Yeⁿꞌe yuūtɛ̄ chi ꞌiiⁿꞌyāⁿ cáꞌa yā yeⁿꞌē nátai yeⁿꞌe ídolos
8
Maaⁿ ní idinguúⁿ taama chi yeⁿꞌe yuūtɛ̄ yeⁿꞌe ꞌiiti chi ꞌiiⁿꞌyāⁿ ꞌcaaⁿꞌnúⁿ yā ní cáꞌa yā yuūtɛ̄ miiⁿ yeⁿꞌē nátaī cáávā ídolos. Deenu yú chi nducyaaca yú deenu yú ꞌtɛɛ yeⁿꞌe chuū. ꞌIiⁿꞌyāⁿ chi nadacadiinúúⁿ yā chi deenú cá yā cuuvi dichꞌɛɛtɛ́ maáⁿ yā ꞌiiⁿꞌyāⁿ. ꞌIiⁿꞌyāⁿ chi neⁿꞌé yā Ndyuūs ní neⁿꞌé yā hermanos, ꞌiiⁿꞌyāⁿ miiⁿ néⁿꞌé yā chi tanáⁿꞌā hermanos chi cuuvi déénu cá yā yeⁿꞌe Ndyuūs. 2 ꞌIiⁿꞌyāⁿ chi nadacádiinúúⁿ yā chi deenu yā nguɛ́ɛ́ tanducuéⁿꞌē deenu yā tanꞌdúúcā chi canéé chi cuuví deenu yā. 3 Nduuti chi ꞌáámá ꞌiiⁿꞌyāⁿ dinéⁿꞌe yā Ndyuūs, tuuꞌmi ní Ndyuūs inaaⁿ yā ꞌiiⁿꞌyāⁿ miiⁿ. 4 Maaⁿ ní ꞌúú neⁿꞌé chi cadiinúúⁿ nī yeⁿꞌe yuūtɛ̄ chi ꞌiiⁿꞌyāⁿ cáꞌa yā yeⁿꞌe nátaī yeⁿꞌe ídolos. Deenu yú chí ídolos nguɛ́ɛ́ cánduuchi. Deenu yú ti ꞌáámá nꞌdyáⁿꞌā Ndyuūs chi vɛɛ yā ní nguɛ́ɛ́ ca táámá yā. 5 ꞌIiⁿꞌyāⁿ ngaⁿꞌa yā chi nééné vɛ́ɛ́ cá ídolos na yáⁿꞌāa ꞌcūū níícú nanguuvi váá. Ní ꞌiiⁿꞌyāⁿ ngaⁿꞌá yā chi cosa sꞌeeⁿ ní dendyuūs sꞌeeⁿ. 6 Sꞌuuúⁿ deenu yú chi vɛ́ɛ́ ꞌáámá nuúⁿ Ndyuūs yeⁿꞌē yú. Ndyuūs Chiida yú chi dinꞌdái yā tanducuéⁿꞌē denduꞌū. Ní Ndyuūs diíⁿ yā chi cuuvi yeⁿꞌé yā sꞌuuúⁿ. Vɛ́ɛ́ ꞌáámá nꞌdyáⁿꞌa ꞌiivú Ndyuūs yeⁿꞌē yú chi Jesucristo. Ndyuūs Chiida yú ndúúcū Jesucristo daiyá yā dinꞌdái yā tanducueⁿꞌē denduꞌū chi vɛ́ɛ́. Jesucristo yeⁿꞌē yú tee yā vida yeⁿꞌē yú cueⁿꞌe daāⁿmaⁿ.7 Nguɛ́ɛ́ nducyaaca ꞌiiⁿꞌyāⁿ chi iꞌtéénu yā Jesucristo deenú yā chi ꞌaama nꞌdyáⁿꞌā Dendyuūs vɛɛ yā. Ndii maaⁿ ní náⁿꞌa yā ní iꞌtéénu yā chi canduuchi ídolos. Taachi ꞌiiⁿꞌyāⁿ cáꞌa yā yuūtɛ̄ yeⁿꞌē nátai yeⁿꞌe ídolos, ní iꞌtéénu yā chi caꞌa yā yuūtɛ̄ nátai yeⁿꞌé dendyuūs sꞌeeⁿ. Ní taachi ꞌiiⁿꞌyāⁿ chi duuꞌví deenú yā yeⁿꞌe Ndyuūs