Jesús nduuchi yā yeⁿꞌe nguaaⁿ tináⁿꞌā
20
ꞌÁámá domingo chi nguuvi vmnááⁿ vmnaaⁿ yeⁿꞌe ndɛɛtɛ̄ miiⁿ tá María Magdalena nééné ꞌdaꞌa ca ndaā tá na yáinyāⁿ. Ní nꞌdiichi tá tuūu miiⁿ chi ndiiviī na yáinyāⁿ. 2 Tuuꞌmi ní nꞌdaataá ngéenū tá nanááⁿ Simón Pedro ndúúcū táámá discípulo, ꞌiiⁿꞌyāⁿ chi dinéⁿꞌe taavi yā Jesús. Tuuꞌmí ngaⁿꞌā tá ngii tá saⁿꞌā sꞌeeⁿ: ꞌĀā ndiivíi yā Jesús miiⁿ ná chɛɛti yáinyāⁿ, ní nguɛ́ɛ́ deenu yú tií nꞌnéeⁿ yā ꞌiiⁿꞌyāⁿ.3 Ní canꞌdáā Pedro miiⁿ ndúúcū taama discípulo ní ndaá yā na yáinyāⁿ. 4 Ngéénū, ngéénū nduu ꞌuuví yā. Táámá discípulo diitu cá chéénu sa nguɛ́ɛ́ ti Pedro, ní ndaá vmnaaⁿ sa na yáinyāⁿ. 5 Canꞌdíi sa ní nꞌdiichi sa. Ní nꞌdiichi sá chi ꞌaa dámaaⁿ tiīnūuⁿ miiⁿ snúūⁿ naati nguɛ́ɛ́ chi ndaa sa chɛɛti yáinyāⁿ. 6 Simón miiⁿ ní sndaā sa chɛɛti yáinyāⁿ. Ní nꞌdiichi sa tiīnūuⁿ miiⁿ naachi snúuⁿ. 7 Niicu pañuelo chꞌɛɛtɛ ca tiīiⁿ nguɛ́ɛ́ dáámá tiīnūuⁿ lino. Ndɛ́ɛ́tií nduu cánéé táámá cuaaⁿ. 8 Tuuꞌmi ní sndaa ntúūⁿ táámá discípulo chi ndaā vmnááⁿ vmnaaⁿ ná yáinyāⁿ ní nꞌdiichí yā ní chiꞌtéénu yā. 9 Tii nguɛ́ɛ́ déénu yā chi canéé nguūⁿ chí Jesús miiⁿ cuuví nduuchí yā yeⁿꞌē nguaaⁿ tináⁿꞌā. 10 Ní nguɛɛcundií discípulos na vaacu yā.
Jesús nndaaca yā María Magdalena
11 Naati tá María canee ta chúvaꞌāī yáinyāⁿ. Neené ngɛɛcu tá. Ní diꞌcuaꞌáí naaⁿ tá nꞌdiichi tá chɛɛti yáinyāⁿ. 12 Ní nꞌdiichī tá na ꞌuuvi ángeles ndúúcū catecaí yā cuɛ́ɛ̄. ꞌÁámá ángel miiⁿ vɛɛ yā cuaaⁿ tiīⁿ naachi canúúⁿ cuerpo Jesús miiⁿ ní táámá yā vɛɛ yā cuaaⁿ ndiiya. 13 Ní caⁿꞌá yā: Díí nꞌdaataá, ¿dɛꞌɛ̄ cúúví chí ngɛɛcu di? Tuuꞌmí ngaⁿꞌa tá: Caati candɛ́ɛ yā Señor yeⁿꞌé, ní nguɛ́ɛ́ deenú tií sꞌnéeⁿ yā ꞌiiⁿꞌyāⁿ.
14 Taachi caⁿꞌa tá chuū, ndaacadaami tá. Ní nꞌdiichi ta Jesús chi canée yā miiⁿ naati nguɛ́ɛ́ deenu tá chi Jesús miiⁿ. 15 Tuuꞌmí ngaⁿꞌa Jesús ní ngii yā táⁿꞌā: Díí nꞌdaataá, ¿dɛꞌɛ̄ cúúví chí ngɛɛcu di? ¿Duꞌū inꞌnuuⁿ di? ꞌIicu nꞌdaataá miiⁿ ní nacadíínuuⁿ tá chi ꞌiiⁿꞌyāⁿ ꞌcúū ní ꞌiiⁿꞌyāⁿ chi diiⁿ cuidado yeⁿꞌē chéēⁿ yeⁿꞌe naāndā miiⁿ. Ní caⁿꞌa tá: Señor, ndúúti chi dii candɛ́ɛ di ꞌiiⁿꞌyāⁿ cuuvi di ꞌúú tií chiꞌneeⁿ dí ꞌiiⁿꞌyāⁿ ni ꞌúú ní candɛɛ́ ꞌiiⁿꞌyāⁿ.
16 Tuuꞌmi ngaⁿꞌa Jesús miiⁿ: María. Nguɛɛcundíí ntuūⁿ ta ní ngaⁿꞌā ta: Raboni. (Nduudu ꞌcūū neⁿꞌe caaⁿꞌmaⁿ, Maestro.)
17 Tuuꞌmí ngaⁿꞌa Jesús: Nguɛ́ɛ́ tuūꞌvī di ꞌúú caati ꞌāā cuɛ́ɛ́ caⁿꞌá nanááⁿ Chiidá. Naati dii, cuéⁿꞌe di nꞌdiichi di hermanos yeⁿꞌe yú ní caaⁿꞌmaⁿ di cuuvi di ꞌiiⁿꞌyāⁿ: Caⁿꞌá nanááⁿ Chiidá ní nanááⁿ Chiida yú, nanááⁿ Ndyuūs yeⁿꞌé ní nanááⁿ Ndyuūs yeⁿꞌé yú.
