2 Chꞌíínú cheꞌe nguiinú yā. Yááⁿnꞌguiinūuⁿ ꞌāā sꞌneeⁿ sa na staava yeⁿꞌē Judas Iscariote chi daiya Simón chi canéé chi diíⁿ yā entregar Jesús. 3 Déénú Jesús chí tanducuéⁿꞌē ní caꞌa Chiidá yā taꞌa daiyá yā ní chí nanꞌdáa yā yeⁿꞌé Dendyuūs ní duuꞌvī tiempo tuuꞌmí naⁿꞌá yā nanááⁿ Dendyuūs. 4 Nadacuéeⁿ yā naachi chi cheꞌe nguiinú yā ní ndivíi yā catecaí yā. Ní staꞌá yā ꞌaama toalla chɛɛcu vmnaaⁿ cuerpo yeⁿꞌe yā. 5 Ní chꞌiinuúⁿ yā nuūⁿnīⁿ chɛɛti tina ní tucáꞌa yā naaⁿnu yā caꞌa discípulos. Ní natíꞌi yā ndúúcū toalla chi ndɛɛcú yā.

6 Ndaá yā naachi canéé Simón Pedro ní sáⁿꞌa ꞌcūū ngaⁿꞌa sa ngii sa ꞌiiⁿꞌyāⁿ: Señor, ¿ꞌáá nꞌdiī ntúūⁿ naaⁿnú nī caꞌá?

7 Nanꞌguɛɛcútaⁿꞌā Jesús ní ngaⁿꞌa yā ngii yā saⁿꞌā: ꞌÚú ní chi diíⁿ nguɛ́ɛ́ deenu di maaⁿ naati cadíínuuⁿ di cuayiivi.

8 Ngaⁿꞌā Pedro ngii sa ꞌiiⁿꞌyāⁿ: Nꞌdiī, nguɛ́ɛ́ nááⁿnú nī caꞌá mar ꞌáámá tiempo. Nanꞌguɛɛcútaⁿꞌā Jesús yeⁿꞌē sa: Ndúúti chi nguɛɛ naaⁿnú yeⁿꞌē di nguɛ́ɛ́ ꞌáámá parte yeⁿꞌē di nduucú.

9 Tuuꞌmi ní ngaⁿꞌa Simón Pedro: Señor, nguɛ́ɛ́ dámaāⁿ caꞌá ti ndii taꞌá ntúūⁿ ndúúcū tiíⁿ.

10 Tuuꞌmi ní ngaⁿꞌa Jesús ngii yā saⁿꞌā: Duꞌu chí chiīnē nguɛ́ɛ́ neⁿꞌē sa chi naaⁿnu sa cuerpo yeⁿꞌe sa ti dámaāⁿ caꞌa sa caati tanducuéⁿꞌē cuerpo yeⁿꞌē sa ní dɛɛvɛ. Ndísꞌtiī ní ꞌāā dɛɛvɛ́ nī ꞌāā nꞌdáá rá chí nguɛ́ɛ́ nducyaaca nī.

11 Ti deenú yā duꞌu chí diíⁿ entregar ꞌiiⁿꞌyāⁿ ní cáávā chííⁿ chi caⁿꞌa yā: Nguɛ́ɛ́ nducyaacá nī dɛɛvɛ nī.

12 Taachí chꞌiinu naaⁿnú yā caꞌa discípulos, ní staꞌá yā catecaí yā nguɛɛcundíí ntuúⁿ yā ꞌcuundi yā. Ngaⁿꞌa yā ngii yā saⁿꞌā sꞌeeⁿ: ¿ꞌÁá déénú nī dɛꞌɛ̄ chi idiíⁿ nduucú nī? 13 Ndísꞌtiī ngaⁿꞌa nī chi ꞌúú ni Maestro, chi ꞌúú ni Señor. Nꞌdaācā ngaⁿꞌa nī caati ꞌtíícā ꞌúú. 14 ꞌÚú ní Señor yeⁿꞌé nī, ꞌúú ni Maestro yeⁿꞌé nī. ꞌÚú inaaⁿnú caꞌa nī. Ndísꞌtiī canéé nī ntúūⁿ chi naaⁿnu nī ꞌaama nī caꞌa taama nī. 15 Caneéⁿ chi diíⁿ chuū. Tanꞌdúúcā chi ꞌúú chi diíⁿ ꞌtíícá nī ntúūⁿ diiⁿ ndísꞌtiī. 16 Cuaacu nííⁿnyúⁿ cuāācū niiⁿnyuⁿ ngaⁿꞌá ngií ndísꞌtiī: ꞌIiⁿꞌyāⁿ chí diiⁿ mandado nguɛ́ɛ́ ꞌāā ꞌnaaⁿ ca yā chi ꞌiiⁿꞌyāⁿ chí ngaⁿꞌa ntiiⁿnyūⁿ yeⁿꞌé yā. Ndíí nguɛ́ɛ́ ndúú ꞌiiⁿꞌyāⁿ chi dichoꞌó yā nguɛ́ɛ́ ꞌāā ꞌnaaⁿ cá yā chi ꞌiiⁿꞌyāⁿ chi dichoꞌó yā ꞌiiⁿꞌyāⁿ. 17 Nduuti chi deenu nī taanduvɛ́ɛ́ denduꞌū ní yeenu taaví nī ndúúti chi diíⁿ nī chuū.

