Pablo caaⁿꞌmáⁿ yā chi cuaacu chi apóstol yā yeⁿꞌe Señor Jesucristo
10
ꞌÚú Pablo diꞌcuiitú ndísꞌtiī chuū. ꞌÚú ní ndiicuúⁿ ní vɛ́ɛ́ cá paciencia yeⁿꞌé ní tanꞌdúúcā Cristo ngaⁿꞌa yā, ꞌtíícā ngaⁿꞌá. ꞌIiⁿꞌyāⁿ ngaⁿꞌa yā yeⁿꞌe ꞌúú chi ꞌúú ꞌaama saⁿꞌā ndiicúúⁿ taachi caneé nduucú ndísꞌtiī ní naati nguɛ́ɛ́ caneé nduucú ndísꞌtiī tuuꞌmi ní chɛɛchí yaaꞌví ndísꞌtiī. 2 ꞌÚú diꞌcuíitú ndísꞌtiī chi diiⁿ nꞌdaacá nī ti taachi ndaá nꞌdiichí ndísꞌtiī nguɛ́ɛ́ canee chi caaⁿꞌmáⁿ nduudu chɛɛchi ndúúcū ndísꞌtiī. Náⁿꞌā ꞌiiⁿꞌyāⁿ ní ngaⁿꞌá yā yeⁿꞌé ꞌnū chi núsꞌuu diíⁿ ꞌnū ntiiⁿnyuⁿ yeⁿꞌe Ndyuūs tanꞌdúúca chi neⁿꞌé ꞌnū diíⁿ ꞌnū. ꞌÚú vɛɛ yaáⁿ chi nandaācá ꞌiiⁿꞌyāⁿ sꞌeeⁿ ní caaⁿꞌmaⁿ taáⁿ nduucú yā. 3 Cuaacu chi neⁿꞌe chi núsꞌuu ní ꞌiiⁿꞌyāⁿ yeⁿꞌe iⁿꞌyeeⁿdí ꞌcūū núsꞌuu diiⁿ ꞌnū ntiiⁿnyuⁿ yeⁿꞌe Ndyuūs. Nguɛ́ɛ́ diíⁿ ꞌnū ntiiⁿnyuⁿ cucáávā chi vɛ́ɛ́ chi cuuvi yeⁿꞌé ꞌnū na iⁿꞌyeeⁿdí ꞌcūū tanꞌdúúcā chi diiⁿ tanáⁿꞌā ꞌiiⁿꞌyāⁿ yeⁿꞌē iⁿꞌyeeⁿdí ꞌcūū chi nguɛ́ɛ́ iꞌtéénu yā Cristo. 4 Caati ntiiⁿnyuⁿ chi diíⁿ ꞌnū nguɛ́ɛ́ diíⁿ ꞌnū ndúúcū vaadī deenu yeⁿꞌe iⁿꞌyeeⁿdí ꞌcūū tí diíⁿ ꞌnū ndúúcū poder yeⁿꞌé Ndyuūs. Ní Ndyuūs nginneé yā sꞌuuúⁿ chi cuuvi dituūví ꞌnū denduꞌū chi yeⁿꞌe enemigo yeⁿꞌé ꞌnū chi yááⁿnꞌguiinūuⁿ miiⁿ. 5 ꞌTíícā chuū cuuvi diíⁿ ꞌnū. Dituuví ꞌnū nducuéⁿꞌē vaanicadíínūuⁿ yeⁿꞌe ꞌiiⁿꞌyāⁿ chi contra yeⁿꞌé Ndyuūs. Ní ꞌíícu ꞌiiⁿꞌyāⁿ cuuví nadacadíínúúⁿ yā yeⁿꞌe Cristo ní cuuví cuꞌtéénu yā yeⁿꞌe yā. 6 Maaⁿ ní taachi ndísꞌtiī nꞌgiindiveéⁿ nī nduudu chí ngaⁿꞌá tuuꞌmi ní núsꞌuu canee yaáⁿ ꞌnū chi diíⁿ ꞌnū castigar nducyáácá nī chi nguɛ́ɛ́ nꞌgiindiveéⁿ nī nduudu chi ngaⁿꞌá.7 Ndísꞌtiī ní nꞌdiichí nī denduꞌu chi vɛ́ɛ́ tanꞌduucā chi cánéé. Ní ndúútí chi ꞌáámá yā yeⁿꞌe ndísꞌtiī deenú yā chi seguro chi yeⁿꞌe Cristo ꞌiiⁿꞌyāⁿ miiⁿ, tuuꞌmí canee cúúⁿmíⁿ yā chi nadacadíínuuⁿ yā chi núsꞌuū ntúūⁿ ní yeⁿꞌe Cristo núsꞌuu. Tanꞌdúúca yā ꞌtiicá ntúūⁿ núsꞌuu. 8 ꞌÁárá chi ꞌúú Pablo ngaⁿꞌá chi ꞌúú chꞌɛɛtɛ́ ꞌúú na ntiiⁿnyuⁿ yeⁿꞌe Señor Jesucristo nguɛ́ɛ́ ꞌcuinaáⁿ cáávā chi caaⁿꞌmáⁿ ꞌtúúcā. Deenú ꞌnū chi Señor yeⁿꞌē yú tée yā núsꞌuu ntiiⁿnyuⁿ chi diíⁿ ꞌnū ndúúcū poder yeⁿꞌé yā ti ndísꞌtiī cuuvi cuꞌtéénu ca nī Ndyuūs, ní nguɛ́ɛ́ cáávā chi diíⁿ chi nguɛ́ɛ́ iꞌtéénu nī Ndyuūs. 9 ꞌÚú nguɛ́ɛ́ neⁿꞌé chi ndísꞌtiī nadacadíínuuⁿ nī chi dinguúⁿ carta yeⁿꞌé nī cucaavā chi candií ndísꞌtiī chí ꞌvaꞌá nī. 10 ꞌIiⁿꞌyāⁿ ngaⁿꞌa yā chi cartas yeⁿꞌé chí nguúⁿ ní neené ditiīnu nduudu yeⁿꞌé ní taachi caneé nanááⁿ ndísꞌtiī ní ꞌúú ní duūvā ꞌúú. Ní nduudu chi ngaⁿꞌá ní nguɛ́ɛ́ dɛꞌɛ̄ vɛ́ɛ́ yeⁿꞌē. 11 Neⁿꞌé chi ꞌiiⁿꞌyāⁿ chi ngaⁿꞌa yā ꞌtúúcā yeⁿꞌé, cadíínuuⁿ yā chuū. ꞌTúúcā tanꞌdúúcā chi dinguuⁿ ꞌnū na cartas ti yaꞌai caneé ꞌnū yeⁿꞌe nī, ꞌtiicá ntúūⁿ taachi ndaá ꞌnū nanááⁿ ndísꞌtiī ngaⁿꞌá ꞌnū ndúúcu yā ní dáámá diíⁿ ꞌnū ndúúcu yā.
