5 Neⁿꞌé chi nducyaaca ndísꞌtiī cuuvi caaⁿꞌmáⁿ nī tanáⁿꞌā davaacu chi n̄ꞌdááⁿ naati nꞌdaacā ca chi caaⁿꞌmáⁿ nī nduudu yeⁿꞌé Ndyuūs na veedi ní nꞌgiindiveéⁿ yā ꞌiiⁿꞌyāⁿ. ꞌIiⁿꞌyāⁿ chi ngaⁿꞌá yā tanáⁿꞌa davaacu chi n̄ꞌdááⁿ chi nguɛ́ɛ́ deenu yú, ꞌiiⁿꞌyāⁿ sꞌeeⁿ nguɛ́ɛ́ caꞌcueéⁿ yā sꞌuuúⁿ. Dámaāⁿ nꞌgiindiveeⁿ yú nduuti chi táámá yā caaⁿꞌmáⁿ yā dɛꞌɛ́ neⁿꞌē caaⁿꞌmaⁿ nduudu miiⁿ. 6 Ndísꞌtiī hermanos yeⁿꞌé, ndúúti chi ꞌúú ndaá ní caaⁿꞌmáⁿ ndúúcū táámá davaacu chi n̄ꞌdááⁿ chi nguɛ́ɛ́ nꞌgiindiveéⁿ nī, ¿táácā cuuvi cunneé ndísꞌtiī? Naati nduuti chi caaⁿꞌmáⁿ na veedi tuuꞌmi ní cuuví caaⁿꞌmáⁿ yeⁿꞌē cosas chi cuchiī, o yeⁿꞌē nduudu cuaacu chí nꞌdai chí yeⁿꞌé Ndyuūs. Tuuꞌmi ní cuuvi ꞌcuɛɛtinée nī tanꞌdúúcā chi ngaⁿꞌá nduudu yeⁿꞌé Ndyuūs, ní caꞌcueéⁿ ndísꞌtiī.

7 Taachí ꞌiiⁿꞌyāⁿ itiiꞌví yā ꞌáámá flauta, o tuuꞌví yā ꞌáámá guitarra, ní nguɛ́ɛ́ n̄ꞌdaaⁿ tono chi itiiꞌví yā, o tuuꞌví yā tuuꞌmi ní ¿táácā cuuvi deenú tanáⁿꞌā ꞌiiⁿꞌyāⁿ dɛꞌɛ̄ música chi itiiꞌví yā o tuuꞌví yā? 8 Nduuti chi ꞌáámá soldado itiiꞌví yā trompeta yeⁿꞌe música yeⁿꞌe caanda, ní nguɛɛ n̄ꞌdaáⁿ tono chi itiiꞌví yā, ¿táácā cuuvi deenú tanáⁿꞌā soldados ní cuundiyaáⁿ yā chi ꞌāā ndaá caandaá? 9 ꞌTiicá ntúūⁿ. Nduuti chi ndísꞌtiī ní caaⁿꞌmaⁿ nī ndúúcū nduudu chi nguɛ́ɛ́ deenu tanáⁿꞌa yā ¿táácā tuumicadiinúúⁿ yā chi ngaⁿꞌá nī? Ndísꞌtiī ní diíⁿ nī tanꞌdúúcā chi ngaⁿꞌá nī na ꞌyúúné. 10 Nééné nꞌdeee ꞌnááⁿ davaacu vɛ́ɛ́ iⁿꞌyeeⁿdí ꞌcūū. Ní ꞌiiⁿꞌyāⁿ cuuvi caaⁿꞌmáⁿ yā maaⁿ na nduudu yeⁿꞌe yā nducuéⁿꞌē chi neⁿꞌé yā ní tanáⁿꞌā ꞌiiⁿꞌyāⁿ sꞌeeⁿ ꞌcaandiveéⁿ yā nduudu yeⁿꞌe yā. 11 Nduuti chi ꞌúú nguɛɛ nꞌgiindiveéⁿ nduudu yeⁿꞌe tanáⁿꞌa ꞌiiⁿꞌyāⁿ tuuꞌmi ní ꞌiiⁿꞌyāⁿ miiⁿ canée yā tanꞌdúúcā ꞌáámá ꞌiiⁿꞌyāⁿ chi canúúⁿ yúúní. ꞌTííca ntúuⁿ, ꞌúú ní caneé tanꞌdúúcā ꞌáámá ꞌiiⁿꞌyāⁿ chi canúúⁿ yúúní ti nguɛ́ɛ́ nꞌgiindiveéⁿ yā nduudu yeⁿꞌé. 12 Ndísꞌtiī chi neⁿꞌé nī diíⁿ nī ntiiⁿnyuⁿ chꞌɛɛtɛ yeⁿꞌé Ndyuūs, ngiicá nī Espíritu Nꞌdai yeⁿꞌé Ndyuūs chi tée yā ntiiⁿnyuⁿ ndísꞌtiī, ntiiⁿnyuⁿ chi cuuví caꞌcuéeⁿ nī nduudu yeⁿꞌé Ndyuūs ꞌiiⁿꞌyāⁿ. Ní ꞌíícú ꞌiiⁿꞌyāⁿ cuuvi déénu ca yā yeⁿꞌe Ndyuūs.

