4
Deenu yú chi Señor Jesucristo tee yā sꞌuuúⁿ cosas chi nꞌdai ca. Cáávā chuū diíⁿ ꞌnū ntiiⁿnyuⁿ yeⁿꞌé yā ní caaⁿꞌmáⁿ ꞌnū nduudu cuaacu yeⁿꞌé yā ní nguɛɛ cuuvi cúunū ꞌnū. 2 Maaⁿ ní nguɛɛ diíⁿ ꞌnū cosas chi nguɛɛ nꞌdaacā chi cuuvi snááⁿ ꞌiiⁿꞌyāⁿ, cosa chi diíⁿ ꞌnū chi ꞌcuináaⁿ ꞌnū nanááⁿ ꞌiiⁿꞌyāⁿ. Ní nguɛ́ɛ́ cachiicá ꞌnu nginncheꞌéí ꞌnū ꞌiiⁿꞌyāⁿ. Ní nguɛ́ɛ́ ndastaⁿꞌá ꞌnū nduudu cuaacu yeⁿꞌé Ndyuūs ndúúcū nduudu yaadi. ꞌTíícā idiíⁿ ꞌnū ní caaⁿꞌmaⁿ ꞌnū dámaāⁿ nduudu cuaacu yeⁿꞌé Dendyuūs ní cuuvi deenú nducyaaca ꞌiiⁿꞌyāⁿ, ní Dendyuūs nꞌdiichí yā núsꞌuu. 3 Nduuti chi ꞌiiⁿꞌyāⁿ nguɛ́ɛ́ ituumicádiinuuⁿ yā nduudu cuaacu chi ngaⁿꞌá ꞌnū tuuꞌmí ní ꞌiiⁿꞌyāⁿ miiⁿ nguɛ́ɛ́ iꞌtéénu yā Señor Jesucristo yeⁿꞌē yú ní cuuvi ndái yā. 4 ꞌIiⁿꞌyāⁿ nguɛ́ɛ́ iꞌtéénu yā Señor Jesucristo caati ndyuūs yeⁿꞌē iⁿꞌyeeⁿdí ꞌcūū chi yááⁿnꞌguiinūuⁿ nꞌgaadi sá ná vaadī cadiinúúⁿ yeⁿꞌe yā, caati yaaⁿnꞌguiinūuⁿ nguɛ́ɛ́ nꞌgúúⁿ sá chi nꞌdiichí yā dɛɛvɛ yeⁿꞌe Dendyuūs. Maaⁿ ní ꞌiicu ꞌiiⁿꞌyāⁿ nguɛ́ɛ́ snaaⁿ yā dɛɛvɛ́ nꞌdai yeⁿꞌe nduudu yeⁿꞌe Cristo chí dɛɛvɛ. Ní sꞌuuúⁿ taachí inaaⁿ yú Cristo miiⁿ inaaⁿ yú Ndyuūs. 5 Ní taachi ngaⁿꞌá ꞌnū nduudu yeⁿꞌe Dendyuūs nguɛ́ɛ́ ngaⁿꞌá ꞌnū nduudu yeⁿꞌe maá ꞌnū ti ngaⁿꞌá ꞌnū chi Jesucristo miiⁿ ní Señor yeⁿꞌē yú. Tiī núsꞌuu ní dichííꞌvɛ ꞌnū ndísꞌtiī cucáávā chi Cristo neⁿꞌé yā nducyaaca ꞌiiⁿꞌyāⁿ. 6 Ní taachi Ndyuūs dinꞌdái yā iⁿꞌyeēⁿdī ngaⁿꞌa yā ꞌtíícā: Yeⁿꞌe naachí maaiⁿ miiⁿ canéé dɛɛvɛ. Maaⁿ Ndyuūs miiⁿ ní diíⁿ yā chi dɛɛvɛ miiⁿ canéé na staava yeⁿꞌé ꞌnū. Ní ndúúcū dɛɛvɛ miiⁿ cuuvi deenú ꞌnū vaadī deenu yeⁿꞌé Ndyuūs chí nꞌdai taavi ca. Ní núsꞌuu nꞌdiichí ꞌnū dɛɛvɛ yeⁿꞌé Ndyuūs taachi nꞌdiichi ꞌnū naaⁿ Jesucristo miiⁿ.Vida yeⁿꞌé ꞌiiⁿꞌyāⁿ chi iꞌtéénu yā Jesucristo
7 Ní nduudu cuaacu yeⁿꞌe Ndyuūs chi iꞌtéénu ꞌnū canéé na staava yeⁿꞌe ꞌnū tanꞌdúúcā tesoro ꞌtíícā. Ní ꞌáárá chi cuerpo yeⁿꞌé ꞌnū tanꞌdúúcā ꞌcuūtí yáⁿꞌāa chi nguɛɛ dɛɛvɛ́ɛ́, núꞌsuu chꞌiⁿꞌí ꞌnū cáávā ntiiⁿnyuⁿ chi diíⁿ ꞌnū chi poder chi cānee nduucú ꞌnū ní chꞌɛɛtɛ ca ní yeⁿꞌé Ndyuūs. Ní nguɛ́ɛ́ yeⁿꞌē núsꞌuu. 