12 Nguɛ́ɛ́ caaⁿꞌmáⁿ ꞌnū chi nduuvidaamá ꞌnū ndúúcū tanáⁿꞌa yā chi ngaⁿꞌá yā chi maáⁿ yā ní nꞌgɛɛtɛ́ yā. ꞌIiⁿꞌyāⁿ sꞌeeⁿ ngaⁿꞌá yā tanꞌdúúcā chi tonto yā tí dicaadi maáⁿ yā ndúúcū ꞌáámá yā táámá yā hermanos. 13 Núsꞌuu ní nguɛɛ caaⁿꞌmáⁿ ꞌnū yeⁿꞌe ndúcuéⁿꞌe chi nꞌgɛɛtɛ chi nguɛ́ɛ́ candɛɛ́ ꞌnū cuidado yeⁿꞌē. Ndyuūs chꞌiⁿꞌí yā núsꞌuu naachi cuuvi cuchiicá ꞌnū ní diíⁿ ꞌnū ntiiⁿnyuⁿ yeⁿꞌé yā. Ní chꞌiⁿꞌí yā chi núsꞌuu choꞌó ꞌnū nanááⁿ ndísꞌtiī chi snéé na yáāⁿ Corinto. 14 Cáávā chuū ní deenú ꞌnū chi nguɛ́ɛ́ cueⁿꞌé ꞌnū mar ꞌáámá yáⁿꞌāa nduuti chi Ndyuūs nguɛ́ɛ́ chꞌiⁿꞌí yā núsꞌuu chi caⁿꞌá ꞌnū miiⁿya. Ní cáávā chuū ndaá ꞌnū nanááⁿ ndísꞌtiī ní candɛɛ́ ꞌnū nduudu cuaacu chi nduudu ngai yeⁿꞌē Señor Jesucristo yeⁿꞌē yú. 15 Nguɛ́ɛ́ ngaⁿꞌá ꞌnū chi nꞌgɛɛtɛ ntiiⁿnyuⁿ yeⁿꞌe táámá yā tanꞌdúúcā chi núsꞌuu diíⁿ ꞌnū ntiiⁿnyuⁿ yeⁿꞌé yā. Dámaāⁿ ngaⁿꞌá ꞌnū yeⁿꞌē ntiiⁿnyuⁿ chi diíⁿ ꞌnū. Cunee ngiinú ꞌnū chi ndísꞌtiī cuꞌtéénu cá nī ní núsꞌuu cuuvi diiⁿ ꞌnū ntiiⁿnyuⁿ chi más cā chꞌɛɛtɛ ca nguaaⁿ ndísꞌtiī, naati dámaāⁿ diíⁿ ꞌnū ntiiⁿnyuⁿ naachi Ndyuūs chꞌiⁿꞌí yā núsꞌuu chi diíⁿ ꞌnū. 16 Cuayiivi miiⁿ ní neⁿꞌé ꞌnū caⁿꞌá ꞌnū táámá cuaaⁿ chí táámá lado yeⁿꞌē ndísꞌtiī chi cuuvi caaⁿꞌmáⁿ ꞌnū nduudu cuaacu yeⁿꞌé Ndyuūs. Ní nguɛ́ɛ́ cánéé chí caaⁿꞌmáⁿ yeⁿꞌē ntiiⁿnyuⁿ yeⁿꞌe táámá yā tanꞌdúúcā chi núsꞌuu diíⁿ ꞌnū ntiiⁿnyuⁿ yeⁿꞌé yā.
17 Ní nduuti chí ꞌáámá ꞌiiⁿꞌyāⁿ neⁿꞌé yā caaⁿꞌmáⁿ yā yeⁿꞌe cosa chi chꞌɛɛtɛ ca tuuꞌmi ní canee chi caaⁿꞌmáⁿ yā chi Ndyuūs diíⁿ yā chiiⁿ chi chꞌɛɛtɛ ca. 18 Nduuti chi Ndyuūs deenu yā chi ꞌáámá ꞌiiⁿꞌyāⁿ ní nꞌdaacā idiíⁿ yā tuuꞌmi ní cuaacu. Nduuti chi maáⁿ yā ngaⁿꞌa yā chi nꞌdaacā chi diíⁿ yā tuuꞌmi ní ¿duꞌū deenu chí cuaacu?