4 Tuuꞌmí canꞌdáa ntuūⁿ Pilato chuvaꞌāī. Ní caⁿꞌā sa chii sa ꞌiiⁿꞌyāⁿ sꞌeeⁿ: Cuinꞌdiichí nī, tunꞌdaá ꞌiiⁿꞌyāⁿ chuvaꞌāī niicu tuumicadiinúúⁿ nī chi nguɛ́ɛ́ nꞌdiichí mar ꞌáámá nuuⁿndi yeⁿꞌé yā.

5 Ní canꞌdaā Jesús chuvaꞌāī. Canꞌdɛ́ɛ yā corona yeⁿꞌe yááⁿ ndúúcū catecai morado yā. Ní ngaⁿꞌa Pilato miiⁿ: Cunꞌdííchí nī saⁿꞌā.

6 Taachí nꞌdiichí yā ꞌiiⁿꞌyāⁿ tuuꞌmi ní chiiduú nꞌgɛɛtɛ́ ndúúcū policías nꞌgaī yiicu sa: Cuꞌnééⁿngaꞌá nī ꞌiiⁿꞌyāⁿ. Cuꞌnééⁿngaꞌá nī ꞌiiⁿꞌyāⁿ. Tuuꞌmi ngaⁿꞌā Pilato ngii yā ꞌiiⁿꞌyāⁿ sꞌeeⁿ: Cutaꞌa ndisꞌtiī ꞌiiⁿꞌyāⁿ, ní cuꞌnééⁿngaꞌá nī ꞌiiⁿꞌyāⁿ, ti ꞌúú ní nguɛ́ɛ́ indaacá mar ꞌáámá nuuⁿndi yēⁿꞌe yā.

7 Nanꞌguɛɛcútaⁿꞌā ꞌiiⁿꞌyāⁿ Israel sꞌeeⁿ: Núsꞌuū ní cánéé ley yeⁿꞌé ꞌnū. Ní tanꞌdúúcā chi ngaⁿꞌa ley miiⁿ canee chi ꞌcuuvī caati caⁿꞌa yā chi maáⁿ yā Daiya Dendyuūs ꞌiiⁿꞌyāⁿ.

8 Taachí chꞌiindiveeⁿ Pilato chuū diiꞌyā ca sá chiī. 9 Chindáa ntuūⁿ sa cuarto yeⁿꞌē juzgado ní caⁿꞌá yā chii yā Jesús: ¿Tií ꞌiiⁿꞌyāⁿ dii? Naati Jesús ní nguɛ́ɛ́ caⁿꞌa yā.

10 Tuuꞌmi ní caⁿꞌa Pilato Jesús: Dii, ¿ꞌáá nguɛɛ ngaⁿꞌā di yeⁿꞌé? ¿ꞌÁá nguɛ́ɛ́ deenu di chi ꞌúú ní cúúví caaⁿꞌmaⁿ ntiiⁿnyúⁿ chi cuꞌnééⁿngaꞌá nī dii, ní cuuvi nꞌtɛɛchí ntúuⁿ dii?

11 Nanꞌguɛɛcútaⁿꞌā Jesús miiⁿ: Nguɛ́ɛ́ duꞌū vɛɛ cuuvi diiⁿ di ndúúcū ꞌúú ndúúti chi nguɛ́ɛ́ duꞌū vɛɛ ndii caꞌa yeⁿꞌē di yeⁿꞌē vaꞌai chɛɛti nguuvi. ꞌIiⁿꞌyāⁿ chi tee yā ꞌúú chi preso ꞌúú nanáá nꞌdiī, ꞌiiⁿꞌyāⁿ miiⁿ dichꞌɛɛtɛ ca nuuⁿndi yēⁿꞌe yā.

12 Ndíí tuuꞌmi ní neⁿꞌe Pilato nꞌtɛɛchi sa ꞌiiⁿꞌyāⁿ. Naati ꞌiiⁿꞌyāⁿ Israel sꞌeeⁿ nꞌgai yiicú yā ní ngaⁿꞌa yā: Ndúúti chi saⁿꞌá ꞌcūū nꞌtɛɛchi di, nguɛ́ɛ́ dii amigo yeⁿꞌē César. Nducyáácá ꞌiiⁿꞌyāⁿ chi ngaⁿꞌa yeⁿꞌé yā chi maáⁿ yā rey ngaⁿꞌa yā contra César.

