Ngaⁿꞌa yā chí Cristo caꞌnééⁿngaꞌá yā
2
Ndísꞌtiī hermanos yeⁿꞌé, taachí ndāa ní caneé ndúúcu nī ꞌtíícā caⁿꞌá nduudu cuaacu yeⁿꞌé Dendyuūs. Nguɛ́ɛ́ caⁿꞌá nduudu miiⁿ ndúúcū núúⁿmáⁿ vadicadíínūuⁿ yeⁿꞌe vaadī deenu. 2 ꞌTíícā ngaⁿꞌá, ti nguɛ́ɛ́ neⁿꞌé caāⁿꞌmaⁿ táámá cosa nanááⁿ ndísꞌtiī, dámaaⁿ neⁿꞌé caaⁿꞌmáⁿ yeⁿꞌē Jesucristo chi caꞌnééⁿngaꞌá yā. 3 Taachi caneé ndúúcū ndísꞌtiī ndii cuūⁿnūⁿ ꞌúú; ní ꞌvaꞌā ꞌúú; ní nééné inꞌduuví vaa. 4 Nguɛ́ɛ́ ngaⁿꞌá nduudu miiⁿ ndúúcū vaadī deenu chi cadiinuuⁿ ꞌiiⁿꞌyāⁿ yeⁿꞌē iⁿꞌyeeⁿdí ꞌcūū, naati ngaⁿꞌá nduudu cuaacu miiⁿ ndúúcū nduudu chi nguɛ́ɛ́ ngíⁿꞌīi. Ngaⁿꞌá chiiⁿ chi Espíritu Nꞌdai yeⁿꞌé Ndyuūs chꞌiⁿꞌí yā ꞌúú ndúúcū poder yeⁿꞌé yā chí nduudu cuaacu miiⁿ ní yeⁿꞌe Dendyuūs. Níícú ꞌiiⁿꞌyāⁿ cuuvi deenú yā chí nduudu cuaacu miiⁿ ní nduudu yeⁿꞌé Dendyuūs. 5 ꞌTíícā ngaⁿꞌá ti chííⁿ chi iꞌteenu yú nguɛ́ɛ́ chiīcā na vaanīcadiīnuuⁿ yeⁿꞌe ꞌiiⁿꞌyāⁿ yeⁿꞌē iⁿꞌyeeⁿdí ꞌcūū ti yeⁿꞌē poder yeⁿꞌé Dendyuūs.Dendyuūs diíⁿ yā chi deenu ꞌiiⁿꞌyāⁿ cucáávā Espíritu Nꞌdai yeⁿꞌe yā
6 Taachi caneé ꞌnū nguaaⁿ ꞌiiⁿꞌyāⁿ chi iꞌteenú yā Dendyuūs ní ꞌáámá caneé yā ndúúcū Dendyuūs, tuuꞌmi ní ngaⁿꞌá ꞌnū ndúúcū nduudu ngiⁿꞌīi yeⁿꞌe vaanicádiinūuⁿ. Nguɛ́ɛ́ ti vaadī deenu chi nadacadiinúuⁿ ꞌiiⁿꞌyāⁿ yeⁿꞌē iⁿꞌyeeⁿdí ꞌcūū, ꞌiiⁿꞌyāⁿ chi nguɛ́ɛ́ iꞌtéénu yā Dendyuūs yeⁿꞌē yú. Ndíí nguɛ́ɛ́ ti yeⁿꞌé saⁿꞌā chi ndii tíīiⁿ yeⁿꞌē iⁿꞌyeeⁿdí ꞌcūū chi chóꞌōo poder yeⁿꞌe yā. 7 Naati ngaⁿꞌá ꞌnū vaadī déénu yeⁿꞌé Dendyuūs. Ní nguɛ́ɛ́ deenú ꞌiiⁿꞌyāⁿ yeⁿꞌē iⁿꞌyeeⁿdí ꞌcūū vaadī deenu miiⁿ, ti Ndyuūs caⁿꞌa yā vaadī deenú ꞌcūū chi yeⁿꞌe maáⁿ yā vmnááⁿ vmnaaⁿ chi dinꞌdái yā íⁿꞌyeeⁿdí ꞌcūū, ní ꞌiicu cuuvi nadinguáⁿꞌai yā sꞌuūúⁿ. 8 Mar ꞌáámá ꞌiiⁿꞌyāⁿ nꞌgɛɛtɛ yeⁿꞌē iⁿꞌyeeⁿdí ꞌcūū déénū yā yeⁿꞌe vaadī deenú ꞌcūū, ti nduuti chi déénu yā, tuuꞌmi ní nguɛ́ɛ́ sꞌneeⁿngaꞌá yā Señor Jesucristo chi chīīca yā yeⁿꞌē vaꞌai chɛɛti nguūvī. 9 Canéé nguūⁿ ndii cuááⁿ vmnaaⁿ ná libro yeⁿꞌé Ndyuūs ꞌtíícā:
Nducuéⁿꞌē chi dinꞌdái Dendyuūs ní yeⁿꞌé ꞌiiⁿꞌyāⁿ chí iꞌteenu ꞌiivú Ndyuūs, tanáⁿꞌā ꞌiiⁿꞌyāⁿ yeⁿꞌē iⁿꞌyeeⁿdí ꞌcūū nguɛ́ɛ́ nꞌdiichí yā Jesucristo, ndíí nguɛ́ɛ́ nꞌgiindiveéⁿ yā yeⁿꞌé yā, ndíí nguɛ́ɛ́ nadicadiinúuⁿ yā yeⁿꞌe denduꞌū chuū na staava yeⁿꞌe yā.
