ꞌIiⁿꞌyāⁿ chi iꞌtéénu yā Señor Jesucristo naⁿꞌá yā nanááⁿ juez ndúúcū vaadī ꞌcaaꞌva yeⁿꞌé yā
6
Nduuti chi ꞌaama chɛ́ɛ́ ndísꞌtiī vɛ́ɛ́ vaadī ꞌcaaꞌva ndúúcū taama chɛ́ɛ́ ndísꞌtiī, ¿dɛꞌɛ̄ cúúví chí caⁿꞌá nī nanááⁿ juez yeⁿꞌe yaāⁿ vaacú nī, ní nguɛ́ɛ́ caⁿꞌá nī nanááⁿ ꞌiiⁿꞌyāⁿ chi chɛ́ɛ́ vmnaaⁿ yeⁿꞌe yáacū yeⁿꞌé nī? 2 ¿ꞌÁá nguɛ́ɛ́ deenu ndísꞌtiī ti sꞌuuúⁿ chi iꞌteenu yú Jesucristo ndáá nguuvi chi cuuvi nꞌdiichi yú nuuⁿndi yeⁿꞌe ꞌiiⁿꞌyāⁿ yeⁿꞌe iⁿꞌyeeⁿdí ꞌcūū? Nduuti chi ndísꞌtiī caⁿꞌá nī nꞌdiichí nī nuuⁿndi chi idiiⁿ ꞌiiⁿꞌyāⁿ yeⁿꞌe iⁿꞌyeeⁿdí ꞌcūū, ¿ꞌáá nguɛ́ɛ́ cuuvi nꞌdiichí nī ta ꞌlííⁿ nuuⁿndi yeⁿꞌe nī chí nguaaⁿ ndísꞌtiī? 3 ¿ꞌÁá nguɛ́ɛ́ deenu ndísꞌtiī chi sꞌuuúⁿ caⁿꞌa yú nꞌdiichi yú nuuⁿndi yeⁿꞌe ángeles? Ní nduuti chi cuuvi diiⁿ yú ꞌtíícā tuuꞌmi ní cuuvi nꞌdiichi yú denduꞌū nuuⁿndi chi vɛ́ɛ́ yeⁿꞌe yú iⁿꞌyeeⁿdí ꞌcūū. 4 Nduuti chi canéé chi nꞌdiichí nī denduꞌū vaadī ꞌcaaꞌva nguaaⁿ ndísꞌtiī, nꞌdaacā chi caⁿꞌá nī nanááⁿ ꞌiiⁿꞌyāⁿ yeⁿꞌe yaācū ꞌaara chi nguɛ́ɛ́ ꞌiiⁿꞌyāⁿ chí duūꞌvī néⁿꞌe yā viꞌī. 5 Ngaⁿꞌá chuū chi cuuvi ꞌcuinaáⁿ nī. ¿ꞌÁá cadiinuuⁿ nī chi nguɛ́ɛ́ vɛ́ɛ́ mar ꞌáámá ꞌiiⁿꞌyāⁿ nguaaⁿ ndísꞌtiī, mar ꞌáámá ꞌiiⁿꞌyāⁿ chi nguɛ́ɛ́ cuuvi nꞌdiichí yā duꞌu hermano chi vɛ́ɛ́ nuuⁿndi yeⁿꞌe yā? 6 Nduuti chi vɛ́ɛ́ ꞌaama hermano chi deenu ca nguaaⁿ ndísꞌtiī, ¿dɛꞌɛ̄ cúúví chi ngeⁿꞌe hermanos ndúúcū vaadī ꞌcaaꞌva yeⁿꞌé yā nanááⁿ ꞌiiⁿꞌyāⁿ chi nguɛ́ɛ́ iꞌtéénu yā Señor Jesucristo yeⁿꞌē yú?7 Cuaacu nííⁿnyúⁿ nguɛ́ɛ́ nꞌgiⁿꞌi ndísꞌtiī chi yeⁿꞌe Ndyuūs ndísꞌtiī ti vɛ́ɛ́ vaadī ꞌcaaꞌva yeⁿꞌe ꞌáámá nī táámá nī ndúúcū viꞌī. ¿Dɛꞌɛ̄ cúúví chi nguɛ́ɛ́ ichɛ́ɛ nī nguaaⁿ ndísꞌtiī denduꞌū chi nguɛɛ nꞌdaacā chi hermano diíⁿ yā nduucú nī? Nꞌdaacā nꞌdai chi ichɛ́ɛ nī tanducueⁿꞌē ní nguɛ́ɛ́ caⁿꞌá nī nanááⁿ ꞌiiⁿꞌyāⁿ cucáávā hermanos chi idiíⁿ yā ndúúcu nī. 8 Ndísꞌtiī, hermanos, ní nguɛ́ɛ́ nꞌdaacā idiíⁿ nī chi nginncheꞌéí nī ꞌáámá nī ndúúcū taama nī chi hermano yeⁿꞌe nī.
