5 Ndúútí chi ꞌaama ꞌiiⁿꞌyāⁿ diíⁿ yā ꞌaama cosa chi vɛ́ɛ dɛꞌɛ̄ cáávā chi cuꞌneeⁿ ndaachi yiinú náⁿꞌā ndísꞌtiī ꞌúú ntúūⁿ cuꞌneeⁿ ndaachi yiinú ꞌúú ndúúcū nducyáácá ndísꞌtiī denduꞌū ꞌtɛ́ɛ́ nūuⁿ. ꞌÚú nguɛ́ɛ́ neⁿꞌé caaⁿꞌmáⁿ yeⁿꞌe ꞌiiⁿꞌyāⁿ miiⁿ chi vɛ́ɛ́ cá nuuⁿndi yeⁿꞌé yā yeⁿꞌē chi dinuuⁿndí yā. 6 Deenú ntúūⁿ chi nꞌdeēe cá ndísꞌtiī ꞌāā nꞌdiichí nī nuuⁿndi yeⁿꞌé yā ní nadacádiinúúⁿ chi ꞌāā vɛ́ɛ́ castigo yeⁿꞌē ꞌiiⁿꞌyāⁿ miiⁿ, ní nguɛ́ɛ́ diíⁿ nī más ca ndúúcū ꞌiiⁿꞌyāⁿ miiⁿ. 7 Maaⁿ ní canéé chi ncaꞌá nī ꞌviichꞌɛɛtínūuⁿ ꞌiiⁿꞌyāⁿ ꞌcúū ní nadachꞌɛɛcú yā yeⁿꞌe ꞌiiⁿꞌyāⁿ ꞌcúū ní nguɛ́ɛ́ neené taaⁿ cuꞌneeⁿ ndaachi yiinú yā. 8 Caavā chuū chi ngaⁿꞌá chí ndisꞌtiī ꞌcuuⁿꞌmiⁿ nī chi dinéⁿꞌe ca nī ꞌiiⁿꞌyāⁿ ꞌcúū. 9 Níícu taachi idinguúⁿ chuū yeⁿꞌe ndísꞌtiī yeⁿꞌe ꞌiiⁿꞌyāⁿ ꞌcúū neⁿꞌé cadiinúúⁿ ní nꞌdiichí nduuti chi ndísꞌtiī ní diíⁿ nī ndúúcu yā tanꞌdúúcā chi ꞌāā ngaⁿꞌá ngīi ndísꞌtiī na carta yeⁿꞌé. 10 ꞌÚú dendúꞌū caⁿꞌá inadichꞌɛɛcú nuuⁿndi yeⁿꞌe ꞌāā dɛꞌɛ́ nūuⁿ ꞌiiⁿꞌyāⁿ chi ndísꞌtiī nadichꞌɛɛcú yā nuuⁿndi yeⁿꞌé yā. Ní taachi ꞌúú nadichꞌɛɛcú yeⁿꞌé yā, ní ꞌtúúca diíⁿ cucáávā ndísꞌtiī ní nanááⁿ Cristo. 11 Nduuti chí diiⁿ yú ꞌtúúcā tuuꞌmi ní yááⁿnꞌguiinūuⁿ nguɛ́ɛ́ cuuvi cuchɛ́ɛ sa yeⁿꞌē yú ti deenu yú dɛꞌɛ̄ chi nginncheꞌei sá.

12 Taachi cueⁿꞌé cuaaⁿ cyuuni ní ndaá na yáāⁿ Troas chi caaⁿꞌmáⁿ nduudu yeⁿꞌe evangelio yeⁿꞌe Cristo, tuuꞌmi ní Ndyuūs nnꞌguaáⁿ yā yáāⁿ miiⁿ tanꞌdúúcā chi nnꞌguaaⁿ ꞌiiⁿꞌyāⁿ ꞌáámá cheendi vaꞌāī. ꞌTíícā diíⁿ Ndyuūs cucaavā ꞌúú chi caaⁿꞌmáⁿ nduudu yeⁿꞌē evangelio. 13 Ní neené nadacadiinúúⁿ na staava yeⁿꞌé ti nguɛ́ɛ́ nndaācá saⁿꞌā Tito, hermano yeⁿꞌē yú. Cáávā chuū diíⁿ despedir ꞌiiⁿꞌyāⁿ yeⁿꞌe yáāⁿ miiⁿ ní chiīcá ni cueⁿꞌé na yáⁿꞌāa Macedonia.