13 ꞌIiⁿꞌyāⁿ mííⁿ chi caaⁿꞌmaⁿ yā táámá davaacu chi n̄ꞌdááⁿ canéé chi ngiicá yā Ndyuūs dɛꞌɛ chi neⁿꞌē caaⁿꞌmaⁿ nduudu chí caⁿꞌa yā. Ní cuuvi caaⁿꞌmáⁿ yā tanáⁿꞌa yā nduudú miiⁿ. 14 Nduuti chi ꞌúú caaⁿꞌmáⁿnguaꞌá ndúúcū táámá davaacu chi n̄ꞌdááⁿ ní nguɛ́ɛ́ deenú chííⁿ chí caaⁿꞌmáⁿ tuuꞌmi ní dámaāⁿ espíritu yeⁿꞌé caāⁿꞌmaⁿ. Ní ꞌúú ní nguɛ́ɛ́ tuumicadiinúúⁿ dɛ́ꞌɛ̄ vɛɛ chi caaⁿꞌmáⁿ. 15 ¿Dɛꞌɛ̄ diíⁿ tuuꞌmi? Caaⁿꞌmaⁿnguaꞌá ndúúcū nduudu na veedi ní espíritu yeⁿꞌé ní túúmícádiīnúuⁿ chííⁿ chi diíⁿ. Ní caatá ndúúcū nduudu na veedi ní espíritu yeⁿꞌé ní túúmícádiīnúúⁿ chííⁿ chi caātá denduꞌū. 16 Ndúúti chi ndísꞌtiī caaⁿꞌmaⁿnguaꞌá nī ndúúcū táámá davaacu chi n̄ꞌdááⁿ ní ngaⁿꞌá nī ꞌtíícā: Nꞌdií Ndyuūs, gracias, ní diíⁿ nī ndúúcū espíritu yeⁿꞌé nī, tuuꞌmi ní ¿táácā cuuvi caaⁿꞌmaⁿ tanáⁿꞌa yā chi ꞌtíícā chiiⁿ chi ngaⁿꞌa nī? 17 ꞌÁárá chí nꞌdaacā ngaⁿꞌa nī, nguɛ́ɛ́ cunnee nī ꞌiiⁿꞌyāⁿ chi caⁿꞌá yā yaācū. 18 ꞌÚú Pablo ncaꞌá gracias Ndyuūs yeⁿꞌe yú chi ngaⁿꞌá cá nꞌdeee ꞌnááⁿ davaacu chi n̄ꞌdááⁿ ndúúcū espíritu yeⁿꞌé nguɛɛ ti ndísꞌtiī. 19 Taachí ngaⁿꞌá na yaācū nꞌdaacā ca chí caaⁿꞌmáⁿ nyuⁿꞌu nduudu na veedi chi ꞌúú cadiinúúⁿ ní ꞌiicu caꞌcueéⁿ tanáⁿꞌa yā, ti ꞌúú ngaⁿꞌá ta ndiīchi mil nduudu táámá naaⁿ davaacu chi n̄ꞌdááⁿ chi nguɛ́ɛ́ itúúmícadiīnuuⁿ tanáⁿꞌa yā.

