Pablo caꞌá yā consejo ꞌiiⁿꞌyāⁿ chí nꞌgiindivaacu yā
7
Maaⁿ ní idinguúⁿ ní nanꞌguɛɛcútāⁿꞌa yeⁿꞌe preguntas chi dingúuⁿ nī yeⁿꞌé. Nꞌdaacā chi ꞌaama saⁿꞌā nguɛ́ɛ́ ꞌcaandavaacu sa. 2 Naati ꞌtíícā. Deenú chi saⁿꞌā neⁿꞌe sa cūnee sa ndúúcū nꞌdaataá. Cáávā chuū nꞌdááca chi ꞌcaandavaacu sá ní vɛ́ɛ́ nꞌdaataá yeⁿꞌē sa. ꞌTiicá ntúūⁿ chi ꞌaama nꞌdaataá ꞌcaandavaacu tá ní vɛ́ɛ́ saⁿꞌā yeⁿꞌē tá. ꞌTíícā ní nguɛ́ɛ́ diíⁿ yā nuuⁿndi. 3 Saⁿꞌā ní canéé chí cunꞌdiití sá ndúúcū nꞌdaataá yeⁿꞌē sa. ꞌTiicá ntúūⁿ nꞌdaata miiⁿ canéé chí cunꞌdiití tá ndúúcū sáⁿꞌā yeⁿꞌē tá. 4 Nꞌdaataá chi nꞌgííndivaacu tá, cuerpo yeⁿꞌē tá nguɛ́ɛ́ yeⁿꞌē tá dámaāⁿ tá ti yeⁿꞌe sa ndúúcu tá. ꞌTiicá ntúūⁿ saⁿꞌā miiⁿ. Cuerpo yeⁿꞌē sa nguɛ́ɛ́ yeⁿꞌē sa dámaāⁿ sa ti yeⁿꞌē sa ndúúcu tá. 5 Diíⁿ nī cumplir ndúúcū nꞌdaata yeⁿꞌe nī o isaⁿꞌā yeⁿꞌé nī. Nduuti chi nduu ꞌuuví nī canee yiinú nī yeⁿꞌē ꞌáámá tiempo chi ꞌáámá caaⁿꞌmaⁿnguaꞌá nī ní ndeé nī ndúúcū ꞌiivú Ndyuūs, tuuꞌmí chuū ní chi diíⁿ nī cumplir tiempo ꞌcūū. ꞌCuiinū caaⁿꞌmaⁿnguaꞌá nī ndúúcū ꞌiivú Ndyuūs, tuuꞌmi ní diíⁿ nī cumplir ndúúcū isaⁿꞌā o nꞌdaataá yeⁿꞌe nī. Nduuti chi nguɛ́ɛ́ diíⁿ nī ꞌtuucā, tuuꞌmi ní cuuvi neⁿꞌé nī caⁿꞌá nī ndúúcū táámá saⁿꞌā o nꞌdaataá. Ní yááⁿnꞌguiinūuⁿ nꞌdiichínēēⁿ sa ndísꞌtiī neⁿꞌe chi nguɛ́ɛ́ diíⁿ nī cumplir ndúúcū isáⁿꞌā o nꞌdaataá yeⁿꞌe nī. Ní cuuvi diíⁿ nī nuuⁿndi.6 ꞌÚú nguɛ́ɛ́ caaⁿꞌmáⁿ ndisꞌtiī chiiⁿ chi diíⁿ nī, ndísꞌtiī chi neⁿꞌé nī ꞌcaandavaacú nī. Nguɛ́ɛ́ teé chuū tanꞌdúúcā ꞌáámá ley. 7 Ti neⁿꞌé chi nducyaaca saⁿꞌā nguɛ́ɛ́ ꞌcaandavaacu sa ní cūnee sa dámaāⁿ sa tanꞌdúúcā chi ꞌúú caneé, naati nguɛɛ cuuví chi ꞌtíícā. ꞌÚú deenu chi Ndyuūs caꞌá yā ꞌáámá ꞌáámá ꞌiiⁿꞌyāⁿ chiiⁿ chi cuuvi diíⁿ yā.
