5
Maaⁿ ní deenu yú chi cuerpo yeⁿꞌe yú ꞌcuiinu ti tanꞌdúúcā ꞌáámá vaꞌai chi nguɛ́ɛ́ ꞌáámá cūnee ꞌtíícā cuerpo yeⁿꞌe yú naati Ndyuūs idinꞌdái yā ꞌaama vaꞌāī yeⁿꞌe yú ná vaꞌai chɛɛti nguuvi chí ꞌáámá cūnee. Ní nguɛ́ɛ́ saⁿꞌā yeⁿꞌe iⁿꞌyeeⁿdí ꞌcūū dinꞌdái sa ndúúcū taꞌa sa vaꞌai miiⁿ. 2 Maaⁿ ní chí nꞌdai yiinu yú ti nééné neⁿꞌé yú n̄ꞌdaaⁿ yú cuerpo yeⁿꞌe yú ní snee yú na vaꞌai chɛɛtī nguūvī ndúúcū cuerpo ngai ní dɛɛvɛ chi yeⁿꞌe vaꞌai chɛɛti nguuvi. 3 Nguuvi miiⁿ ní Ndyuūs caꞌá yā chi tée yā ꞌaama cuerpo ngai yeⁿꞌe yú chi tanꞌdúúcā chi ꞌaama vestido. Ní Ndyuūs nguɛ́ɛ́ cuuvi ndaacá yā sꞌuuúⁿ chi nguɛ́ɛ́ chí dɛɛvɛ cuerpo yeⁿꞌe yú. 4 Neⁿꞌe chi snée yú na iⁿꞌyeeⁿdí ꞌcūū na vaꞌai yeⁿꞌe yú chi cuerpo yeⁿꞌe yú, nandáí yiinu yú ti nꞌgeenu yú ngii. Nguɛ́ɛ́ cucaavā chi neⁿꞌe yú chi cuerpo ndiicúū yeⁿꞌe yú ꞌcuūvī naati neⁿꞌe yú chi Ndyuūs tée yā chiꞌcaadí na cuerpo yeⁿꞌe yú chí ngai chi tanꞌdúúcā chi catecai ngai yú. Ní ꞌiicú cuerpo ndiicúū yeⁿꞌe yú yeⁿꞌē iⁿꞌyeeⁿdí ꞌcūū ní ꞌcuiinu ti snée yú ndúúcū cuerpo chí ngai ní vɛ́ɛ́ vida cueⁿꞌe daāⁿmaⁿ yeⁿꞌe yú. 5 Ní cáávā chuū ní Ndyuūs chꞌiindiyaáⁿ yā yeⁿꞌe yú cuerpo chí ngai ní tee yā Espíritu Nꞌdai yeⁿꞌe yā sꞌuuúⁿ chi cuuvi deenu yú chi cuaacu chi tee yā chuū chi cuuvi yeⁿꞌe yú.6 ꞌTííca rā va, cueⁿꞌe daāⁿmaⁿ vɛ́ɛ́ confianza yeⁿꞌe yú ndúúcū Dendyuūs. Deenu yú chi neⁿꞌe chi snée yú na iⁿꞌyeeⁿdí ꞌcūū ndúúcū cuerpo ndiicúū yeⁿꞌe yú nguɛ́ɛ́ cuuví cunee yú ndúúcū Señor yeⁿꞌe yú na vaꞌai chɛɛti nguuvi. 7 Maaⁿ ní chiiⁿ chi diiⁿ yú, diiⁿ yú ti iꞌteenu yú Jesucristo ní nguɛ́ɛ́ idiiⁿ yú cucáávā chi nꞌdiichi yú cosa chi yeⁿꞌē iⁿꞌyeeⁿdí ꞌcūū. 8 ꞌÍícú vɛɛ confianza yeⁿꞌē yú. Neⁿꞌe yú caⁿꞌa yú yeⁿꞌē vaacu yú chi cuerpo ndiicúū yeⁿꞌe yú ní cunee yú ndúúcū cuerpo ngai yeⁿꞌe yú na vaꞌai chɛɛti nguuvi ndúúcū Señor yeⁿꞌē yú. 9 Cáávā chuū neⁿꞌe yú diiⁿ yú cueⁿꞌe daāⁿmaⁿ chiiⁿ chi Ndyuūs neⁿꞌé yā chi diiⁿ yú nduuti chi snée yú na vaꞌāī yeⁿꞌe yú na iⁿꞌyeeⁿdí ꞌcūū o nduuti chi snée yú na vaꞌāī yeⁿꞌe yú na vaꞌāī chɛɛtí nguuvi ndúúcū Señor Jesucristo. 10 Ti ꞌtíícā nducyaaca yú canee chi naⁿꞌa yú nanááⁿ juez chi Cristo ní ꞌíícu caꞌaama caꞌaama sꞌuuúⁿ cuuvi cutaꞌā yú chuu chi cuuvi yeⁿꞌē yú tanꞌdúúcā chi diiⁿ yú ntiiⁿnyuⁿ yeⁿꞌé yā neⁿꞌe chi snee yú na cuerpo ndiicúū yeⁿꞌe yú na iⁿꞌyeeⁿdí ꞌcūū, nduuti chi ntiiⁿnyuⁿ chi nꞌdaacā o nguɛɛ nꞌdaacā.
