Jesús nduuchi yā yeⁿꞌē nguaaⁿ tináⁿꞌā
16
Taachi chóꞌōo sábado, nguuvi chi ntaaviꞌtuunúúⁿ yā, María yeⁿꞌe yáāⁿ Magdala, ndúúcū María chí chɛɛcuú Jacobo, ndúúcū nꞌdaata chi Salomé cai yā perfumes chi cueendái yā vmnááⁿ yeⁿꞌē cuerpo yeⁿꞌē Jesús miiⁿ ní cueⁿꞌe yā. 2 Neené tyaaⁿ yeⁿꞌē nguuvi vmnááⁿ vmnaaⁿ yeⁿꞌé ndɛɛ̄tɛ chi domingo taachí canꞌdáá ꞌyáⁿꞌā nꞌdaatā sꞌeeⁿ ndaá yā na yáinyāⁿ miiⁿ. 3 Ní ngāⁿꞌa yā nguááⁿ maáⁿ yā: ¿Duꞌū ndivíi tuūu yeⁿꞌē yú taachí ndaā yú cheendi yáinyāⁿ?4 Taachí ndaa yā, tuuꞌmi ní nꞌdiichi yā chi tuūu chꞌɛɛtɛ́ nꞌdai miiⁿ ꞌāā ntɛ́ɛ́ canéé na lugar yeⁿꞌē. 5 Ní taachí ndáa yā chɛɛti yáinyāⁿ, miiⁿ nꞌdiichí yā ꞌáámá saⁿꞌā ꞌdííⁿ vɛɛ sa lado tá cuaācú ní canúúⁿ sá catecai chꞌéenūu sa ní cuɛ́ɛ̄. Ní nꞌdaata sꞌeeⁿ diiꞌyá yā chiī. 6 Sáⁿꞌā miiⁿ ní caⁿꞌā sa: Nguɛ́ɛ́ diiꞌyá nī cuuvi. Ndísꞌtiī ní inꞌnuúⁿ nī cuerpo yeⁿꞌe Jesús yeⁿꞌe yáāⁿ Nazaret, ꞌiiⁿꞌyāⁿ chí iiⁿꞌyāⁿ sꞌeeⁿ caꞌnééⁿngaꞌa yā. Nááti ꞌiiⁿꞌyāⁿ miiⁿ ní ꞌāā ndúúchí yā yeⁿꞌē nguaaⁿ tináⁿꞌā ní nguɛ́ɛ yā ꞌmuuⁿ. Cuinꞌdiichí nī naachí canuúⁿ yā. 7 Ndísꞌtiī cuinaⁿꞌá nī ní cuuvi nī discípulos yeⁿꞌe yā, ndúúcū Pedro, chi Jesús miiⁿ ní caⁿꞌá yā vmnááⁿ ndísꞌtiī na yáⁿꞌāa Galilea. Mííⁿ snaáⁿ nī ꞌiiⁿꞌyāⁿ tanꞌdúúcā chi Jesús caⁿꞌa yā chii yā ndísꞌtiī ndúúcū tanáⁿꞌā ꞌiiⁿꞌyāⁿ.
8 Nꞌdaata sꞌeeⁿ ní cunaⁿꞌá yā ngeenu yā yeⁿꞌe na yáinyāⁿ, ti neené cueⁿꞌe yiinú yā ní yiinduuví yā. Nguɛ́ɛ́ dɛꞌɛ̄ vɛɛ caⁿꞌá yā chii yā mar ꞌáámá ꞌiiⁿꞌyāⁿ, ti ꞌvaꞌá yā.
Jesús cheꞌenaáⁿ yā yeⁿꞌe ta María Magdalena
9 Taachí Jesús nduuchi yā chidɛɛvɛ nguuvi domingo chi nguuvi vmnááⁿ vmnaaⁿ yeⁿꞌe ndɛɛ̄tɛ̄ miiⁿ, vmnááⁿ vmnaaⁿ cheꞌenaáⁿ yā nanááⁿ María Magdalena, nꞌdaataá chí nnꞌdivií yā ndɛɛ̄chɛ̄ espíritus yeⁿꞌe yááⁿnꞌguiinūuⁿ yeⁿꞌē ta. 10 Táⁿꞌā miiⁿ ní caⁿꞌa tá ní chii tá ꞌiiⁿꞌyāⁿ chí chiicá yā ndúúcū Jesús miiⁿ. Ní ngɛɛcú ꞌiiⁿꞌyāⁿ sꞌeeⁿ chí neené ndaachií yiinu yā. 11 Ní taachí ꞌiiⁿꞌyāⁿ sꞌeeⁿ chꞌiindiveéⁿ yā chi Jesús miiⁿ nduuchi yā yeⁿꞌe nguaaⁿ tináⁿꞌā ní chí táⁿꞌā miiⁿ nꞌdiichi tá Jesús, nguɛ́ɛ́ sꞌteenú yā.
