Sꞌuūúⁿ ní compañeros yeⁿꞌē yú viꞌī ní diiⁿ yú ntiiⁿnyuⁿ yeⁿꞌé Dendyuūs
3
Ndísꞌtiī hermanos yeⁿꞌé, nguɛ́ɛ́ cuuvi caaⁿꞌmáⁿ ndúúcū ndísꞌtiī tanꞌdúúcā chi ndísꞌtiī ní ꞌiiⁿꞌyāⁿ chi ꞌáámá canéé ndúúcū Espíritu Nꞌdai yeⁿꞌé Ndyuūs, ní ꞌiiⁿꞌyāⁿ chí nꞌgiindiveéⁿ yā yeⁿꞌe yā. Naati caⁿꞌá nduucú nī tanꞌdúúcā chi ndísꞌtiī daiya yeⁿꞌé Ndyuūs ndísꞌtiī, tanꞌdúúcā chi ndísꞌtiī ꞌiiⁿꞌyāⁿ chi caama iꞌtéénu yā Cristo ndísꞌtiī. 2 Tanꞌdúúcā daꞌcaīyāa chi ngiꞌi leche ti ꞌāā cuɛ́ɛ́ cuuvi cheꞌé yā, ꞌtiicá ntúūⁿ ndísꞌtiī. Caꞌcueéⁿ ndísꞌtiī ndúúcū denduꞌū nduudu chi nguɛ́ɛ́ ngíⁿꞌīi, tí nguɛ́ɛ́ diíⁿ nī tanꞌdúúcā chi ngaⁿꞌa Espíritu Nꞌdai yeⁿꞌé Ndyuūs. 3 Naati tanꞌdúúcā ꞌiiⁿꞌyāⁿ yeⁿꞌē iⁿꞌyeeⁿdí ꞌcūū diíⁿ yā chi neⁿꞌe maáⁿ yā, ꞌtíícā idiíⁿ nī. Ndísꞌtiī ní ꞌtɛ́ɛ́ ní nguⁿꞌu nī ní nguɛ́ɛ́ nduuvidaamá nī. Nguɛ́ɛ́ idiiⁿ nꞌdaacá nī tanꞌdúúcā ꞌiiⁿꞌyāⁿ chi iꞌtéénu yā ꞌiivú Ndyuūs chi idiíⁿ yā, ti idiíⁿ nī tanꞌdúúcā ꞌiiⁿꞌyāⁿ chi nguɛ́ɛ́ iꞌteenú yā ꞌiivú Ndyuūs chi idiíⁿ yā ꞌtíícā, ní idiíⁿ ꞌtííca nī. 4 Caati náⁿꞌā ndísꞌtiī ngaⁿꞌá nī: ꞌÚú ní iꞌteenú tanꞌdúúcā chi ngaⁿꞌa Pablo, ní táámá nī ngaⁿꞌa nī: ꞌÚú iꞌteenú tanꞌdúúcā chi ngaⁿꞌa saⁿꞌa Apolos. ¿ꞌÁá nguɛ́ɛ́ ngaⁿꞌá nī tanꞌdúúcā chi caⁿꞌa nī tiempo chi ꞌāā chóꞌōo taachi ꞌāā cuɛ́ɛ́ cuꞌtéénu nī Jesucristo? 5 ¿Duꞌú saⁿꞌa Pablo ꞌúú? ¿Duꞌú saⁿꞌa Apolos miiⁿ? ¿ꞌÁá nguɛ́ɛ́ núsꞌūu ꞌiiⁿꞌyāⁿ chi dichííꞌvɛ̄ Dendyuūs? Ngaⁿꞌá ꞌnū nduudu chi chꞌiⁿꞌi Dendyuūs núsꞌuu ní ndísꞌtiī ní iꞌteenú nī. 6 ꞌÚú ngaⁿꞌá nduudu yeⁿꞌé Dendyuūs nanááⁿ ndísꞌtiī ní diíⁿ tanꞌdúúcā chí chiīnú ndaata na staava yeⁿꞌé nī. Sáⁿꞌā Apolos miiⁿ canee sa ndúúcu nī ní ngiꞌcueeⁿ sá ndísꞌtiī ní diiⁿ sa tanꞌdúúcā chí chꞌiiⁿꞌyú sa ndaata miiⁿ. Dendyuūs diíⁿ yā chi ꞌcuiita ndaata miiⁿ. 7 Cáávā chuū ꞌiiⁿꞌyāⁿ chi ngaⁿꞌa nduudu yeⁿꞌē Dendyuūs o ꞌiiⁿꞌyāⁿ chí caꞌcueeⁿ nduudu miiⁿ nguɛ́ɛ́ chꞌɛɛtɛ́ yā. Dámaaⁿ Ndyuūs chi ꞌcuiitá yā nduudu miiⁿ ní chꞌɛɛtɛ cá yā. 8 ꞌIiⁿꞌyāⁿ chi caaⁿꞌmáⁿ yā nduudu miiⁿ ní ꞌiiⁿꞌyāⁿ chi caꞌcueéⁿ yā nduudu miiⁿ, ꞌāā daamá nūuⁿ diíⁿ yā ntiiⁿnyuⁿ yeⁿꞌé Ndyuūs. Ndyuūs caꞌá yā ꞌiiⁿꞌyāⁿ miiⁿ chiiⁿ chi cuuvi yeⁿꞌé yā caavā ntiiⁿnyuⁿ yeⁿꞌe yā chi diíⁿ yā. 9 Núsꞌuu ní daama dáámá nuúⁿ idiíⁿ ꞌnū ntiiⁿnyúⁿ ndúúcū Dendyuūs. Ndísꞌtiī ní tanꞌdúúcā ꞌáámá campo yeⁿꞌé Ndyuūs chi Ndyuūs chidiꞌcuiitá yā ꞌtíícā ndisꞌtiī. Tanꞌdúúcā ꞌáámá vaꞌai chi idinꞌdaí Dendyuūs, ꞌtíícā ndísꞌtiī. 10 Ndyuūs teé yā ꞌúú vaadī deenū yeⁿꞌé yā ní tanꞌdúúcā ꞌáámá saⁿꞌā deenu dinꞌdai sa cimiento yeⁿꞌe vaꞌai, ꞌtíícā ꞌúú. ꞌÚú ngaⁿꞌá nduudu cuaacu chi tanꞌdúúcā cimiento miiⁿ chi dinꞌdai sa. Táámá ꞌiiⁿꞌyāⁿ ꞌiicandíí yā ndúúcū vaꞌai miiⁿ. Caꞌáámá caꞌaama ꞌiiⁿꞌyāⁿ chi ꞌiicandíí yā nduūcū canéé chi ꞌiicandíí yā ndúúcū vaꞌāī ndúúcū cuidado. 11 Mar ꞌáámá ꞌiiⁿꞌyāⁿ nguɛ́ɛ́ cuuví cuꞌneeⁿ yā táámá cimiento chi n̄ꞌdaaⁿ yeⁿꞌē chi ꞌúú chiꞌneéⁿ, ti tuūú yeⁿꞌē cimiento miiⁿ ní Jesucristo. 12 ꞌIiⁿꞌyāⁿ sꞌeeⁿ chi ꞌiicandíí yā vmnaaⁿ cimiento miiⁿ ndúúcū ꞌdííⁿnguaaⁿ, o ndúúcū ꞌdííⁿnguɛɛ, o ndúúcū tuūu ndɛɛ cheeⁿ, o ndúúcū yáⁿꞌá, o ndúúcū yaāta o ndúúcū ꞌíꞌvoōo canéé chí cadiinúúⁿ yā, ti chuū chí ngaⁿꞌá. 13 Nguuvi chi Jesucristo diíⁿ yā juzgar ntiiⁿnyuⁿ yeⁿꞌē caꞌáámá caꞌáámá ꞌiiⁿꞌyāⁿ, ní ꞌíícú ꞌiiⁿꞌyāⁿ cádíínuuⁿ yā dɛꞌɛ̄ ntiiⁿnyuⁿ chiiⁿ yeⁿꞌē ꞌáámá ꞌáámá yā. Ntiiⁿnyuⁿ miiⁿ ní canéé chí choꞌōo naavtaⁿꞌā ngiichí yaⁿꞌā ní deenú yā ꞌiiⁿꞌyāⁿ yeⁿꞌe ntiiⁿnyuⁿ yeⁿꞌé yā. 14 Nduutī chí cunee ntiiⁿnyuⁿ yeⁿꞌe ꞌiiⁿꞌyāⁿ sꞌeeⁿ chi ꞌiicandíí yā vmnaaⁿ cimiento miiⁿ, ntiiⁿnyuⁿ chi ꞌāā chóꞌōo naavtaⁿꞌā ngiichi yaⁿꞌā ní nguɛɛ chiichi, tuuꞌmi ní ꞌiiⁿꞌyāⁿ sꞌeeⁿ vɛ́ɛ́ chi cuuvi yeⁿꞌe yā. 15 Ndúúti chi cuucu ntiiⁿnyuⁿ chi ꞌiicandíí yā ndúúcū yaⁿꞌā, tuuꞌmi ní diꞌcuiīnú ntiiⁿnyuⁿ miiⁿ. ꞌIiⁿꞌyāⁿ sꞌeeⁿ ní nanguáⁿꞌai yā tanꞌdúúcā ꞌiiⁿꞌyāⁿ chi chéénu yā yeⁿꞌe vaꞌai yeⁿꞌe yā taachí ngiichi vaꞌai yeⁿꞌé yā.16 ¿ꞌÁá nguɛ́ɛ́ déénú ndísꞌtiī chi iꞌteenú nī Jesucristo chi cuerpo yeⁿꞌe nī ní yáacū yeⁿꞌe Dendyuūs, ní canéé Espíritu Nꞌdai yeⁿꞌe Ndyuūs ndúúcū ndísꞌtiī? 17 Ndúútí chi ꞌáámá ꞌiiⁿꞌyāⁿ dituuví yā yaācū yeⁿꞌé Ndyuūs, Ndyuūs ní diꞌcuiinú yā ꞌiiⁿꞌyāⁿ miiⁿ. Yáacū yeⁿꞌé Ndyuūs ní dɛɛvɛ. Ndísꞌtiī ní yaācū yeⁿꞌé Ndyuūs ndísꞌtiī.
18 Mar ꞌáámá nī ní nguɛ́ɛ́ nginncheꞌéí maáⁿ nī ndísꞌtiī. Taachi ꞌaamá ndísꞌtiī nadacadiinuuⁿ nī chi ngeꞌe taaví nī yeⁿꞌē vaadī deenu yeⁿꞌe iⁿꞌyeeⁿdí ꞌcūū, tuuꞌmi ní canee cuuⁿmiⁿ chi diíⁿ nī tanꞌduucā ꞌáámá ꞌiiⁿꞌyāⁿ chi nguɛ́ɛ́ deenu. Ní cuuvi ndaācā vaadī deenu yeⁿꞌé nī chí yeⁿꞌē Dendyuūs. 19 Vaadī déénu yeⁿꞌé ꞌiiⁿꞌyāⁿ yeⁿꞌe iⁿꞌyeeⁿdí ꞌcūū tanꞌdúúcā ꞌáámá cosa chí duuchi nanááⁿ Ndyuūs. ꞌĀā canéé nguūⁿ na libro yeⁿꞌé Ndyuūs ndíí vmnaaⁿ ꞌtíícā: Ndyuūs diíⁿ yā chi vaadī deenu yeⁿꞌé ꞌiiⁿꞌyāⁿ yeⁿꞌē iⁿꞌyeeⁿdí ꞌcūū diīíⁿ chi ꞌcuuvi ꞌiiⁿꞌyāⁿ ní ꞌiiⁿꞌyāⁿ miiⁿ canee yā tanꞌdúúcā chi cundaí yā na trampa yeⁿꞌe maáⁿ yā. 20 Canéé nguūⁿ ntuuⁿ táámá chí ꞌtuucā: ꞌIivú Ndyuūs déénu yā vaanicadiinūuⁿ yeⁿꞌé ꞌiiⁿꞌyāⁿ chi deenu yeⁿꞌé iⁿꞌyeeⁿdí ꞌcūu. Nguɛ́ɛ́ dɛꞌɛ̄ vɛɛ dichííꞌvɛ̄ chi nadacadiinūuⁿ ꞌiiⁿꞌyāⁿ sꞌeeⁿ. 21 Mar ꞌáámá ꞌiiⁿꞌyāⁿ nguɛ́ɛ́ cuuvi caaⁿꞌmáⁿ yā chi dichꞌɛɛtɛ́ yā saⁿꞌā iⁿꞌyeeⁿdí ꞌcūū. Tanducuéⁿꞌē denduꞌū ní yeⁿꞌe ndísꞌtiī. 22 Nduuti chi ꞌúú chí Pablo, o saⁿꞌā Apolos, o saⁿꞌā Pedro, o nduuti chi yeⁿꞌē íⁿꞌyeēⁿdī, o yeⁿꞌe vida yeⁿꞌē yú, o yeⁿꞌe vaadī nꞌgii, o yeⁿꞌe cosa chi ꞌāā vɛɛ o yeⁿꞌē denduꞌū chí caama cuchiī, tanducuéⁿꞌē chuū ní yeⁿꞌe ndísꞌtiī. 23 Ní ndísꞌtiī ní yeⁿꞌe Cristo ndísꞌtiī. Ní Cristo miiⁿ ní yeⁿꞌe Dendyuūs chí cánduuchi yā cueⁿꞌe daāⁿmaⁿ.