18 Nguɛ́ɛ́ ngaⁿꞌá yeⁿꞌē nducyaaca ndisꞌtiī. ꞌÚú ní deenú ꞌiiⁿꞌyāⁿ chí ndɛɛvɛ́. Ní ꞌiicu canéé chi cuuví cuaacu chí canéé nguūⁿ. Duꞌū chi ngeꞌé pan nduucú, canéé chi caⁿꞌá yā contra yeⁿꞌē ꞌúú. 19 Ndíí maaⁿ ꞌāā ngaⁿꞌá ꞌaara chi ꞌāā cuɛ́ɛ́ cuuvi niiⁿnuúⁿ. Taachi ꞌāā choꞌōo chuū cuuví cuꞌtéénu nī chi ꞌúú. 20 Cuaacu nííⁿnyúⁿ cuāācū niiⁿnyuⁿ ꞌúú ngaⁿꞌá ngií ndísꞌtiī: ꞌIiⁿꞌyāⁿ chi ꞌcuáaⁿ yā ꞌiiⁿꞌyāⁿ chi ꞌúú dichoꞌó ꞌcuáaⁿ yā ꞌúú. Ní ꞌiiⁿꞌyāⁿ chi ꞌcuáaⁿ yā ꞌúú ꞌcuáaⁿ yā ꞌiiⁿꞌyāⁿ chi dichoꞌó yā ꞌúú.

21 Taachí ngaⁿꞌa Jesús chuū yaꞌai ꞌiinú yā na espíritu yeⁿꞌé yā ní caⁿꞌa cuaacú yā: Cuaacu nííⁿnyúⁿ cuāācū niiⁿnyuⁿ ngaⁿꞌá ngií ndísꞌtiī chi ꞌáámá chɛ́ɛ́ ndísꞌtiī diíⁿ nī entregar ꞌúú.

22 Tuuꞌmi discípulos nꞌgíínú yā na ꞌáámá yā na táámá yā. Nguɛ́ɛ́ tuumicádiinúúⁿ yā duꞌu yeⁿꞌē chi ngaⁿꞌa yā. 23 ꞌÁámá discípulo, chi nééné neⁿꞌé Jesús, candíítí neeⁿ yā na nííⁿnúⁿ Jesús. 24 Simón Pedro caꞌa yā señas saⁿꞌá ꞌcūū ní ngaⁿꞌa yā saⁿꞌā chí natiingúúneeⁿ sa yeⁿꞌē sáⁿꞌā chi ngaⁿꞌa Jesús. 25 Níícú taachi candiití neeⁿ yā nííⁿnúⁿ Jesús, tuuꞌmí ngaⁿꞌá yā: Señor, ¿duꞌū chii?

26 Nanꞌguɛɛcútaⁿꞌā Jesús: Caⁿꞌá diꞌcaandá pan ní caꞌá ꞌiiⁿꞌyāⁿ ní ꞌiiⁿꞌyāⁿ miiⁿ chííⁿ. Ní diꞌcaandá yā pan ní caꞌá yā Judas Iscariote, daiya Simón. 27 Chꞌíínú cheꞌe sa pan miiⁿ ní yááⁿnꞌguiinūuⁿ ndaa sa na staava yeⁿꞌē sa. Tuuꞌmí Jesús ní ngaⁿꞌa yā ngii yā saⁿꞌā: Chíí chi neⁿꞌe di diiⁿ dí miiⁿ, diiⁿ núúⁿ yiiⁿnu nuuⁿ di.