Jesús cheꞌenaáⁿ yā yeⁿꞌē ꞌuūvī discípulos yēⁿꞌe yā
12 Choꞌōo chúū, ní Jesús cheꞌenaáⁿ yā yeⁿꞌē ꞌuuvi ꞌiiⁿꞌyāⁿ chi cueⁿꞌé yā na yúúní. Ní Jesús diíⁿ yā tanꞌdúúcā chi nguɛɛ déénu yā yeⁿꞌe chi chóꞌōo. 13 Ní cuayiivi ꞌiiⁿꞌyāⁿ sꞌeeⁿ ní cúnaⁿꞌá yā ní caⁿꞌa yā chii yā tanáⁿꞌā discípulos. ꞌTiicá ntúūⁿ discípulos ní nguɛ́ɛ́ sꞌteenú yā.
Jesús idichóꞌo yā ꞌiiⁿꞌyāⁿ apóstoles yeⁿꞌe yā
14 Chiī chꞌíinū nguuvi domingo miiⁿ, ní Jesús cheꞌenaáⁿ yā yeⁿꞌē nduꞌū ndiicháámá discípulos yēⁿꞌe yā, taachi ꞌiiⁿꞌyāⁿ sꞌeeⁿ vɛɛ̄tɛ́ yā na mesa. Ní Jesús tuūvi iinú yā ndúúcu yā ti discípulos nguɛ́ɛ́ sꞌteenu yā ní chɛɛchi staava yeⁿꞌé yā ti discípulos nguɛ́ɛ́ sꞌteenú yā ꞌiiⁿꞌyāⁿ chi ngaⁿꞌa yā chí nꞌdiichí yā Jesús chí ꞌāā nduuchí yā yeⁿꞌē nguaaⁿ tínáⁿꞌā. 15 Ní caⁿꞌa yā chii yā discípulos: Cuéⁿꞌe nī núúⁿmáⁿ nación yeⁿꞌe íⁿꞌyeeⁿdī ní caaⁿꞌmáⁿ nī ndúúdú cuaacu yeⁿꞌē chí nanguáⁿꞌai yā nanááⁿ nducyaaca ꞌiiⁿꞌyāⁿ. 16 ꞌIiⁿꞌyāⁿ chí iꞌteenú yā ní ngɛɛdínuúⁿniⁿ yā, ní nanguaⁿꞌai yā yeⁿꞌe nuuⁿndi yeⁿꞌe yā. Naati ꞌiiⁿꞌyāⁿ chi nguɛ́ɛ́ iꞌtéénu yā cuuví yā condenado. 17 Níícú señales yeⁿꞌe poder miiⁿ canéé ndúúcū ꞌiiⁿꞌyāⁿ chi iꞌtéénu yā ꞌúú. Ndúúcū chi duūchí tunꞌdaá yā espíritus yeⁿꞌe yááⁿnꞌguiinūuⁿ yeⁿꞌe ꞌiiⁿꞌyāⁿ ní cuuví caⁿꞌá yā táámá davaacu chí ngai. 18 Ní nduuti chi cutaꞌá yā ndúúcū taꞌa yā ꞌáámá cúú ní nguɛ́ɛ́ dɛꞌɛ̄ daño diíⁿ tī ndúúcu yā. Ní nduuti chi cuꞌú yā dɛꞌɛ̄ chí veneno miiⁿ nguɛ́ɛ́ diiⁿ daño ꞌiiⁿꞌyāⁿ. Ní cunꞌduú yā taꞌa yā vmnaaⁿ yeⁿꞌē ꞌiiⁿꞌyāⁿ chi ngíítā ní ꞌiiⁿꞌyāⁿ sꞌeeⁿ ní nduūvā yēⁿꞌe yā.
Jesús cundáa yā vaꞌai chɛɛti nguuvi
19 Chꞌíínú caⁿꞌa Señor Jesús ndúúdú ꞌcūū ndúúcū discípulos yēⁿꞌe yā ní cundáa yā na vaꞌai chɛɛti nguuvi. Ní chꞌiindí yā lado yeⁿꞌe honor yeⁿꞌé Ndyuūs. 20 Discípulos ní cueⁿꞌe yā, ní caⁿꞌa yā nduudu cuaacu yeⁿꞌē chí nanguaⁿꞌai yā nduꞌū cuaaⁿ. Maaⁿ Señor Jesucristo ngiinnee yā discípulos ꞌíícú canee nꞌdaācā ndúúdú yeⁿꞌe yā cáávā señales ndúúcū vaadī nꞌgiinu chi diíⁿ yā. ꞌTíícā chiī.