4 Espíritu Nꞌdai yeⁿꞌé Ndyuūs tee yā ntiiⁿnyuⁿ sꞌuūuⁿ chí ꞌāā viꞌi caā ntiiⁿnyuⁿ yeⁿꞌē ꞌáámá ꞌáámá sꞌuūuⁿ. Ní tee yā poder sꞌuuúⁿ chi cuuvi diiⁿ yú ntiiⁿnyuⁿ miiⁿ chí ꞌāā viꞌi caā. Niicu vɛ́ɛ́ ꞌáámá nꞌdyáⁿꞌā Espíritu Nꞌdai yeⁿꞌé Ndyuūs. 5 Idiiⁿ yú nꞌdeee nááⁿ ntiiⁿnyuⁿ chi ꞌāā viꞌi caā chi yeⁿꞌe ꞌiivú Ndyuūs, naati nducyaaca ntiiⁿnyuⁿ miiⁿ ní yeⁿꞌe ꞌáámá nꞌdyáⁿꞌā ꞌiivú Ndyuūs. 6 Nꞌdeee nááⁿ ntiiⁿnyuⁿ yeⁿꞌe Dendyuūs vɛ́ɛ́ chi idiiⁿ yú ní Ndyuūs ngínnee yā ꞌáámá ꞌáámá sꞌuuúⁿ. 7 Ndyuūs tee yā Espíritu Nꞌdai yeⁿꞌé yā sꞌuuúⁿ ní Espíritu miiⁿ nginnee sꞌuuúⁿ. Ní sꞌuuúⁿ cuuvi cunnee yú nducyaaca ꞌiiⁿꞌyāⁿ chi iꞌtéénu yā Señor Jesucristo chí ꞌiivi yú. 8 Espíritu Nꞌdai miiⁿ ní cunnee tanáⁿꞌā ꞌiiⁿꞌyāⁿ chi ngaⁿꞌa nꞌdááca yā nduudu yeⁿꞌé Ndyuūs. Espíritu Nꞌdai yeⁿꞌé Ndyuūs nginnee naⁿꞌa ꞌiiⁿꞌyāⁿ chi cuuvi caaⁿꞌmaⁿ yā ndúúcū vaadī deenú ca. Dámaāⁿ ꞌáámá nꞌdyáⁿꞌā Espíritu Nꞌdai miiⁿ diiⁿ chuū. 9 Ní Espíritu Nꞌdai miiⁿ ní nginnee nducyaaca ꞌiiⁿꞌyāⁿ chi iꞌtéénu cá yā Dendyuūs. Ní Espíritu Nꞌdai nginnee náⁿꞌā ꞌiiⁿꞌyāⁿ ní caꞌá poder miiⁿ ꞌiiⁿꞌyāⁿ sꞌuuⁿ chi ꞌiiⁿꞌyāⁿ sꞌuuⁿ cuuvi diíⁿ yā chí nduūvā yeⁿꞌé ꞌiiⁿꞌyāⁿ chi ngiītā. 10 Espíritu Nꞌdai miiⁿ caꞌá naⁿꞌa ꞌiiⁿꞌyāⁿ chi idiíⁿ yā vaadī nꞌgiinuú ní ngaꞌa poder náⁿꞌā ꞌiiⁿꞌyāⁿ chi cuuvi candɛɛ́ yā nduudu cuaacu yeⁿꞌé Ndyuūs. Espíritu Nꞌdai miiⁿ ní diiⁿ chi náⁿꞌā ꞌiiⁿꞌyāⁿ cuuvi déénu yā chɛɛ ꞌiiⁿꞌyāⁿ ngaⁿꞌá yā caavā Espíritu Nꞌdai yeⁿꞌé Ndyuūs o cáávā espíritu yeⁿꞌe yááⁿnꞌguiinūuⁿ. Ní Espíritu Nꞌdai caꞌa náⁿꞌa yā poder chi caaⁿꞌmaⁿ yā nꞌdeee nááⁿ davaacu, ní náⁿꞌa yā chi caⁿꞌa yā chííⁿ chí neⁿꞌe caāⁿꞌmaⁿ nduudu miiⁿ. 11 ꞌÁámá nꞌdyáⁿꞌā Espíritu Nꞌdai yeⁿꞌé Ndyuūs tee yā poder ꞌáámá ꞌáámá sꞌuuúⁿ chi cuuvi diiⁿ yú ntiiⁿnyuⁿ yeⁿꞌé yā tanꞌdúúcā chí néⁿꞌe yā.