20 Ndísꞌtiī hermanos yeⁿꞌé, nguɛ́ɛ́ nadacadíínuuⁿ nī tanꞌdúúcā dáꞌcaiyaā, o tanꞌdúúcā ꞌáámá daꞌcuáꞌāa chi nguɛ́ɛ́ inadacadíínuuⁿ yā yeⁿꞌē nuuⁿndi yeⁿꞌe yā ꞌtíícá nī. Maaⁿ ní nducueⁿꞌē chi diíⁿ nī ní nadacadíínuuⁿ nī yeⁿꞌē tanꞌdúúcā saⁿꞌā nꞌgɛɛtɛ nadacadíínuuⁿ sa. 21 Canéé nguūⁿ na libro yeⁿꞌé Ndyuūs ndii cuááⁿ vmnaaⁿ ꞌtíícā: ꞌÚú chi ꞌiivú Ndyuūs ngaⁿꞌá chuū. ꞌÚú dichoꞌó ꞌiiⁿꞌyāⁿ chi canúúⁿ yúúní chi ngaⁿꞌá yā nduudu cuaacu yeⁿꞌé ndúúcū táámá naaⁿ davaacu. Ndaa yā nanááⁿ ꞌiiⁿꞌyāⁿ sꞌeeⁿ ní ꞌiiⁿꞌyāⁿ sꞌeeⁿ nguɛ́ɛ́ neⁿꞌé yā ꞌcaandiveéⁿ yā nduudu yeⁿꞌé. ꞌTíícā ngaⁿꞌa Ndyuūs. 22 Cáávā chiiⁿ ní Ndyuūs caꞌá yā poder ꞌiiⁿꞌyāⁿ chi caaⁿꞌmáⁿ yā nꞌdeee ꞌnaaⁿ davaacu chi ꞌiiⁿꞌyāⁿ nguɛ́ɛ́ tuumicadíínuuⁿ yā. Ní chííⁿ chí nꞌgiⁿꞌi Ndyuūs ní ꞌaama seña chi poder yeⁿꞌe yā cááva ꞌiiⁿꞌyāⁿ chi nguɛ́ɛ́ iꞌtéénu yā Ndyuūs. Nguɛ́ɛ́ caavā sꞌuuúⁿ chi iꞌtéénu yú. ꞌIiⁿꞌyāⁿ chi caꞌcueéⁿ yā nduudu yeⁿꞌé Ndyuūs ní ngaⁿꞌa yā cáávā sꞌuuúⁿ chi iꞌteenu yú nguɛ́ɛ́ ti cáávā ꞌiiⁿꞌyāⁿ chi nguɛ́ɛ́ iꞌtéénu yā Dendyuūs yeⁿꞌē yú. 23 Ndúúti chi ꞌiiⁿꞌyāⁿ chi nguɛ́ɛ́ iꞌtéénu yā ꞌiivú Ndyuūs, o ꞌiiⁿꞌyāⁿ chi canúúⁿ yúúní, ndaa yā na yáacū ní nduuvidaamá yā ndúúcu yú ní nducyaaca yú ngaⁿꞌa yú davaacu chí n̄ꞌdááⁿ. ¿ꞌÁá nguɛ́ɛ́ caaⁿꞌmáⁿ yā chi sꞌuuúⁿ ní loco yú? 24 Ndúúti chi nducyaaca nī caꞌcueeⁿ nī nduudu yeⁿꞌé Ndyuūs na veedi ní ndaa ꞌáámá ꞌiiⁿꞌyāⁿ chɛɛti yaācū, ꞌiiⁿꞌyāⁿ chi nguɛ́ɛ́ iꞌtéénu yā ꞌiivú Ndyuūs o nguɛ́ɛ́ déénu yā ꞌiivú Ndyuūs yeⁿꞌē yú, tuuꞌmi ní ꞌiiⁿꞌyāⁿ miiⁿ cuuvi diíⁿ yā sentir nuuⁿndi yeⁿꞌé yā. Ní nadacadiinúúⁿ yā yeⁿꞌē nuuⁿndi yeⁿꞌé yā na staava yeⁿꞌé yā. 25 ꞌIiⁿꞌyāⁿ miiⁿ ní cuuvi deenú yā dɛꞌɛ̄ chi maáⁿ yā nadacadiinúúⁿ yā na staava yeⁿꞌe yā chi nguɛɛ cuuvi nꞌdiichí yā. Ní ꞌiiⁿꞌyāⁿ miiⁿ cundiitínꞌdíí yā ní cuꞌtéénu yā Ndyuūs. Ní ngaⁿꞌá yā ꞌtiicā: Cuaacu nííⁿnyúⁿ Ndyuūs caneé yā ndúúcū ndísꞌtiī.