14 ꞌÚú ní caꞌá gracia Ndyuūs caati Ndyuūs caⁿꞌá yā nduucú ꞌnū ꞌāā tií nūuⁿ lugar naachi caⁿꞌá ꞌnū caati núsꞌuu cuuvi chɛɛ́ ꞌnū yeⁿꞌe nducuéⁿꞌē cucáávā sꞌuuúⁿ ní yeⁿꞌe Cristo sꞌuuúⁿ. Níícú Ndyuūs diíⁿ yā cáávā núsꞌuu chi deenu ꞌnū yeⁿꞌē Cristo chi cuuvi caaⁿꞌmáⁿ ꞌnū yeⁿꞌe Cristo nanááⁿ nducyaaca ꞌiiⁿꞌyāⁿ yeⁿꞌe núúⁿmáⁿ iⁿꞌyeeⁿdī. Ní ꞌiiⁿꞌyāⁿ cuuvi deenú yā yeⁿꞌē Cristo dendúꞌū. Ní chuū ní tanꞌdúúcā ꞌáámá cosa chi nꞌdɛ̄ɛ̄vɛɛ ngééⁿ chi vɛ́ɛ́ nducuéⁿꞌē yáāⁿ naachi cueⁿꞌé ꞌnū. 15 Sꞌuuúⁿ tanꞌdúúcā ꞌáámá cosa chi nꞌdɛ̄ɛ̄vɛɛ ngééⁿ chi incienso nanááⁿ Dendyuūs. ꞌTíícā sꞌuuúⁿ chi iꞌteenu yú Cristo. ꞌTiicá ntúūⁿ sꞌuuúⁿ nanááⁿ ꞌiiⁿꞌyāⁿ chi caⁿꞌá yā cuꞌtéénu yā Jesucristo ní caⁿꞌá yā na vaꞌai chɛɛti nguuvi. Ní nanááⁿ ꞌiiⁿꞌyāⁿ chi nguɛ́ɛ́ iꞌtéénu yā ní caⁿꞌá yā ná vaadī nꞌgii cueⁿꞌe daāⁿmaⁿ, 16 sꞌuuúⁿ tanꞌdúúcā ꞌáámá cosa chi ngééⁿ chi nꞌdíí chí ꞌāā ntɛɛ nꞌdáaca, ꞌtíícā sꞌuuúⁿ nanááⁿ ꞌiiⁿꞌyāⁿ chi nguɛ́ɛ́ iꞌtéénu yā Jesucristo. Ní chuū chꞌiⁿꞌi chi caⁿꞌá yā ꞌcuūvi yā cueⁿꞌe daāⁿmaⁿ. Ní sꞌuuúⁿ ní tanꞌdúúcā ꞌáámá cosa chi nꞌdɛ̄ɛ̄vɛɛ ngééⁿ ti vɛ́ɛ́ vida yeⁿꞌē. ꞌTíícā sꞌuuúⁿ nanááⁿ ꞌiiⁿꞌyāⁿ chi caⁿꞌá yā cuꞌtéénu yā Jesucristo ni caⁿꞌá yā na vaꞌai chɛɛti nguuvi. ¿Dúꞌū cuuvi diiⁿ yeⁿꞌe chuū ꞌtuucā? 17 Núsꞌuu ní nguɛ́ɛ́ caaⁿꞌmáⁿ ꞌnū nduudu cuaacu yeⁿꞌé Ndyuūs chi ꞌiiⁿꞌyāⁿ nadííꞌvɛ yā núsꞌuu, tanꞌdúúcā chi diiⁿ nꞌdeēe nꞌdáí ꞌiiⁿꞌyāⁿ. Naati Ndyuūs dichóꞌo yā núsꞌuu ní núsꞌuu ní caaⁿꞌmáⁿ ꞌnū nduudu miiⁿ ndúúcū núúⁿmáⁿ staava yeⁿꞌé ꞌnū. Ní Ndyuūs inaáⁿ yā núsꞌuu ti diíⁿ ꞌnū tanꞌdúúcā chi Cristo neⁿꞌé yā chi diíⁿ ꞌnū, ti yeⁿꞌé Cristo núsꞌuu.