ꞌIiⁿꞌyāⁿ caꞌá yā nꞌdeee nꞌdaí ofrenda
8
Ndísꞌtiī, hermanos yeⁿꞌé, maaⁿ ní caaⁿꞌmáⁿ ꞌnū ndísꞌtiī ti deenú nī yeⁿꞌe vaadī nꞌdai chꞌɛɛtɛ yeⁿꞌé Dendyuūs ní táácā chi diíⁿ ꞌnū ntiīⁿnyuⁿ yeⁿꞌē na nducuéⁿꞌē yaacū yeⁿꞌé Ndyuūs chi snee na nducuéⁿꞌē yáⁿꞌāa yeⁿꞌe Macedonia. 2 ꞌAara chi ꞌiiⁿꞌyāⁿ sꞌeeⁿ yeⁿꞌe yáacū sꞌeeⁿ diītū nꞌdáí nꞌgeenú yā ngiī cucáávā chi chóꞌōo yeⁿꞌe yā yeenú taavi cá yā. Ní ꞌáárá chi pobre yā caꞌá yā nꞌdeee nꞌdáí ofrenda tanꞌdúúcā chi ꞌáámá ꞌiiⁿꞌyāⁿ chi ꞌcuiica, ꞌtííca diíⁿ yā caava hermanos chi snée yā na yáⁿꞌāa Judea. 3 ꞌÚú ngaⁿꞌá nduudu cuaacu yeⁿꞌé yā. Ndúúcū núúⁿmáⁿ staava yeⁿꞌé yā caꞌá yā ofrenda, ní caꞌá yā nducuéⁿꞌē chi cuuví yeⁿꞌe yā. Ní ndii caꞌá yā más cā chi cuuví yeⁿꞌe yā. 4 Caⁿꞌa diitú yā ndúúcu ꞌnū chi ꞌcuaaⁿ ꞌnū ofrenda chi ꞌáámá ayuda yeⁿꞌe chi cuuvi yeⁿꞌe hermanos yeⁿꞌē yú chi nguɛ́ɛ́ vɛ́ɛ́ yeⁿꞌe yā ní caꞌá ꞌnū hermanos sꞌuuúⁿ. 5 Ní diíⁿ yā más cā chi cunee ngiinú ꞌnū chi diíⁿ yā. Vmnááⁿ vmnaaⁿ caꞌá yā vida yeⁿꞌe maáⁿ yā na taꞌa Señor Jesucristo yeⁿꞌē yú. Ní cuayiivi, tanꞌdúúcā chi Ndyuūs neⁿꞌé yā chi diíⁿ yā, ꞌiiⁿꞌyāⁿ sꞌeeⁿ tée yā vida yeⁿꞌé yā núsꞌuu chi diíⁿ yā ntiiⁿnyuⁿ cáávā núsꞌuu. 6 Nducuéⁿꞌe chuū vmnááⁿ vmnaaⁿ cuuví ꞌnū Tito ní dichoꞌó ꞌnū saⁿꞌā chi caaⁿꞌmaⁿ yā yeⁿꞌe ofrendá yeⁿꞌé ndísꞌtiī. ꞌTiicá ntúūⁿ maaⁿ ní dichoꞌó ꞌnū Tito chi ꞌcuiīnu ntiiⁿnyuⁿ miiⁿ ní cutáꞌa sa ofrenda yeⁿꞌé nī chi ntiiⁿnyuⁿ chi nꞌdai taavi chi yeⁿꞌé Ndyuūs. 7 Ní ndísꞌtiī ní tanꞌdúúcā chi ꞌcuiicá nī ꞌtiicá nī ti iꞌtéénu cá nī Ndyuūs. Ní ngaⁿꞌa cá nī nduudu cuaacu, ní déénu cá nī. Ní nééné neⁿꞌé nī cunneé nī núsꞌuu, ní neⁿꞌé nī núsꞌuu. Maaⁿ ní neⁿꞌé ꞌnū chi ndísꞌtiī ní caꞌa cá nī ofrenda yeⁿꞌé nī ní dinꞌdai ca ntiiⁿnyúⁿ ꞌcūū chi cunneé nī hermanos yeⁿꞌe yú.8 ꞌÚú nguɛ́ɛ́ caꞌá orden yeⁿꞌé chuū. Dámaāⁿ neⁿꞌé chi deenú nī tanꞌdúúcā chi diiⁿ tanáⁿꞌā hermanos yeⁿꞌe yáⁿꞌāa yeⁿꞌe Macedonia ní ꞌíícú cuuvi deenú chi cuaacu chi ndísꞌtiī dinéⁿꞌe nī Ndyuūs caavā ofrenda chi caꞌá nī. 9 Ní ndísꞌtiī ní ꞌāā deenú nī chɛ́ɛ́ chí vaadi nꞌdai taavi ca yeⁿꞌé Señor Jesucristo yeⁿꞌē yú. Cristo miiⁿ ꞌāā ꞌcuiicá yā naati diíⁿ yā chi pobre yā cucáávā chi néⁿꞌe yā sꞌuuúⁿ. Ní ꞌíícú ndísꞌtiī cuuvi cutaꞌá nī vaadī ꞌcuiica yeⁿꞌé yā cáávā Cristo chi diíⁿ yā chi pobre yā.