8 ꞌÚú ngaⁿꞌá ngīi saⁿꞌā nꞌgaiyáa o nꞌdaataá nꞌgaiyáa ndúúcū nꞌdaataá nꞌguáꞌāa chi nꞌdaacā chi ꞌiiⁿꞌyāⁿ sꞌeeⁿ nguɛ́ɛ́ ꞌcaandavaacú yā ní cunee yā dámaáⁿ yā tanꞌdúúcā chi ꞌúú caneé. 9 Nduuti chi nguɛ́ɛ́ cuuvi ꞌcuɛɛtinée yā damaáⁿ yā, tuuꞌmi ní ꞌcaandavaacú yā. Ti nꞌdaacā chi ꞌcaandavaacú yā ní nguɛ́ɛ́ cūnee yā ndúúcū deseo chi saⁿꞌā neⁿꞌe sa nꞌdaataá o nꞌdaataá neⁿꞌe tá saⁿꞌā.
10 Chuū ngaⁿꞌá yeⁿꞌé ꞌiiⁿꞌyāⁿ chí nꞌgiindivaacu yā. Saⁿꞌā miiⁿ nguɛ́ɛ́ divíi sa nꞌdaataá yeⁿꞌē sa, o táⁿꞌā miiⁿ nguɛ́ɛ́ divii tá isáⁿꞌā yeⁿꞌē tá. Chuū chi ley yeⁿꞌe Ndyuūs. 11 Ndúúti chi ꞌáámá nꞌdaataá divíi tá yeⁿꞌe isaⁿꞌā yeⁿꞌē ta caati nguɛ́ɛ́ yaaⁿ yiinú tá ndúúcū isaⁿꞌā yeⁿꞌē tá, tuuꞌmi ní ꞌāā ntɛ́ɛ́ ꞌcaandavaacu tá ndúúcū taama sáⁿꞌā. ꞌTiicá ntúūⁿ saⁿꞌa yeⁿꞌē tá nguɛ́ɛ́ cuꞌneeⁿ sá nꞌdaataá yeⁿꞌē sa cucáávā taama nꞌdaataá.
12 Maaⁿ ní chuū chí ngaⁿꞌá ngīi tanáⁿꞌā ꞌiiⁿꞌyāⁿ ni cosa tanꞌdúúcā chi deenú chi nꞌdaacā cááva yā. Ní chuū ní nguɛ́ɛ́ ley yeⁿꞌe Ndyuūs. Nduuti chi ꞌáámá saⁿꞌā chi iꞌteenu Ndyuūs ní nꞌdaataá yeⁿꞌē sa ní nguɛ́ɛ́ iꞌteenu tá, tuuꞌmi nguɛ́ɛ́ cuꞌneeⁿ sa nꞌdaataá yeⁿꞌē sa nduuti chi táⁿꞌā miiⁿ nꞌdaacā canee tá ndúúcū sa. 13 ꞌTiicá ntúūⁿ, nꞌdaataá chi iꞌteenu tá ní saⁿꞌā yeⁿꞌe tá nguɛ́ɛ́ iꞌtéénu sa ni nꞌdááca canee tá ndúúcū sa, tuuꞌmi nguɛ́ɛ́ cuꞌneeⁿ tá isáⁿꞌā yeⁿꞌē tá. 14 Sáⁿꞌā yeⁿꞌē tá chi nguɛ́ɛ́ iꞌtéénu sa ní cuuvi yeⁿꞌé Jesucristo saⁿꞌā miiⁿ cucáávā nꞌdaataá yeⁿꞌē sa chi iꞌteenu tá. ꞌTiicá ntúūⁿ, nꞌdaataá chi nguɛ́ɛ́ iꞌteenu tá ní cuuvi yeⁿꞌé