Visión yeⁿꞌe Pablo ndúúcū chi nꞌdiichí yā
12
Cuaacu nííⁿnyúⁿ chi nguɛɛ dɛꞌɛ̄ vɛɛ nꞌdaacá chi caaⁿꞌmáⁿ yeⁿꞌē ꞌúú maáⁿ chi ꞌúú chꞌɛɛtɛ́ ꞌúú. Nꞌdáaca ca chi ꞌúú caaⁿꞌmáⁿ yeⁿꞌe nꞌdeee nááⁿ chi canéé chi snaáⁿ yeⁿꞌe Señor Jesucristo ní yeⁿꞌe chi canúúⁿ nꞌdeꞌei chi nꞌgiⁿꞌí yā ꞌúú. 2 Cuayiivi chi iꞌteenú Cristo chóꞌōo ndiichi cúūⁿ nduuyúū chí nꞌdiichí ꞌáámá visión tanꞌdúúcā chi chꞌiinú. Ní ꞌaama ꞌiiⁿꞌyāⁿ candɛ́ɛ yā ꞌúú ndii vaꞌāī chɛɛti nguuvi. Nguɛ́ɛ́ deenú nduuti chi candɛɛ yā cuerpo yeⁿꞌé o nguɛ́ɛ́. Dámaaⁿ Ndyuūs deenú yā chuū. 3 Naati chíí ní nguɛɛ deenú nduuti chi cueⁿꞌé ndúúcū cuerpo yeⁿꞌé o nguɛ́ɛ́ ndúúcū cuerpo yeⁿꞌé naati dámaāⁿ Ndyuūs deenú yā táácā cueⁿꞌé. 4 ꞌÚú deenú chi candɛ́ɛ yā ꞌúú ní cueⁿꞌé ndii paraíso chi vaꞌai chɛɛti nguuvi. Ní ꞌúú nꞌgiindiveéⁿ nduudu chi nguɛ́ɛ́ tanꞌduucā nduudu yeⁿꞌe ꞌiiⁿꞌyāⁿ yeⁿꞌe iⁿꞌyeeⁿdí ꞌcūū ti yeⁿꞌe Ndyuūs. Nguɛ́ɛ́ vɛ́ɛ́ permiso chi cuuvi caaⁿꞌmáⁿ yeⁿꞌē chi nꞌgiindiveéⁿ. 5 ꞌÚú cuuvi caaⁿꞌmáⁿ chi ꞌúú ní chꞌɛɛtɛ maáⁿ yeⁿꞌē chi Ndyuūs diíⁿ yā nduucú. ꞌÚú nguɛ́ɛ́ caaⁿꞌmáⁿ yeⁿꞌe maáⁿ chi chꞌɛɛtɛ́ maáⁿ. Dámaāⁿ caaⁿꞌmáⁿ chi duūvā ꞌúú. 6 ꞌÁárá chi caaⁿꞌmáⁿ chi ꞌúú chꞌɛɛtɛ́ maáⁿ nguɛ́ɛ́ caaⁿꞌmáⁿ tanꞌdúúcā chi zonzo ꞌúú ti caaⁿꞌmáⁿ nduudu cuaacu yeⁿꞌé naati nguɛ́ɛ́ caaⁿꞌmáⁿ ꞌtíícā ti nguɛ́ɛ́ neⁿꞌé chi mar ꞌáámá ꞌiiⁿꞌyāⁿ nadacadíínuuⁿ yā chi ꞌúú chꞌɛɛtɛ ca ꞌúú. Neⁿꞌé chi ꞌiiⁿꞌyāⁿ miiⁿ nadacadíínuuⁿ yā yeⁿꞌe ꞌúú tanꞌdúúcā chi nꞌdiichí yā ꞌúú, ní nꞌgiindiveéⁿ yā nduudu yeⁿꞌé.7 Chuū chi Cristo chꞌiⁿꞌí yā ꞌúú ní ꞌáámá visión chi chꞌɛɛtɛ ni dɛɛvɛ taavi ca. Ní Cristo tee yā ꞌúú ꞌáámá yaꞌai na cuerpo yeⁿꞌé chi ꞌáámá canéé ní tanꞌdúúcā chi ꞌáámá yááⁿ chi cataꞌāī na cuerpo yeⁿꞌé. Ní chiī tanꞌdúúcā chi yááⁿnꞌguiinūuⁿ sꞌneeⁿ sa yááⁿ miiⁿ chi neⁿꞌe sa chí ꞌcueenú cuuvi. Ní Ndyuūs tee yā permiso chi ꞌúú canee ndúúcū dolor miiⁿ cáávā chi nguɛ́ɛ́ cuuvi caaⁿꞌmáⁿ yeⁿꞌe maáⁿ chi chꞌɛɛtɛ́ ꞌúú. 8 Ní ꞌiīnū cuuvi chiicá Señor Jesucristo yeⁿꞌē yú chi divíi yā vaadī yaꞌáí ꞌcūū yeⁿꞌé. 