3 Maaⁿ ní nguɛ́ɛ́ diíⁿ ꞌnū mar ꞌáámá cosa chi diꞌvaachí ꞌiiⁿꞌyāⁿ ti ꞌiiⁿꞌyāⁿ cuuvi caaⁿꞌmáⁿ yā chi ntiiⁿnyuⁿ yeⁿꞌe Ndyuūs chi diíⁿ ꞌnū nguɛ́ɛ́ nꞌdaacā. 4 Naati diíⁿ ꞌnū nducuéⁿꞌē ntiiⁿnyuⁿ miiⁿ chi nꞌdaacā ti neⁿꞌé ꞌnū chꞌiⁿꞌí ꞌnū nducyáácá ꞌiiⁿꞌyāⁿ chi ntiiⁿnyuⁿ chi diíⁿ ꞌnū ní yeⁿꞌe Ndyuūs. Ní cucáávā ntiiⁿnyuⁿ miiⁿ chi chɛɛ́ ꞌnū yeⁿꞌe nducuéⁿꞌē chi chꞌeenú ꞌnū chiī nguuvi nguuvi. Ní nééné nꞌdeēe denduꞌū chííⁿ chí diꞌvaachi núsꞌuu ndúucū chi vɛɛ necesidades yeⁿꞌé ꞌnū ndúúcū vaadī ꞌcaaꞌva. 5 Ní chꞌeⁿꞌé yā núsꞌuu chí cuꞌnéeⁿ yā núsꞌuu na vacūū. Ní neené ꞌyaaⁿ ꞌiiⁿꞌyāⁿ nduuvidaamá yā yeⁿꞌe chi neⁿꞌe ꞌcueⁿꞌe yā núsꞌuu. Ní diíⁿ ꞌnū nꞌdeee nꞌdáí ntiiⁿnyuⁿ chi nééné díítūu. Ní choꞌōo ꞌnááⁿ nguuvi chi nguɛ́ɛ́ cheetiyaadú ꞌnū, ní nguɛ́ɛ́ cheꞌe ꞌnū va. 6 Níícú nducuéⁿꞌē denduꞌū chuū ní chꞌiⁿꞌí ꞌnū ꞌiiⁿꞌyāⁿ chi vida yeⁿꞌé ꞌnū ní nꞌdaacā. Ní chꞌiⁿꞌí ꞌnū chi deenú ꞌnū nduudu cuaacu yeⁿꞌé Ndyuūs. Ní diíⁿ ꞌnū ntiiⁿnyuⁿ miiⁿ ndúúcū vaadī ngiīnū ní ndúúcū vaadī nꞌdai. Ní diíⁿ ꞌnū nducuéⁿꞌē cucáávā Espíritu Nꞌdai yeⁿꞌé Ndyuūs canee nduucú ꞌnū. Diíⁿ ꞌnū túúcā ti cuaacu nííⁿnyúⁿ dineⁿꞌé ꞌnu nducyaaca ꞌiiⁿꞌyāⁿ. 7 Ní ngaⁿꞌá ꞌnū nduudu cuaacu cucáávā poder yeⁿꞌe Ndyuūs chi canee nduucú ꞌnū ní caavā chi nꞌdaacā caneé ꞌnū nanááⁿ Ndyuūs. ꞌTíícā diíⁿ ꞌnū. Ní diíⁿ ꞌnū defender núsꞌuu ndúúcū vaadī cuaacu. Ndúúcū vaadī cuaacu miiⁿ ní tanꞌdúúcā chi ndɛ́ɛ́ ꞌnū ꞌáámá machete chí ꞌuūvi lados ꞌcaāiⁿ ní diíⁿ ꞌnū defender núsꞌuu nduūcū. ꞌTíícā diíⁿ ꞌnū. 8 Ní náⁿꞌā ꞌiiⁿꞌyāⁿ ngaⁿꞌá yā chí nꞌdáí ꞌnū ní tanáⁿꞌa yā ngaⁿꞌá yā chi nguɛ́ɛ́ nꞌdáí ꞌnū. Ní náⁿꞌā ꞌiiⁿꞌyāⁿ ngaⁿꞌá nꞌdaaca yeⁿꞌé ꞌnū ní tanáⁿꞌa yā nguɛ́ɛ́ ngaⁿꞌa nꞌdaaca yeⁿꞌé ꞌnū. ꞌÁámá tiempo ní diíⁿ yā tratar nduucú ꞌnū tanꞌdúúcā chi ngaⁿꞌá ꞌnū nduudu yaadi ní taama tiempo tanꞌdúúcā chi ngaⁿꞌá ꞌnū chi cuaacu. 9 Ní ꞌáámá tiempo ꞌiiⁿꞌyāⁿ diíⁿ yā tanꞌdúúcā chi nguɛ́ɛ́ nꞌdiichí yā núsꞌuu ꞌtíícā diíⁿ yā, ní táámá tiempo diíⁿ yā tanꞌdúúcā chi núsꞌuu amigos yeⁿꞌé yā, ꞌtíícā diíⁿ yā. Ní nꞌdeee nꞌdáí tiempo cuuví ꞌcuūvi ꞌnū ní nguɛ́ɛ́ ꞌcuūvi ꞌnū. Ní tee yā núsꞌuu ꞌáámá castigo chi neené díítūu nꞌdeee nꞌdáí tiempo naati nguɛɛ ꞌcaaⁿꞌnúⁿ yā núsꞌuu. 10 ꞌÁárá chí diꞌvaachí yā núsꞌuu, núsꞌuu ní yeenú ꞌnū. ꞌÁárá chi pobre núsꞌuu, diíⁿ ꞌnū ntiiⁿnyuⁿ ni nꞌdeee nꞌdáí ꞌiiⁿꞌyāⁿ vɛ́ɛ́ vaadī ꞌcuiica yeⁿꞌé yā. ꞌÁárá chi nguɛ́ɛ́ dɛꞌɛ̄ vɛɛ vɛ́ɛ́ yeⁿꞌé ꞌnū nducuéⁿꞌē chi vɛ́ɛ́ ní yeⁿꞌé ꞌnū.