12 ꞌTíícā vɛ́ɛ́ ꞌáámá cuerpo yeⁿꞌē yú ní nééné nꞌdeee nááⁿ chí vɛ́ɛ́ yeⁿꞌē. Ní ndúúcū nꞌdeee nááⁿ chi vɛ́ɛ́ yeⁿꞌē, ni yeⁿꞌē ꞌáámá cuerpo nūuⁿ, ꞌtúúcā. Cucáávā chi yeⁿꞌe Jesucristo sꞌuuúⁿ, tuuꞌmi sꞌuuúⁿ ní tanꞌdúúcā chi sꞌuuúⁿ ní ꞌáámá cuerpo nūuⁿ sꞌuuúⁿ. Ní cuerpo miiⁿ ní Jesucristo miiⁿ. 13 Ti cááva Espíritu Nꞌdai yeⁿꞌé Ndyuūs miiⁿ ngɛɛ̄dinuūⁿnīⁿ yú ní maaⁿ ní sꞌuūúⁿ ní yeⁿꞌē ꞌáámá cuerpo sꞌuuúⁿ. Nduuti chi ꞌiiⁿꞌyāⁿ Israel chi judíos sꞌuuúⁿ, o ꞌiiⁿꞌyāⁿ griegos sꞌuuúⁿ o ꞌiiⁿꞌyāⁿ chi snéé caadi ꞌiiyu sꞌuuúⁿ, o ꞌiiⁿꞌyāⁿ chi diiⁿ ntiiⁿnyuⁿ cáávā maáⁿ yā sꞌuuúⁿ, nducyaaca sꞌuuúⁿ ní yeⁿꞌē ꞌáámá Espíritu Nꞌdai yeⁿꞌé Dendyuūs.

14 ꞌTíícā cuerpo yeⁿꞌē yú, ní nguɛ́ɛ́ ꞌáámá nꞌdyáⁿꞌā nūuⁿ ti ꞌyaaⁿ nꞌdáí yeⁿꞌē. 15 Ndúúti chi caꞌa yú chí ngíí ngaⁿꞌa ní miiⁿ ní caāꞌmaⁿ: Caati ꞌúú nguɛ́ɛ́ ꞌáámá taꞌá ꞌúú nguɛ́ɛ́ yeⁿꞌe cuerpo yeⁿꞌe yú. ¿ꞌÁá nadacadíínuuⁿ nī chi cáávā chiiⁿ chi caⁿꞌa caꞌa yú, ní caꞌa yú nguɛ́ɛ́ yeⁿꞌe cuerpo yeⁿꞌe yú? Nguɛ́ɛ́ ꞌtíícā. 16 Ndúúti chi veeⁿ yú chi ngíí ngaⁿꞌa ní miiⁿ ní caāⁿꞌmaⁿ: Caati ꞌúú ní nguɛ́ɛ́ ꞌáámá nduutináaⁿ ꞌúú nguɛ́ɛ́ yeⁿꞌe cuerpo yeⁿꞌē yú. ¿ꞌÁá nadacadíínuuⁿ nī chi cáávā chiiⁿ chi caⁿꞌa veeⁿ yú, ní veeⁿ yú nguɛ́ɛ́ yeⁿꞌē cuerpo yeⁿꞌe yú? Nguɛ́ɛ́ ꞌtíícā. 17 Nduuti chi nuuⁿmaⁿ cuerpo yeⁿꞌē yú ní ꞌáámá nduutinaaⁿ yú tuuꞌmi ní ¿taacā cúúví ꞌcaandiveeⁿ yú? Ní ndúútī chi nuuⁿmáⁿ cuerpo yeⁿꞌē yú ní veeⁿ yú tuuꞌmi ní ¿táácā cuuvi ꞌtáaⁿꞌnuⁿ yú? 18 Dendyuūs sꞌnéeⁿ yā caꞌáámá caꞌáámá chi canee yeⁿꞌē cuerpo yeⁿꞌē yú na lugar naachi canee yiinú yā. 19 Nduuti chi cuerpo yeⁿꞌē yú ní ꞌáámá parte nūuⁿ ¿tií canéé nducuéⁿꞌē cuerpo yeⁿꞌē yú? 20 ꞌTíícā Dendyuūs dinꞌdái yā ꞌáámá cuerpo yeⁿꞌē yú chi nꞌdeee nááⁿ chi vɛɛ naati vɛ́ɛ́ ꞌáámá cuerpo yeⁿꞌē yú.