9 Naati Señor yeⁿꞌe yú ngaⁿꞌá yā ngii yā ꞌúú ꞌtíícā: Vaadī neⁿꞌe yeⁿꞌé ní tūneeⁿ di ní nguɛ́ɛ́ más ca neⁿꞌe nī ti chuū. Ní poder yeⁿꞌé chuū chi nꞌgiⁿꞌi cá taachí ꞌiiⁿꞌyāⁿ chi duūva cuerpo yeⁿꞌé yā. Maaⁿ ní cucáávā chi yaaꞌví Señor ꞌúú ꞌtúúcā, ꞌúú yeenú ti ꞌúú duūvā ꞌúú ti Cristo cuuvi ꞌcuuⁿꞌmíⁿ yā poder yeⁿꞌé yā ti canée yā na cuerpo yeⁿꞌé. 10 Cáávā chuū ní yeenú ti duūvá. Ní yeenú ꞌaara chi ꞌiiⁿꞌyāⁿ ngaⁿꞌa taaⁿ yā yeⁿꞌé, ní nguɛ́ɛ́ vɛ́ɛ́ necesidades yeⁿꞌé, ní ꞌiiⁿꞌyāⁿ diíⁿ yā chi nꞌgeenú ngiī. Ní yeⁿꞌe dendúꞌū díítūu chi choꞌōo yeⁿꞌé ní nꞌgeenú ngiī nducuéⁿꞌē chuū cáávā Cristo. ꞌTííca rā va. Taachi duūvā cuerpo yeⁿꞌé tuuꞌmi ní más ca ditiīnu ꞌúú.
Pablo nadacadiinuuⁿ cá yā yeⁿꞌe ꞌiiⁿꞌyāⁿ yeⁿꞌe yaacū yeⁿꞌe yáāⁿ Corinto
11 ꞌÚú deenú chi ngaⁿꞌá tanꞌdúúcā chi loco ꞌúú taachi ngaⁿꞌá yeⁿꞌē maáⁿ naati ndísꞌtiī diíⁿ nī chi a fuerza canee chi caaⁿꞌmáⁿ yeⁿꞌe maáⁿ ti ndísꞌtiī nguɛɛ ngaⁿꞌá nī yeⁿꞌé ꞌtúúcā. Nꞌdaacā ca chi ndísꞌtiī caaⁿꞌmaⁿ nꞌdááca nī yeⁿꞌé. ꞌÚú nguɛ́ɛ́ duuꞌví ꞌúú yeⁿꞌē tanáⁿꞌā ꞌiiⁿꞌyāⁿ chi ngaⁿꞌá yā chi apóstoles ní nguɛ́ɛ́ ꞌtíícā ꞌaara chi ꞌúú nguɛ́ɛ́ dɛꞌɛ̄ vɛɛ ꞌúú. 12 Ní taachi canéé nduucú nī chꞌiⁿꞌí ndísꞌtiī chi cuaacu chi ꞌúú ꞌáámá apóstol yeⁿꞌe Jesucristo ꞌúú ndúúcū vaadī nꞌgiinu chꞌɛɛtɛ chi diíⁿ ní ndúúcū ntiiⁿnyuⁿ chꞌɛɛtɛ chi diíⁿ ní nduūcū vaadī nꞌgiinu nꞌdai chi diíⁿ. 13 Dɛꞌɛ̄ vɛɛ chi nguɛ́ɛ́ diíⁿ ndúúcu ndisꞌtiī taachi caneé ndúúcu nī tanꞌdúúcā chi diíⁿ ndúúcū nducyaaca ꞌiiⁿꞌyāⁿ yeⁿꞌē tanáⁿꞌā yaācū. ꞌĀā daamá nūuⁿ idiíⁿ nduucú nī. Deenú chi nguɛ́ɛ́ ngiicá ndísꞌtiī chi cunneé nī ꞌúú caavā necesidades yeⁿꞌé. Maaⁿ ní nadichꞌɛɛcú nī yeⁿꞌé caavā falta ꞌcūū ti nguɛ́ɛ́ diiⁿ daamá ndúúcu nī.
