Yeⁿꞌe ofrenda caavā hermanos
16
Maaⁿ ní neⁿꞌé caaⁿꞌmáⁿ ndísꞌtiī yeⁿꞌe ofrenda yeⁿꞌé nī chi caꞌá nī ꞌiiⁿꞌyāⁿ chi iꞌtéénu yā Jesucristo cáávā ꞌiiⁿꞌyāⁿ ndaachíī snée yā ní nguɛ́ɛ́ denduꞌū yeⁿꞌē. Diíⁿ nī tanꞌdúúcā chi ꞌúú ngaⁿꞌá ngīi ꞌiiⁿꞌyāⁿ yeⁿꞌe tanáⁿꞌā yáacū sꞌeeⁿ na yáⁿꞌāa Galacia. 2 ꞌTíícā diíⁿ nī. Nguuví vmnááⁿ vmnaaⁿ yeⁿꞌé ndɛɛ̄tɛ̄ chi domingo miiⁿ, caꞌáámá caꞌáámá ndísꞌtiī ní cuꞌnéeⁿ nī ꞌāā viꞌí caā parte yeⁿꞌé nī chi tunééⁿ Ndyuūs chi yeⁿꞌe nducuéⁿꞌē chi Ndyuūs tee yā ndísꞌtiī. Ní ndísꞌtiī caꞌa nī ofrenda yeⁿꞌé nī na taꞌa ꞌiiⁿꞌyāⁿ chí ngaⁿꞌa ntiiⁿnyuⁿ yeⁿꞌe yáacū. Ní taachi ꞌúú ndaá nguɛ́ɛ́ canéé chi caꞌa nī ofrenda yeⁿꞌe nī. 3 Ní taachi ndaá, ꞌúú dichoꞌó ꞌiiⁿꞌyāⁿ chi ndisꞌtiī neꞌéⁿ nī chi candɛ́ɛ yā ofrenda yeⁿꞌé nī ndíí yáāⁿ Jerusalén. ꞌIiⁿꞌyāⁿ miiⁿ candɛɛ́ yā carta yeⁿꞌé ndúúcū ofrenda yeⁿꞌe nī. 4 Nduuti chi ꞌúú caneé chi caⁿꞌá yáāⁿ Jerusalén tuuꞌmi ꞌiiⁿꞌyāⁿ sꞌeeⁿ caⁿꞌá yā nduucú.Pablo caⁿꞌa yā chi caⁿꞌá yā yaāⁿ sꞌeeⁿ
5 Caneé chi choꞌó na yáⁿꞌāa Macedonia. Ní taachi choꞌó na yáⁿꞌāa miiⁿ cuayiivi ní ndaá na yáāⁿ Corinto ní cuneé ndúúcū ndísꞌtiī. 6 Neⁿꞌé chi cūnēe ndúúcū ndisꞌtiī tiempo chi ꞌiichɛɛ. Ní cuayiivi ní ndísꞌtiī cuuvi caⁿꞌá nī nduucú ꞌtɛ́ɛ́ nūuⁿ naachi ꞌúú naⁿꞌá cuaaⁿ cyúúní. 7 Nguɛ́ɛ́ neⁿꞌé nꞌdiichí ndísꞌtiī taachi choꞌó yáāⁿ vaacú nī, naati canéé ngiinú chi ndaá nꞌdiichí ndísꞌtiī ꞌáámá tiempo nduuti chi Ndyuūs tée yā lugar ꞌúú. 8 Naati cuneé na yáāⁿ Efeso ndii tiempo yeⁿꞌe ꞌviicu yeⁿꞌe Pentecostés. 9 Miiⁿ ní vɛ́ɛ́ nꞌdeee ca ntiiⁿnyuⁿ chi diíⁿ. Ní yáāⁿ Efeso miiⁿ tanꞌdúúcā ꞌáámá cheendi vaꞌāī chi chꞌɛɛtɛ nꞌdai ni ndɛɛvɛ́ɛ́ nꞌdai caavā ꞌúú, ti vɛ́ɛ́ cá ntiiⁿnyuⁿ chi diíⁿ. Miiⁿ ntúūⁿ neene vɛɛ ꞌiiⁿꞌyāⁿ chi induuví táaⁿ yā yeⁿꞌé.
10 Ndúúti chi ndaa saⁿꞌā Timoteo nanááⁿ ndísꞌtiī, canéé chi diíⁿ nī recibir saⁿꞌā miiⁿ tanꞌdúúcā ꞌáámá saⁿꞌā chi diiⁿ ntiiⁿnyuⁿ sa yeⁿꞌé Ndyuūs, ti saⁿꞌā miiⁿ ní idiiⁿ sa ntiiⁿnyuⁿ yeⁿꞌé Ndyuūs tanꞌdúúcā ꞌúú. 11 Mar ꞌáámá ndísꞌtiī nguɛ́ɛ́ diíⁿ nī ndúúcū Timoteo tanꞌdúúcā chi saⁿꞌā chi nguɛɛ nꞌdaacā, ní nguɛ́ɛ́ deenu sa. Cuaviivi taachi dichoꞌó nī Timoteo miiⁿ cuaaⁿ cyúúní, dichoꞌó nī saⁿꞌa miiⁿ ndúúcū nꞌdai. Canee ngiinú chi ndaa sa ndúúcū tanáⁿꞌā hermanos nanááⁿ ꞌúú.
