Jesús nndaacá yā ndɛɛ̄chɛ̄ discípulos yeⁿꞌé yā
21
Cuayiivi chi choꞌōo chuū chiináāaⁿ ntúūⁿ maaⁿ Jesús miiⁿ yeⁿꞌē discípulos yeⁿꞌé yā niiⁿnuúⁿ ná yaana nuuⁿniⁿꞌyáⁿꞌā chi nguuvi Tiberias ní ꞌtúúcā chiinaáⁿ yā. 2 Ndidaama yā Simón Pedro ndúúcū Tomás miiⁿ chi nguuvi Dídimo chi Gemelo, ndúúcū Natanael saⁿꞌā yeⁿꞌe yáāⁿ Caná yeⁿꞌē yáⁿꞌāa Galilea, ndúúcū na ꞌúúví saⁿꞌā daiya Zebedeo ndúúcū táá na ꞌuuvi discípulos yeⁿꞌe Jesús. 3 Tuuꞌmí ngaⁿꞌa Simón Pedro: Caⁿꞌá tungaáⁿ ꞌyaācā. Tuuꞌmí ngaⁿꞌā ꞌiiⁿꞌyāⁿ sꞌeeⁿ ngii yā saⁿꞌā: Caⁿꞌā ntúuⁿ núsꞌuu ndúúcu di. Ní cueⁿꞌe yā ní chindáa yā na ꞌáámá barco. Nguiīnū miiⁿ nguɛ́ɛ́ staꞌá yā mar ꞌáámá tī. 4 Chi dɛɛvɛ táámá nguuvi, Jesús ní caneé yā cuaaⁿ ꞌdiitú yā yaana nuuⁿniⁿꞌyáⁿꞌā naati discípulos nguɛ́ɛ́ túúmicadíínuuⁿ yā chi Jesús miiⁿ. 5 Ní caⁿꞌa yā chii yā saⁿꞌā sꞌeeⁿ: Ndísꞌtiī, saⁿꞌā nꞌgaiyáāⁿ ¿ꞌáá vɛ́ɛ́ chi tungaaⁿ di chi cheꞌe yú? Nanꞌguɛɛcutáⁿꞌa yā yeⁿꞌe yā: Nguɛ́ɛ́.6 Tuuꞌmi ní ngaⁿꞌa yā ngii yā saⁿꞌā sꞌeeⁿ: Caꞌnuúⁿ nī yaāna lado ta cuaacu yeⁿꞌē barco miiⁿ ní ndaacá nī. Tuuꞌmi ní chiꞌnuúⁿ yā yaāna tií ní ꞌāā ntɛɛ ngii dííⁿ yā tunꞌdáa yā chi neené tááⁿ nꞌgii ꞌyaācā. 7 Tuuꞌmi ní discípulo chi neené diyaꞌāī ꞌíínu Jesús ngaⁿꞌā sa ngii sa Pedro: Señor miiⁿ ꞌiiⁿꞌyāⁿ sꞌtíī. Ní Simón Pedro, taachi chꞌiindiveeⁿ sa chi Jesús miiⁿ nuⁿnuúⁿ sá catecai sa ti dámaāⁿ ngáaⁿ sa, ní chindáa sa chɛɛti yaana nuūⁿnīⁿꞌyáⁿꞌā. 8 Ni tanduu ꞌuuvi discípulos ndaá yā ndúúcū barco ti nguɛ́ɛ́ dáanā yaⁿꞌāī chi chinée yā yeⁿꞌe yáⁿꞌāa miiⁿ ti tandúú na cuūúⁿ ngɛɛcu ndiichi metros. Ngíí nꞌdaā yā yaāna yeⁿꞌe ꞌyaāca. 9 Taachí nꞌcheéⁿ yā yáⁿꞌāa miiⁿ nꞌdiichí yā nꞌgiichi yáⁿꞌā. Ní ꞌáámá ꞌyaācā nduú tī nanááⁿ nduucyáⁿꞌā. Ní nꞌdiichí yā pan. 10 Tuuꞌmí ngaⁿꞌa Jesús ngiī yā saⁿꞌā: Teé nī ta nꞌduuvi ꞌyaācā chí caama staꞌá nī maaⁿ.