Jesucristo nꞌdaataá miiⁿ cucáávā isaⁿꞌā yeⁿꞌe tá chi iꞌteenu sa. Ndúúti chi nguɛ́ɛ́ ꞌtíícā, tuuꞌmi ní nguɛ́ɛ́ cuuví yeⁿꞌe Jesucristo daiyá yā. Naati ꞌtíícā, tuuꞌmi ní cuuví yeⁿꞌe Jesucristo daiyá yā. 15 Naati nduuti chi saⁿꞌā o nꞌdaata chi nguɛ́ɛ́ iꞌtéénu yā Señor Jesucristo nguɛ́ɛ́ cūnee nꞌdááca saⁿꞌā miiⁿ ndúúcū nꞌdaataá yeⁿꞌē sa, o nꞌdaataá mííⁿ ndúúcū isaⁿꞌa yeⁿꞌē tá chi iꞌtéénu yā Señor Jesucristo, tuuꞌmi ní cuuvi divíi yā yeⁿꞌe víꞌī. ꞌIiⁿꞌyāⁿ chi iꞌtéénu yā Jesucristo nguɛ́ɛ́ a fuerza chi cuneé yā ndúúcū ꞌiiⁿꞌyāⁿ chi nguɛɛ iꞌtéénu yā Señor Jesucristo. Ndyuūs neⁿꞌé yā chi ꞌiiⁿꞌyāⁿ chi iꞌtéénu yā Señor Jesucristo cunee nꞌdááca yā ndúúcū vaadī ꞌdiīiⁿ. 16 Ndísꞌtiī ꞌiiⁿꞌyāⁿ chi iꞌtéénu nī Señor Jesucristo, ¿táácā cuuvi deenú nī nduuti chi cuuvi dinguáⁿꞌai nī isaⁿꞌa yeⁿꞌé nī o nꞌdaataá yeⁿꞌé nī? Nguɛ́ɛ́ cuuvi déénu nī chuū chi ꞌtíícā.
17 Ndyuūs yeⁿꞌē yú yaaꞌví yā sꞌuuúⁿ chi yeⁿꞌé yā sꞌuuúⁿ. Ní tee yā ꞌáámá ꞌáámá sꞌuūúⁿ ntiiⁿnyuⁿ sꞌuuúⁿ chí yeⁿꞌé yā chí ituneeⁿ sꞌuūúⁿ. Ní ꞌíícú vɛ́ɛ́ ntiiⁿnyuⁿ yeⁿꞌé Ndyuūs yeⁿꞌē ꞌáámá ꞌáámá sꞌuūuⁿ. Ní canee chi ꞌcuɛɛtinee yú nꞌdaacā tanꞌdúúcā Ndyuūs neⁿꞌe yā chi diiⁿ yú. ꞌTíícā ngaⁿꞌa ntiiⁿnyuⁿ ꞌúú yeⁿꞌē nducyáácá yáacū. 18 Nduuti chi Ndyuūs yaaꞌví yā ꞌáámá saⁿꞌā yeⁿꞌē ndaata Israel chi cuuvi yeⁿꞌe yā ní ꞌiiⁿꞌyāⁿ ꞌāā diíⁿ yā circuncidar cuerpo yeⁿꞌe saⁿꞌā miiⁿ ndii chi ꞌlííⁿ sa tanꞌdúúcā chí ngaⁿꞌa ley yeⁿꞌe ꞌiiⁿꞌyāⁿ ndaata Israel, ꞌāā canee sa ꞌtíícā. Ndúúti chi Ndyuūs yaaꞌví yā ꞌáámá saⁿꞌā chi cuuvi yeⁿꞌé yā ní saⁿꞌā miiⁿ nguɛ́ɛ́ yeⁿꞌē ndaata Israel ní nguɛ́ɛ́ diíⁿ yā circuncidar cuerpo yeⁿꞌe saⁿꞌā miiⁿ, ꞌāā canee sa ꞌtíícā. 