Ngaⁿꞌa yā nuuⁿndi yeⁿꞌē ꞌáámá saⁿꞌa chi caⁿꞌá yā na yaācū
5
Nꞌgiindiveéⁿ ꞌnū chi nguááⁿ ndisꞌtiī vɛ́ɛ́ ꞌáámá saⁿꞌā chí diiⁿ nuuⁿndi ca tí canee sa ndúúcū nꞌdaataá chi nguɛ́ɛ́ yeⁿꞌē sa. Nguɛ́ɛ́ ꞌtíícá nguaaⁿ ꞌiiⁿꞌyāⁿ gentiles chi nguɛɛ iꞌtéénu yā Jesucristo. Nꞌgiindiveéⁿ ꞌnū chi saⁿꞌā miiⁿ staꞌa nꞌdaataá yeⁿꞌē chiida sa ní canee sá ndúúcū tá. 2 Ní ndísꞌtiī ngaⁿꞌa maáⁿ nī yeⁿꞌe nī chi nꞌgɛɛtɛ nī nꞌdáárá chi idiiⁿ saⁿꞌā miiⁿ nuuⁿndi ꞌtíícā. ¿Dɛꞌɛ̄ cuuvi chi nguɛ́ɛ́ divií nī saⁿꞌa miiⁿ na yaacū yeⁿꞌé Ndyuūs yeⁿꞌē yú? 3 Nꞌdáárá chi ꞌúú nguɛ́ɛ́ caneé ndúúcū ndísꞌtiī inacádiinúúⁿ yeⁿꞌé ndísꞌtiī. ꞌÚú ní caaⁿꞌmáⁿ nuūⁿndī yeⁿꞌe saⁿꞌā miiⁿ yeⁿꞌe dendúꞌu chi idiiⁿ sa tanꞌdúúcā chi ꞌúú caneé ndúúcū ndísꞌtiī. 4 Taachí nduuvidáámá ndísꞌtiī ná chi duuchi Señor Jesucristo tuuꞌmi ní poder yeⁿꞌē Señor Jesucristo canee ndúúcū ndísꞌtiī. Ní diíⁿ nī tanꞌdúúcā chi ꞌúú caneé ndúúcū ndisꞌtiī. 5 ꞌTíícā nadacádiinúúⁿ chi ndísꞌtiī canee cuuⁿmiⁿ chi diíⁿ nī. Divíi nī saⁿꞌā miiⁿ nguaaⁿ ndísꞌtiī ti saⁿꞌā miiⁿ ní canee sa yeⁿꞌē na poder yeⁿꞌe yááⁿnꞌguiinūuⁿ. ꞌTíícā castigo yeⁿꞌē sa. Ní cuuvi cadíínuuⁿ sa yeⁿꞌe alma yeⁿꞌe sa. Ní cuuvi nanguaⁿꞌai alma yeⁿꞌē sa nguuvi chi ndaa ntúūⁿ Señor Jesucristo yeⁿꞌē yú.6 Nguɛ́ɛ́ nꞌdáácā ndísꞌtiī ní ngaⁿꞌá nī chi nꞌdáí ndísꞌtiī, ní vɛ́ɛ́ ꞌiiⁿꞌyāⁿ chí idiíⁿ yā nuuⁿndi nguaaⁿ ndísꞌtiī. ¿ꞌÁá nguɛ́ɛ́ deenú nī ti ta ꞌlííⁿ chuundi levadura ichɛ́ɛ́ ndúúcū tanducuéⁿꞌē yaāchī? 7 Saⁿꞌā miiⁿ tanꞌdúúcā levadura ꞌtíícā sa. Ndísꞌtiī divíi nī saⁿꞌā miiⁿ ní cūnee nꞌdááca nī. Cuneé nī tanꞌdúúcā yaāchī chi nguɛ́ɛ́ levadura yeⁿꞌē, tanꞌdúúcā pan chí cheꞌe yā yeⁿꞌē pascua. ꞌIiⁿꞌyāⁿ chꞌiiⁿꞌnúⁿ yā Cristo. Ní Cristo miiⁿ ní tanꞌdúúcā ꞌiiti cuūchī chi chꞌiiⁿꞌnúⁿ yā cáávā ꞌviicu pascua. Cáávā sꞌuūuⁿ ní Cristo miiⁿ ní staꞌá yā lugar yeⁿꞌē ꞌiiti cuūchī yeⁿꞌe ꞌviicu pascua ti chꞌīi yā cucáávā sꞌuuúⁿ. 8 Maaⁿ ní nguɛ́ɛ́ dichꞌɛɛtɛ yú ꞌviicu yeⁿꞌe pascua miiⁿ tanꞌdúúcā ꞌiiⁿꞌyāⁿ chi vɛ́ɛ́ nuuⁿndi yeⁿꞌé yā ti nguɛ́ɛ́ yeⁿꞌe Cristo ꞌiiⁿꞌyāⁿ sꞌeeⁿ. Ní nguɛ́ɛ́ dichꞌɛɛtɛ yú ndúúcū vaadī nꞌgiinu na staava yeⁿꞌē yú o ndúúcū cosa chi nguɛ́ɛ́ nꞌdaacā, ti chuū ní tanꞌdúúcā levadura ꞌtíícā. Dichꞌɛɛtɛ yú pascua miiⁿ dámaāⁿ ndúúcū nducueⁿꞌē chi nꞌdáacā na staava yeⁿꞌē yú ti tanꞌdúúcā pan chi nguɛ́ɛ́ levadura yeⁿꞌē, ꞌtíícā canee yú.