9 Ndísꞌtiī nguɛ́ɛ́ ꞌcaandiveéⁿ nī chiiⁿ chi ꞌiiⁿꞌyāⁿ ngaⁿꞌa yā chi cuaacu ní nguɛ́ɛ́ cuaacu. ¿ꞌÁá nguɛ́ɛ́ deenu nī chi ꞌiiⁿꞌyāⁿ chi nguɛ́ɛ́ idinꞌdaacá yā nguɛ́ɛ́ ndaa yā naachí Ndyuūs ngaⁿꞌa ntiiⁿnyúⁿ yā? Ní nguɛ́ɛ́ ꞌiiⁿꞌyāⁿ sꞌeeⁿ ndíí nguɛɛ ꞌiiⁿꞌyāⁿ chi staꞌá yā nꞌdaataá yeⁿꞌe taama sa, o isaⁿꞌā yeⁿꞌe taama ta, ní nguɛ́ɛ́ nꞌdaataá chi nꞌdiichi tá saⁿꞌā chi nguɛ́ɛ́ yeⁿꞌe tá, ní nguɛ́ɛ́ saⁿꞌā chi nꞌdiichi sa nꞌdaataá chi nguɛ́ɛ́ yeⁿꞌe sá, ndúúcū ꞌiiⁿꞌyāⁿ chi iꞌteenu ídolos chi santos, ndúúcū saⁿꞌā chi iduuchinééⁿ víꞌi sa. 10 ꞌTiicá ntúūⁿ ꞌiiⁿꞌyāⁿ duucu, ndúúcū ꞌiiⁿꞌyāⁿ chi neⁿꞌe cá yā denduꞌu chi vɛ́ɛ́ yeⁿꞌe taama ꞌiiⁿꞌyāⁿ, ndúúcū ꞌiiⁿꞌyāⁿ chí ngii cúúꞌví, ndúúcū ꞌiiⁿꞌyāⁿ chi ngaⁿꞌa taáⁿ yā yeⁿꞌē taama ꞌiiⁿꞌyāⁿ, ndúúcū ꞌiiⁿꞌyāⁿ chí itáꞌá yā yeⁿꞌē taama yā. Nducuéⁿꞌē ꞌiiⁿꞌyāⁿ sꞌeeⁿ nguɛ́ɛ́ cuuvi nndaá yā naachi Ndyuūs ngaⁿꞌa ntiiⁿnyuⁿ yā. 11 ꞌTiicá ntúūⁿ diīiⁿ ndísꞌtiī. Dinuuⁿndí nī tiempo chi ꞌāā chóꞌōo naati maaⁿ ní Ndyuūs nꞌdiichí yā ndísꞌtiī tanꞌdúúcā chi ꞌāā ntɛ́ɛ́ vɛɛ nuuⁿndi yeⁿꞌé nī cáávā Jesucristo. Maaⁿ ní ndísꞌtiī ní diíⁿ nī nducuéⁿꞌē chi nꞌdaacā ti yeⁿꞌé Jesucristo ndísꞌtiī. Ní Espíritu Nꞌdai yeⁿꞌé Ndyuūs yeⁿꞌē yú canéé ndúúcu nī.