19 Nguɛ́ɛ́ dɛꞌɛ̄ vɛɛ nanááⁿ Ndyuūs nduuti chi diíⁿ yā circuncidar cuerpo yeⁿꞌe saⁿꞌā o nguɛ́ɛ́. Dámaāⁿ dichííꞌvɛ̄ nduuti chi cuꞌteenu yú Jesucristo ní diiⁿ yú tanꞌdúúcā chi Ndyuūs neⁿꞌé yā. 20 Tanꞌdúúcā chi ndísꞌtiī ꞌāā canee nī taachí Ndyuūs yaaꞌvi yā ꞌáámá ꞌáámá ndísꞌtiī ꞌtiicá ntúūⁿ cuneé nī. 21 Taachi Ndyuūs yaaꞌví yā nꞌdiī chi cuuvi yeⁿꞌé yā, nduuti chi nꞌdiī canéé nī tanꞌdúúcā chi canéé ꞌiiⁿꞌyāⁿ chi canéé caadi ꞌiiyu ní nguɛ́ɛ́ cuuvi naⁿꞌa yā nguɛ́ɛ́ nacádiinúúⁿ nī dɛꞌɛ̄ vɛɛ yeⁿꞌē chúū. Ní nduuti chí cuuvi canee libre ndísꞌtii, chí diíⁿ nī ntiiⁿnyuⁿ caadi ꞌiiyu tuuꞌmi ní caⁿꞌá nī. Ní cunée nī libre. 22 Taachí Ndyuūs yaaꞌví yā ꞌiiⁿꞌyāⁿ chi canéé caadi ꞌiiyu ní ꞌiiⁿꞌyāⁿ miiⁿ iꞌtéénu yā Jesucristo, ꞌiiⁿꞌyāⁿ canéé yā tanꞌdúúcā chi libre, tī canee libre yā yeⁿꞌe nuuⁿndi yeⁿꞌé yā. ꞌIiⁿꞌyāⁿ chi canéé libre taachí Ndyuūs yaaꞌví yā ꞌiiⁿꞌyāⁿ, ꞌiiⁿꞌyāⁿ miiⁿ nguɛ́ɛ́ libre ti dichííꞌvɛ yā Ndyuūs. 23 ꞌIivú Ndyuūs ní cái yā ndísꞌtiī ndúúcū ꞌáámá precio chi nééné yaⁿꞌai chiiꞌvɛ̄ ti yuuúⁿ yeⁿꞌe daiyá yā. Maaⁿ ní ndísꞌtiī ní yeⁿꞌé Ndyuūs ndísꞌtiī. Ní diíⁿ nī ntiiⁿnyuⁿ yeⁿꞌé Ndyuūs. Nguɛ́ɛ́ diíⁿ nī tanꞌdúúcā ꞌiiⁿꞌyāⁿ yeⁿꞌe iⁿꞌyeeⁿdí ꞌcūū chi nguɛɛ iꞌtéénu yā Jesucristo ngaⁿꞌa yā chī diíⁿ nī. 24 Ndísꞌtiī hermanos yeⁿꞌé, caꞌáámá caꞌáámá ndísꞌtiī canéé nī ndúúcū Ndyuūs. Naachi canéé nī mííⁿ canéé Dendyuūs ndúúcu nī.
