Aquila: Nꞌdaí ndísꞌtiī, caaⁿꞌmáⁿ nī. Ní Epeneto amigo chi neené neⁿꞌé: Nꞌdaí dii, caaⁿꞌmáⁿ nī. Epeneto miiⁿ saⁿꞌa vmnááⁿ vmnaaⁿ chíꞌteenu sá Cristo na yáⁿꞌāa Acaya. 6 Ní tá María chi neené diiⁿ tá ntiiⁿnyuⁿ nguaaⁿ ndísꞌtiī: Nꞌdaí tá, caaⁿꞌmáⁿ nī. 7 Ní saⁿꞌā Andrónico ndúúcū sáⁿꞌā Junias canée yā vácūū taachi ꞌúú caneé vácūū, ní saⁿꞌā sꞌeeⁿ ní nꞌgɛɛtɛ nguaaⁿ ꞌiiⁿꞌyāⁿ chi apóstoles. Ní saⁿꞌā sꞌeeⁿ iꞌtéénu yā Cristo vmnaaⁿ cá níícu ꞌúú: Nꞌdaí ndísꞌtiī, caaⁿꞌmáⁿ nī.
8 Ní sáⁿꞌā Amplias chi neené neⁿꞌé ti yeⁿꞌe Señor saⁿꞌa miiⁿ: Nꞌdaí dii, caaⁿꞌmáⁿ nī. 9 Ní saⁿꞌā Urbano chi dáámá diiⁿ sa ntiiⁿnyuⁿ yeⁿꞌé Señor nduucú ꞌnū: Nꞌdaí dii, caaⁿꞌmáⁿ nī. Ní saⁿꞌa Estaquis chi neené neⁿꞌé: Nꞌdaí dii, caaⁿꞌmáⁿ nī. 10 Ní saⁿꞌā Apeles chi neené chꞌeenú yā chii cáávā chi iꞌtéénu yā Cristo: Nꞌdaí dii, caaⁿꞌmáⁿ nī. ꞌTiicá ntúūⁿ nducyaaca ꞌiiⁿꞌyāⁿ yeⁿꞌe vaacu Aristóbulo: Nꞌdai ndísꞌtiī, caaⁿꞌmáⁿ nī. 11 Ní saⁿꞌa Herodión chi yeⁿꞌe yáāⁿ vaacú: Nꞌdaí dii, caaⁿꞌmáⁿ nī. Ní ꞌiiⁿꞌyāⁿ chi iꞌtéénu yā yeⁿꞌe vaacu Narciso: Nꞌdaí ndísꞌtiī caaⁿꞌmáⁿ nī. 12 Ní nꞌdaataá Trifena ndúúcū nꞌdaataá Trifosa chi diíⁿ yā ntiiⁿnyuⁿ chi ntiiⁿnyuⁿ yeⁿꞌe Señor: Nꞌdaí ndísꞌtiī caaⁿꞌmáⁿ nī. Ní nꞌdaataá Pérsida, hermana yeⁿꞌé chi neené neⁿꞌé chi nꞌdeee nꞌdáí ntiiⁿnyuⁿ diíⁿ tá yeⁿꞌē ntiiⁿnyuⁿ yeⁿꞌe Señor: Nꞌdaí tá, caaⁿꞌmaⁿ nī. 13 Ní saⁿꞌā Rufo, chi saⁿꞌā chꞌɛɛtɛ nguaaⁿ ꞌiiⁿꞌyāⁿ chi iꞌtéénu yā Cristo ndúúcū chɛɛcu sa chi tanꞌdúúcā chɛɛcú dendúꞌū: Nꞌdai ndísꞌtiī, caaⁿꞌmaⁿ nī. 14 Ní saⁿꞌa sꞌeeⁿ Asíncrito ndúúcū Flegonte ndúúcū Hermas ndúúcū Patrobas ndúúcū Hermes ndúúcū tanáⁿꞌā hermanos chi snée yā ndúúcu yā: Nꞌdaí ndísꞌtiī, caaⁿꞌmáⁿ nī. 15 ꞌTiicá ntúūⁿ saⁿꞌa Filólogo ndúúcū nꞌdaataá Julia ndúúcū saⁿꞌā Nereo ndúúcū nꞌdaataá víꞌi yā, ndúúcū saⁿꞌa Olimpas ndúúcū nducyáácá hermanos yeⁿꞌe yú chi snée yā ndúúcū ꞌiiⁿꞌyāⁿ sꞌeeⁿ: Nꞌdaí ndísꞌtiī, caaⁿꞌmáⁿ nī.
16 Maaⁿ ní nguaaⁿ maáⁿ nī chi iꞌtéénu nī Cristo: Nꞌdaí dii, caaⁿꞌmáⁿ nī, ní caꞌá nī ꞌáámá beso ꞌáámá nī ndúúcū taama nī tanꞌdúúcā costumbre yeⁿꞌé nī caati néⁿꞌe nī viꞌī. Nducyáácá ꞌiiⁿꞌyāⁿ yeⁿꞌe nducyáácá yaācū: Nꞌdaí ndísꞌtiī ngaⁿꞌa yā.