Yeⁿꞌe chi nꞌdaācā chi diiⁿ yú
12 Tanducuéⁿꞌē chi nguɛ́ɛ́ nuuⁿndi cuuvi diíⁿ, naati nducueⁿꞌē chi nꞌdaacā nguɛ́ɛ́ neⁿꞌé diíⁿ, ti nguɛ́ɛ́ nꞌdai chi diíⁿ. Cuuvi diíⁿ tanducuéⁿꞌē chi neⁿꞌé chi nꞌdaacā, naati nguɛ́ɛ́ necio caneé yeⁿꞌē mar ꞌáámá denduꞌū. 13 Cuaacu chi yúutɛ̄ chi cheꞌe yú ní caavā chɛɛti yú. Chɛɛti yú ní neⁿꞌe cheꞌe yuūtɛ̄. Naati Ndyuūs diꞌcuiinú yā yuūtɛ̄ chi cheꞌe yú ndúúcū cuerpo yeⁿꞌe yú ndúúcū chi vɛ́ɛ́ yeⁿꞌē. Nguɛ́ɛ́ cuuvi caaⁿꞌmaⁿ yú chi Ndyuūs teé yā cuerpo yeⁿꞌe yú chi nꞌdaataá nꞌdiichí yā saⁿꞌā. Ndyuūs diíⁿ yā chi sꞌuuúⁿ chi cuuvi yeⁿꞌé yā ní cuerpo yeⁿꞌē yú ní yeⁿꞌé Dendyuūs. 14 Jesucristo chi ꞌiivi yú, Ndyuūs nducuéeⁿ yā yeⁿꞌē nguaaⁿ tináⁿꞌā. ꞌTiicá ntúūⁿ Ndyuūs nadacueēⁿ ntúuⁿ yā sꞌuuúⁿ ndúúcū poder yeⁿꞌé yā.
15 ¿ꞌÁá nguɛ́ɛ́ deenu ndísꞌtiī chi cuerpo yeⁿꞌé nī ní yeⁿꞌe Cristo? ¿ꞌÁá cutaꞌá nī ꞌáámá saⁿꞌā chi yeⁿꞌe Cristo ní diíⁿ nī chi saⁿꞌā miiⁿ yeⁿꞌē ꞌáámá nꞌdáátāa chi ꞌyaaⁿ saⁿꞌā yeⁿꞌē tá? Ndyuūs nguɛ́ɛ́ ꞌcuáaⁿ yā chi ꞌtíícā. 16 ¿ꞌÁá nguɛ́ɛ́ deenu ndísꞌtiī chi saⁿꞌā chi caⁿꞌa sa ndúúcū nꞌdaātāa chí ꞌyaaⁿ saⁿꞌā yeⁿꞌē tá nduuvi ꞌaama nú yā? ꞌIivú Ndyuūs ngaⁿꞌa yā ndii cuááⁿ vmnaaⁿ naachi canéé nguūⁿ na libro yeⁿꞌe yā ꞌtiicā: Naachí naꞌuuví yā ní nduuvi ꞌaama cuerpo núú yā. 17 Sꞌuuúⁿ chi iꞌteenu yú Jesucristo chí ꞌiivi yú canee yú ndúúcū dáámá espíritu chí yeⁿꞌē Jesucristo.
18 Ndísꞌtiī nꞌdaataá, nguɛ́ɛ́ caⁿꞌá nī ndúúcū saⁿꞌā, o saⁿꞌā nguɛ́ɛ́ caⁿꞌá nī ndúúcū nꞌdaataá, chi idinuuⁿndí nī ti idiiⁿ nuuⁿndí nī ndúúcū cuerpo yeⁿꞌe maáⁿ nī. Castigo yeⁿꞌē nuuⁿndi miiⁿ ꞌáámá cūnee na cuerpo yeⁿꞌé nī. Tanáⁿꞌa ca nuuⁿndi chi idiíⁿ nī ní nguɛ́ɛ́ contra cuerpo chi yeⁿꞌe maáⁿ nī. 19 ¿ꞌÁá nguɛ́ɛ́ deenú ndísꞌtiī chi cuerpo yeⁿꞌé nī chííⁿ chí yaācū yeⁿꞌe Espíritu Nꞌdai yeⁿꞌé Ndyuūs chi canéé ndúúcū ndísꞌtiī? Ndyuūs tee yā Espíritu Nꞌdai yeⁿꞌe yā ndísꞌtiī. Maaⁿ ni cuerpo yeⁿꞌe nī nguɛ́ɛ́ yeⁿꞌe maáⁿ nī ti yeⁿꞌe Espíritu Nꞌdai chi yeⁿꞌe Ndyuūs. Ní Ndyuūs tee yā ndísꞌtiī Espíritu Nꞌdai yeⁿꞌé yā. 20 Chuū ní cáávā Jesucristo cái yā ndísꞌtiī ndúúcū ꞌáámá precio chi nééné yaⁿꞌai chiiꞌvɛ̄. Cáávā chuū dichꞌɛɛtɛ́ nī Dendyuūs ndúúcū nuuⁿmáⁿ cuerpo yeⁿꞌe nī ti ndísꞌtiī ní yeⁿꞌé Ndyuūs ndísꞌtiī.