18 Cheⁿꞌe tá María Magdalena nanááⁿ discípulos ní caⁿꞌa tá chi nꞌdiichi tá Jesús miiⁿ. Caⁿꞌa tá chii tá discípulos nduudu chi Jesús miiⁿ caⁿꞌa yā chii yā táⁿꞌā.
Jesús nndaacá yā discípulos
19 Chii chí nguiīnū yeⁿꞌe maāⁿ nguuvi domingo mííⁿ, nguuvi vmnááⁿ vmnaaⁿ yeⁿꞌē ndɛɛtɛ miiⁿ ní naachi snúūⁿ discípulos ní nduudí cheendi vaꞌāī miiⁿ caati ꞌvaꞌá yā ꞌiiⁿꞌyāⁿ Israel sꞌeeⁿ. Ndaa Jesús miiⁿ. Ní canée yā naavtaⁿꞌā ꞌiiⁿꞌyāⁿ sꞌeeⁿ. Ní caⁿꞌa yā: Cuuvi ꞌdiiíⁿ ndúúcū ndísꞌtiī.
20 Taachí caⁿꞌa yā chuū, ní chꞌiⁿꞌi yā taꞌá yā ndúúcū tiicuáá yā. Ní discípulos yeenú taaví yā chí nꞌdiichí yā Jesús. 21 Tuuꞌmí ngaⁿꞌā ntúūⁿ Jesús ngii yā ꞌiiⁿꞌyāⁿ: Cuuvi ꞌdiiíⁿ ndúúcū ndísꞌtiī. Tanꞌdúúcā chi dichóꞌo Chiidá ꞌúú, ꞌtiicá ntúūⁿ ꞌúú dichoꞌó ndisꞌtiī.
22 Taachí caⁿꞌa yā chuū tiivineeⁿ yā ꞌiiⁿꞌyāⁿ ní caⁿꞌa yā: Cutaꞌá nī Espíritu Nꞌdai yeⁿꞌé Ndyuūs. 23 ꞌIiⁿꞌyāⁿ chi ndísꞌtiī nadichꞌɛɛcú nī nuūⁿndī yeⁿꞌé yā, ní ꞌāā nachꞌɛɛcu yeⁿꞌé yā. ꞌIiⁿꞌyāⁿ chíí nguɛ́ɛ́ nadichꞌɛɛcu nī nuuⁿndi yeⁿꞌé yā, ꞌāā nguɛ́ɛ́ nachꞌɛɛ̄cu yeⁿꞌé yā.
Nguɛ́ɛ́ chiꞌteenú Tomás
24 Naati Tomás ꞌáámá discípulo chi nguuvi Dídimo chi Gemelo nguɛ́ɛ́ cúnéé sá ndúúcū saⁿꞌā sꞌeeⁿ taachi Jesús miiⁿ ndaá yā. 25 Chíí tanꞌduuvi discípulos miiⁿ ngaⁿꞌa yā ngii yā saⁿꞌā: Nꞌdiichí ꞌnū Señor miiⁿ. Saⁿꞌā miiⁿ ní ngaⁿꞌa sa ngii sá ꞌiiⁿꞌyāⁿ sꞌeeⁿ: ꞌÚú ní nguɛ́ɛ́ cuꞌteenú ndúúti chi nguɛ́ɛ́ nꞌdiichí, ní nguɛ́ɛ́ tiinguú nduutitaꞌá naachí chꞌɛɛchi clavos, ní tiinguú taꞌá ná tiicuáá yā.
26 Chꞌiinu niiní nguuvi vɛɛtɛ ntúūⁿ discípulos snée yā chɛɛti vaꞌāī. Mííⁿ canéé Tomás ndúúcu yā. Ní nduudí cheendi vaꞌāī miiⁿ. Ndaa ntúūⁿ Jesús miiⁿ. Ní canúuⁿ yā naavtaⁿꞌā ní caⁿꞌa yā: Cuuvi ꞌdiiíⁿ ndúúcū ndísꞌtiī.
27 Tuuꞌmí ní Jesús ngaⁿꞌa yā ngiī yā Tomás miiⁿ: Tiingúú nduutitáꞌa di ꞌmuuⁿ ní nꞌdiichi di taꞌá. Ní tiingúú taꞌa di ndii ꞌmuuⁿ ní tiingúú taꞌā di tiicuáá. Ní nguɛ́ɛ́ chí nguɛ́ɛ́ cuꞌtéénu dí, canéé chi cuꞌtéénu dí.
28 Tuuꞌmi ní Tomás miiⁿ ní caⁿꞌā sa: Nꞌdiī Señor yeⁿꞌé. Nꞌdiī Dendyuūs yeⁿꞌé.
29 Tuuꞌmi ní ngaⁿꞌa Jesús miiⁿ: Tomás, díí ní chiꞌtéénu di tiī nꞌdiichi di ꞌúú. Nꞌdaí ꞌiiⁿꞌyāⁿ chi nguɛ́ɛ́ nꞌdiichi yā ꞌúú ní chiꞌtéénu yā.
¿Dɛꞌɛ cúúví chi vɛ́ɛ́ libro ꞌcūū?