Ntiiⁿnyuⁿ yeⁿꞌe apóstoles
4
Ndísꞌtiī ní didúúchɛ́ nī núsꞌuu tanꞌdúúcā ꞌiiⁿꞌyāⁿ chí idiíⁿ ntíiⁿnyúⁿ yā yeⁿꞌe Jesucristo. Núsꞌuu ní ngaⁿꞌá ꞌnū nduudu cuaacu yeⁿꞌé Ndyuūs nanaaⁿ ndísꞌtiī. Vmnááⁿ vmnaaⁿ ní nguɛ́ɛ́ chi cadíínuuⁿ nī naati maaⁿ ní cádiinuuⁿ nī nduudu cuaacu miiⁿ. 2 ꞌIiⁿꞌyāⁿ chi diíⁿ ntiiⁿnyuⁿ yeⁿꞌe ꞌiivú Ndyuūs canee cuuⁿmiⁿ chi diíⁿ yā cumplir tanducuéⁿꞌe chí caaⁿꞌmaⁿ Ndyuūs yeⁿꞌē ntiiⁿnyuⁿ chi diíⁿ yā. 3 Nguɛ́ɛ́ dɛꞌɛ̄ vɛɛ tunee ꞌúú nduuti chi ꞌiiⁿꞌyāⁿ diíⁿ yā juzgar ꞌúú, o nduutī chí ndísꞌtiī, o táámá ꞌiiⁿꞌyāⁿ o ꞌúú maáⁿ nꞌdiichí nuuⁿndi yeⁿꞌé. 4 ꞌÁárá chi staava yeⁿꞌé ngɛ́ɛ́ diiⁿ condenar ꞌúú cáávā chiiⁿ chi diíⁿ, ꞌúú nguɛ́ɛ́ cuuvi caaⁿꞌmáⁿ chi nguɛ́ɛ́ nuuⁿndi yeⁿꞌé. Dámaāⁿ Señor Jesucristo diíⁿ yā juzgar ꞌúú, ní caaⁿꞌmáⁿ yā nuuⁿndi yeⁿꞌé. 5 Ndísꞌtiī nguɛ́ɛ́ diíⁿ nī juzgar ꞌiiⁿꞌyāⁿ. Taachí ndáá Señor Jesucristo yeⁿꞌē yú taama vmnéⁿꞌēe tuuꞌmi ꞌcuuⁿꞌmíⁿ yā tanducuéⁿꞌē chi cadiinuuⁿ yú ꞌaama ꞌaama yú ndii na staava yeⁿꞌē yú. Tiempo miiⁿ ní ꞌiivú Ndyuūs tée yā sꞌuuúⁿ chi cuuvi yeⁿꞌē yú caavā ntiiⁿnyuⁿ chí diīⁿ yú.6 ꞌÚú ngaⁿꞌá yeⁿꞌē chi ꞌúú ndúúcū saⁿꞌā Apolos diíⁿ ꞌnū. Ní ꞌíícú ndísꞌtiī cuuvi ꞌcueéⁿ nī tanꞌdúúcā chi cuuvi diíⁿ nī tanꞌdúúcā chi canéé nguūⁿ ndíí vmnaaⁿ na libro yeⁿꞌe Ndyuūs. Ndísꞌtiī nguɛ́ɛ́ nꞌdiichí nī ꞌiiⁿꞌyāⁿ. Ní nguɛ́ɛ́ caaⁿꞌmáⁿ nī chi ꞌáámá ꞌiiⁿꞌyāⁿ chi chꞌɛɛtɛ ca yā nguɛ́ɛ́ ti táámá yā. 7 ¿Dɛ́ꞌɛ̄ cuuvi chi ngaⁿꞌa nī chi naⁿꞌa ꞌiiⁿꞌyāⁿ chi chꞌɛɛtɛ yā? ¿ꞌÁá nguɛ́ɛ́ tee Ndyuūs tanducuéⁿꞌē chi vɛɛ yeⁿꞌé nī? ¿Dɛꞌɛ̄ cuuvi chi ngaⁿꞌa nī chi tanducuéⁿꞌe chi vɛɛ chi yeⁿꞌé nī ní maáⁿ nī staꞌá nī, ní nguɛ́ɛ́ diíⁿ nī cuenta yeⁿꞌē chiiⁿ chi tee Ndyuūs ndísꞌtiī?