Nduudu cuaacu yeⁿꞌe vaadī ꞌdiīiⁿ
11 Núsꞌuu ní deenú ꞌnū chi Señor Jesucristo caⁿꞌá yā nꞌdiichí yā nducyaaca ꞌiiⁿꞌyāⁿ. Ní neⁿꞌé ꞌnū diíⁿ ꞌnū nꞌdaacā. Ní cáávā chuū ní núsꞌuu diitu diíⁿ ꞌnū nducuéⁿꞌē chi chꞌiⁿꞌí ꞌnū ꞌiiⁿꞌyāⁿ chi ngaⁿꞌá ꞌnū nduudu cuaacu yeⁿꞌe Señor Jesucristo. Ndyuūs déénu yā chiiⁿ chi diíⁿ ꞌnū ní cunee ngiinú ꞌnū chi ndísꞌtiī cuuvi déénu nī chuū denduꞌū. 12 Nguɛ́ɛ́ ngaⁿꞌá ꞌnu taama vmnéⁿꞌēe yeⁿꞌe vida yeⁿꞌé ꞌnū nanááⁿ ndísꞌtiī naati caꞌá ꞌnū ꞌáámá lugar ndísꞌtiī ti cuuvi caaⁿꞌmáⁿ nī chi nꞌdaacā idiíⁿ ꞌnū. Ngaⁿꞌá ꞌnū nduudu cuaacu nanááⁿ ndísꞌtiī. Maaⁿ ní ꞌiicu ndísꞌtiī cuuvi nanꞌguɛɛcútáⁿꞌa nī yeⁿꞌe ꞌiiⁿꞌyāⁿ chi itiinguuneéⁿ nī, ꞌiiⁿꞌyāⁿ chi ngaⁿꞌa yā yeⁿꞌe maáⁿ yā chi nꞌdaacā yā tanꞌdúúcā chi tanáⁿꞌā ꞌiiⁿꞌyāⁿ snaaⁿ yā, ní ꞌiiⁿꞌyāⁿ miiⁿ nguɛ́ɛ́ nacádiinúúⁿ yā yeⁿꞌē chííⁿ chi vɛɛ na staava yeⁿꞌé yā. 13 Ní nduuti chi nadacadiinúúⁿ nī chi núsꞌuu tanꞌdúúcā loco núsꞌuu, ꞌtíícā ngaⁿꞌá ꞌnū ní diíⁿ ꞌnū chi Ndyuūs ní chꞌɛɛtɛ́ yā nanááⁿ ndísꞌtiī. Ní nduuti chí nguɛ́ɛ́ loco ꞌnū ní cáávā chi diíⁿ ꞌnū ntiiⁿnyuⁿ yeⁿꞌe Ndyuūs cucáávā ndísꞌtiī. 14 Jesucristo ngaⁿꞌa ntiiⁿnyuⁿ yeⁿꞌé ꞌnū ti neⁿꞌé yā núsꞌuu. Deenu yú chi cuaacu chi ꞌáámá saⁿꞌa chi Cristo chꞌiī sa, ní cucáávā saⁿꞌā miiⁿ ní tanꞌdúúcā chi nducyaaca ꞌiiⁿꞌyāⁿ ní chꞌiī. 15 ꞌTíícā Cristo chꞌīi yā cucáávā nducyaaca ꞌiiⁿꞌyāⁿ maaⁿ ní ꞌiiⁿꞌyāⁿ chi snéé yā na iⁿꞌyeeⁿdí ꞌcūū. ꞌIiⁿꞌyāⁿ sꞌeeⁿ ꞌāā ntɛ́ɛ́ snée yā cucáávā vida yeⁿꞌe maáⁿ yā caati snée yā yeⁿꞌe Jesucristo chi chꞌīi yā ní nduuchi ntuuⁿ yā yeⁿꞌe nguaaⁿ tináⁿꞌā cucáávā ꞌiiⁿꞌyāⁿ. 