Yeⁿꞌē Nduudu Ngai yeⁿꞌé Ndyuūs
3
Taachi dinguúⁿ ꞌnū chuu, ¿ꞌáá nadacadiinúúⁿ nī chi núsꞌuu caaⁿꞌmaⁿ cá ꞌnū chi nꞌdaacā idiíⁿ ꞌnū? O ¿ꞌáá canee chi ndɛɛ́ ꞌnū taama carta chi ndɛ́ɛ̄ recomendación, nanááⁿ ndísꞌtiī, o ꞌáámá carta chi dinguúⁿ nī chi ngíícá nī recomendación yeⁿꞌé nī tanꞌdúúcā chi ndɛɛ̄ tanáⁿꞌā ꞌiiⁿꞌyāⁿ? Nguɛɛ ꞌtíícā. 2 Ndísꞌtiī ní tanꞌdúúcā carta yeⁿꞌé ꞌnū ꞌtíícā ndísꞌtiī ti yeⁿꞌé Cristo ndísꞌtiī. Ní ndísꞌtiī tanꞌdúúcā chi carta yeⁿꞌé ꞌnū chi canéé nguūⁿ na staava yeⁿꞌé ꞌnū ꞌtíícā ndísꞌtiī. Ní ꞌíícú nducyáácá ꞌiiⁿꞌyāⁿ cuuvi ꞌcueeⁿ yā níícú cadíínuuⁿ yā chi ndísꞌtiī iꞌtéénu nī Jesucristo. 3 Ní nducyáácá ꞌiiⁿꞌyāⁿ deenú yā chi ndísꞌtiī ní tanꞌdúúcā ꞌáámá carta chi dingúūⁿ Cristo ní tee yā núsꞌuu ꞌtiicā ndísꞌtiī cáávā ntiiⁿnyuⁿ yeⁿꞌe Cristo chi diíⁿ ꞌnū nanááⁿ ndísꞌtiī. Carta miiⁿ nguɛ́ɛ́ cánéé nguūⁿ ndúúcū tinta ndíí nguɛ́ɛ́ ndúú tanꞌdúúcā chi Ndyuūs diiⁿ nguúⁿ yā ley na tabla yeⁿꞌe tuūu ti Espíritu Nꞌdai yeⁿꞌé Ndyuūs chi canduuchi dinguūⁿ carta ꞌcūū staava yeⁿꞌē yú.4 Ní seguro chi Ndyuūs ndɛɛvɛ yā ndísꞌtiī ní vɛ́ɛ́ ꞌviichꞌɛɛtiinūuⁿ yeⁿꞌé ꞌnū caati Jesucristo innee yā ꞌúú. Ní deenú chi dichííꞌvɛ Ndyuūs ndúúcū ntiiⁿnyuⁿ nꞌdaacā chi diíⁿ cucááva Cristo. 5 Nguɛ́ɛ́ nadacadiinúúⁿ ꞌnū chi cuuvi cundɛɛ yú cuidado yeⁿꞌe nducuéⁿꞌē chi diiⁿ yú. Ndyuūs nginnee yā núsꞌuu ní tée yā poder núsꞌuu ní cuuvi diíⁿ ꞌnū nducuéⁿꞌē. 6 Ndyuūs tee yā núsꞌuu ntiiⁿnyuⁿ chi candɛɛ́ ꞌnū táámá compromiso yeⁿꞌé yā chí ngai. Ní compromiso chí ngai miiⁿ nguɛ́ɛ́ yeⁿꞌe ley yeⁿꞌe yú chi canéé nguūⁿ ti yeⁿꞌe Espíritu Nꞌdai yeⁿꞌé Dendyuūs. Nduudu yeⁿꞌe ley yeⁿꞌe yú diiⁿ chi condenado sꞌuuúⁿ ní ꞌcuūvi yú naati Espíritu Nꞌdai miiⁿ itee vida cueⁿꞌe daāⁿmaⁿ sꞌuuúⁿ.
