3 ꞌIiⁿꞌyāⁿ chi itíínguuneeⁿ yā ꞌúú yeⁿꞌē chi ꞌúú chi ꞌaama apóstol, ꞌtúúcā nanꞌguɛɛcútaⁿꞌá yeⁿꞌe yā. 4 Núsꞌuu chi apóstoles ¿ꞌáá nguɛ́ɛ́ tuneéⁿ ꞌnū chi chéꞌé ꞌnū ní cúꞌú ꞌnū ndúúcū ndísꞌtiī na vaacu nī? 5 ¿ꞌÁá nguɛ́ɛ́ tuneéⁿ ꞌnū chi ꞌáámá ꞌáámá ꞌnū candɛɛ́ ꞌnū nꞌdaataá yeⁿꞌe ꞌnū taachi caⁿꞌa ꞌnū cuaaⁿ cyúúní? ꞌTúúcā diīiⁿ tanáⁿꞌā apóstoles, ndúúcū hermanos chi yeⁿꞌe Jesucristo, ndúúcū hermano Pedro. 6 Dámaāⁿ ꞌúú ndúúcū Bernabé diíⁿ ꞌnū ntiiⁿnyuⁿ cáávā chi chéꞌé ꞌnū. 7 ¿Duꞌú soldado diiⁿ sa gastar tuumi caavā gastos yeⁿꞌe sa taachi diiⁿ sa ntiiⁿnyuⁿ miiⁿ? ¿Duꞌú saⁿꞌā ngiichi sa dííꞌyú uvas ní ꞌáá nguɛ́ɛ́ cuuvi chéꞌé sá yeⁿꞌē? ¿Duꞌú ꞌiiⁿꞌyāⁿ chi diiⁿ cuidado ꞌáámá taaⁿ ꞌiiti cuūchī ní ꞌáá nguɛ́ɛ́ cuuvi cuꞌú yā leche yeⁿꞌē ꞌiiti miiⁿ? 8 ꞌÚú nguɛ́ɛ́ ngaⁿꞌá chuū tanꞌdúúcā chi ngaⁿꞌa saⁿꞌa chi caꞌa orden. Ngaⁿꞌá chuū, ti ꞌtíícā ngaⁿꞌa ley yeⁿꞌe Moisés miiⁿ. 9 Canee nguūⁿ na libro yeⁿꞌé Ndyuūs chi ley chi Moisés dinguúⁿ yā chi ꞌtíícā: Nguɛ́ɛ́ cuꞌnuúⁿ nī yaana duutú tī chi indeꞌei nuúⁿ tī nguaaⁿ trigo chi nguɛ́ɛ́ cuuvi cheꞌé tī: ¿ꞌÁá ndɛɛ cuidado Ndyuūs dámaāⁿ ꞌiiti? Nguɛ́ɛ́ ꞌtúúcā. 10 Cáávā núsꞌuu, ní cuaacu nííⁿnyúⁿ canéé nguūⁿ ꞌtíícā: ꞌIiⁿꞌyāⁿ chí diꞌcuūndú yā ꞌiiti ndúúcū ꞌiiⁿꞌyāⁿ chi yiinenaáⁿ yā ꞌiiti chi indeꞌei nuúⁿ tī nguaaⁿ trigo, ꞌiiⁿꞌyāⁿ sꞌeeⁿ ní cunee ngiinú yā cosechā yeⁿꞌe yā. 11 Candɛɛ́ ꞌnū nduudu yeⁿꞌé Ndyuūs nguaaⁿ ndísꞌtiī taachi ꞌāā cuɛ́ɛ́ ꞌcaandiveéⁿ nī nduudu miiⁿ. ¿ꞌÁá nguɛ́ɛ́ tée nī núsꞌuu necesidades yeⁿꞌé ꞌnū? 12 Nduuti chi tanáⁿꞌā apóstoles cuuvi cutaꞌá yā necesidades yeⁿꞌé yā yeⁿꞌe ndísꞌtiī, ¿ꞌáá nguɛ́ɛ́ cuuvi cutaꞌá ꞌnu necesidades yeⁿꞌé ꞌnū dendúꞌū? Nguɛ́ɛ́ caaⁿꞌmáⁿ ꞌnū chi ndísꞌtiī tée nī necesidades yeⁿꞌé ꞌnū naatí chi chɛɛ́ ꞌnū nducuéⁿꞌē denduꞌū, caati ꞌiiⁿꞌyāⁿ cuuvi cuꞌtéénu yā nduudu yeⁿꞌe ꞌiivú Ndyuūs. 