25 ꞌÚú caꞌá ꞌáámá consejo yeⁿꞌē nꞌdaataá chi nguɛ́ɛ́ nꞌgiindivaacu tá. Deenú chi ngaⁿꞌá tanꞌdúúcā chí Dendyuūs néⁿꞌé yā, naati chuū ní nguɛ́ɛ́ ley yeⁿꞌé yā. ꞌÚú Pablo ꞌúú chi iꞌteenú Ndyuūs. Ní Ndyuūs chꞌiⁿꞌí yā ꞌúú chiiⁿ chi ꞌúú diíⁿ ní ngaⁿꞌá. 26 ꞌÚú nadacadiinúúⁿ chi nꞌdaacā chi saⁿꞌā sꞌeeⁿ ꞌcuɛɛtinée sa damaāⁿ sa. Ti maaⁿ ní deenu yú chi ndaā tiempo chi nꞌgeenu yú ngii. 27 Ndísꞌtiī saⁿꞌā chi vɛ́ɛ́ nꞌdaataá yeⁿꞌé nī, nguɛ́ɛ́ cuꞌneeⁿ nī táⁿꞌā. Ndísꞌtiī saⁿꞌā chi nguɛ́ɛ́ nꞌdaataá yeⁿꞌé nī nguɛ́ɛ́ inꞌnuúⁿ nī nꞌdaataá chi cuuvi yeⁿꞌé nī. 28 Nduuti chi ꞌáámá saⁿꞌā chꞌiindivaacu sa, nguɛ́ɛ́ dinuūⁿndí sa. Nduuti chi nꞌdaataá mííⁿ ꞌcaandavaacú tá, nguɛ́ɛ́ dinuuⁿndí tá. ꞌÚú nadacádiinúúⁿ chi ꞌiiⁿꞌyāⁿ chi chꞌiindivaacu yā ní ꞌcueenu cá yā cuuvi. Nguɛ́ɛ́ neⁿꞌé chi ndísꞌtiī ꞌcueenu cá nī cuuvi.
29 Chuū ngaⁿꞌá ngīi ndísꞌtiī hermanos yeⁿꞌé: Nguɛ́ɛ́ ꞌnaaⁿ tiempo ꞌcuɛɛtinée yú iⁿꞌyeeⁿdí ꞌcūū. Saⁿꞌā chi vɛ́ɛ́ nꞌdaataá yeⁿꞌē sa n̄diiⁿ sa ntiiⁿnyuⁿ yeⁿꞌe ꞌiivú Ndyuūs vmnááⁿ vmnaaⁿ nguɛ́ɛ́ ti neⁿꞌe nꞌdaataá yeⁿꞌē sa. 30 Nguɛ́ɛ́ diíⁿ nī cuenta yeⁿꞌe dɛꞌɛ̄ vɛɛ chi chóꞌōo yeⁿꞌé nī. Nduuti chi ngɛɛcú nī yeⁿꞌe ꞌaama tináⁿꞌā nguɛ́ɛ́ ꞌnaaⁿ tiempo cuɛɛcú nī. Nduuti chi yeenú nī ti vɛ́ɛ́ ꞌáámá ꞌviicu nguɛ́ɛ́ ꞌnaaⁿ tiempo cunéé vaadī yeenú nanáaⁿ nī. Nduuti chi ngái nī tuuꞌmi ní ngáácú nī chi nguɛ́ɛ́ ꞌnaa tiempo cunee. 31 Ní ndísꞌtiī chi vɛ́ɛ́ negocio yeⁿꞌé nī yeⁿꞌē cosa chi vɛ́ɛ́ ná iⁿꞌyeeⁿdí ꞌcūū, nguɛ́ɛ́ ꞌcuɛɛtineé nī dámaāⁿ yeⁿꞌe chuū, ti iⁿꞌyeeⁿdī ndúúcū nducuéⁿꞌē chi vɛɛ yeⁿꞌē ní chóꞌoó.
32 ꞌÚú neⁿꞌé chi nguɛ́ɛ́ nadacádíínuuⁿ nī yeⁿꞌé denduꞌū chi vɛ́ɛ́. Saⁿꞌā sꞌeeⁿ chi nguɛ́ɛ́ nꞌgiindivaacu sa ndɛ́ɛ sa cuidado yeⁿꞌe dendúꞌū chi yeⁿꞌē ꞌiivú Ndyuūs. Ní idiiⁿ sa tanꞌdúúcā chi neⁿꞌé Ndyuūs. 33 Saⁿꞌā chi nꞌgiindivaacu sa ndɛ́ɛ sa cuidado yeⁿꞌē chi vɛ́ɛ́ na iⁿꞌyeeⁿdí ꞌcūū táácā cuuvi cunee yíínūu nꞌdaataá yeⁿꞌē sa. 34 ꞌTiicá ntúūⁿ idiiⁿ nꞌdaataá chí nꞌgííndíváacu tá. ꞌÁámá nꞌdaataá chí nguɛ́ɛ́ nꞌgiindivaacu tá ndɛ́ɛ tá cuidado yeⁿꞌe denduꞌū yeⁿꞌe ꞌiivú Ndyuūs. Ní diiⁿ tá ndúúcū nuuⁿmaⁿ staava yeⁿꞌē tá nducuéⁿꞌē chi neⁿꞌe Ndyuūs. Nguɛ́ɛ́ ꞌtíícā idiiⁿ nꞌdaataa chí nꞌgīīndivaacu tá. Ndɛ́ɛ tá cuidado yeⁿꞌe nducuéⁿꞌē yeⁿꞌē vaacu tá ni táácā chi cuuvi cunee yíínūu isaⁿꞌā yeⁿꞌē tá.