16 Maaⁿ ní cáávā chuū chi chóꞌōo núsꞌuu nguɛ́ɛ́ inaáⁿ ꞌnū ꞌtɛ́ɛ́ yeⁿꞌē ꞌiiⁿꞌyāⁿ tanꞌdúúcā tanáⁿꞌā ꞌiiⁿꞌyāⁿ yeⁿꞌē iⁿꞌyeeⁿdí ꞌcūū. Tiempo chi ꞌāā chóꞌōo núsꞌuu inaáⁿ ꞌnū Cristo ndúúcū yeⁿꞌē chi diíⁿ yā taachi canee yā na iⁿꞌyeeⁿdí ꞌcūū naati maaⁿ ní nguɛɛ inaáⁿ ꞌnū ꞌtíícā. Inaáⁿ ꞌnū chi Cristo ní Ndyuūs. 17 ꞌTíícā ní ꞌiiⁿꞌyāⁿ chi iꞌtéénu yā Cristo ní yeⁿꞌé Cristo. Ní ꞌiiⁿꞌyāⁿ miiⁿ ꞌáámá ꞌiiⁿꞌyāⁿ ngai. Cosas chi diíⁿ yā vmnaaⁿ nguɛ́ɛ́ diíⁿ yā maaⁿ ti nducuéⁿꞌē chí diíⁿ yā ní yeⁿꞌe vida ngai yeⁿꞌe yā.
18 Ní tanducueⁿꞌē chúū ní Ndyuūs diíⁿ yā. Cucáávā Cristo miiⁿ ní Ndyuūs diíⁿ yā chi sꞌuuúⁿ ní yeⁿꞌé yā sꞌuuúⁿ ní nguɛ́ɛ́ contra yeⁿꞌe yā sꞌuuúⁿ. Ní Ndyuūs ngaⁿꞌa ntiiⁿnyúⁿ yā yeⁿꞌé ꞌnū chi caaⁿꞌmáⁿ ꞌnū nduudu yeⁿꞌé yā chi ꞌiiⁿꞌyāⁿ na iⁿꞌyeeⁿdí ꞌcūū cuuví yeⁿꞌé yā ꞌiiⁿꞌyāⁿ. 19 ꞌTíícā canee chi caaⁿꞌmáⁿ ꞌnū nduudu cuaacu yeⁿꞌe Cristo chi ꞌiiⁿꞌyāⁿ sꞌeeⁿ cuuvi yeⁿꞌé yā ꞌiiⁿꞌyāⁿ. Ní cucáávā Cristo miiⁿ Ndyuūs diíⁿ yā chi vɛ́ɛ́ vaadī ꞌdiīíⁿ nguaaⁿ ꞌiiⁿꞌyāⁿ nduucú yā. Ní nguɛ́ɛ́ diiⁿ Ndyuūs cuenta yeⁿꞌe nuuⁿndi yeⁿꞌe ꞌiiⁿꞌyāⁿ sꞌeeⁿ. Níícu Ndyuūs tee yā núsꞌuu ntiiⁿnyuⁿ chi caaⁿꞌmáⁿ ꞌnū nduudú ꞌcūū yeⁿꞌé yā chi vaadī ꞌdiīiⁿ. 20 Maaⁿ ní ꞌtíícā ndaá ꞌnū nanááⁿ ndísꞌtiī ndúúcū nduudu yeⁿꞌe Cristo ní caaⁿꞌmáⁿ ꞌnū nduudu miiⁿ na lado yeⁿꞌe Ndyuūs. Ní tanꞌdúúcā chi Cristo ngaⁿꞌá yā chi ndaacadaamí nī, cáávā chuū núsꞌuu ngiicá ꞌnū ndísꞌtiī cááva Cristo chi ndaacadaamí nī yeⁿꞌe nuuⁿndi yeⁿꞌé nī ní ꞌíícú vɛ́ɛ́ vaadī ꞌdiīiⁿ yeⁿꞌe ndísꞌtiī ndúúcū Ndyuūs. 21 Cristo nguɛ́ɛ́ dinuuⁿndí yā mar ꞌáámá. Caati cucáávā sꞌuūuⁿ Ndyuūs diiⁿ cuenta yā ní diíⁿ yā tanꞌdúúcā chi Cristo dinuuⁿndí yā. Ní ꞌíícú taachi yeⁿꞌe Cristo sꞌuuúⁿ Ndyuūs nꞌdiichí yā sꞌuuúⁿ chi nduuví nꞌdai vida yeⁿꞌē yú nanáaⁿ yā.