26 Ndísꞌtiī ní ꞌtíícā diíⁿ nī taachi nduuvidáámá nī. Naⁿꞌa ndísꞌtiī ní candɛ́ɛ nī ꞌaama canción. Ní naⁿꞌa nī chꞌeeⁿnee listo nī chi caꞌcueéⁿ nī tanáⁿꞌa yā. Naⁿꞌá nī ní chꞌeeⁿnee listo nī chi caaⁿꞌmáⁿ nī ꞌáámá nduudu cuaacu yeⁿꞌé Ndyuūs. Naⁿꞌá nī ní caaⁿꞌmáⁿ nī táámá naaⁿ davaacu chi n̄ꞌdááⁿ naati nꞌnuúⁿ nī vmnaaⁿ vmnaaⁿ ꞌáámá hermano chi cuuvi caaⁿꞌmáⁿ dɛꞌɛ̄ chi neⁿꞌe caaⁿꞌmaⁿ nduudu sꞌeeⁿ chi n̄ꞌdááⁿ. ꞌTíícā cuuvi, ní cuꞌtéénu cá nī yeⁿꞌē ꞌiivú Ndyuūs. 27 Damaāⁿ ꞌuuvī o ꞌiinú nī ꞌaama ꞌaamá nī caaⁿꞌmáⁿ nī ndúúcū naaⁿ davaacu, nduudú chí n̄ꞌdááⁿ, naatí táámá nī chꞌeeⁿnee listo chi caaⁿꞌmáⁿ nī dɛꞌɛ̄ neⁿꞌé caaⁿꞌmāⁿ nduudu sꞌeeⁿ chi n̄ꞌdááⁿ. 28 Nduuti chi nguɛ́ɛ́ vɛ́ɛ́ ꞌáámá yā nguaaⁿ ndísꞌtiī chi cuuvi caaⁿꞌmaⁿ dɛꞌɛ neⁿꞌe caaⁿꞌmāⁿ nduudu sꞌeeⁿ chí n̄ꞌdááⁿ tuuꞌmi ꞌiiⁿꞌyāⁿ nguɛ́ɛ́ cuuvi caaⁿꞌmáⁿ yā ndúúcū davaacu chí n̄ꞌdááⁿ naachi nduuvidaamá nī. Naati ꞌiiⁿꞌyāⁿ miiⁿ cuuvi ndeé yā cúūnū cúūnū ndúúcū Dendyuūs ndúúcū davaacu chi n̄ꞌdááⁿ. 29 Taachí nduuvidaamá nī, ꞌuuví nī o ꞌiinu nī candɛ́ɛ nī nduudu cuaacu yeⁿꞌé Ndyuūs ní caꞌaama caꞌaama nī caaⁿꞌmáⁿ nī nduudu na veedi ní tanaⁿꞌá yā nadacadíínuuⁿ yā yeⁿꞌe nduudu chí ngaⁿꞌa nī. 30 Ní nduuti Ndyuūs ní nꞌgiⁿꞌi yā ꞌáámá ndísꞌtiī chi vɛ́ɛ nī ꞌáámá nduudu yeⁿꞌé yā chi caaⁿꞌmáⁿ nī, tuuꞌmi ní ꞌiiⁿꞌyāⁿ chi candɛ́ɛ yā nduudu miiⁿ canéé chí tée yā lugar chi caaⁿꞌmáⁿ nī nduudu yeⁿꞌé Ndyuūs. 