11 Cuchɛɛ Simón Pedro ní nandɛ́ɛ sa yaāna na yáⁿꞌāa miiⁿ ndiituú ꞌyaācā nꞌgɛɛtɛ́, ngii ꞌáámá ciento ꞌuuvī ngɛɛcu nꞌdiichi ꞌíínú, ní yaāna miiⁿ nguɛ́ɛ́ chi teēⁿ nꞌdáá rá chi nꞌdeee taaví ꞌyaācā. 12 Tuuꞌmi Jesús ngaⁿꞌa yā ngii yā saⁿꞌā sꞌeeⁿ: Cuchií nī caꞌdiinú nī. Mar ꞌáámá discípulo miiⁿ nguɛ́ɛ́ tiinguuneéⁿ yā ꞌiiⁿꞌyāⁿ: ¿Duꞌu rá díí? Ti ꞌāā deenú yā chi Jesús miiⁿ. 13 Ndaā Jesús miiⁿ ní staꞌá yā pan ní caꞌa yā ꞌiiⁿꞌyāⁿ. ꞌTíícá nī ntúūⁿ diíⁿ yā ndúúcū ꞌyaāca.
14 ꞌĀā chií ꞌiinu cuuvi chi nꞌgeenaāaⁿ Jesús yeⁿꞌē discípulos yeⁿꞌé yā taachí ꞌāā nnduuchi yā nguaaⁿ tináⁿꞌā.
Caꞌa di chi chéꞌé ꞌiiti cuūchī yeⁿꞌé
15 Taachí chꞌiinu caꞌdiinú yā, Jesús ngaⁿꞌa yā ngii yā Simón Pedro: Simón, díí daiya Jonás, ¿ꞌáá neⁿꞌe ca di ꞌúú, nguɛ́ɛ́ ti chuū? Tuuꞌmí ngaⁿꞌa sa ngii sa Pedro: ꞌTííca, Señor, nꞌdiī ní déénú nī chi neⁿꞌé nꞌdīī. Ngaⁿꞌa yā ngii yā saⁿꞌā: Caꞌá di ꞌiiti cuūchi ꞌlííⁿ yeⁿꞌé chí cheꞌé tī.
16 Jesús ní ntiinguuneeⁿ ntuúⁿ yā yeⁿꞌe saⁿꞌā naachi ndii ꞌuuvi cuuvi: Simón, díí daiya Jonás, ¿ꞌáá neⁿꞌe di ꞌúú? Nanꞌguɛɛcútaⁿꞌa sa yēⁿꞌe yā: ꞌTííca, Señor, nꞌdiī ní déénú nī chi neⁿꞌé nꞌdīī. Tuuꞌmí ngaⁿꞌa yā ngii yā saⁿꞌā: Caꞌá dí ꞌiiti cuūchī yeⁿꞌé chi cheꞌé tī.