9 ꞌÁá dinguúⁿ yeⁿꞌe ndísꞌtiī chi nguɛ́ɛ́ cáⁿꞌa nī ndúúcū saⁿꞌā chi canee sa ndúúcū nꞌdaataá chi nguɛɛ yeⁿꞌē sa ndíí nguɛ́ɛ́ cáⁿꞌa nī ndúúcū nꞌdaataá miiⁿ. 10 ꞌÚú nguɛ́ɛ́ ngaⁿꞌá chi nguɛ́ɛ́ nꞌdiichí nī sáⁿꞌā chi vɛ́ɛ́ nꞌdaataá yeⁿꞌē sa, o nꞌdaataá chi vɛ́ɛ́ saⁿꞌā yeⁿꞌē tá, o ꞌiiⁿꞌyāⁿ chi nginncheꞌéí yā ꞌiiⁿꞌyāⁿ, o ꞌiiⁿꞌyāⁿ chi duūcú, o ꞌiiⁿꞌyāⁿ chi iꞌteenú yā ídolos. Ndísꞌtiī nguɛ́ɛ́ cuuvi cuneé nī na iⁿꞌyeeⁿdí ꞌcūū ní nguɛ́ɛ́ nꞌdiichí nī ꞌiiⁿꞌyāⁿ yeⁿꞌe iⁿꞌyeeⁿdí ꞌcūū. 11 Naati maaⁿ ní ꞌāā dinguúⁿ yeⁿꞌé ndisꞌtiī chi nguɛ́ɛ́ cáⁿꞌa nī ndúúcū ꞌiiⁿꞌyāⁿ sꞌeeⁿ chi ngaⁿꞌá yā chi hermanos yeⁿꞌé nī ní nguɛ́ɛ́ nꞌdaacā idiíⁿ yā, ti saⁿꞌā chi canee ndúúcū nꞌdaataá chi nguɛɛ yeⁿꞌe sa, o nꞌdaataa chi canee ndúúcū saⁿꞌa chi nguɛɛ yeⁿꞌē tá. Ndíí nguɛ́ɛ́ cáⁿꞌa nī ndúúcū ꞌiiⁿꞌyāⁿ chi iꞌteenú yā ídolos. Ndíí nguɛ́ɛ́ cáⁿꞌa nī ndúúcū ꞌiiⁿꞌyāⁿ chi ngaⁿꞌá yā nduudu yaadi , o ndúúcū ꞌiiⁿꞌyāⁿ chi nginncheꞌéí yā ꞌiiⁿꞌyāⁿ, o ndúúcū ꞌiiⁿꞌyāⁿ chi ngii cuuꞌvi, o ndúúcū ꞌiiⁿꞌyāⁿ chi duucu. Ní nguɛ́ɛ́ cheꞌé nī ndúúcū ꞌiiⁿꞌyāⁿ sꞌeeⁿ. 12 ¿Dɛꞌɛ̄ cúúví chí ꞌúú nꞌdiichí nuuⁿndi yeⁿꞌe ꞌiiⁿꞌyāⁿ chi nguɛ́ɛ́ iꞌtéénu yā Jesucristo yeⁿꞌē yú? Chuū ní nguɛ́ɛ́ ntiiⁿnyuⁿ yeⁿꞌé ti yeⁿꞌé Dendyuūs. Ndísꞌtiī canee chi nꞌdiichi nī nuuⁿndi yeⁿꞌe ꞌiiⁿꞌyāⁿ chi caⁿꞌá yā yaacū ndúúcu nī. 13 Jesucristo nꞌdiichí yā nuuⁿndi yeⁿꞌe ꞌiiⁿꞌyāⁿ chi nguɛ́ɛ́ iꞌtéénu yā Ndyuūs. Maaⁿ ní ndísꞌtiī divíi nī saⁿꞌā miiⁿ nguaaⁿ ndísꞌtiī.