21 Nduuti chi nduutinaaⁿ yú chi ngíí ngaⁿꞌa ní miiⁿ ní caāⁿꞌmaⁿ yeⁿꞌe taꞌā yú ꞌtíícā: Dii taꞌā, nguɛ́ɛ́ dichííꞌvɛ̄ di. ꞌTiicá ntúūⁿ tiīⁿ ra yú ni caaⁿꞌmaⁿ yeⁿꞌē caꞌā yú ꞌtiicā: Díí caꞌá, nguɛ́ɛ́ dichííꞌvɛ̄ dii. Nguɛ́ɛ́ cuuvi ꞌtíícā. 22 Denduꞌū chi snée na cuerpo yeⁿꞌe yú chi duūvā ni ꞌlííⁿ chi nguɛ́ɛ́ diiⁿ yú cuenta yeⁿꞌē, chííⁿ chi neené dichííꞌvɛ̄ sꞌuuúⁿ. 23 Denduꞌu chi yeⁿꞌe cuerpo yeⁿꞌē yú chí nacadiinuuⁿ yú chi nguɛ́ɛ́ importante, chuū ní diiⁿ yú cuidado yeⁿꞌē tanꞌdúúcā chí chꞌɛɛtɛ ca. Denduꞌū yeⁿꞌe cuerpo yeⁿꞌe yú chi nguɛ́ɛ́ neⁿꞌe yú chi ꞌiiⁿꞌyāⁿ nꞌdiichi yā chi nꞌdíi yú ndúúcū catecai yú. 24 Tanáⁿꞌā parte yeⁿꞌe cuerpo yeⁿꞌe yú ꞌāā nꞌdaacā canee ꞌāā tiiní caā. Dendyuūs diíⁿ yā cuerpo yeⁿꞌe yú ní diíⁿ yā chi cundɛɛ̄ ca yú cuidado yeⁿꞌē nducuéⁿꞌē chi nadacādiinuuⁿ yú chi nguɛ́ɛ́ importante yeⁿꞌe cuerpo yeⁿꞌe yú. 25 Chuū ní diíⁿ Dendyuūs chi nducuéⁿꞌē parte yeⁿꞌe cuerpo nꞌdaacā diīíⁿ ntiiⁿnyūⁿ yeⁿꞌē cuerpo yeⁿꞌe yú. Ní nducuéⁿꞌē cuerpo yeⁿꞌe yú diiⁿ yú cuidado ꞌáámá parte yeⁿꞌē yú ndúúcū táámá parte yeⁿꞌe yú. 26 Nduuti chi diiⁿ yú cuidado yeⁿꞌe ꞌáámá dendúꞌū nūuⁿ yeⁿꞌe cuerpo yeⁿꞌe yú ti diiⁿ sufrir, tuuꞌmi ní nuuⁿmaⁿ chꞌɛɛtɛ cuerpo yeⁿꞌe yú diiⁿ sufrir. Nduuti chi dichꞌɛɛtɛ́ yā ꞌáámá denduꞌū yeⁿꞌe cuerpo yeⁿꞌē yú tuuꞌmi ní núúⁿmáⁿ cuerpo yeⁿꞌe yú ní yeenú taavi.