8 ꞌÁárá chi nduū cuaaⁿ nꞌgeenú ꞌnū ngii mar ꞌáámá naāⁿ nguɛ́ɛ́ diīⁿ chi dúúꞌva ꞌnū. ꞌÁárá chi nꞌdeee nááⁿ inadacádiinúúⁿ ꞌnū deenú chɛɛ chi diíⁿ ꞌnū. 9 ꞌÁárá chi ꞌiiⁿꞌyāⁿ ní nꞌdaa yā chi neⁿꞌe ꞌcaaⁿꞌnúⁿ yā núsꞌuu Dendyuūs canee yā nduucú ꞌnū. ꞌÁárá chi ꞌiiⁿꞌyāⁿ cunꞌdáa yā núsꞌuu na yáⁿꞌāa nguɛɛ ꞌcuūvi ꞌnū. 10 ꞌĀā tií nūuⁿ cuááⁿ naachi caⁿꞌá ꞌnū cueⁿꞌe daāⁿmaⁿ canee na staava yeⁿꞌé ꞌnū chi cuuvi ꞌcuūví ꞌnū tanꞌdúúcā chi chꞌiī Señor Jesucristo yeⁿꞌe yú. Ní ꞌíícú ꞌiiⁿꞌyāⁿ cuuvi nꞌdiichí yā chi Jesucristo nadanguáⁿꞌai yā núsꞌuu. Ní cuuvi deenú yā chí Jesucristo canduuchí yā. 11 Ní nducuéⁿꞌe tiempo chi snduuchí ꞌnū na iⁿꞌyeeⁿdí ꞌcūū deenú ꞌnū chi cuuvi ꞌcuuví ꞌnū cucáávā chi núsꞌuū diíⁿ ꞌnū ntiīⁿnyuⁿ yeⁿꞌe Cristo. Ní ꞌíícú ꞌiiⁿꞌyāⁿ cuuvi nꞌdiichí yā chi poder yeⁿꞌe Cristo Jesús canéé ndúúcū núsꞌuu. 12 ꞌTíícā ní vaadī nꞌgii diīⁿ ntiiⁿnyuⁿ yeⁿꞌē na vida yeⁿꞌé ꞌnū ꞌtiicá ntuūⁿ vida cueⁿꞌe daāⁿmaⁿ diiⁿ ntiiⁿnyuⁿ yeⁿꞌē na vida yeⁿꞌé ndísꞌtiī.
13 ꞌTíícā canéé nguūⁿ na libro yeⁿꞌé Ndyuūs ndii cuááⁿ vmnaaⁿ: ꞌÚú iꞌteenú, ní cáávā chiiⁿ chi ngaⁿꞌá. Ni ꞌtiicá ntúūⁿ núsꞌuu iꞌtéénu ꞌnū ní cáávā chuū ngaⁿꞌá ꞌnū. Ní daama chiꞌtéénu ꞌnū ndúúcu yā. 14 Caati deenu yú chi ꞌiiⁿꞌyāⁿ chi nadacuéeⁿ yā Señor Jesucristo yeⁿꞌe nguaaⁿ tinaⁿꞌā, ꞌiiⁿꞌyāⁿ miiⁿ nadacuéeⁿ ntúūⁿ yā sꞌuuúⁿ yeⁿꞌe nguaaⁿ tináⁿꞌā. Ní Dendyuūs candɛɛ́ yā núsꞌuu ndúúcū ndísꞌtiī nanááⁿ Jesucristo. 15 Nducuéⁿꞌe chi diíⁿ ꞌnū ní cucáávā chi ndísꞌtiī cuuvi cutaꞌá nī tanducuéⁿꞌē chí nꞌdai. Ní ꞌíícú nꞌdeee ꞌnááⁿ ꞌiiⁿꞌyāⁿ cuuvi cutaꞌá yā cosa chi nꞌdai yeⁿꞌé Dendyuūs. Ní nꞌdeee nꞌdáí ꞌiiⁿꞌyāⁿ cuuvi caaⁿꞌmaⁿnguaꞌá yā, ní caꞌa yā gracia, Dendyuūs, ní cuuvi chꞌɛɛtɛ cá yā Dendyuūs chi dɛɛvɛ taavi ca.
16 Cáávā nducuéⁿꞌē chuū nguɛ́ɛ́ ngii cúunu yú ꞌaara chi cuerpo yeⁿꞌe yú nꞌgii nééⁿ nguuvi nguuvi naati Dendyuūs tée yā fuerzas sꞌuuúⁿ nguuvi nguuvi. 17 Níícú chuū chi nꞌgeenú yú ngii na iⁿꞌyeeⁿdí ꞌcūū nguɛ́ɛ́ chꞌɛɛtɛ ní nuuⁿ nūuⁿ chóꞌōo, ní diiⁿ cáávā sꞌuuúⁿ chi vɛ́ɛ́ yeⁿꞌe yú ꞌaama lugar chí nꞌdɛɛvɛ nꞌdai ca ní nꞌdeēe ca chi ꞌáámá cunee cueⁿꞌe daāⁿmaⁿ. 18 Maaⁿ ní nguɛɛ diiⁿ yú cuenta yeⁿꞌe denduꞌū chi inaaⁿ yú ti chííⁿ chí inaaⁿ yú ní ngoꞌo yéⁿꞌē. Naati chííⁿ chi nguɛ́ɛ́ inaaⁿ yú cunee cueⁿꞌe daāⁿmaⁿ.