13 ¿ꞌÁá nguɛ́ɛ́ déénú ndísꞌtiī chuū ndii tiempo chi ꞌaa chóꞌōo yeⁿꞌe ꞌiiⁿꞌyāⁿ chi diiⁿ ntiiⁿnyuⁿ yeⁿꞌe yaacū templo? ꞌIiⁿꞌyāⁿ miiⁿ cheꞌé yā comida yeⁿꞌe yaācū. ꞌTiicá ntúūⁿ, ꞌiiⁿꞌyāⁿ chi diíⁿ yā ntiiⁿnyuⁿ yeⁿꞌe nátai, ꞌiiⁿꞌyāⁿ miiⁿ cheꞌé ntúuⁿ yā chi vɛ́ɛ́ nátai chí ꞌiiⁿꞌyāⁿ ndɛ́ɛ yā ndaa yā nátai. 14 ꞌTíícā ngaⁿꞌa Señor ꞌiivú Ndyuūs yeⁿꞌé ꞌiiⁿꞌyāⁿ chi candɛɛ́ yā nduudu yeⁿꞌe evangelio chí nduudu ngai yeⁿꞌé Jesucristo. ꞌIiⁿꞌyāⁿ miiⁿ ꞌcuɛɛtinée yā ndúúcū ꞌiiⁿꞌyāⁿ chi iꞌtéénu yā Señor Jesucristo, ní caꞌá yā ꞌiiⁿꞌyāⁿ sꞌuuⁿ chi cheꞌé yā. 15 ꞌÚú nguɛ́ɛ́ staꞌá túumī yeⁿꞌé nī, ní nguɛ́ɛ́ cheꞌé dɛꞌɛ̄ vɛɛ, ti teé túumī ndísꞌtiī. Nguɛ́ɛ́ dinguúⁿ chuū chi ꞌtíícā diíⁿ nī nduucú. Nꞌdáácā ca yeⁿꞌé chi ꞌcuūví ní mar ꞌáámá ꞌiiⁿꞌyāⁿ nguɛ́ɛ́ cuuvi caaⁿꞌmaⁿ yā chi ꞌúú candɛɛ́ ndúúdu cuaacu yeⁿꞌe Dendyuūs cáávā chi nadííꞌvɛ yā ꞌúú.

16 ꞌÁárá chi ngaⁿꞌá evangelio chí ndúúdú ngai yeⁿꞌé Jesucristo ꞌúú nguɛ́ɛ́ cuuvi caaⁿꞌmáⁿ chi ꞌúú chi chꞌɛɛtɛ́. Canéé chí caaⁿꞌmáⁿ yeⁿꞌé evangelio, ti cáávā chuū chííⁿ chi Ndyuūs dichoꞌó yā ꞌúú. Nééné ꞌcueenú cuuvi nduuti chi nguɛ́ɛ́ caaⁿꞌmáⁿ yeⁿꞌē evangelio. 17 Ndúúti chi caaⁿꞌmáⁿ yeⁿꞌe evangelio ti diíⁿ buscar ntiiⁿnyuⁿ miiⁿ tuuꞌmi ní Ndyuūs nadííꞌvɛ yā ꞌúú, naati nguɛɛ ꞌtíícā. Cáávā chuū canéé chi caaⁿꞌmáⁿ evangelio chí ndúúdú ngai yeⁿꞌē Jesucristo. 18 ¿Dɛꞌɛ́ ndaacā yeⁿꞌē ꞌúú? Nguɛ́ɛ́ dɛꞌɛ̄ vɛɛ ndaācā yeⁿꞌé. Cáávā ꞌúú nadííꞌvɛ yeⁿꞌé chiiⁿ chi ngaⁿꞌá ndúúdú ngai. ꞌÚú caaⁿꞌmáⁿ nduudu ngai yeⁿꞌé Jesucristo ní yeenú taavi ꞌúú ti nguɛ́ɛ́ cutaⁿꞌá dendúꞌū yeⁿꞌe nī. Nguɛ́ɛ́ caaⁿꞌmáⁿ chi ndísꞌtiī tee nī ꞌúú dɛꞌɛ̄ vɛɛ cáávā ntiiⁿnyuⁿ yeⁿꞌé ꞌaara chi cuaacu chí canéé chí diíⁿ nī.