10 Ní yeⁿꞌē ofrenda ꞌcūū ꞌúú yaaꞌvi neéⁿ ndísꞌtiī chuū. Nꞌdaacā ca chi ꞌcuiinú nī chɛɛ chi diíⁿ nī nduuyu chi ꞌāā chóꞌōo. Ndísꞌtiī ní vmnááⁿ vmnaaⁿ ꞌiiⁿꞌyāⁿ chi diíⁿ yā ꞌtuucā ní ꞌtíícā ní neⁿꞌé chi diꞌcuiinú nī yeⁿꞌe ofrenda miiⁿ nguuvi chi cuchiī. 11 Maaⁿ ní diíⁿ nī ꞌtiicā ní diꞌcuiinú nī ntiiⁿnyuⁿ yeⁿꞌe nī chi ꞌāā neⁿꞌé nī tanꞌdúúcā chi cuchií nī diiⁿ nī ndii cuááⁿ vmnaaⁿ. Ní caꞌá nī ofrenda chɛɛ chi cuuvi diíⁿ nī. 12 Ní nduuti chi ꞌáámá ndísꞌtiī cuaacu nííⁿnyúⁿ neⁿꞌé nī caꞌa nī ofrenda, tuuꞌmi ní Ndyuūs diíⁿ yā aceptar ofrenda yeⁿꞌé nī ní diiⁿ cuenta yā yeⁿꞌē chi vɛ́ɛ́ yeⁿꞌé nī nguɛ́ɛ́ yeⁿꞌe chi nguɛ́ɛ́ vɛ́ɛ́ yeⁿꞌé nī.
13 ꞌÚú nguɛ́ɛ́ neⁿꞌé chi ndísꞌtiī caꞌá nī más cā ofrenda chi cuuví nī ni ꞌāā ntɛ́ɛ́ vɛ́ɛ́ necesidades yeⁿꞌé nī cucáávā chi inneé nī náⁿꞌā hermanos. 14 Maaⁿ ní vɛ́ɛ́ ca yeⁿꞌé nī ní cuuvi diíⁿ nī completar ofrenda yeⁿꞌé nī ní caꞌá nī ꞌiiⁿꞌyāⁿ chi nguɛ́ɛ́ vɛ́ɛ́ yeⁿꞌé yā. Ní cunnee nī ꞌiiⁿꞌyāⁿ. Ní cuuvi caꞌá nī daamá nduucú yā. Cuayiivi ní taachi nguɛ́ɛ́ vɛ́ɛ́ yeⁿꞌé nī ní ꞌiiⁿꞌyāⁿ sꞌeeⁿ vɛɛ ca yeⁿꞌé yā, ꞌiiⁿꞌyāⁿ sꞌeeⁿ cuuvi tée yā ofrenda yeⁿꞌé nī ní teé yā ofrenda ndísꞌtiī. Ní nginnee yā ndísꞌtiī. ꞌTíícā caꞌá nī daama ndúúcu yā. 15 ꞌTíícā canee nguūⁿ na libro yeⁿꞌe Ndyuūs ndii cuááⁿ vmnaaⁿ: ꞌIiⁿꞌyāⁿ chi vɛ́ɛ́ cá yeⁿꞌé yā nguɛ́ɛ́ nacaāva yeⁿꞌé yā. ꞌIiⁿꞌyāⁿ chi duūꞌvī vɛɛ yeⁿꞌé yā nguɛ́ɛ́ chii faltar yeⁿꞌé yā.
Yeⁿꞌé saⁿꞌā Tito ndúúcū compañeros yeⁿꞌé yā
16 Maaⁿ ní ꞌúú caꞌá gracias Ndyuūs ti Ndyuūs chiꞌneéⁿ yā na staava yeⁿꞌe Tito chí neⁿꞌe yā cunnee cá yā ndísꞌtiī tanꞌdúúcā chi núsꞌuū diíⁿ ꞌnū. 17 Ní neⁿꞌé yā diíⁿ yā tanꞌdúúcā chi ngaⁿꞌá ꞌnū nduucú yā yeⁿꞌē ndísꞌtiī. Ní nééné neⁿꞌé yā nginnee yā ndísꞌtiī caati neⁿꞌé yā nꞌdiichí yā ndísꞌtiī.