35 Ngaⁿꞌá ngīi ndisꞌtiī chuū: Nguɛ́ɛ́ chi nguɛ́ɛ́ ꞌcaandavaacú nī ti neⁿꞌé chi ndísꞌtiī ní cuuvi cunee nꞌdaaca cá nī. Neⁿꞌé chi ndísꞌtiī diíⁿ nī ndúúcū nuuⁿmaⁿ staava yeⁿꞌe nī chiiⁿ chi cuuvi dichííꞌvɛ̄ ca Ndyuūs. Ní cuꞌneéⁿ nī nducuéⁿꞌē chi vɛ́ɛ́ iⁿꞌyeeⁿdí ꞌcūū chí cuuví nī.
36 Nduuti chi ꞌáámá saⁿꞌā nadacádiinuuⁿ sa chi nꞌdaacā chi daiya sa chi nꞌdaataa cuiinu ꞌcaandavaacu tá ti vɛ́ɛ́ nduuyu yeⁿꞌē tá tuuꞌmi ní cuuvi diiⁿ sa nꞌdaacā caava tá. Ní ꞌcaandavaacú tá. Chuū ní nguɛ́ɛ́ nuuⁿndi. 37 Nduuti chi táámá saⁿꞌā miiⁿ nguɛ́ɛ́ neⁿꞌe sa chi daiya sa ꞌcaandavaacu tá ti canéé ditiinú sa na staava yeⁿꞌē sa chi nguɛ́ɛ́ neⁿꞌe sa ꞌcaandavaacu tá, tuuꞌmi ní cunee libre sa. Ní cuuví diiⁿ sa chɛɛ chí neⁿꞌē sa. Ní diiⁿ sa cuidado táⁿꞌā daiya sa. Ní nꞌdaacā idiiⁿ sa. 38 Saⁿꞌā chi ngaⁿꞌa sa chi nꞌgīīndivaacu tá, o saⁿꞌā chi nguɛ́ɛ́ neⁿꞌe sa chi ꞌcaandavaacú tá, nduu ꞌuuví saⁿꞌā miiⁿ dinꞌdaacá sa. Naati nꞌdaacā ca idiiⁿ saⁿꞌā chi nguɛ́ɛ́ neⁿꞌe sa chi ꞌcaandavaacú tá.
39 Nꞌdaataá chi nꞌgíídívaacu tá canéé chi ꞌcuɛɛtinee tá ndúúcū isaⁿꞌā yeⁿꞌē tá núúⁿmáⁿ neⁿꞌe chí cándúúchi sá. Ndúúti chi ꞌcuūvī saⁿꞌā yeⁿꞌe tá tuuꞌmi ní cuuví ꞌcaandavaacu tá ndúúcū táámá saⁿꞌā chi iꞌtéénu sa Jesucristo. 40 ꞌÚú inadacádiinúúⁿ chí nꞌdaacā ca yeⁿꞌē tá chi ꞌaa ntɛ́ɛ́ ꞌcaandavaacu tá. Chuū chi ngaⁿꞌá nguɛ́ɛ́ dámaāⁿ yeⁿꞌe chi ꞌúú nadicádiinúúⁿ ti tanꞌdúúcā chi neⁿꞌe Espíritu Nꞌdai yeⁿꞌé Ndyuūs.