19 Nꞌdaacā caneé ꞌtíícā. Nguɛ́ɛ́ duꞌū vɛɛ cuuvi caaⁿꞌmaⁿ ntiiⁿnyuⁿ yeⁿꞌé, ti ꞌiiⁿꞌyāⁿ nguɛ́ɛ́ nadííꞌvɛ yā ꞌúú. ꞌÚú dichííꞌvɛ nducyáácá ꞌiiⁿꞌyāⁿ ꞌiicu cuuvi cuꞌtéénu yā Jesucristo yeⁿꞌē yú. 20 ꞌÁárá chi maaⁿ nguɛ́ɛ́ costumbre yeⁿꞌé chi idiíⁿ tanꞌdúúcā chi ngaⁿꞌa ley yeⁿꞌē Moisés, naati taachi caneé nguaaⁿ ꞌiiⁿꞌyāⁿ hebreo sꞌeeⁿ chi diíⁿ yā tanꞌdúúcā chi ngaⁿꞌa ley yeⁿꞌē Moisés, ꞌtíícā idiíⁿ denduꞌū. Idiíⁿ ꞌtiicā ní ꞌiicu ꞌiiⁿꞌyāⁿ hebreo sꞌeeⁿ cuuvi cuꞌtéénu yā Jesucristo. 21 Taachi ꞌúú caneé ndúúcū ꞌiiⁿꞌyāⁿ chi ꞌāā viꞌi cā ley yeⁿꞌé yā nguɛ́ɛ́ ti ley yeⁿꞌē Moisés miiⁿ, ꞌúú idiíⁿ tanꞌdúúcā ꞌiiⁿꞌyāⁿ sꞌeeⁿ. Naati nguɛ́ɛ́ idiíⁿ cosa chi Ndyuūs nguɛɛ neⁿꞌé yā chi ꞌúú diíⁿ. ꞌTíícā idiíⁿ, ní ꞌíícú ꞌiiⁿꞌyāⁿ miiⁿ cuuvi cuꞌtéénu yā Jesucristo. 22 Taachi caneé nguaaⁿ ꞌiiⁿꞌyāⁿ chi duūvā tuuꞌmi ꞌúú idiíⁿ tanꞌdúúcā ꞌaama chi duūvā, ní ꞌiicu cuuvi cuꞌtéénu yā Jesucristo. Nduu cuaaⁿ naachi caⁿꞌá ꞌúú idiíⁿ nducuéⁿꞌē tanꞌdúúcā chi idiíⁿ ꞌiiⁿꞌyāⁿ sꞌuuⁿ. Idiíⁿ ꞌtíícā ní ꞌiicu diíⁿ chí nanguáⁿꞌai náⁿꞌa yā. 23 ꞌÚú idiíⁿ tanducuéⁿꞌē chuū chi ꞌúú cuuvi caaⁿꞌmáⁿ nduudu yeⁿꞌe Ndyuūs nanááⁿ ꞌiiⁿꞌyāⁿ. Ní cuuvi cutaꞌa yú cosa chi nꞌdai chi Ndyuūs tée yā sꞌuūúⁿ.

24 ¿ꞌÁá nguɛ́ɛ́ déénu ndísꞌtiī yeⁿꞌe ꞌiiⁿꞌyāⁿ chi ngéénu yā na juego? Nducyaaca yā ngéénu yā na juego naati ꞌáámá núuⁿ yā chi diíⁿ yā ganar ní ndaaca regalo yeⁿꞌe yā. Maaⁿ ní ndísꞌtiī diíⁿ nī tanꞌduucā ꞌaama chi ngéénu yā ní diíⁿ nī ganar. ꞌTíícā diíⁿ nī chiiⁿ chi Ndyuūs neⁿꞌé yā, ní tunéé ndísꞌtiī chi cuuvi yeⁿꞌé nī chɛɛ chí Ndyuūs tée yā ndísꞌtiī. 25 Caꞌáámá caꞌaama saⁿꞌā chi ngeēnū sa nguɛ́ɛ́ cuuvi diiⁿ sa nducuéⁿꞌē chi neⁿꞌe sa. Dámaāⁿ idiiⁿ sa cosas chi nꞌdaācā caavā sa cucáávā chi ditiīnú sa. ꞌTíícā idiiⁿ sa ni cuuví ndaacā sa ꞌáámá corona yeⁿꞌe naāndā chi ngoꞌo yéⁿꞌē. Sꞌuūúⁿ ní idiiⁿ cá yú tanꞌdúúcā chí Dendyuūs neⁿꞌé yā chi diiⁿ yú, ní ndaaca yú ꞌáámá corona chi nguɛ́ɛ́ tuvií yeⁿꞌē chi Dendyuūs tée yā sꞌuuúⁿ. 26 ꞌÚú idiíⁿ ntiiⁿnyuⁿ yeⁿꞌé Ndyuūs tanꞌdúúcā ꞌáámá chi ngeenu na juego ní diíⁿ yā ganar. ꞌÚú idiíⁿ ntiiⁿnyuⁿ díítūu tanꞌdúúcā ꞌiiⁿꞌyāⁿ chi nguⁿꞌú yā ndúúcū taamá yā, nguɛ́ɛ́ tanꞌduucā chi nguⁿꞌú yā ní ngéⁿꞌé yā na ꞌyúúné. 27 ꞌÚú idiíⁿ sufrir cáávā ntiiⁿnyuⁿ yeⁿꞌé Ndyuūs, ní diiⁿ nꞌdai cá ntiiⁿnyuⁿ miiⁿ. ꞌTíícā idiíⁿ, ti nguɛ́ɛ́ neⁿꞌé chi cuayiivi chi caaⁿꞌmáⁿ nduudu cuaacu miiⁿ, Ndyuūs cuuvi caaⁿꞌmáⁿ yā yeⁿꞌe ꞌúú chi nguɛ́ɛ́ nꞌdaacā diíⁿ ntiiⁿnyúⁿ yeⁿꞌe yā.