17 Tuuꞌmí ngaⁿꞌa yā ngii yā saⁿꞌā naachi ndii chííⁿ ndii ꞌíínú cuuvi: Simón, dii saⁿꞌā daiya Jonás, ¿ꞌáá neⁿꞌe di ꞌúú? Canéé ndaachi yiinú Pedro chí ꞌāā naachi ndii chííⁿ ndii ꞌíínú cuuvi yaaꞌví yā saⁿꞌā: ¿ꞌÁá neⁿꞌe di ꞌúú? Tuuꞌmí ngaⁿꞌa sa ngii sa ꞌiiⁿꞌyāⁿ: Señor, nꞌdiī déénú nī tanducuéⁿꞌē denduꞌū. Maaⁿ ní deenu nī chi neⁿꞌé nꞌdiī. Tuuꞌmí ngaⁿꞌa Jesús ngii yā saⁿꞌā: Caꞌá dí ꞌiiti cuūchi yeⁿꞌé, chi cheꞌé tī. 18 Cuaacu nííⁿnyúⁿ cuāācū niiⁿnyuⁿ ngaⁿꞌá ngií dii: Taachi saⁿꞌā ꞌlííⁿ dii inꞌnuuⁿ canúúⁿ dí catecai di ní cheⁿꞌe di naachi neⁿꞌe di. Naati taachí ꞌāā cuuvi ndiicú di ndoo táꞌa di ni táámá ꞌiiⁿꞌyāⁿ inꞌnuúⁿ yā catecai di ní candɛ́ɛ yā dii naachi nguɛ́ɛ́ neⁿꞌē di.
19 Ní chuū Jesús caⁿꞌa yā ní ngáꞌa yā chi cádiinuuⁿ sa dɛꞌɛ́ vaadī nꞌgiī diīiⁿ honrar Dendyuūs miiⁿ. Chꞌiinu caⁿꞌa yā chuū, tuuꞌmí ngaⁿꞌa yā ngiī yā Simón Pedro: Canꞌdáa di ꞌúú.
Discípulo chi neⁿꞌe taavi Jesús
20 Nguɛɛcundíī Pedro miiⁿ nꞌdiichi sá discípulo chi dineⁿꞌé Jesús, discípulo chi cueⁿꞌe sa ndúúcū Jesús. Sáⁿꞌā chi candiitínee sa ꞌiiⁿꞌyāⁿ taachi ꞌāā caama chi cheꞌe nguiinú yā. Ní ꞌāā caⁿꞌa yā chii yā saⁿꞌā: Señor, ¿duꞌū chi canéé chí diiⁿ entregar nꞌdiī? 21 Taachi Pedro miiⁿ nꞌdiichi sa discípulo miiⁿ tuuꞌmí ngaⁿꞌa yā ngii yā Jesús: Señor, ¿dɛꞌɛ idiiⁿ sáⁿꞌā tíī?
22 Tuuꞌmí ngaⁿꞌā Jesús ngii yā saⁿꞌā: Ndúúti chi ꞌúú chi neⁿꞌé chi cunee sá ndii taachi nindaá, ¿dɛꞌɛ́ ineeⁿ di chííⁿ? Díí canꞌdáa di ꞌúú.
23 Caāvā nduudu ꞌcūū tuumicadiinuuⁿ viꞌī sꞌeeⁿ chi discípulo miiⁿ nguɛ́ɛ́ canéé chi ꞌcuūvī sa. Naati Jesús ní nguɛ́ɛ́ caⁿꞌá yā chi nguɛ́ɛ́ ꞌcuūvī sa, naati Jesús caⁿꞌa yā: Ndúúti chi ꞌúú chi neⁿꞌé chi cunee sá ndii taachi nindaá, ¿dɛꞌɛ́ ineeⁿ di chííⁿ?
24 Saⁿꞌá ꞌcūū discípulo chi ngaⁿꞌā cuaacu sa yeⁿꞌē chúū. Ní idingúuⁿ sa chuū. Ní deenu yú chi chiiⁿ chi ngaⁿꞌa sa ní nduudu cuaacu ní cuaacu nííⁿnyúⁿ chi nduudu cuaacu.
25 Neené nꞌdeēe nꞌdáí cosa chi diíⁿ Jesús miiⁿ. Ndúúti chi canéé nguūⁿ ꞌáámá ꞌáámá cosa ꞌúú nadacadíinúúⁿ chi maaⁿ rá iⁿꞌyeēⁿdí ꞌcūū nguɛ́ɛ́ tunééⁿ libros chi canéé nguūⁿ yeⁿꞌe chuū. ꞌTíícā chiī.