11 Ndísꞌtiī hermanos yeⁿꞌe yú yeⁿꞌe yáāⁿ Corinto, dinguúⁿ ꞌnū nduudu yeⁿꞌé ꞌnū yeⁿꞌe nducuéⁿꞌē chi vɛ́ɛ́ tanꞌdúúcā chi vɛ́ɛ́ ca. Ní nduudu miiⁿ cachiica yeⁿꞌē staava yeⁿꞌé ꞌnū ti neⁿꞌé ꞌnū ndísꞌtiī. 12 Núsꞌuu chꞌiⁿꞌí ꞌnū nducuéⁿꞌē chi canee na staava yeⁿꞌé ꞌnū naati ndísꞌtiī nguɛ́ɛ́ diíⁿ nī ꞌtúúcā nduucú ꞌnū ti nguɛ́ɛ́ chꞌiⁿꞌí nī núsꞌuu chi neⁿꞌé nī núsꞌuu ndúúcū núúⁿmáⁿ staava yeⁿꞌé nī. 13 Núsꞌuu ngiica ꞌnū ndísꞌtiī tanꞌdúúcā ꞌáámá chiida ngiica yā daiya yā ꞌtíícā ngiica ꞌnū ndísꞌtiī ti cuuví dinéⁿꞌe nī núsꞌuu ndúúcū núúⁿmáⁿ staava yeⁿꞌé nī. Ní ndísꞌtiī cuuví caaⁿꞌmáⁿ nī nduudu cuaacu yeⁿꞌē nducuéⁿꞌē tanꞌdúúcā chi núsꞌuu diíⁿ ꞌnū ndúúcu nī.

14 Ndísꞌtiī, nguɛ́ɛ́ caⁿꞌá nī ndúúcū ꞌiiⁿꞌyāⁿ chi nguɛ́ɛ́ iꞌtéénu yā Jesucristo ti nguɛ́ɛ́ cuuvi diiⁿ nī dáámá ntiiⁿnyúⁿ ndúúcu yā. Ní diíⁿ nī tanꞌdúúcā ꞌáámá yunta chi nguɛɛ daamá tī, ꞌtíícā diíⁿ nī. ¿ꞌÁá cuuví cuuvi dáámá chi nꞌdaācā ndúúcū chi nguɛɛ nꞌdaācā? O ¿ꞌáá daama canee chi dɛɛvɛ ndúúcū chi maāiⁿ? Nguɛ́ɛ́ cuuvi. 15 ¿ꞌÁá cuuvi nduuvidaamá Cristo ndúúcū Satanás? O ¿ꞌáá daama vɛɛ parte yeⁿꞌe ꞌiiⁿꞌyāⁿ chi iꞌtéénu yā Cristo ndúúcū ꞌiiⁿꞌyāⁿ chi nguɛ́ɛ́ iꞌtéénu yā Cristo? Nguɛ́ɛ́ cuuvi. 16 ¿ꞌÁá nduuvidaama templo yeⁿꞌe Ndyuūs ndúúcū ídolos? Nguɛ́ɛ́ cuuvi. Cuerpo yeⁿꞌe ndísꞌtiī ní yaacū yeⁿꞌé Ndyuūs. Ndyuūs maáⁿ yā ngaⁿꞌa yā na libro yeⁿꞌé yā ꞌtíícā: