Yeⁿꞌe vaadī neⁿꞌe chí chꞌɛɛtɛ nꞌdaí
13
Nduuti chi sꞌuuúⁿ caaⁿꞌmaⁿ yú tanꞌdúúcā chi ngaⁿꞌa ꞌiiⁿꞌyāⁿ chi deenu, o tanꞌduucā chi ngaⁿꞌa ángeles, ní nguɛ́ɛ́ neⁿꞌe yú nducyaaca ꞌiiⁿꞌyāⁿ, tuuꞌmi ní nduudu yeⁿꞌe yú tanꞌduucā ꞌáámá cūū ꞌlííⁿ chí nꞌgɛɛcu, o tanꞌdúúcā ꞌáámá cuꞌu lata chi diꞌcuɛɛ̄cú yú. 2 Ndúúti chi Ndyuūs tee yā ntiiⁿnyuⁿ sꞌuuúⁿ chi cuuvi caaⁿꞌmaⁿ yú dendúꞌū chi cuchiī, ní nduuti chi cadiinuuⁿ yú nducuéⁿꞌē chi yeⁿꞌé Ndyuūs chi nguɛɛ deenu tanáⁿꞌa yā, ní nducuéⁿꞌe vaadī deenu chi yeⁿꞌē iⁿꞌyeeⁿdí ꞌcūū, ní nguɛ́ɛ́ neⁿꞌe yú nducyaaca ꞌiiⁿꞌyāⁿ, tuuꞌmi ní chiiⁿ chi diiⁿ yú nguɛ́ɛ́ dichííꞌvɛ̄ nanááⁿ Dendyuūs. Ní nduuti chi iꞌteenu ca yú Dendyuūs chi cuuvi caaⁿꞌmaⁿ yú yeⁿꞌē ꞌáámá yiīcū ꞌtíícā: Nꞌdii yiīcū, divíi nī yeⁿꞌē ꞌmuuⁿ, ní yiīcū miiⁿ caⁿꞌā taama lado. Ní nduuti chi nguɛ́ɛ́ neⁿꞌe yú nducyaaca ꞌiiⁿꞌyāⁿ, tuuꞌmi ní chiiⁿ chi diiⁿ yú nguɛ́ɛ́ dichííꞌvɛ̄ nanááⁿ Dendyuūs. 3 Ndúúti chi caꞌa yú nducuéⁿꞌē chi vɛ́ɛ́ yeⁿꞌe yú ꞌiiⁿꞌyāⁿ chi nguɛ́ɛ́ yeⁿꞌé yā, ní ꞌáárá chí caꞌa yú maaⁿ cuerpo yeⁿꞌe yú chi ꞌiiⁿꞌyāⁿ cuucú yā sꞌuuúⁿ cucáávā chi ngaⁿꞌa yú nduudu cuaacu, ní nguɛ́ɛ́ neⁿꞌe yú nducyaaca ꞌiiⁿꞌyāⁿ, tuuꞌmi ní nguɛ́ɛ́ dɛꞌɛ̄ vɛɛ chi diiⁿ yú chi dichííꞌvɛ̄ nanááⁿ Dendyuūs.4 Ndúúti chi sꞌuuúⁿ ní neⁿꞌe yú nducyaaca ꞌiiⁿꞌyāⁿ ní nguɛ́ɛ́ caaⁿꞌmaⁿ taaⁿ yú ndúúcū ꞌiiⁿꞌyāⁿ ní cuchɛɛ yú tanducuéⁿꞌe tuuꞌmi ní neene nꞌdai yú. Ndúúti chi sꞌuuúⁿ neⁿꞌe yú nducyaaca ꞌiiⁿꞌyāⁿ ní nguɛ́ɛ́ ngueē yú chiiⁿ chi naaⁿ yú chi vɛ́ɛ́ yeⁿꞌe ꞌiiⁿꞌyāⁿ. Ní nguɛ́ɛ́ nadacadíínuuⁿ yú chi chꞌɛɛtɛ nꞌdai yú. Ní nguɛ́ɛ́ maāⁿ yú caaⁿꞌmaⁿ yú chi chꞌɛɛtɛ nꞌdai maāⁿ yú. 5 Ndúúti chi sꞌuuúⁿ neⁿꞌe yú nducyaaca ꞌiiⁿꞌyāⁿ nguɛ́ɛ́ a fuerza diiⁿ yú dámaāⁿ chiiⁿ chi neⁿꞌe yú. Ní nguɛ́ɛ́ nadacadíínuuⁿ yú dámaāⁿ yeⁿꞌe maaⁿ yú, naati nginnee yú ꞌiiⁿꞌyāⁿ chi diꞌvaachi. Ní cuchɛɛ yú taachí ꞌiiⁿꞌyāⁿ sꞌeeⁿ díꞌvaāchí yā sꞌuuúⁿ. Ní nguɛ́ɛ́ nadacadíínuuⁿ yú yeⁿꞌē chi nguɛ́ɛ́ nꞌdaacā. 6 Nduuti chi sꞌuuúⁿ neⁿꞌe yú nducyaaca ꞌiiⁿꞌyāⁿ nguɛ́ɛ́ yeenu yú taachi táámá ꞌiiⁿꞌyāⁿ diíⁿ yā chi nguɛɛ nꞌdaacā, ti yeenu yú taachi ꞌiiⁿꞌyāⁿ diíⁿ yā denduꞌū chi nꞌdaacā. 7 Nduuti chi sꞌuuúⁿ neⁿꞌe yú nducyaaca ꞌiiⁿꞌyāⁿ tuuꞌmi ní cuchɛ́ɛ́ yú tanducuéⁿꞌē denduꞌū chi chóꞌōo ndúúcu yú. Ní nguɛ́ɛ́ iꞌteenu yú tanducuéⁿꞌē denduꞌū chi nꞌgiindiveeⁿ yú chí ꞌiiⁿꞌyāⁿ ngaⁿꞌa yeⁿꞌe táámá ꞌiiⁿꞌyāⁿ yeⁿꞌe chi nguɛ́ɛ́ nꞌdaācā idiíⁿ yā. Ní cunee yíínu yú nducuéⁿꞌe chi nꞌdaacā. Ní cuchɛ́ɛ yú yeⁿꞌē tanducuéⁿꞌē denduꞌū chi diītu nꞌdáí taachí chóꞌōo yeⁿꞌē yú.