31 ꞌTíícā nducyaaca nī cuuvi caaⁿꞌmáⁿ nī nduudu yeⁿꞌé Ndyuūs caꞌáámá caꞌáámá nī. Tanáⁿꞌa nī nꞌgiindiveéⁿ nī. Ní ꞌtíícā ní cuuvi déénu cá nī yeⁿꞌé Ndyuūs ní cuꞌtéénu cá nī yeⁿꞌé yā. 32 ꞌIiⁿꞌyāⁿ chi caaⁿꞌmáⁿ yā nduudu yeⁿꞌé Ndyuūs deenu yā dɛꞌɛ tiempo chi caaⁿꞌmáⁿ yā. 33 Ndyuūs neⁿꞌé yā chi vɛ́ɛ́ orden chɛɛti yáacū yeⁿꞌé yā ní vɛ́ɛ́ vaadī ꞌdiīiⁿ. ꞌTíícā ní chꞌeeⁿnéé ꞌdiíⁿ nī denduꞌū na staava yeⁿꞌé nī. ꞌTíícā cānee tanducuéⁿꞌē yaācū yeⁿꞌé Ndyuūs. 34 Taachi nduuvidáámá nī nꞌdaataá nguɛ́ɛ́ cuuvi candɛɛ tá nduudu yeⁿꞌe Dendyuūs, naati ꞌdiiⁿ ꞌdiíⁿ nūuⁿ ꞌcuɛɛtinéé cheendí tá. ꞌTíícā canéé nguūⁿ na ley yeⁿꞌé Ndyuūs. 35 Nduuti chi ꞌáámá nꞌdaataá nguɛ́ɛ́ tuumicadíínuuⁿ tá yeⁿꞌe nducuéⁿꞌē chi ngaⁿꞌa yā chɛɛti yaācū, tuuꞌmi taachi ndaa tá ná vaacu tá cuuvi nítíínguuneeⁿ ta isaⁿꞌā yeⁿꞌe tá. Nduuti chi ꞌááma nꞌdaataá candɛɛ tá nduudu yeⁿꞌé Ndyuūs chɛɛti yaācū, tuuꞌmi ꞌcuináaⁿ tá.

36 ¿ꞌÁá nguɛ́ɛ́ neⁿꞌé nī ꞌcaandiveéⁿ nī chi dinguúⁿ yeⁿꞌe nī? ¿Dɛ́ꞌɛ ra tuuꞌmi? ¿ꞌÁá yeⁿꞌe ndísꞌtiī nduudu yeⁿꞌe Ndyuūs o ndaā dámáāaⁿ nanááⁿ ndísꞌtiī nduudu miiⁿ? 37 Nduuti chi ꞌáámá saⁿꞌā nguaaⁿ ndísꞌtiī nadacadíínuuⁿ sa chi cuaacu chi ntiiⁿnyuⁿ yeⁿꞌē sa chiiⁿ chi caaⁿꞌmaⁿ sa nduudu cuaacu yeⁿꞌé Ndyuūs, ní Espíritu Nꞌdai yeⁿꞌé Ndyuūs caꞌcueéⁿ yā saⁿꞌa miiⁿ, tuuꞌmi ní cuuvi deenu sa chííⁿ chi idinguúⁿ tanꞌdúúcā chi Ndyuūs chꞌiⁿꞌí yā ꞌúú. 38 Nduuti chi saⁿꞌā miiⁿ nguɛ́ɛ́ ꞌcaandiveeⁿ sa nduudu yeⁿꞌé, tuuꞌmi ní ndísꞌtiī nguɛ́ɛ́ ꞌcaandiveéⁿ nī nduudu yeⁿꞌē sa.

39 ꞌTíícā diíⁿ nī, ndísꞌtiī hermanos yeⁿꞌé. Caaⁿꞌmáⁿ nī nduudu cuaacu ní caꞌá nī lugar chi ꞌiiⁿꞌyāⁿ caaⁿꞌmáⁿ yā táámá davaacu chi n̄ꞌdááⁿ. 40 Diiⁿ nꞌdaacá nī tanducuéⁿꞌē ndúúcū orden.