18 Ní dichoꞌó ꞌnū ndúúcū Tito miiⁿ táámá hermano yeⁿꞌe yú ní nducyáácá ꞌiiⁿꞌyāⁿ yeⁿꞌe nducyáácá yaācū ngaⁿꞌá yā chi hermano miiⁿ ní neené nꞌdai diiⁿ sa ntiiⁿnyuⁿ. Ní ngaⁿꞌa sa nduudu cuaacu yeⁿꞌe evangelio chi nduudú ngai yeⁿꞌe Jesucristo. 19 Nguɛ́ɛ́ damáāⁿ chuū idiiⁿ saⁿꞌā miiⁿ ti nducyáácá ꞌiiⁿꞌyāⁿ yeⁿꞌe nducyáácá yáacū sꞌeeⁿ naachi caⁿꞌá ꞌiiⁿꞌyāⁿ chi iꞌteenú yā Señor Jesucristo yeⁿꞌē yú nndɛ́ɛ́vɛ́ yā saⁿꞌā miiⁿ chi caⁿꞌa sa ndúúcū núsꞌuu caati cuuvi cunnee sa núsꞌuu ndúúcū ofrenda chi cuuvi cunnee hermanos. Ní ꞌíícú hermanos cuuví yā dichꞌɛɛtɛ cá yā Señor yeⁿꞌē yú. Ní cuuvi ꞌcuuⁿꞌmíⁿ ꞌnū hermanos chi ndísꞌtiī neⁿꞌé nī cunneé nī hermanos. 20 ꞌTíícā ní ꞌiiⁿꞌyāⁿ nguɛ́ɛ́ cuuví caaⁿꞌmaⁿ neeⁿ yā núsꞌuū yeⁿꞌe chi diíⁿ ꞌnū ndúúcū ofrenda miiⁿ chi cutaꞌá ꞌnū yeⁿꞌe hermanos. 21 Ní ꞌtíícā neⁿꞌé ꞌnū diíⁿ ꞌnū nducuéⁿꞌe nꞌdaacā nanááⁿ Ndyuūs ní ꞌtíícā ntúūⁿ nanááⁿ nducyáácá ꞌiiⁿꞌyāⁿ.
22 Maaⁿ ní dichoꞌó ꞌnu taama hermano yeⁿꞌe yú ndúúcū Tito miiⁿ. Ní ꞌāā diíⁿ ꞌnū probar hermano miiⁿ nꞌdeee nꞌdáí naaⁿ ni chꞌiⁿꞌí saⁿꞌā miiⁿ nꞌdeee nꞌdáí naaⁿ chi neⁿꞌe sa nginnee sa núsꞌuu. Maaⁿ ní saⁿꞌa miiⁿ neené neⁿꞌe sa nginnee sa ndísꞌtiī ti vɛɛ ꞌviichꞌɛɛtiinūuⁿ ca yeⁿꞌé ꞌnū ndúúcū ndísꞌtiī. 23 Ní ndúúti chi ꞌáámá ꞌiiⁿꞌyāⁿ ítiinguuneéⁿ yā yeⁿꞌe saⁿꞌā Tito miiⁿ tuuꞌmi ní ndísꞌtiī caaⁿꞌmáⁿ nī chi saⁿꞌā miiⁿ compañero yeⁿꞌé. Ní diiⁿ sa ntiiⁿnyuⁿ dáámá nduucú ní diiⁿ sa ntiiⁿnyuⁿ chí dichííꞌvɛ̄ ndísꞌtiī. O nduuti chi itiinguuneéⁿ yā yeⁿꞌe tanáⁿꞌā hermanos chi dichoꞌó tuuꞌmi ní ndísꞌtiī caaⁿꞌmaⁿ nī chi ꞌiiⁿꞌyāⁿ yeⁿꞌē nducyaaca yaācū sꞌeeⁿ dichóꞌo yā hermanos sꞌeeⁿ. Ní hermanos ní dichꞌɛɛtɛ́ cá yā Cristo yeⁿꞌē yú. 24 Caꞌá nī ofrenda yeⁿꞌé nī ní ꞌtíícā cuuvi deenú ꞌiiⁿꞌyāⁿ yeⁿꞌe yaacu sꞌeeⁿ chi dineⁿꞌé nī hermanos chi dichoꞌó. Ndísꞌtiī ní ꞌcuuⁿꞌmiⁿ nī nducyáácá ꞌiiⁿꞌyāⁿ cáávā ofrenda yeⁿꞌé nī chi cuaacu niiⁿnyúⁿ neⁿꞌé nī hermanos. Ní núsꞌuu deenú ꞌnū chi caⁿꞌá nī diíⁿ nī ꞌtíícā. Ní yeenú ꞌnū cucáávā ndísꞌtiī. Ní ꞌiiⁿꞌyāⁿ cuuvi deenú yā chiiⁿ chi ngaⁿꞌá yeⁿꞌe nī ní cuaacu.