8 Nduuti chi sꞌuuúⁿ neⁿꞌe yú nducyaaca ꞌiiⁿꞌyāⁿ, tuuꞌmi ní ꞌáámá canee yú ndúúcū vaadī neⁿꞌe yeⁿꞌé Dendyuūs chi ꞌáámá cūneé ndúúcu yú. Ndaā tiempo chi profetas chi ngaⁿꞌa nduudu yeⁿꞌé Dendyuūs ꞌāā ntɛ́ɛ́ caaⁿꞌmaⁿ yā ꞌtiicā. Ní ꞌiiⁿꞌyāⁿ chi ngaⁿꞌa yā nꞌdeee ꞌnááⁿ davaacu ꞌāā ntɛ́ɛ́ caaⁿꞌmáⁿ yā ꞌtíícā. Ní vaadī déenū ntúūⁿ chi ꞌiiⁿꞌyāⁿ ngaⁿꞌa ní choꞌōo yéⁿꞌē. Dámaāⁿ canee vaadī neⁿꞌe. 9 Maaⁿ ní caaⁿꞌmaⁿ yú nduudu yeⁿꞌé Dendyuūs tanꞌdúúcā chi nꞌgiⁿꞌí yā sꞌuuúⁿ naati Ndyuūs nguɛ́ɛ́ chꞌiⁿꞌí yā sꞌuuúⁿ vaadī déénú yeⁿꞌē tanducuéⁿꞌē. 10 Taachi chóꞌōo tanducuéⁿꞌē denduꞌū chi canéé chi cuchiī tuuꞌmi ní deenu yú nducuéⁿꞌē, nguɛ́ɛ́ dámaāⁿ ꞌtɛ́ɛ́ nūuⁿ.
11 Taachí saⁿꞌa ꞌlííⁿ ꞌúú, ngaⁿꞌá tanꞌdúúcā chi ngaⁿꞌā daꞌcáíyāa ní nadacádiinúúⁿ tanꞌduucā daꞌcáíyāa. Taachí chi chꞌɛɛtɛ ꞌúú ꞌāā ntɛ́ɛ́ diíⁿ tanꞌdúúcā daꞌcáíyāa. 12 Maaⁿ ní inaaⁿ yú tanducuéⁿꞌē tanꞌdúúcā chi inaaⁿ yú chɛɛti ꞌáámá espejo yaāⁿ yáāiⁿ, ní nguɛ́ɛ́ inaaⁿ yú nꞌdaacā. Cuayiivi miiⁿ ní nꞌdiichi yú ꞌiivú Señor Jesucristo dánaaⁿ dánaaⁿ yú. Maaⁿ ní ꞌtɛ́ɛ́ nuúⁿ deenu yú. Cuayiivi miiⁿ ní snaaⁿ yú tanꞌdúúcā ꞌiivu Señor Jesucristo nꞌdiichí yā sꞌuuúⁿ. ꞌTíícā snaaⁿ yú. 13 Ná vida yeⁿꞌe sꞌuuúⁿ vɛ́ɛ́ ꞌiinū chi nꞌdaacā. Vɛ́ɛ́ chi iꞌteenu yú Dendyuūs, ní vɛ́ɛ́ chi canee ngiinu yú chi diiⁿ Dendyuūs ndúúcu yú, ní vɛ́ɛ́ chi neⁿꞌe yú Dendyuūs. Nduu ꞌiinú naaⁿ chuū ní chiiⁿ chi chꞌɛɛtɛ́ nꞌdai, ní chííⁿ chi neⁿꞌe yú ꞌiivú Dendyuūs ní neⁿꞌe yú nducyaaca ꞌiiⁿꞌyāⁿ.