10 Ndyuūs chꞌiⁿꞌí yā nducuéⁿꞌē sꞌuūúⁿ cucaavā Espíritu Nꞌdai yeⁿꞌé yā. Espíritu Nꞌdai yeⁿꞌé Dendyuūs ní deenú yā nducuéⁿꞌē, ní deenú yā nducuéⁿꞌē vaadī deenu yeⁿꞌé Ndyuūs. 11 ¿Duꞌú ꞌiiⁿꞌyāⁿ cuuvi deenú yā chi nadacadiinúúⁿ taama ꞌiiⁿꞌyāⁿ? Dámaaⁿ espíritu yeⁿꞌe maáⁿ yā deēnu chi maáⁿ yā nadacadíínuuⁿ yā. ꞌTíícá ntúūⁿ mar ꞌáámá ꞌiiⁿꞌyāⁿ nguɛɛ cádíínuuⁿ yā chi Ndyuūs nadicadíínuuⁿ yā, ti dámaāⁿ Espíritu Nꞌdai yeⁿꞌé Dendyuūs deenu yā yeⁿꞌé Dendyuūs. 12 Sꞌuūúⁿ ní nguɛ́ɛ́ staꞌā yú espíritu chi yeⁿꞌē iⁿꞌyeēⁿdī ti staꞌā yú Espíritu Nꞌdai chí cuchiī yeⁿꞌé Ndyuūs. Maaⁿ ní cuuvi deenu yú nducuéⁿꞌē chí nꞌdaacā nꞌdai ti Ndyuūs teé yā sꞌuūúⁿ Espíritu Nꞌdai yeⁿꞌé yā. 13 Ngaⁿꞌa ntúūⁿ yú yeⁿꞌe nducuéⁿꞌē chuū. Nguɛ́ɛ́ ngaⁿꞌa yú ndúúcū nduudu chi ngiꞌcueeⁿ ꞌiiⁿꞌyāⁿ yeⁿꞌe iⁿꞌyeeⁿdí ꞌcūū. Espíritu Nꞌdai yeⁿꞌé Ndyuūs caꞌcueéⁿ yā nducyaaca ꞌiiⁿꞌyāⁿ chi canee ndúúcū Espíritu Nꞌdai miiⁿ.
14 ꞌIiⁿꞌyāⁿ chi nguɛ́ɛ́ iꞌtéénu yā Jesucristo yeⁿꞌē yú nguɛ́ɛ́ ituumicádiinuuⁿ yā denduꞌū chí yeⁿꞌē Espíritu Nꞌdai yeⁿꞌé Dendyuūs, ti staꞌá yā nduudu miiⁿ tanꞌdúúcā ꞌáámá cosa chí duuchi. Ní nguɛ́ɛ́ cuuvi tuumicadiinúúⁿ yā nduudu miiⁿ ti canéé chi cadiinúúⁿ yā nduudu miiⁿ cáávā Espíritu Nꞌdai yeⁿꞌé Dendyuūs. 15 ꞌIiⁿꞌyāⁿ chi canéé ndúúcū Espíritu Nꞌdai yeⁿꞌé Dendyuūs nꞌdiichí yā tanducuéⁿꞌē denduꞌū, naati ꞌiiⁿꞌyāⁿ chi nguɛ́ɛ́ iꞌtéénu yā Jesucristo nguɛ́ɛ́ cuuvi tuumicadiinúúⁿ yā táácā idiíⁿ ꞌiiⁿꞌyāⁿ chi canee ndúúcū Espíritu Nꞌdai yeⁿꞌé Dendyuūs. 16 Canéé nguūⁿ na libro yeⁿꞌé Ndyuūs ndíí vmnaaⁿ chi ngaⁿꞌa tíícā: ꞌIiⁿꞌyāⁿ chi nguɛ́ɛ́ iꞌtéénu yā Jesucristo, ¿táácā cuuvi deenú yā chi nadacadiinúúⁿ ꞌiivú Ndyuūs? ¿Duꞌú ꞌiiⁿꞌyāⁿ cuuvi caꞌcueéⁿ yā Ndyuūs? Sꞌuuúⁿ chí canee yú ndúúcū Espíritu Nꞌdai yeⁿꞌé Dendyuūs snee yú ndúúcū vaanicadíínūuⁿ yeⁿꞌé Cristo chi ꞌiivú Ndyuūs yeⁿꞌē yú.