2 Maaⁿ ní ngiica ꞌnū ndísꞌtiī chi ꞌcuáaⁿ nī nduudu yeⁿꞌé ꞌnū na staava yeⁿꞌé nī. Núsꞌuū nguɛɛ diiⁿ daño ꞌnū yeⁿꞌē mar ꞌáámá nī, ndíí nguɛ́ɛ́ diíⁿ ꞌnū chi diiⁿ nuuⁿndí nī ndíí nguɛ́ɛ́ nginncheꞌéí ꞌnū mar ꞌáámá ꞌiiⁿꞌyāⁿ. 3 ꞌÚú nguɛɛ ngaⁿꞌá chuū ti diíⁿ condenar ndísꞌtiī chi nguɛ́ɛ́ nꞌdaacá nī. Naati tanꞌdúúcā chi ngaⁿꞌá vmnááⁿ vmnaaⁿ, neⁿꞌé taavi ndísꞌtiī. Ní canee yú tanꞌdúúcā chi daama snée yú. ꞌTiicá ntúūⁿ ní canduuchi yú daama vida yeⁿꞌē yú na iⁿꞌyeeⁿdí ꞌcūū ní dáámá ꞌcuūvi yú. 4 Vɛɛ ꞌviichꞌɛ́ɛ́tiinúúⁿ nꞌdai yeⁿꞌé ndúúcu nī ní yeenú yeⁿꞌe nī. Ní maaⁿ ní ndúúcū nducuéⁿꞌē chi chꞌeenú chii nguɛ́ɛ́ diꞌvaachi ꞌúú ti nééné vɛ́ɛ́ vaadī yeenú yeⁿꞌé.

5 Ní ndíí tiempo taachi ndaá ꞌnū na yáⁿꞌāa Macedonia nguɛ́ɛ́ ntaavīꞌtuūnuúⁿ cuerpo yeⁿꞌé ꞌnū naati nꞌgeenú ꞌnū ngíí nducuéⁿꞌē cuaaⁿ. Ní nguⁿꞌu ꞌiiⁿꞌyāⁿ nduucú ꞌnū ní diꞌvaꞌá ꞌnū na staava yeⁿꞌé ꞌnū. 6 Naati Ndyuūs chi caꞌa yā ꞌviichꞌɛɛtíínūuⁿ ꞌiiⁿꞌyāⁿ chi chicuūnú, maaⁿ Ndyuūs ní tee yā ꞌviichꞌɛɛtíínūuⁿ núsꞌuu taachi ndaā saⁿꞌā Tito hermano yeⁿꞌé ꞌnū. 7 Nguɛ́ɛ́ dámaāⁿ caavā chi ndaā saⁿꞌā Tito miiⁿ ti cáávā chi chiiⁿ sá chi ndísꞌtiī caꞌa nī ꞌviichꞌɛɛtíínūuⁿ saⁿꞌā miiⁿ. Ní saⁿꞌā miiⁿ yaaꞌvi sá núsꞌuu chi ndísꞌtiī neené neⁿꞌé nī nꞌdiichi nī núsꞌuu, ní neene dindaachí nī yeⁿꞌé ꞌnū ndii ná stááva yeⁿꞌé nī. Ní neené neⁿꞌé nī diíⁿ nī nducuéⁿꞌē chi ꞌúú neⁿꞌé chi diíⁿ nī. Ní cucáávā chííⁿ ní yeenú taaví ca.

8 Vmnááⁿ vmnaaⁿ diíⁿ sentir yeⁿꞌe carta chi dinguúⁿ yeⁿꞌé nī. ꞌAara chi sꞌneeⁿ ndaachi yiinu nī cáávā carta miiⁿ. Maaⁿ ní nguɛ́ɛ́ diíⁿ sentir yeⁿꞌe chi dinguúⁿ yeⁿꞌé nī. Vmnaaⁿ vmnaaⁿ nduuti chi sꞌneeⁿ ndaachī núúⁿ nī, deenú chi carta miiⁿ diīⁿ chí chꞌɛɛtinéé ndaachí nī ꞌáámá tiempo nūuⁿ. 9 Maaⁿ ní vɛ́ɛ́ vaadī yeenú yeⁿꞌé. Nguɛ́ɛ́ cucáávā chi sꞌneeⁿ ndaachi núúⁿ nī naati sꞌneeⁿ yaꞌai ꞌiinú nī taanduvɛ́ɛ́ ní ndaacadaamí nī yeⁿꞌe nuuⁿndi chi diíⁿ nī. Ní ndísꞌtiī sꞌneeⁿ ndaachí nī tanꞌdúúcā chi Ndyuūs neⁿꞌe yā chi diíⁿ nī ní ꞌíícú núsꞌuu nguɛ́ɛ́ diíⁿ ꞌnū mar ꞌáámá chi cuuvi ndái nī cucáávā núsꞌuu. 