8 Ndísꞌtiī ní nadacadíínuuⁿ nī chí deenú nī nducuéⁿꞌē chi yeⁿꞌe nduudu yeⁿꞌe Dendyuūs. Ní diíⁿ nī tanꞌdúúcā ꞌiiⁿꞌyāⁿ chi ꞌcuiica. Taachi nguɛ́ɛ́ chꞌɛɛtineé ꞌnū ndúúcū ndísꞌtiī, tuuꞌmi ní ndísꞌtiī diíⁿ nī tanꞌdúúcā chi reyes ndísꞌtiī. Nduuti chi ndaa tiempo chi ndísꞌtiī caaⁿꞌmáⁿ nī ntiiⁿnyuⁿ ti rey ndísꞌtiī, tuuꞌmi ní núsꞌuu caaⁿꞌmaⁿ ntiiⁿnyúⁿ ꞌnū nduucú nī. 9 Tanꞌdúúcā chí ꞌúú nadacádiinúúⁿ, núsꞌuu chí apóstoles ní candɛ́ɛ ꞌnū nduudu yeⁿꞌe Ndyuūs. Ndyuūs sꞌneéⁿ yā nusꞌūū lugar chi ndii na nꞌgiīnū yeⁿꞌe fila. Ní núsꞌuu caneé ꞌnū tanꞌdúúcā ꞌiiⁿꞌyāⁿ chi niiⁿnuúⁿ cánee nguuvi chi ꞌcuūvi yā, ní niiⁿnuúⁿ canéé nguuvi chi chꞌiiⁿꞌnúⁿ yā núsꞌuu. ꞌTíícā snéé núsꞌuu. ꞌIiⁿꞌyāⁿ yeⁿꞌe iⁿꞌyeeⁿdí ꞌcūū ndúúcū ángeles yeⁿꞌē nanguuvi nꞌgíínu yā núsꞌuu. 10 ꞌIiⁿꞌyāⁿ yeⁿꞌe iⁿꞌyeeⁿdí ꞌcūū ngaⁿꞌá yā chi núsꞌuu tonto ꞌnū ti neⁿꞌé ꞌnū Cristo, naati ngaⁿꞌá yā ti ndísꞌtiī ní saⁿꞌā deenu ndísꞌtiī. Ngaⁿꞌá yā ti núsꞌuu ní ꞌvaꞌá ꞌnū naati ndísꞌtiī ní ditiinú nī. Ngaⁿꞌá yā chi núsꞌuu ní nguɛ́ɛ́ nꞌdááca ꞌnū naati ndísꞌtiī ní nꞌdááca nī. 11 Ndii nguuvi miiⁿ ní cuiicu ꞌnū ní yaaca ꞌnū va. Ní ꞌāā ntɛ́ɛ́ nꞌdeee catécai ꞌnū chī nꞌdaacā. Ní ꞌiichɛ yeⁿꞌé ꞌnū. Ní ꞌiiⁿꞌyāⁿ chꞌeⁿꞌé yā núsꞌuu. Ní diíⁿ yā chi chéénú ꞌnū ndii mííⁿ ní ndii ꞌmúúⁿ ní nguɛ́ɛ́ vaacu ꞌnū. 12 Ní diíⁿ ꞌnū ntiiⁿnyuⁿ ndúúcū taꞌá ꞌnū chi cuuvi cheꞌé ꞌnū. Taachi ꞌcaaꞌva yā yeⁿꞌé ꞌnū tuuꞌmi ní ꞌiiⁿꞌyāⁿ miiⁿ diꞌviicú yā núsꞌuu. Diíⁿ yā chi nééné chꞌeenu ꞌnū chiī ní núsꞌuu ní chi chɛɛ́ ꞌnū yeⁿꞌé nducuéⁿꞌē. 13 Caⁿꞌa yā cunncáā yeⁿꞌé ꞌnū ní chɛ́ɛ ꞌnū ndúúcū vaadī ngiinu. Ndii nguuvi miiⁿ ꞌiiⁿꞌyāⁿ nacadiinúúⁿ yā chi núsꞌuu tanꞌdúúcā dɛɛcúū yeⁿꞌe iⁿꞌyeeⁿdí ꞌcūū ꞌtííca núsꞌuu.