13 Tuuꞌmí Pilato, taachi chꞌiindiveeⁿ sa chuū, candɛ́ɛ sa Jesús chuvaꞌāī. Ní chꞌiindi sa ná silla yeⁿꞌe juzgado chi nguuvi Enlosado, ní nduudu hebreo neⁿꞌe caaⁿꞌmaⁿ Gabata. 14 Ní nguuvi chi diíⁿ yā ntiiⁿnyuⁿ yeⁿꞌē ꞌviicu yeⁿꞌē pascua, tanꞌdúúcā ndiichúúví na nguuvi. Tuuꞌmí ngaⁿꞌa Pilato ꞌiiⁿꞌyāⁿ Israel sꞌeeⁿ: Cuinꞌdiichí nī Rey yeⁿꞌé nī.

15 Naati ꞌiiⁿꞌyāⁿ sꞌeeⁿ ꞌcaí yā diitú yā: Divíi nī ꞌiiⁿꞌyāⁿ, divíi nī ꞌiiⁿꞌyāⁿ, cuꞌnééⁿngaꞌá nī ꞌiiⁿꞌyāⁿ. Tuuꞌmí ngaⁿꞌa Pilato: ¿ꞌÁá rey yeⁿꞌé nī chi cuꞌnééⁿngaꞌá nī? Tuuꞌmí nanꞌguɛɛcútaⁿꞌā saⁿꞌā chiiduú nꞌgɛɛtɛ́: Nguɛ́ɛ́ rey yēⁿꞌe ꞌnū caati ꞌāā César nuúⁿ.

16 Tuuꞌmi ní Pilato caꞌá yā Jesús miiⁿ ꞌiiⁿꞌyāⁿ sꞌeeⁿ ní ꞌiicu cuꞌnééⁿngaꞌá yā. Ní ꞌiiⁿꞌyāⁿ sꞌeeⁿ staꞌá yā Jesús miiⁿ ní candɛ́ɛ yā ꞌiiⁿꞌyāⁿ.

17 Ní Jesús candɛ́ɛ yā cruz yēⁿꞌe yā. Ní canꞌdáa yā na lugar chi ꞌáámá lado yeⁿꞌe yáāⁿ Jerusalén chi nguuvi Calavera chi lugar ꞌIini Ngaꞌai Tiīiⁿ, ꞌiicu nduudu hebreo neⁿꞌe caaⁿꞌmaⁿ Gólgota. 18 Naachí cuꞌnééⁿngaꞌá yā Jesús ndúúcū taa na ꞌuuví yā. ꞌÁámá yā ꞌáámá ꞌáámá lado ꞌiicu Jesús miiⁿ ní naavtáⁿꞌā canuúⁿ yā. 19 Ní ꞌneeⁿ Pilato miiⁿ ꞌáámá letra chi nꞌduu sá nanááⁿ cruz ní canéé nguūⁿ miiⁿ, Jesús yeⁿꞌē yaāⁿ Nazaret, Rey yeⁿꞌe ꞌiiⁿꞌyāⁿ yeⁿꞌe ndaata yeⁿꞌe Israel. 20 Ní neené ꞌyaaⁿ ꞌiiⁿꞌyāⁿ Israel sꞌeeⁿ chꞌeéⁿ yā letra ꞌcūū ti nááchí cuꞌnééⁿngaꞌa yā Jesús miiⁿ niiⁿnuúⁿ na yáāⁿ Jerusalén miiⁿ. Canéé nguūⁿ miiⁿ na nduudu hebreo ndúúcū nduudu griego ndúúcū nduudu latín. 21 Ní ngaⁿꞌa saⁿꞌā chiiduú nꞌgɛɛtɛ́ yeⁿꞌē ꞌiiⁿꞌyāⁿ Israel sꞌeeⁿ ngii sa Pilato: Nguɛ́ɛ́ ꞌneeⁿ di Rey yeⁿꞌē ꞌiiⁿꞌyāⁿ yeⁿꞌe ndaata yeⁿꞌe Israel naati maáⁿ yā ngaⁿꞌa yā: ꞌÚú Rey yeⁿꞌe ꞌiiⁿꞌyāⁿ yeⁿꞌe Israel ꞌúú.

22 Nanꞌguɛɛcútaⁿꞌā Pilato saⁿꞌā miiⁿ: Chiiⁿ ꞌneéⁿ ꞌāā ꞌneéⁿ.

23 Taachi soldados chiꞌneeⁿngaꞌā sa Jesús, staꞌá sa catecai yā ní diīⁿ sa repartir catecai yā. Niicu ꞌáámá ꞌáámá tááⁿ catecai yā ꞌaama soldado. Abrigo catecai yā miiⁿ nguɛ́ɛ́ nꞌdeenyú ndii ꞌnííⁿnúⁿ ndíí cuaaⁿ ndiiya. 24 Ní caⁿꞌa sa nguaaⁿ maáⁿ sa: Nguɛ́ɛ́ ꞌcanuu cuūⁿ yú naati tunꞌdaī yú suerte yeⁿꞌē yú nduūcū. Duꞌú yeⁿꞌē cuuvi. Ní ꞌiicu cuuví cuaacu naachí canee nguūⁿ chi ngaⁿꞌā:

25 Ní chɛɛcuú Jesús miiⁿ canée yā niiⁿnuúⁿ ná cruz yeⁿꞌe Jesús ndúúcū viꞌī chɛɛcuú yā chi nguuvi María chi nꞌdaataá yeⁿꞌē Cleofas, ndúúcū María Magdalena. 26 Taachí nꞌdiichi Jesús chɛɛcú yā ndúúcū discípulos chi yaꞌāī ꞌiinú yā chi caneé niiⁿnuúⁿ tuuꞌmi ní Jesús ngaⁿꞌá yā ngiī yā chɛɛcú yā: Nꞌdiī nꞌdaataá, cunꞌdííchí nī daiya nī. 27 Tuuꞌmi ní ngaⁿꞌa yā ngiī yā discípulo: Cunꞌdiichi di, ꞌííngaā chɛɛcu di. Ndíí tuuꞌmi ní discípulo miiⁿ ní dichɛɛcú yā ꞌiiⁿꞌyāⁿ.

28 Choꞌó tanducueⁿꞌē chuū ní déénú Jesús chi tanducuéⁿꞌē denduꞌū ní ꞌāā chii cuaacu. Niicu naachi canéé nguūⁿ níícú cuuvi cuaacu. Ngaⁿꞌa Jesús: Yaacá.

29 Mííⁿ canéé ꞌáámá vaso ndiitu vinagre. Tuuꞌmi ní ꞌáámá soldado dicuutu yā ꞌáámá esponja ndúúcū vinagre. Ní chiꞌneeⁿ yā na áámá yáⁿꞌá hisopo. Ní sꞌneeⁿ yā na cheendi Jesús. 30 Taachí Jesús chiꞌi yā vinagre, caⁿꞌa yā: Chꞌíínú tanducuéⁿꞌē denduꞌū. Ní nadicuaꞌá yā tiiⁿ yā chi nꞌnééⁿ maáⁿ yā espíritu yēⁿꞌe yā.

31 Tuuꞌmi ní caati nguuvi viernes chi diíⁿ yā ntiiⁿnyuⁿ yeⁿꞌē ꞌviicu pascua miiⁿ, ní ꞌiiⁿꞌyāⁿ Israel sꞌeeⁿ diꞌcuíítu sa Pilato chi ꞌcúuⁿmāⁿ sa ꞌííní caꞌa saⁿꞌā sꞌeeⁿ ní candɛ́ɛ sa cuerpo yeⁿꞌé yā. Caati nguɛ́ɛ́ neⁿꞌé sa chi canée cuerpo yeⁿꞌé yā na cruz nguuvi sábado miiⁿ caatí sábado ní nguuvi chꞌɛɛtɛ yeⁿꞌe ꞌviicu pascua. 32 Ní ndaā soldados ní ndaa sa nanááⁿ saⁿꞌā chi vmnááⁿ vmnaaⁿ. ꞌTíícā ꞌcuúⁿ sa caꞌa sa. ꞌTíícā ꞌcuúⁿ ntúūⁿ sa caꞌā taama sa. 33 Naati taachí ndaa sa nanááⁿ Jesús miiⁿ, ní caati nꞌdiichí yā chi ꞌāā nꞌdii Jesús nguɛ́ɛ́ ꞌcuúⁿ sa caꞌa yā.