10 Caati chííⁿ chi diíⁿ Ndyuūs chi inee yaꞌai ꞌiinu yú ní diiiⁿ chi ndaacadaami yú yeⁿꞌe nuuⁿndi yeⁿꞌe yú ní nnguaⁿꞌai yú. Ní ꞌíícú cáávā chuū nguɛ́ɛ́ diiⁿ yú chi cunéé yaꞌāī ꞌíínu yú yeⁿꞌe chi nadacadaami yú yeⁿꞌē nuuⁿndi yeⁿꞌe yú. ꞌIiⁿꞌyāⁿ chi nguɛ́ɛ́ iꞌtéénu yā Ndyuūs ní ndaachi canee yā na iⁿꞌyeeⁿdí ꞌcūū ní ꞌcuūvi yā cueⁿꞌe daāⁿmaⁿ. 11 Naati ndísꞌtii cuchɛɛ nī chi inéé ndaachí nī. Nꞌdiichí nī maaⁿ ntiiⁿnyuⁿ yeⁿꞌe vaadī ndaachi táácā idiiiⁿ na vida yeⁿꞌé nī. ¿ꞌÁá diiiⁿ chi nadacadiinúúⁿ nī nꞌdaacā yeⁿꞌe nuuⁿndi chi diíⁿ nī ní caaⁿꞌmáⁿ nī chi nguɛɛ nꞌdaacā idiíⁿ nī? ¿ꞌÁá diiiⁿ chi ndísꞌtiī nguɛ́ɛ́ canee yiinú nī yeⁿꞌe chííⁿ chi diíⁿ nī? ¿ꞌÁá ꞌvaꞌá nī cúcááva nuuⁿndi chi diíⁿ nī? Cuayiivi ní neⁿꞌé nī nꞌdiichí nī ꞌúú ní neⁿꞌé nī chi caꞌa castigo yeⁿꞌe ꞌiiⁿꞌyāⁿ chi dinuuⁿndí yā. Ní yeⁿꞌē nducueⁿꞌé chuū chꞌiⁿꞌí nī ndúúcū chiiⁿ chi diíⁿ nī chi ndísꞌtiī diíⁿ nī chííⁿ chí nꞌdaacā. 12 ꞌTíícā taachi dinguúⁿ carta miiⁿ yeⁿꞌe ndísꞌtiī, nguɛ́ɛ́ dinguúⁿ cáávā ꞌiiⁿꞌyāⁿ chi dinuuⁿndi o cáávā ꞌiiⁿꞌyāⁿ chi chꞌeenú yā chii caavā nuuⁿndi miiⁿ. Dinguúⁿ yeⁿꞌe nī ti ndísꞌtiī cuuvi deenú nī chi núsꞌuu ní nꞌgiⁿꞌí ꞌnū chi vɛ́ɛ́ cuidado yeⁿꞌé ꞌnū ndúúcū ndísꞌtiī nanááⁿ Dendyuūs. 13 Ní cáávā chuū staꞌá ꞌnū ꞌviichꞌɛɛtíínūuⁿ yeⁿꞌé ndísꞌtiī. Nguɛ́ɛ́ dámaāⁿ chi staꞌá ꞌnū ꞌviichꞌɛɛtíínūuⁿ yeⁿꞌé ndísꞌtiī naati saⁿꞌā Tito miiⁿ diiⁿ sá chi yeenú taaví ꞌnū taachi yaaꞌvi sá núsꞌuū yeⁿꞌé nī tanꞌdúúcā ndísꞌtiī diíⁿ nī ndúúcu sa. Ní yeenú taavi sā. 14 ꞌÚú ngaⁿꞌá ngīi saⁿꞌā Tito miiⁿ chi ndísꞌtiī ní nꞌdaacá nī ní ꞌcaandiveéⁿ nī nduudu yeⁿꞌe carta miiⁿ. Ní nguɛɛ ꞌcuinaáⁿ cucáávā chi ngaⁿꞌá ꞌtuucā yeⁿꞌé nī ti ꞌtíícā diíⁿ nī. Nducuéⁿꞌē chi ngaⁿꞌá ꞌnū ndúúcū ndísꞌtiī ní nduudu cuaacu. ꞌTiicá ntuūⁿ nduudu chi ngaⁿꞌá ꞌnū ngií ꞌnū Tito miiⁿ yeⁿꞌé ndísꞌtiī ní chiiⁿ chi nꞌgiindiveéⁿ nī nduudu yeⁿꞌe carta miiⁿ ní ꞌtíícā diíⁿ nī. 15 ꞌTiicá ntúūⁿ Tito miiⁿ dineⁿꞌe cá sa ndísꞌtiī taachi nanꞌgaācu sa yeⁿꞌē ndísꞌtiī tanꞌdúúcā ndísꞌtiī chꞌiindiveéⁿ nī nduudu yeⁿꞌē sa ní diíⁿ nī ꞌtuucā. Ní ndísꞌtiī ní ꞌcuúⁿ nī saⁿꞌā miiⁿ ní dinꞌdaaca nī caatí ꞌvaꞌa nī. 16 Cáávā chuū vɛ́ɛ́ ꞌviichꞌɛɛtínuúⁿ yeⁿꞌé ndúúcū ndísꞌtiī yeⁿꞌe tanducuéⁿꞌē denduꞌū chi diíⁿ nī.