Jesús nduuchi yā yeⁿꞌē nguaaⁿ tináⁿꞌā
28
Chóꞌōo nguuvi sábado chi ntaaviꞌtuunúúⁿ yā ní chidɛɛvɛ táámá nguuvi chi domingo, nguuvi chi ngaⁿꞌa yú chi nguuvi vmnááⁿ vmnaaⁿ yeⁿꞌe ndɛɛtɛ̄, ní tá María Magdalena ndúúcū taama tá María cheⁿꞌe ta nꞌdiīchī tá na yaīnyāⁿ yeⁿꞌe Jesús. 2 Ní nééné díítūu nuⁿꞌu yáⁿꞌāa ti ꞌaama ángel yeⁿꞌe Señor Ndyuūs chiiya yā yeⁿꞌē vaꞌai chɛɛti nguuvi. Ní taachi ndaa yā, divíi yā tuūu chꞌɛɛtɛ miiⁿ yeⁿꞌe cheendi yaīnyāⁿ ní chꞌiindi yā vmnaaⁿ yeⁿꞌe tuūú miiⁿ. 3 Angel miiⁿ tanꞌdúúcā chi inááⁿ ꞌcuai ꞌtíícā máaⁿ yā chi dɛɛvɛ yā. Ní catecai yā ní cuɛ́ɛ̄ tanꞌduucā yaāⁿ. 4 Soldados chí idiiⁿ yā cuidado yáinyāⁿ miiⁿ inꞌdúúví yā chi ꞌvaꞌa yā. Ní nduuví yā tanꞌdúúcā chí chꞌīi yā. 5 Naati ángel miiⁿ caⁿꞌa yā chii yā nꞌdaataá sꞌeeⁿ: Nguɛ́ɛ́ ꞌvaꞌa ndísꞌtiī; ti ꞌúú ní deenú ti inꞌnuúⁿ nī Jesús chí cāꞌneeⁿngaꞌā. 6 ꞌĀā ntɛ́ɛ́ ꞌiiⁿꞌyāⁿ miiⁿ ti nduuchi yā yeⁿꞌē nguaaⁿ tináⁿꞌā tanꞌdúúcā chi caⁿꞌa yā. Cuchíi nī ní nꞌdiichí nī naachí cānuuⁿ cuerpo yeⁿꞌe Señor miiⁿ. 7 Cuayiivi ní ngaⁿꞌa ángel chii yā nꞌdaataá sꞌeeⁿ: Cuinaⁿꞌa núuⁿ nī maāⁿnchɛɛ̄tɛ́ ní caaⁿꞌmáⁿ nī cuuvi nī discípulos yeⁿꞌe yā chí nduuchi Jesús miiⁿ yeⁿꞌe nguaaⁿ tináⁿꞌā. Cuinꞌdiichí nī. Jesús miiⁿ caⁿꞌa yā vmnááⁿ ndísꞌtiī na yáⁿꞌāa Galilea. Mííⁿ snaaⁿ nī ꞌiiⁿꞌyāⁿ. Chúū chí ngaⁿꞌá ngií ndísꞌtiī.8 Tuuꞌmi ní nꞌdaata sꞌééⁿ nanꞌdáa yā chɛɛti yáinyāⁿ miiⁿ ní diiꞌyá yā chiī ní duuvi yeenú yā. Nꞌdaata sꞌééⁿ ní cueⁿꞌe yā ngéenū yā ní caⁿꞌa yā chii yā discípulos yeⁿꞌe Jesús tanꞌdúúcā chí nꞌdiichí yā. 9 Tuuꞌmi ní taachi cueⁿꞌé yā chi yaaꞌví yā discípulos cuinꞌdiichí nī, Jesús miiⁿ ndaá yā chí nndaacá yā nꞌdaata sꞌeeⁿ ní caⁿꞌa yā: Tavachoꞌonoó nī ndísꞌtiī nꞌdaata sꞌeeⁿ. Ní nꞌdaata sꞌeeⁿ ní ndáá niiⁿnúⁿ yā Jesús miiⁿ ní túmaⁿꞌa yā caꞌa Jesús miiⁿ ní sꞌtéénu yā ꞌiiⁿꞌyāⁿ. 10 Tuuꞌmi ní Jesús caⁿꞌa yā chii yā nꞌdaataá sꞌééⁿ: Nguɛ́ɛ́ ꞌvaꞌa nī. Cuéⁿꞌe nī cuuví nī hermanos yeⁿꞌé chi nꞌdiichí nī ꞌúú. Ní hermanos caⁿꞌa yā na yáⁿꞌāa Galilea ní miiⁿ snaáⁿ yā ꞌúú.