14 Maaⁿ ní vɛɛ yaáⁿ chi ndaá nanááⁿ ndísꞌtiī ndiichi ndii ꞌíínú cuuvi, ní taachi ndaá nguɛ́ɛ́ diꞌvaachí ndísꞌtiī. Ní nguɛ́ɛ́ neⁿꞌé dɛꞌɛ̄ vɛ́ɛ́ yeⁿꞌe nī chi maáⁿ nī inꞌnuúⁿ nī naati ꞌúú neⁿꞌé ndísꞌtiī. Deenu yú chi ꞌiiⁿꞌyāⁿ chi chiidá yā canéé chí inꞌnuúⁿ yā necesidades yeⁿꞌē daiyá yā, nguɛ́ɛ́ ti daiyá yā inꞌnuúⁿ yā necesidades yeⁿꞌē chiidá yā. 15 Ni ꞌúú diíⁿ gastar tuūmī yeⁿꞌé chi diíⁿ ntiiⁿnyuⁿ cáávā ndísꞌtiī ní ndíí chi cuūnū ꞌúú cáávā almas yeⁿꞌe nī níícú ꞌcuɛɛtinéé nꞌdaacá nī. ꞌÁárá chí neⁿꞌe cá ndísꞌtiī ní nguɛ́ɛ́ ti ndísꞌtiī neⁿꞌé nī ꞌúú.
16 Ní ꞌáárá chi ꞌúú nginneé ndísꞌtiī, náⁿꞌā ꞌiiⁿꞌyāⁿ nguaaⁿ ndísꞌtiī chi deenú yā chi nguɛ́ɛ́ staꞌá tuumi yeⁿꞌé nī, ngaⁿꞌá yā chi ꞌúú nginncheꞌéí ꞌiiⁿꞌyāⁿ sꞌeeⁿ. 17 ¿ꞌÁá nginncheꞌéí ndísꞌtiī cucáávā ꞌiiⁿꞌyāⁿ sꞌeeⁿ chi dichoꞌó nanááⁿ ndísꞌtiī? Nguɛɛ ꞌtíícā. 18 ꞌÚú chiicá saⁿꞌā Tito chi naⁿꞌá yā. Ní dichoꞌó Tito ndúúcū táámá hermano yeⁿꞌe yú nanááⁿ ndísꞌtiī. ¿ꞌÁá cuaacu chi Tito miiⁿ chinncheꞌéí yā ndísꞌtiī? Nguɛɛ ꞌtíícā. O ¿ꞌáá cuaacu chi ꞌúú ndúúcū ꞌiiⁿꞌyāⁿ miiⁿ nguɛ́ɛ́ diíⁿ ꞌnū dáámá ntiiⁿnyuⁿ nguaaⁿ ndísꞌtiī ní nguɛ́ɛ́ ndúúcū dáámá sentido yeⁿꞌé ꞌnū? Nguɛɛ ꞌtíícā.
