CHUŪ CHI DIIⁿ APÓSTOLES
Dendyuūs caⁿꞌa yā chi tée yā Espíritu Nꞌdai
1
Dii Teófilo, taachí vmnááⁿ vmnaaⁿ dinguúⁿ yeⁿꞌe di, caⁿꞌá yeⁿꞌe tanducuéⁿꞌē chi ꞌtúúcā diiⁿ Jesús ní caꞌcueéⁿ yā, 2 ndii nguuvi chí cunaⁿꞌā Jesús vaꞌai chɛɛti nguuvi. Vmnááⁿ vmnaaⁿ chi cunaⁿꞌā Jesús miiⁿ chꞌíínú caꞌa yā orden yeⁿꞌé yā apóstoles caava Espíritu Nꞌdai yeⁿꞌe Ndyuūs. Jesús ndɛɛvɛ́ yā ní dichóꞌo yā apóstoles. 3 Jesús chꞌeenú yā chiī ní chꞌīi yā. Cuayiivi taachi ꞌāā chꞌīi yā nééné nꞌdeee nááⁿ chííⁿ chꞌiⁿꞌi maáⁿ yā yeⁿꞌé yā tanꞌdúúcā chí ꞌāā cuɛɛ̄ ꞌcuūvi yā vmnááⁿ apóstoles caati apóstoles cuuvi déénu yā chi cánduuchi ntuuⁿ yā. Canée yā ndúúcū apóstoles yeⁿꞌé yā ꞌuuvi ngɛɛcu nguuvi ní caⁿꞌa yā yeⁿꞌē chi Dendyuūs ngaⁿꞌa ntiiⁿnyúⁿ yā. 4 Taachí ndii dáámá yā tuuꞌmi ní Jesús caⁿꞌa ntiiⁿnyúⁿ yā apóstoles. Nguɛ́ɛ́ náⁿꞌa nī yeⁿꞌe yáāⁿ Jerusalén naati cunee ngíínú nī yeⁿꞌē chi caⁿꞌa Chiida yú chi tée yā. Chuū chi ꞌāā chꞌiindiveéⁿ nī yeⁿꞌē ꞌúú. 5 Juan cuaacu nííⁿnyúⁿ chi ndúúcū nuūⁿnīⁿ chɛɛdinuūⁿnīⁿ sa naati ndísꞌtiī ní cuɛɛdinuūⁿniⁿ nī ndúúcū Espíritu Nꞌdai yeⁿꞌe Ndyuūs.Jesús cuchɛ́ɛ yā
6 Tuuꞌmi ní saⁿꞌa chi ndúúvídáámá nitiinguunéeⁿ yā ꞌiiⁿꞌyāⁿ ní ngaⁿꞌá yā: Señor Jesús, ¿ꞌáá nadicuééⁿ ntuuⁿ nī taama saⁿꞌā Israel chí caaⁿꞌmaⁿ ntiiⁿnyuⁿ sa yeⁿꞌe ꞌiiⁿꞌyāⁿ Israel maaⁿ nguuví ꞌcūū? 7 Ní ngaⁿꞌa Jesús ngiī yā ꞌiiⁿꞌyāⁿ: Nguɛ́ɛ́ ituneeⁿ ndísꞌtiī chi cadíínuuⁿ nī dɛꞌɛ tiempo o dɛꞌɛ nguuvi yeⁿꞌē chuū chí Chiida yú sꞌneeⁿ yā na poder yeⁿꞌe maáⁿ yā. 8 Naati cutaꞌá nī poder chi diitú nī taachi ꞌāā ndaa Espíritu Nꞌdai yeⁿꞌe Ndyuūs vmnaaⁿ yeⁿꞌé nī. Ní ndísꞌtiī ní caaⁿꞌmáⁿ nī nduudu cuaacu yeⁿꞌé na yáāⁿ Jerusalén ndii nuuⁿmaⁿ yáⁿꞌāa Judea, ndii yáⁿꞌāa Samaria, ndii núúⁿmáⁿ iⁿꞌyeēⁿdī. 9 Ní chꞌíínú caⁿꞌa yā chuū taachi nꞌdiichi saⁿꞌā sꞌeeⁿ Jesús cuchɛ́ɛ yā ní cheꞌenaāⁿ sa ꞌiiⁿꞌyāⁿ ná meēeⁿ. Ní ꞌāā ntɛ́ɛ́ snaaⁿ saⁿꞌa sꞌeeⁿ ꞌiiⁿꞌyāⁿ.