Soldados ngaⁿꞌa yā ngii yā chiiduú nꞌgɛɛtɛ sꞌeeⁿ tanꞌdúúcā chí chiī
11 Nchóꞌōo nꞌdaata sꞌuuⁿ cunaⁿꞌá yā ní nꞌduuvi soldados chi diíⁿ yā cuidado yeⁿꞌe yáinyāⁿ cheⁿꞌé yā na yáāⁿ Jerusalén ní caⁿꞌa yā chii yā chiiduú nꞌgɛɛtɛ yeⁿꞌé tánducueⁿꞌē chí chiī. 12 Chiiduú nꞌgɛɛtɛ nadidaamá yā ndúúcū ꞌiiⁿꞌyāⁿ ndíícuū chi ngaⁿꞌa ntiiⁿnyuⁿ yeⁿꞌe yaācū. Ní nduuvidaamá yā ní nééné nꞌdeēe túumī caꞌa yā soldados. 13 Ní caⁿꞌa yā chii yā soldados: Ndísꞌtiī ní ꞌtúúcā caaⁿꞌmaⁿ nī: Taachi yaaⁿ stiyaadú ꞌnū discípulos yeⁿꞌe Jesús ndaá yā ní diduucú yā cuerpo yeⁿꞌe Jesús. 14 Ní nduuti chi gobernador ꞌcaandíveéⁿ yā chííⁿ chí ndísꞌtiī caaⁿꞌmaⁿ nī, núsꞌuu yaaꞌvi neeⁿ ꞌnū ꞌiiⁿꞌyāⁿ ní nguaⁿꞌāī ndísꞌtiī.
15 Soldados ní staꞌá yā tuūmī miiⁿ ní diíⁿ yā tanꞌdúúcā chi chiiduú nꞌgɛɛtɛ caⁿꞌá yā chii yā soldados. Chííⁿ chí ndii maaⁿ ní ꞌiiⁿꞌyāⁿ yeⁿꞌe ndaataá Israel ngaⁿꞌá yā ꞌtíícā.
Jesús idichóꞌo yā discípulos yeⁿꞌe yā
16 Nduꞌū ndiicháámá discípulos cueⁿꞌé yā na yáⁿꞌāa Galilea ní ndaá yā ná yiīcū naachí Jesús miiⁿ dichóꞌo yā ꞌiiⁿꞌyāⁿ sꞌeeⁿ. 17 Taachí discípulos nꞌdiichí yā Jesús miiⁿ, sꞌtéénu yā ꞌiiⁿꞌyāⁿ ꞌáárá chí náⁿꞌa yā ní ꞌuūvī vaanicádiinūuⁿ yeⁿꞌe yā. 18 Jesús ní ndaa niiⁿnúⁿ yā ní yaaꞌvi yā discípulos ní caⁿꞌa yā: Chiidá ní tee yā ꞌúú nducuéⁿꞌe poder chí caaⁿꞌmaⁿ ntiiⁿnyúⁿ na vaꞌāī chɛɛti nguuvi ndúúcū na iⁿꞌyeeⁿdí ꞌcūū. 19 Maaⁿ ní cueⁿꞌe nī ni caꞌcueéⁿ nī nuuⁿmaⁿ naciones, ní cuuvi nī discípulos yeⁿꞌé. ꞌIiⁿꞌyāⁿ chi iꞌtéénú yā nduudu cuaacu yeⁿꞌé, ndísꞌtiī cuɛɛdínuūⁿniⁿ nī ꞌiiⁿꞌyāⁿ miiⁿ ndúúcū chi duuchi Ndyuūs Chiida yú, ndúúcū Daiya yā, ndúúcū Espíritu Nꞌdai yeⁿꞌé Ndyuūs. 20 Cáꞌcueeⁿ nī ꞌiiⁿꞌyāⁿ sꞌeeⁿ chí diíⁿ yā tanducuéⁿꞌē denduꞌū chi ꞌúú ngaⁿꞌá ngií ndísꞌtiī. Ní cadíínuuⁿ nī chi ꞌúú ní caneé ndúúcū ndísꞌtiī nducuéⁿꞌē tiempo ndíí ntuuví iⁿꞌyeēⁿdī. ꞌTíícā cuuvi.