19 Maaⁿ ní ndisꞌtiī, ¿ꞌáá nadacadiinuuⁿ nī chi ngaⁿꞌa ꞌnū chi chííⁿ chi diíⁿ ꞌnū ní cuaacu caatí chi idiíⁿ ꞌnū defender ntiiⁿnyuⁿ yeⁿꞌé ꞌnū? Nguɛ́ɛ́ ꞌtíícā. Ngaⁿꞌá ꞌnū nanááⁿ Ndyuūs nduudú ꞌcūū cáávā chi núsꞌuu ní yeⁿꞌé Jesucristo. Ní nducuéⁿꞌē chi diíⁿ ꞌnū, diíⁿ ꞌnū ti ndísꞌtiī hermanos chi neⁿꞌé ꞌnū cuuvi cuꞌtéénu cá nī Ndyuūs. 20 Ni ꞌúú ni ꞌvaꞌá ti taachi ndaá nanááⁿ ndísꞌtiī ꞌúú nguɛ́ɛ́ nndaācá chi ndísꞌtiī diíⁿ nī tanꞌdúúcā chi ꞌúú neⁿꞌé chi diíⁿ nī. Ní ndísꞌtiī nguɛ́ɛ́ nndaāca nī ꞌúú tanꞌdúúcā chi neⁿꞌé nī chi ꞌúú idiíⁿ tí canéé chi ꞌcaaꞌvá ndúúcū ndísꞌtiī. Ní nndaācá ndisꞌtiī tanꞌdúúcā chi nguɛ́ɛ́ canéé chi ꞌcuɛɛtineé nī. Ní nndaācá chi vɛ́ɛ́ nguaaⁿ ndísꞌtiī ꞌiiⁿꞌyāⁿ chi nꞌgɛɛcu cheendí yā, ndúúcū ꞌiiⁿꞌyāⁿ chi neⁿꞌé yā cosas tanꞌdúúcā chi vɛ́ɛ́ yeⁿꞌe taama yā ndúúcū ꞌiiⁿꞌyāⁿ chi nduuvi taáⁿ yā. Ní ꞌiiⁿꞌyāⁿ sꞌeeⁿ chí ꞌcaaꞌvá yā ndúúcū táámá hermano ní maáⁿ yā divíi yā yeⁿꞌé yā ti neⁿꞌé yā ngaⁿꞌa yā chi chꞌɛɛtɛ maáⁿ yā. Ní ꞌiiⁿꞌyāⁿ ngaⁿꞌá yā contra yeⁿꞌe taama yā. Ní ꞌiiⁿꞌyāⁿ nééné neⁿꞌe caaⁿꞌmáⁿ yā yeⁿꞌē chí diiⁿ taama yā. Ní ꞌiiⁿꞌyāⁿ ngaⁿꞌá yā chi maáⁿ yā ní chꞌɛɛtɛ́ yā, ní nguɛ́ɛ́ vɛ́ɛ́ vaadī ꞌdiīíⁿ nguaaⁿ ndísꞌtiī. 21 Ni ꞌvaꞌá chí ꞌcuinaáⁿ nanááⁿ Ndyuūs cáávā ndísꞌtiī taachi ndaá nanááⁿ ndísꞌtiī taama vmnéⁿꞌēe. Ní taachi caneé ndúúcu nī ngii yaꞌāī ꞌiinú yeⁿꞌé ꞌyááⁿ ndísꞌtiī chi dinuuⁿndí nī ní nguɛ́ɛ́ nadaacadaamí nī yeⁿꞌe nuuⁿndí nī chi diíⁿ nī yeⁿꞌe chi neⁿꞌe cuerpo yeⁿꞌe nī. Ní diíⁿ nī cosas chi nguɛɛ nꞌdaacā. Chííⁿ ní diíⁿ nī chi sáⁿꞌā staꞌa sa nꞌdaataá yeⁿꞌe tááma saⁿꞌā.