Ofrenda cáávā hermanos yeⁿꞌe yú
9
Ndísꞌtiī hermanos yeⁿꞌé nguɛ́ɛ́ canee chi dinguúⁿ yeⁿꞌē ndísꞌtiī yeⁿꞌe ofrenda chi ngaꞌa nī hermanos chi iꞌtéenu yā Jesucristo yeⁿꞌē yú. 2 ꞌÚú tuumicadiinúúⁿ chi ndísꞌtiī neⁿꞌé nī cunneé nī hermanos. Ní yeenú cucáávā ndísꞌtiī taachi ꞌúú yaaꞌví ꞌiiⁿꞌyāⁿ yeⁿꞌe yáⁿꞌāa yeⁿꞌē Macedonia yeⁿꞌē ndísꞌtiī chi snée nī na yáⁿꞌāa Acaya táácā idiíⁿ nī. Ní ꞌúú yaaꞌví ꞌiiⁿꞌyāⁿ sꞌeeⁿ chi ndísꞌtiī canee yaaⁿ nī ndii nduuyu chi chóꞌōo chi nginneé nī hermanos yeⁿꞌē yú. Ní maaⁿ ní nꞌdeee ꞌnááⁿ hermanos yeⁿꞌe yáⁿꞌāa Macedonia neⁿꞌé yā nginneé yā hermanos cáávā chi ndísꞌtiī caⁿꞌá nī chi caꞌa nī ofrenda yeⁿꞌé nī. 3 Ni cáávā chuū dichoꞌó Tito ndúúcū ꞌuuvi hermanos. Ní nguɛ́ɛ́ cúúví chóꞌōo ꞌáámá cosa chi nguɛ́ɛ́ cuaacu yeⁿꞌé nī yeⁿꞌē chi ꞌúú yaaꞌví ꞌiiⁿꞌyāⁿ sꞌeeⁿ yeⁿꞌe tanꞌdúúcā chi ndísꞌtiī nꞌdaacā diíⁿ nī yeⁿꞌē ofrenda ꞌcūū. Ní ndísꞌtiī ꞌcuɛɛti yaáⁿ nī ofrenda yeⁿꞌe nī chi cunneé nī hermanos. 4 Nguɛ́ɛ́ deenú nduuti chi naⁿꞌa ꞌiiⁿꞌyāⁿ yeⁿꞌe yáⁿꞌāa Macedonia caⁿꞌá yā nduucú. Ní taachi ndaá ꞌnū nanááⁿ ndísꞌtiī nguɛ́ɛ́ vɛ́ɛ́ yaáⁿ nī ndúúcū ofrenda yeⁿꞌé nī. Ní núsꞌuu cuuvi ꞌcuinaáⁿ ꞌnū ti yaaꞌví ꞌnū hermanos yeⁿꞌē yáⁿꞌāa Macedonia ti vɛ́ɛ́ ꞌviichꞌɛɛtíínuuⁿ chꞌɛɛtɛ yeⁿꞌé ꞌnū nduucú nī. Ní ndísꞌtiī cuuvi ꞌcuinaáⁿ nī dendúꞌū. 5 Ní caavā chííⁿ ꞌúú nadīcadiinúúⁿ chi chiicá hermanos chi chīi yā vmnááⁿ vmnaaⁿ nanááⁿ ndísꞌtiī ní cunée yā nduucú nī. Ní ꞌíícú ndísꞌtiī caꞌa nī ofrenda yeⁿꞌe nī hermanos chi dichoꞌó. Níícú cuuvi cunneé nī hermanos yeⁿꞌe yáⁿꞌāa Judea ndúúcū ofrenda yeⁿꞌe nī, ofrenda miiⁿ chi ngaⁿꞌa nī chi caꞌa nī. ꞌTíícā níícú ꞌcuɛɛti yaáⁿ nī ndúúcū ofrenda yeⁿꞌe nī ní chꞌiⁿꞌí nī ꞌiiⁿꞌyāⁿ sꞌeeⁿ chi cuaacu chi neⁿꞌé nī caꞌá nī ofrenda yeⁿꞌe nī. Ní nguɛ́ɛ́ a fuerza canéé chi caꞌá nī ofrenda.6 Maaⁿ ní ndísꞌtiī ní nꞌgaacú nī yeⁿꞌē chuū chí caaⁿꞌmáⁿ. ꞌIiⁿꞌyāⁿ chi duuꞌvī cá ngīīnu yā cutaꞌá yā duūꞌvī ca cosecha yeⁿꞌé yā ní ꞌiiⁿꞌyāⁿ chi nꞌdeeé ca ngīīnu yā cutaꞌá yā nꞌdeeé cá cosecha