27 Chuū chi caaⁿꞌmáⁿ. Maaⁿ ní nducyaaca ndísꞌtiī ní yeⁿꞌe cuerpo yeⁿꞌe Cristo Jesús. Ní caꞌáámá caꞌáámá nī vɛ́ɛ́ parte yeⁿꞌe cuerpo yeⁿꞌe Cristo Jesús. 28 Ndyuūs tee yā ntiiⁿnyuⁿ caꞌáámá caꞌáámá sꞌuuúⁿ chi iꞌteenu yú Jesucristo. Vmnááⁿ vmnaaⁿ caꞌa yā ntiiⁿnyuⁿ chí chꞌɛɛtɛ ca chí ntiiⁿnyuⁿ yeⁿꞌe apóstoles chi dichóꞌó Dendyuūs. Cuayiivi ní tee yā tanáⁿꞌā yú ntiiⁿnyuⁿ yeⁿꞌe profetas chi ndɛɛ̄ yú nduudu yeⁿꞌē ꞌiivú Ndyuūs. Cuayiivi ní tee yā tanáⁿꞌā yú ntiiⁿnyuⁿ chi maestros yeⁿꞌe nduudu yeⁿꞌé Ndyuūs. Ní tanáⁿꞌā yú Ndyuūs tee yā ntiiⁿnyuⁿ sꞌuuúⁿ chi diiⁿ yú vaadī nꞌgiinu. Tuuꞌmi ní tee yā tanáⁿꞌā yú ntiiⁿnyuⁿ chi diiⁿ yú chí induūvā yeⁿꞌe ꞌiiⁿꞌyāⁿ. Tee yā tanáⁿꞌā yú ntiiⁿnyuⁿ chí cunnee yú ꞌiiⁿꞌyāⁿ. Tee yā tanáⁿꞌā yú ntiiⁿnyuⁿ chi caaⁿꞌmaⁿ ntiiⁿnyuⁿ yú yeⁿꞌe ꞌiiⁿꞌyāⁿ chi cunneé yā ꞌiiⁿꞌyāⁿ chi diíⁿ yā ntiiⁿnyuⁿ yeⁿꞌe Ndyuūs. Ni teé yā ntiiⁿnyuⁿ tanáⁿꞌā yú chi ngaⁿꞌa yú nꞌdeee ꞌnááⁿ davaacu. 29 ¿ꞌÁá nadacadíínuuⁿ nī chi nducyaaca yú apóstoles? ¿ꞌÁá nadacadíínuuⁿ nī chi nducyaaca yú profetas chi ndɛɛ̄ nduudu yeⁿꞌe ꞌiivú Ndyuūs? ¿ꞌÁá nadacadíínuuⁿ nī chí nducyaaca yú maestros yeⁿꞌē nduudu yeⁿꞌé Ndyuūs? ¿ꞌÁá nducyaaca yú diiⁿ yú vaadī nꞌgiinu? 30 ¿ꞌÁá nducyaaca yú cuuvi diiⁿ yú chi nduuvā yeⁿꞌe ꞌiiⁿꞌyāⁿ? ¿ꞌÁá nducyaaca yú ngaⁿꞌa yú nꞌdeee ꞌnaaⁿ davaacu? ¿ꞌÁá nducyaaca yú cuuvi caaⁿꞌmaⁿ yú chi neⁿꞌe caaⁿꞌmaⁿ táámá davaacu? Nguɛ́ɛ́ ꞌtíícā. 31 Canéé chi diiⁿ yú ntiiⁿnyuⁿ yeⁿꞌé Dendyuūs tanꞌdúúcā chi Dendyuūs neⁿꞌé yā chi diiⁿ yú. Ní caavā sꞌuuúⁿ ní ntiiⁿnyuⁿ miiⁿ ní nꞌdaacā ca. Maaⁿ ní ꞌúú ꞌcuuⁿꞌmíⁿ ndísꞌtiī táácā cuuvi chí diiⁿ yú chí más cā nꞌdaacā ca.