14 ꞌÚú nguɛ́ɛ́ idinguúⁿ yeⁿꞌe denduꞌú ꞌcūū yeⁿꞌe ndísꞌtiī caati chi cuuvi ꞌcuinaáⁿ nī. Yaaꞌví ndísꞌtiī yeⁿꞌe nducuéⁿꞌē chuū tí ndísꞌtiī tanꞌdúúcā daiyá chi nééné neⁿꞌé, ꞌtíícā ndisꞌtiī. 15 ꞌÁárá chi vɛ́ɛ́ ndiichi mil maestros chi ngiꞌcueéⁿ yā ndísꞌtiī yeⁿꞌe Cristo, nguɛ́ɛ́ nééné ꞌyaaⁿ ꞌiiⁿꞌyāⁿ chi snée yā tanꞌdúúcā chiidá nī. ꞌÚú ní tanꞌdúúcā chiidá nī na ndaata yeⁿꞌé Dendyuūs, ti candɛɛ́ evangelio chi nduudu cuaacu chi ngai yeⁿꞌé Cristo nanááⁿ ndísꞌtiī. Ní ndísꞌtiī ní chiꞌtéénu nī ní chꞌiindiyáāⁿ ntúuⁿ nī na ndaata yeⁿꞌé Ndyuūs. 16 Cáávā chiiⁿ ꞌúú idiꞌcuíítú ndísꞌtiī. Diíⁿ nī tanꞌdúúcā chi ꞌúú idiíⁿ.
17 Cáávā chuū dichoꞌó Timoteo nanááⁿ ndísꞌtiī. Saⁿꞌā miiⁿ tanꞌdúúcā daiyá, ꞌtííca sa. Ní saⁿꞌa chi neⁿꞌé. Saⁿꞌā miiⁿ ní ꞌáámá canee sa ndúúcū ꞌiivú Ndyuūs. Saⁿꞌā miiⁿ ní caꞌcueeⁿ sa ndísꞌtiī yeⁿꞌe Cristo. Ní nꞌgaacu nī yeⁿꞌē tanducuéⁿꞌē chi cuuvi diíⁿ nī maaⁿ chi iꞌteenú nī Cristo tanꞌdúúcā chi ꞌúú ngiꞌcueéⁿ nduu cuaaⁿ nducuéⁿꞌē yáacū va. 18 Maaⁿ ní deenú chi náⁿꞌā ndísꞌtiī ngaⁿꞌa nī chi nꞌgɛɛtɛ ndai maaⁿ nī. Ní nadacádíínuuⁿ nī chí ꞌúú ní ꞌaa ntɛ́ɛ́ ndaá naachi cánéé nī. 19 Ndaa nuúⁿ yeⁿꞌé ndísꞌtiī nduuti chí Ndyuūs neⁿꞌé yā chi ndaá. Taachi ndaá tuuꞌmi ꞌúú cadiinúúⁿ yeⁿꞌe chi ꞌiiⁿꞌyāⁿ chi ngaⁿꞌa maáⁿ yā chi nꞌgɛɛtɛ yā. Cadiinúúⁿ nduuti chi ꞌiiⁿꞌyāⁿ miiⁿ diíⁿ yā tanꞌdúúcā chi Ndyuūs neⁿꞌé yā chi diíⁿ yā. 20 Nducuéⁿꞌē yeⁿꞌe naachi Ndyuūs ngaⁿꞌa ntiiⁿnyuⁿ yā nguɛ́ɛ́ dámaāⁿ yeⁿꞌe chi ngaⁿꞌa yā, ti chiiⁿ chi diiⁿ yā ti poder yeⁿꞌé Ndyuūs. 21 Dɛꞌɛ̄ neⁿꞌé ndísꞌtiī. ¿ꞌÁá neⁿꞌe nī chi taachi ndaá ní diíⁿ regañar ndísꞌtiī, o taachi ndaá caaⁿꞌmáⁿ nduucú ndisꞌtiī ndúúcū vaadī néⁿꞌé?