28 Naati mar ꞌáámá ꞌiiⁿꞌyāⁿ chi vɛ́ɛ́ na mesa miiⁿ nguɛ́ɛ́ tuumicadiinúúⁿ yā dɛꞌɛ̄ chúú chí ꞌtíícā caⁿꞌa yā. 29 Nꞌduuví yā nnacadíínuuⁿ yā chi caati Judas ndɛ́ɛ sa bolsa chi Jesús ní ꞌāā ngaⁿꞌa yā ngii yā saⁿꞌā: Cuái di chi neⁿꞌe yú yeⁿꞌe ꞌviicu o cuicaꞌa dí ꞌtɛɛ ꞌiiⁿꞌyāⁿ chi ndaachíī snée yā. 30 Chꞌiinú cheꞌé yā pan canꞌdaā núuⁿ Judas chuvaꞌai ní ꞌāā chi ꞌdaꞌa.

31 Taachí Judas miiⁿ canꞌdaā sa miiⁿ tuuꞌmi ní ngaⁿꞌā Jesús: Maaⁿ ní canéé chí cuuvi chꞌɛɛtɛ Saⁿꞌā chi Daiya Dendyuūs. Ní Dendyuūs miiⁿ canéé chi chꞌɛɛtɛ ndúúcu yā. 32 Ndúúti chi Dendyuūs canéé chi chꞌɛɛtɛ yā, ꞌtiicá ntúūⁿ diíⁿ yā chi chꞌɛɛtɛ maáⁿ yā. Ní ꞌcuiinu ní diíⁿ yā chi chꞌɛɛtɛ ꞌiiⁿꞌyāⁿ. 33 Nꞌdiī daiya nꞌgaiyaá ꞌtɛ́ɛ́ ꞌtɛ́ɛ́ nuúⁿ cuneé ndúúcū ndisꞌtiī. Inꞌnuúⁿ nī ꞌúú tanꞌdúúcā chi ꞌúú chi ngaⁿꞌá ngií ꞌiiⁿꞌyāⁿ Israel sꞌeeⁿ: Naachi ꞌúú caⁿꞌá ndísꞌtiī ní nguɛ́ɛ́ cuuvi ndaá nī. ꞌTíícā ngaⁿꞌá ndisꞌtiī maaⁿ. 34 ꞌÁámá ley ngai iteé ndisꞌtiī chi diiⁿ yáꞌāī ꞌiinu nī viꞌī ꞌaama nī taama nī tanꞌdúúcā chi idiíⁿ yáꞌāī ꞌiinú ndisꞌtíī. ꞌTiicá ntúūⁿ diyáꞌai ꞌiinú nī viꞌī ꞌaama nī taama nī. 35 ꞌÍícú chúū tuumicadiinuuⁿ nducyaaca ꞌiiⁿꞌyāⁿ chi ndísꞌtiī ní discípulos yeⁿꞌé ndúúti chi neⁿꞌé nī ꞌáámá nī taama nī.

36 Tuuꞌmí ngaⁿꞌā Simón Pedro ngii sa Jesús: Señor, ¿tií cáⁿꞌa di? Nanꞌguɛɛcútaⁿꞌā Jesús miiⁿ: Naachi ꞌúú caⁿꞌá nguɛ́ɛ́ cuuví chiī ndísꞌtiī canꞌdáa nī ꞌúú. Naati canéé chí chii nī canꞌdáa nī ꞌúú cuayiivi.

37 Tuuꞌmí ngaⁿꞌā Pedro miiⁿ: Señor, ¿dɛꞌɛ̄ cuuví chi ꞌāā ntɛɛ cuuví chi canꞌdaá dii maaⁿ? Vida yeⁿꞌé cuꞌneéⁿ lugar yeⁿꞌē di.

38 Nanꞌguɛɛcútaⁿꞌā Jesús miiⁿ: ¿ꞌÁá ꞌcuūvī di lado yeⁿꞌe ꞌúú? Cuaacu nííⁿnyúⁿ cuāācū niiⁿnyuⁿ ngaⁿꞌá ngií dii chi nguɛ́ɛ́ ꞌcai tusáⁿꞌā taachí nguɛ́ɛ́ cueeⁿdíitū di ꞌúú ꞌiinū cuuvi vuelta.