34 Naati ꞌáámá soldado nꞌdaꞌai sa tiicuá Jesús ndúúcū ꞌaama lanza ní canꞌdaā yuuúⁿ ndúúcū nuūⁿnīⁿ. 35 ꞌIiⁿꞌyāⁿ chí nꞌdiichí yā ngaⁿꞌá yā nduudu cuaacu. Níícú chiiⁿ chi ngaⁿꞌá yā. Miiⁿ ní cuaacu chííⁿ. ꞌIicu déénu yā chi ngaⁿꞌá yā nduudu cuaacu níícú ndísꞌtiī ntúūⁿ ní cuꞌteenú nī. 36 Níícú chuū choꞌōo ní cúúví cuaacu chi canée nguūⁿ na libro yeⁿꞌe Ndyuūs: Mar ꞌáámá ꞌiini yeⁿꞌé yā nguɛ́ɛ́ ꞌcúúⁿ sa. 37 Ní taama naachi canéé nguūⁿ ní ngaⁿꞌā: Nꞌdiichí yā ꞌiiⁿꞌyāⁿ chi choꞌōo nééⁿ tiicuá yā.

38 Choꞌōo chuū. José yeⁿꞌē yáāⁿ Arimatea chi ꞌáámá discípulo yeⁿꞌe Jesús nꞌdeꞌei nꞌdeꞌéí nūuⁿ ti ꞌvaꞌa sa ꞌiiⁿꞌyāⁿ Israel sꞌeeⁿ, diꞌcuíítu sa Pilato miiⁿ chi cuuví candɛɛ sa cuerpo yeⁿꞌē Jesús. Ní ꞌcuūⁿ Pilato saⁿꞌā miiⁿ. Tuuꞌmi ní ndaā sa ní nadivíi sa cuerpo yeⁿꞌē Jesús miiⁿ ní candɛ́ɛ sa cuerpo miiⁿ. 39 Ndaa ntúūⁿ Nicodemo, saⁿꞌā chi vmnaaⁿ indaá sá nanááⁿ Jesús miiⁿ ꞌaama nꞌgaaⁿ, ní ndɛ́ɛ sa ꞌáámá perfume chi ndístaⁿꞌā perfume yeⁿꞌē mirra ndúúcū áloes. Ngíí tanduu ꞌáámá ciento libras. 40 Staꞌá yā cuerpo yeⁿꞌe Jesús ní chꞌɛɛcú yā ná tiīnūuⁿ ndúúcū perfume miiⁿ, tanꞌdúúcā costumbre yeⁿꞌē ꞌiiⁿꞌyāⁿ Israel sꞌeeⁿ taachí nꞌgiichí yā tinaⁿꞌā. 41 Ní lugar miiⁿ naachi chiꞌneeⁿngaꞌa yā, miiⁿ canéé ꞌáámá chéēⁿ naāndā. ꞌÍícú chɛɛti chéēⁿ miiⁿ canéé ꞌáámá yáinyāⁿ ngai. Mar ꞌáámá ꞌiiⁿꞌyāⁿ nguɛ́ɛ́ inꞌnuúⁿ yā chɛɛti. 42 Cáávā chi nguuvi viernes chi chꞌiindiyaáⁿ yā yeⁿꞌe ꞌviicú yeⁿꞌe pascua yeⁿꞌē ꞌiiⁿꞌyāⁿ Israel sꞌeeⁿ, sꞌnuúⁿ yā cuerpo Jesús miiⁿ chɛɛti yáinyāⁿ miiⁿ chi canee niiⁿnuúⁿ.