cheꞌé yā yuūtɛ̄ yeⁿꞌe nátai sꞌeeⁿ, ꞌiiⁿꞌyāⁿ miiⁿ nadacádíínuuⁿ yā chi vɛ́ɛ́ nuūⁿndī yeⁿꞌe yā. 8 Ndyuūs nguɛ́ɛ́ diiⁿ cuenta yā yeⁿꞌē sꞌuuúⁿ nduuti chi ngeꞌe yú yuūtɛ̄ miiⁿ o nguɛ́ɛ́. Nduuti chi ngeꞌe yú yuūtɛ̄ miiⁿ nguɛ́ɛ́ idiiⁿ chi nꞌdaacā ca yú. Nduuti chi nguɛ́ɛ́ cheꞌe yú nguɛ́ɛ́ idiiⁿ chi nguɛ́ɛ́ nꞌdaacā ca yú. 9 Ndísꞌtiī chi déénu nī chɛɛ chi Ndyuūs neⁿꞌé yā chi diiⁿ nī, ꞌcaandiveéⁿ nī. Nguɛ́ɛ́ diiⁿ nī dɛꞌɛ̄ vɛɛ chi ꞌiiⁿꞌyāⁿ chi duuꞌvī déénú yā yeⁿꞌe Jesucristo cuuvi nacádíínuuⁿ yā chi vɛɛ nuuⁿndi yeⁿꞌe yā. 10 ꞌÚú ngaⁿꞌá ngīi ndísꞌtiī chi canee diituu cá nī chi iꞌtéénu cá nī Ndyuūs. Deenú nī chi nguɛ́ɛ́ vɛ́ɛ́ nuuⁿndi yeⁿꞌe nī taachi chi snéé na mesa yeⁿꞌe nííꞌvɛ̄ɛ̄ yeⁿꞌe yaācū yeⁿꞌe ídolos. Naati ꞌiiⁿꞌyāⁿ chi duuꞌvī déénu yā yeⁿꞌé Jesucristo cuuvi nꞌdiichí yā ndísꞌtii, tuuꞌmi ní ꞌiiⁿꞌyāⁿ miiⁿ chi nadacadiinúúⁿ yā chi ndísꞌtiī ꞌtɛɛ ꞌtɛɛ iꞌtéénu nī ídolos. ꞌIiⁿꞌyāⁿ miiⁿ cuuvi diíⁿ yā tanꞌdúúcā ndisꞌtii idiíⁿ nī. Caⁿꞌá yā cheꞌé yā yuūtɛ̄ miiⁿ ní diíⁿ yā sentir chi vɛ́ɛ́ nuuⁿndi yeⁿꞌé yā. 11 ꞌÁárá chi cuuvi cheꞌé nī yuutɛ́ ꞌcūū ní nguɛ́ɛ́ vɛ́ɛ́ nuuⁿndi yeⁿꞌé nī nguɛ́ɛ́ neⁿꞌé nī chi hermanos chi duuꞌvī deenú yā yeⁿꞌē Jesucristo diíⁿ yā ꞌtíícā, caati nguɛɛcúndií yā ní ꞌtɛɛ ꞌtɛɛ iꞌtéénu yā ídolos. Ní ꞌtíícā idiiⁿ hermanos ní Cristo chꞌīi yā na cruz ntúūⁿ caavá yā. 12 Taachí diíⁿ nī ꞌtuucā ꞌtíícā idinuuⁿndí nī contra Cristo níícú contra yeⁿꞌe hermano chi duūꞌvī déénu yā yeⁿꞌē Jesucristo. Caati hermanos miiⁿ ꞌtɛɛ ꞌtɛɛ iꞌtéénu yā ídolos, ní vɛ́ɛ́ nuūⁿndi yeⁿꞌe yā. 13 ꞌÚú nacádiinúúⁿ yeⁿꞌe chuū ꞌtíícā. Nduuti chi ꞌúú cheꞌé yuūtɛ̄ miiⁿ, ni ꞌúú diíⁿ chi hermano chi duuꞌvī deenú yā yeⁿꞌē Jesucristo cheꞌé yā ní vɛ́ɛ́ nuuⁿndí yā, tuuꞌmi ní ꞌāā ntɛ́ɛ́ cheꞌé yuūtɛ̄ miiⁿ.