yeⁿꞌé yā. 7 Caꞌáámá cáꞌáámá nī caꞌá nī ofrenda yeⁿꞌé nī tanꞌduucā chi nacádiinuuⁿ nī chi diíⁿ nī na staava yeⁿꞌe nī. Nguɛ́ɛ́ caꞌá nī nduuti chi nguɛ́ɛ́ neⁿꞌe nī, ní nguɛ́ɛ́ a fuerza caꞌa nī. Ndyuūs neⁿꞌé yā ꞌiiⁿꞌyāⁿ chi caꞌa yā ofrenda yeⁿꞌé yā tí yeenú yā chi caꞌá yā. 8 Ní Ndyuūs ní cuuví tée yā ndísꞌtiī nꞌdeeé cá yeⁿꞌe nducuéⁿꞌē chi nꞌdai taavi ca. Ní ꞌtíícā ndísꞌtiī ní cuuví ꞌcuūndī necesidades yeⁿꞌé nī. Ní cuuvi cunneé nī hermanos ndúúcū nducuéⁿꞌē necesidades yeⁿꞌé yā. 9 Ní canéé nguūⁿ na libro yeⁿꞌé Ndyuūs ndii cuááⁿ vmnaaⁿ ꞌtííca:
Nduuti chí ꞌiiⁿꞌyāⁿ caꞌá yā nꞌdeee cá yeⁿꞌe ꞌiiⁿꞌyāⁿ chi pobre yā; tuuꞌmi ní vɛɛ ca yeⁿꞌe maáⁿ yā chi cuuvi caꞌá yā ꞌiiⁿꞌyāⁿ ní ꞌáámá cāneé yā ꞌtíícā.
10 Ni Ndyuūs chí ngaꞌá yā ndaata chi ꞌiiⁿꞌyāⁿ cuūnu yā ndaata miiⁿ, ngaꞌa ntuúⁿ yā pan chi cheꞌé yā. Maaⁿ ní Ndyuūs miiⁿ tée yā ndaata ndísꞌtiī nducuéⁿꞌē chi cuūnu nī. Ní diíⁿ yā chi vɛ́ɛ́ ca cosecha yeⁿꞌe ntiiⁿnyuⁿ chi nꞌdaacā chi diíⁿ nī. 11 ꞌTiicá ntúūⁿ ndísꞌtiī cuuvi cutaꞌá nī yeⁿꞌe nducuéⁿꞌē vaadī ꞌcuiica ní ꞌíícú cuuvi caꞌa cá nī ofrenda yeⁿꞌe nī. Ní cucáávā núsꞌuu, caꞌa yā ofrenda yeⁿꞌé nī hermanos, tuuꞌmi ní hermanos ngaⁿꞌá yā: Ndyuūs nadííꞌvɛ nꞌdiī cáávā ofrenda miiⁿ. 12 Ní ndúúcū ofrenda yeⁿꞌe nī chi caꞌa nī nguɛ́ɛ́ damāāⁿ caꞌá nī ti vɛ́ɛ́ yeⁿꞌē hermanos naati diíⁿ nī chi hermanos caꞌa yā nꞌdeeé cá gracias Ndyuūs. 13 Ní ꞌíícú hermanos dichꞌɛɛtɛ́ yā Ndyuūs nduuti chi ndísꞌtiī chꞌiⁿꞌí nī hermanos chi iꞌtéénu nī nduudu cuaacu yeⁿꞌe Cristo. ꞌTiicá ntúūⁿ hermanos dichꞌɛɛtɛ́ yā Ndyuūs ti ndísꞌtiī caꞌa cá nī ofrenda yeⁿꞌé nī cáávā hermanos miiⁿ ní caavā tanáⁿꞌā hermanos. 14 ꞌTiicá ntúūⁿ hermanos ngaⁿꞌanguaꞌá yā caavā ndísꞌtiī. Ní dineⁿꞌe cá yā ndísꞌtiī. ꞌTíícā diíⁿ yā ti Ndyuūs sꞌneéⁿ yā na staava yeⁿꞌé nī chi ndísꞌtiī diíⁿ nī cosa chi nꞌdaacā. 15 Maaⁿ ní caꞌa yú gracias Ndyuūs ti tee yā sꞌuuúⁿ nducuéⁿꞌē chi vaadī nꞌdai ca yeⁿꞌe yā chi chꞌɛɛtɛ taavi cá chi nguɛ́ɛ́ cuuvi caaⁿꞌmaⁿ yú yeⁿꞌē nducuéⁿꞌē.