17 Maaⁿ ní diꞌcuiitú ndísꞌtiī hermanos yeⁿꞌé chi cundɛ́ɛ nī cuidado yeⁿꞌé ꞌiiⁿꞌyāⁿ chi diiⁿ ꞌúúví vaadi cadíínūuⁿ nguaaⁿ ndísꞌtiī. Ní diíⁿ yā chi ndísꞌtiī dinuuⁿndí nī. ꞌIiⁿꞌyāⁿ sꞌeeⁿ ní contra yeⁿꞌē chi ꞌiiⁿꞌyāⁿ caꞌcueéⁿ yā ndísꞌtiī. Ní contra yeⁿꞌē chí chꞌeéⁿ nī. Divíi nī ꞌiiⁿꞌyāⁿ sꞌeeⁿ yeⁿꞌē nguaaⁿ ndísꞌtiī. 18 Caati ꞌiiⁿꞌyāⁿ sꞌeeⁿ nguɛ́ɛ́ dichííꞌvɛ yā Señor Jesucristo yeⁿꞌe yú ti diíⁿ yā tanꞌdúúcā chi neⁿꞌe yā. Ní nginncheꞌéí yā staava yeⁿꞌe ꞌiiⁿꞌyāⁿ chi ndiicúūⁿ caati ngaⁿꞌá yā ndúúcū nduudu cúuⁿnūⁿ yeⁿꞌé yā chi cunee ngíínu yā. 19 Nducyáácá ꞌiiⁿꞌyāⁿ ꞌāā deenú yā tanꞌdúúcā chí ndísꞌtiī nꞌgiindiveéⁿ nī nduudu yeⁿꞌé Ndyuūs ni cáávā chuū ꞌúú ní yeenú. Neⁿꞌé chi ndísꞌtiī listo canee nī chi diíⁿ nī denduꞌū chi nꞌdaacā. Nguɛ́ɛ́ chi diíⁿ nī cosa chi nguɛ́ɛ́ nꞌdaacā. 20 Ní Ndyuūs chi vɛ́ɛ́ nducuéⁿꞌē vaadī ꞌdiīíⁿ nduucú yā maaⁿ nchꞌɛɛ̄tɛ́ cuꞌnéeⁿ yā yááⁿnꞌguiinūuⁿ miiⁿ cuaaⁿ mááⁿ caꞌá nī. Neⁿꞌé chi Jesucristo tée yā nducyáácá ndísꞌtiī nducuéⁿꞌē vaadi nꞌdai yeⁿꞌé yā.
21 Saⁿꞌa Timoteo chi dáámá idiiⁿ sa ntiiⁿnyuⁿ nduucú ndúúcū sáⁿꞌā Lucio ndúúcū sáⁿꞌā Jasón ndúúcū sáⁿꞌā Sosípater chi sáⁿꞌā sꞌeeⁿ yeⁿꞌe yáāⁿ vaacú: Nꞌdaí ndísꞌtiī, ngaⁿꞌá yā.
22 Ní ꞌúú, sáⁿꞌā chi nguuvi Tercio chi dinguúⁿ carta ꞌcūū cáávā Pablo: Nꞌdaí ndísꞌtiī, ngaⁿꞌá ti yeⁿꞌé Cristo sꞌuuúⁿ.
23 Ní ꞌtiicá ntúūⁿ saⁿꞌa Gayo: Nꞌdaí ndisꞌtíī, ngaⁿꞌa sa. ꞌÚú ní caneé na vaacu sa ní nduuvidaamá yā ꞌiiⁿꞌyāⁿ yeⁿꞌe yaācū na vaacu sa. Ní sáⁿꞌā Erasto ntúūⁿ chi sáⁿꞌā tesorero yeⁿꞌe yáaⁿ ꞌcūū, ndúúcū hermano Cuarto: Nꞌdaí ndísꞌtiī, ngaⁿꞌa yā.
24 Neⁿꞌé chi Señor Jesucristo yeⁿꞌe yú diꞌviicú yā nducyaaca ndísꞌtiī. ꞌTíícā.
ꞌCuíínū carta ꞌcūū ndúúcū chi dichꞌɛɛtɛ yú Ndyuūs
25 Maaⁿ ní dichꞌɛɛtɛ yú Ndyuūs. Ndyuūs cuuvi diiⁿ cá yā chi díítūu canee di ndúúcū chi iꞌtéénu di tanꞌdúúcā chí ꞌúú caⁿꞌá nduudu cuaacu chi Cristo nadanguáⁿꞌai yā ndísꞌtiī. Ní chiꞌcueéⁿ ndísꞌtiī yeⁿꞌe evangelio chi nduudu ngai yeⁿꞌe Cristo. Chuū chí ngaⁿꞌá ní chííⁿ chi Ndyuūs snúúⁿ nꞌdeꞌéí yā ndii tiempo vmnááⁿ vmnaaⁿ chi canéé iⁿꞌyeeⁿdī ní Ndyuūs chꞌiⁿꞌí yā ꞌúú nduudu yeⁿꞌe Cristo. 26 Ní maaⁿ ní deenu yú chuū cáávā chi profetas dingúuⁿ yā na libro yeⁿꞌé Ndyuūs yeⁿꞌé chuū. Ní diíⁿ yā tanꞌdúúcā Ndyuūs ngaⁿꞌa yā yeⁿꞌe chuū. Ní Ndyuūs cuéⁿꞌé daāⁿmaⁿ caneé yā. Ní maaⁿ ní Ndyuūs chꞌiⁿꞌí yā nduudu cuaacu yeⁿꞌé Cristo nanááⁿ ꞌiiⁿꞌyāⁿ yeⁿꞌe nducuéⁿꞌē naciones cáávā chi ꞌcaandiveéⁿ yā ní cuꞌtéénu yā.
27 Cuéⁿꞌé daāⁿmaⁿ canee chi dichꞌɛɛtɛ yú Ndyuūs chi ꞌaama nꞌdyáⁿꞌā Ndyuūs chi deenú yā tanducuéⁿꞌē denduꞌū. Ní diiⁿ yú ꞌtíícā cáávā Jesucristo Señor yeⁿꞌe yú. ꞌTíícā diiⁿ yú.