10 Ní saⁿꞌā sꞌeeⁿ ní nꞌgíínú sá nanguuvi. Taachí ꞌāā cuchɛ́ɛ Jesús, nꞌdiichi sa na ꞌuuvi saⁿꞌā chi ángel chineē ndúúcu sa ndúúcū catecai cuɛ́ɛ̄ sa. 11 ꞌÚuvi ꞌiiⁿꞌyāⁿ miiⁿ ní ngaⁿꞌa yā ngii yā saⁿꞌā sꞌeeⁿ: Ndísꞌtiī saⁿꞌa yeⁿꞌe yáⁿꞌāa Galilea, ¿dɛꞌɛ nꞌgíínú nī nanguuvi? Maāⁿ Jesús chí cunaⁿꞌa yā yeⁿꞌe ndísꞌtiī nanguuvi ꞌtíícā ndaa túuⁿ yā tanꞌdúúcā chí nꞌdiichí nī ꞌiiⁿꞌyāⁿ cuinaⁿꞌá yā nanguuvi.
Ndɛɛvɛ yā saⁿꞌā lado yeⁿꞌe Judas
12 Canꞌdáa yā ná yiīcū ꞌlííⁿ chi nguuvi Olivos chi canéé niiⁿnuⁿ ná yáāⁿ Jerusalén ní ndáá yā na yáāⁿ Jerusalén. Distancia ꞌcūū chí ngaⁿꞌa ley chi cuuvi caacá yā sábado nguuvi chi ntaaviꞌtuunuúⁿ yā. 13 Ndaá yā na yáāⁿ miiⁿ. Chɛɛ́ yā na cuarto yaacu naachi cānee Pedro, ndúúcū Jacobo, ndúúcū Juan, ndúúcū Andrés, ndúúcū Felipe, ndúúcū Tomás, ndúúcū Bartolomé, ndúúcū Mateo, ndúúcū Jacobo dáiyā saⁿꞌā chi nguuvi Alfeo, ndúúcū Simón Zelote, ndúúcū Judas chi ꞌdiīnū Jacobo. 14 Nducyáácá ꞌiiⁿꞌyāⁿ sꞌeeⁿ ndúúcū nꞌdaata sꞌeeⁿ ndúúcū María chi chɛɛcu Jesús ndúúcu ꞌdíínu Jesús nduuvidaamá yā ní ꞌáámá vaādī cadiinúúⁿ yeⁿꞌé yā ní ngaⁿꞌanguaꞌá yā ní diꞌcuiitú yā Dendyuūs. 15 ꞌIiⁿꞌyāⁿ chi nduuvídaama miiⁿ ngíi yā tanꞌdúúcā ꞌáámá ciento canee ndiicú yā. Hora miiⁿ nacueéⁿ Pedro naavtaⁿꞌa yeⁿꞌe ꞌiiⁿꞌyāⁿ sꞌeeⁿ chi iꞌtéénu yā Cristo ní caⁿꞌa sa: 16 Ndísꞌtiī hermanos, canee cuuⁿmiⁿ chí cuuvi cuaacu Escritura chí Espíritu Nꞌdai yeⁿꞌe Ndyuūs caⁿꞌa David cuaaⁿ vmnaāⁿ ní David miiⁿ dinguúⁿ yā yeⁿꞌe Judas. Judas miiⁿ chꞌiⁿꞌi sá duꞌu chí Jesús. Maaⁿ níícú chiī chitaꞌá yā Jesús. 17 Judas miiⁿ ní ndúúcū núsꞌuu ní diiⁿ sa ntiiⁿnyuⁿ ndúúcū núsꞌuu.