12 ꞌÚú neⁿꞌé chi hermano Apolos ndaa sa nanááⁿ ndísꞌtiī taachi ndaa tanáⁿꞌā hermanos. Apolos miiⁿ nguɛ́ɛ́ neⁿꞌe sa ndaa sa maaⁿ, naatí ndaa sa nanááⁿ ndísꞌtiī taachi vɛ́ɛ́ yaaⁿ sa.
Pablo diíⁿ yā saludar hermanos
13 ꞌCuɛɛ́tɛ nꞌdaacá nī ndúúcū cuidado. Ní ꞌcuɛɛtinéé nꞌdaacá nī ndúúcū chi iꞌtéénu nī chi yeⁿꞌe Ndyuūs. Ní tanꞌdúúcā saⁿꞌā nꞌgɛɛtɛ diíⁿ yā ní ꞌtíícā diíⁿ nī. Ní cunéé diitú nī. 14 Tanducuéⁿꞌē chi diíⁿ nī, ní diíⁿ nī ti neⁿꞌe nī Ndyuūs.
15 Ndísꞌtiī ní deenú nī chi ꞌiiⁿꞌyāⁿ yeⁿꞌe vaꞌāī saⁿꞌa Estéfanas sꞌtéénu yā Jesucristo vmnááⁿ vmnaaⁿ taachi snee yā na yáⁿꞌāa Acaya. ꞌÚú yaaꞌví ndísꞌtiī chi ꞌiiⁿꞌyāⁿ sꞌeeⁿ neⁿꞌé yā diíⁿ yā ntiiⁿnyuⁿ chi nginnee nducyaaca ꞌiiⁿꞌyāⁿ chi iꞌtéénu yā Señor Jesucristo yeⁿꞌē yú. 16 ꞌÚú ngiicá ndísꞌtiī hermanos yeⁿꞌé, chi ꞌcaandiveéⁿ nī yeⁿꞌe chi ngaⁿꞌā ꞌiiⁿꞌyāⁿ sꞌeeⁿ yeⁿꞌe vaꞌai Estéfanas ní cunneé nī ꞌáámá ꞌáámá ꞌiiⁿꞌyāⁿ chí idiīiⁿ ntiiⁿnyuⁿ yeⁿꞌé Dendyuūs. 17 Yeenú chi ndaa hermano Estéfanas ndúúcū hermano Fortunato ndúúcū hermano Acaico. Nꞌdaacā chi canée yā ndúúcu nī na lugar yeⁿꞌé. 18 ꞌIiⁿꞌyāⁿ sꞌeeⁿ ní nduūvī nꞌdaí yā na espíritu yeⁿꞌé ní caⁿꞌá yā nduūvī nꞌdaí yā na espíritu yeⁿꞌe nī dendúꞌū. Canéé chi diíⁿ nī aceptar tanáⁿꞌā ꞌiiⁿꞌyāⁿ chi diíⁿ yā tanꞌdúúcā ꞌiiⁿꞌyāⁿ sꞌeeⁿ.
19 ꞌIiⁿꞌyāⁿ yeⁿꞌe yaācū yeⁿꞌe yáⁿꞌāa Asia dichoꞌó yā saludos yeⁿꞌé nī: Nꞌdaí nī, ngaⁿꞌa yā. Saⁿꞌa Aquila ndúúcū nꞌdaataá Priscila ndúúcā ꞌiiⁿꞌyāⁿ yeⁿꞌe yaācū chi snée yā ndavaacú yā dichoꞌó yā saludos yeⁿꞌe nī: Nꞌdaí nī, ngaⁿꞌa yā. 20 Nducyáácá hermanos ní dichoꞌó yā saludos yeⁿꞌe nī: Nꞌdaí nī, ngaⁿꞌa yā. Ndísꞌtiī ní caaⁿꞌmaⁿ nī ꞌtíícā yeⁿꞌe hermanos: Nꞌdaí yā, ngaⁿꞌa nī. Ní caꞌá nī taꞌa nī taachi diíⁿ nī saludar hermanos ti ndísꞌtiī ní neⁿꞌé nī Dendyuūs.
21 ꞌÚú Pablo dinguúⁿ carta miiⁿ ndúúcū taꞌá, ní: Nꞌdaí nī, ngaⁿꞌá.
22 Nduuti chi ꞌáámá saⁿꞌā nguɛ́ɛ́ idinéⁿꞌe yā Señor Jesucristo yeⁿꞌe yú ꞌāā cuuví yā condenado. Niiⁿnuⁿ niiⁿnuⁿ canee tiempo chi Señor Jesucristo yeⁿꞌē yú cuuvi ndaa ntúuⁿ yā.