7 Ley yeⁿꞌē yú chi Ndyuūs dinguúⁿ yā na tabla yeⁿꞌe tuūu nanááⁿ Moisés ní dichííꞌvɛ chi deenu yú chi vɛ́ɛ́ nuuⁿndi yeⁿꞌe yú, ní chīndai yú. Ní taachi ndaā ley miiⁿ chi dɛɛvɛ nꞌdai ca yeⁿꞌé Ndyuūs tuuꞌmi ní ngiī na naaⁿ Moisés miiⁿ. Ní ꞌiiⁿꞌyāⁿ yeⁿꞌe Israel nguɛ́ɛ́ cuuvi nꞌdiichí yā naaⁿ Moisés miiⁿ cáávā chi neené dɛɛvɛ ngii naáⁿ yā, naati dɛɛvɛ́ miiⁿ na naáⁿ yā ꞌāā ntuūvī. 8 Taachi ndaā ley miiⁿ ní dɛɛvɛ́ cá ngiī ní chóꞌōo dɛɛvɛ yeⁿꞌē ¿ꞌáá nguɛ́ɛ́ cuuvi chꞌɛɛtɛ nꞌdáí cá ngiī ntiiⁿnyuⁿ yeⁿꞌe Espíritu Nꞌdai yeⁿꞌé Ndyuūs nguɛ́ɛ́ ti ntiiⁿnyuⁿ yeⁿꞌe ley miiⁿ? 9 Ní nduuti chí ntiiⁿnyuⁿ yeⁿꞌe ley miiⁿ chi dɛɛvɛ́ɛ́ nꞌdai ní diiⁿ condenar ꞌiiⁿꞌyāⁿ chí ndai yā, tuuꞌmi ní ¿ꞌáá nguɛ́ɛ́ más cā chꞌɛɛtɛ taavi cá ngiī ntiiⁿnyuⁿ yeⁿꞌé nduudu yeⁿꞌé Ndyuūs ndúúcū Espíritu Nꞌdai ti diíⁿ yā aceptar ꞌiiⁿꞌyāⁿ nguɛ́ɛ́ ti ley miiⁿ? ꞌTíícā váá. 10 Caati ꞌaara chí dɛɛvɛ́ nꞌdai ley miiⁿ nguɛ́ɛ́ dɛɛvɛ́ chiī chi cuuvi tanꞌdúúcā chi dɛɛvɛ́ nꞌdai ca yeⁿꞌé Ndyuūs. Maaⁿ ní ley miiⁿ canee tanꞌdúúcā chi nguɛ́ɛ́ dɛɛvɛ́ɛ́ nꞌdai. 11 Caati chí ley miiⁿ chí dɛɛvɛ́ɛ́ ní cunee ꞌáámá tiempo nūuⁿ tuuꞌmi ní chuunee dɛɛvɛ́ɛ́ taavi cá nduudu yeⁿꞌé Ndyuūs chííⁿ chí ꞌáámá cūnee.
12 Cáávā chuū deenú ꞌnū chi compromiso chi ngai canéé cueⁿꞌe daāⁿmaⁿ ní ꞌtíícā cuuví. Maaⁿ ní caaⁿꞌmáⁿ ꞌnū nduudu ngai yeⁿꞌé Ndyuūs ní nguɛ́ɛ́ ꞌvaꞌa ꞌnū mar ꞌáámá. 13 Nguɛ́ɛ́ diíⁿ ꞌnū tanꞌdúúcā chi diiⁿ Moisés taachi snduú yā ꞌáámá velo naáⁿ yā ti ꞌiiⁿꞌyāⁿ Israel nguɛ́ɛ́ cuuvi snáaⁿ yā naaⁿ Moisés miiⁿ cucáávā dɛɛvɛ yeⁿꞌe Ndyuūs chi canéé na náaⁿ yā. Dɛɛvɛ́ miiⁿ nguɛ́ɛ́ chíí ꞌnaaⁿ. 14 Ní ꞌiiⁿꞌyāⁿ Israel sꞌeeⁿ nguɛ́ɛ́ tuumicadiinúúⁿ yā yeⁿꞌe dɛɛvɛ́ɛ́ chi canéé nááⁿ Moisés miiⁿ. Ndii nguuví ꞌcūū taachi ꞌiiⁿꞌyāⁿ Israel sꞌeeⁿ chꞌeeⁿ yā compromiso ndiicúū miiⁿ, nguɛɛ cuuvi deenú yā caati canée yā tanꞌdúúcā chi canéé ꞌaama velo na naáⁿ yā. Velo miiⁿ Cristo diiⁿ chi chóꞌōo yeⁿꞌē. 15 Ndii nguuví ꞌcūū taachí ꞌiiⁿꞌyāⁿ sꞌeeⁿ ꞌcueeⁿ yā ley yeⁿꞌe Moisés, cunee velo miiⁿ ti nanꞌgaadí vaanīcádiinūuⁿ yeⁿꞌe yā. 16 Ní ndii taachi cuꞌtéénu yā Señor Jesucristo Daiyá Dendyuūs tuuꞌmi ní velo miiⁿ ní cuavii. 17 Señor miiⁿ ní Espíritu yeⁿꞌe Cristo. Ní naachi vɛ́ɛ́ Espíritu miiⁿ yeⁿꞌe Señor miiⁿ tuuꞌmi ní ꞌiiⁿꞌyāⁿ canéé libre yā. 18 Maaⁿ ní cáávā chuū nducyaaca yú nguɛ́ɛ́ snee yú tanꞌdúúcā chi vɛ́ɛ́ ꞌáámá velo na naaⁿ yú. Maaⁿ ní ꞌiiⁿꞌyāⁿ nꞌdiichi yā dɛɛvɛ yeⁿꞌe Señor Jesucristo yeⁿꞌe yú na vida yeⁿꞌe yú ti sꞌuuúⁿ tanꞌdúúcā ꞌáámá espejo, ꞌtíícā sꞌuuúⁿ. Ní taachi nꞌdiichi yú Señor Jesucristo yeⁿꞌē yú tuuꞌmi ní n̄ꞌdaaⁿ vida yeⁿꞌe yú chi cuuvi tanꞌdúúcā vida yeⁿꞌé Cristo. Ní cūnee ngiinu yú chí n̄ꞌdaāⁿ vida yeⁿꞌe yú tanꞌdúúcā chi chꞌɛɛtɛ ca dɛɛvɛ vida yeⁿꞌē Señor Jesucristo yeⁿꞌē yú. Chuū chi idiíⁿ Espíritu yeⁿꞌe Cristo cáávā sꞌuuúⁿ.