18 Sáⁿꞌa miiⁿ ní cái sa ꞌáámá tááⁿ yáⁿꞌāa ndúúcū tuūmī yeⁿꞌē nuuⁿndi yeⁿꞌē sa. Ní chinꞌdaā sa dácaā nꞌdíi sa ní ndaꞌai naavtaⁿꞌa cuerpo yeⁿꞌē sa ní tanducueⁿꞌē ngɛɛti sa chꞌiinu cānꞌdaa. 19 Nducyáácá ꞌiiⁿꞌyāⁿ yeⁿꞌe yáāⁿ Jerusalén chicadíínuuⁿ yā chuū. Ní yáⁿꞌāa miiⁿ ní ꞌtíícā canee chi duuchi Acéldama davaacu yeⁿꞌé yā chí neⁿꞌe caaⁿꞌmaⁿ campo yeⁿꞌē yuūúⁿ.
20 Ti canéé nguūⁿ na libro yeⁿꞌe Ndyuūs naachi chi duuchi Salmos:
Naachí navaacu sa mííⁿ nduuvi díyáaí. Ndíí nguɛ́ɛ́ ꞌiiⁿꞌyāⁿ chi ꞌcuɛɛtinée yā miiⁿ.
Níícú canéé nguūⁿ:
Cutaꞌa taamá yā ntiiⁿnyuⁿ yeⁿꞌe saⁿꞌā ndíí tiīiⁿ.
21 ꞌIiⁿꞌyāⁿ sáⁿꞌā miiⁿya canee cuuⁿmiⁿ chi canéé yā ndúúcu ꞌnū nducueⁿꞌe tiempo chi Señor Jesús canéé yā ndúúcu ꞌnū. 22 ꞌIiⁿꞌyāⁿ miiⁿ canee cuuⁿmiⁿ chi canéé yā ndúúcu ꞌnū taachi tucáꞌa yā chɛɛdinuūⁿnīⁿ Juan ndíí nguuvi chi Jesús cunaⁿꞌá yā cuaaⁿ ꞌniiⁿnuⁿ nanguuvi. ꞌTúúcā canee cuuⁿmiⁿ chi ꞌáámá yā caaⁿꞌmaⁿ yā ndúúcū núsꞌuu nduudu cuaacu yeⁿꞌē chí nduuchi Jesús ngaaⁿ tináⁿꞌā. 23 Ní ꞌneeⁿ ndutáꞌa yā ná ꞌuuvi ꞌiiⁿꞌyāⁿ. ꞌÁámá saⁿꞌā miiⁿ ní nguuvi sa José Barsabás chi nguuvi Justo ndúúcū taama saⁿꞌā miiⁿ chi nguuvi sa Matías. 24 Ní caⁿꞌanguaꞌá yā ní caⁿꞌa yā: Nꞌdiī, Señor Ndyuūs, chi nꞌdiichi nī staava yeⁿꞌē nducyáácá yā, ꞌcuuⁿꞌmíⁿ nī núsꞌuu ꞌáámá chɛ́ɛ́ sáⁿꞌā sꞌūuⁿ chí ꞌāā ndɛɛvɛ́ nī. 25 Níícú cunee ndúúcū sa ntiiⁿnyuⁿ ndúúcū apóstoles lado yeⁿꞌe Judas. Ní diiⁿ sa ntiiⁿnyuⁿ yeⁿꞌē Judas ntiiⁿnyuⁿ chi nguɛ́ɛ́ diīⁿ sa cumplir cucáávā nuuⁿndi yeⁿꞌē sa. ꞌTíícā ní Judas cúnaⁿꞌa sa na lugar naachí tuneeⁿ saⁿꞌā. 26 Níícú dinguúⁿ yā na ꞌúúví caaca ndúúcū ꞌuuvī chi nguuví ꞌiiⁿꞌyāⁿ, José miiⁿ ndúúcū Matías. Ní tunꞌdáá yā ꞌáámá chi nguuvi Matías ní Matías miiⁿ tuneeⁿ. Ní nduuvidaama sa chíí ndicháámá apóstoles chi ꞌiiⁿꞌyāⁿ chi dichóꞌó Dendyuūs.