N‑jaʼan Jesús xa se ka taxnuni nuu ñayiu Israel, n‑ka kida‑s xa uʼu
12
Te ijan n‑kixeʼe Jesús xa jaʼan‑ia ɨɨn tnuʼu,
xa dakuaʼa‑ia ñayiu ijan:
—Ɨɨn seyɨɨ n‑dakeé kueʼe yutnu uva.
N‑kidavaʼa‑s yuʼa yuú.
N‑chixaku‑s yutnu uva.
N‑kidavaʼa‑s ɨɨn pozo kaʼnu,
nuu kiʼni‑s ndudi uva.
Te n‑kidavaʼa‑s ɨɨn veʼe yuú,
ɨɨn veʼe dujun,
xa junuu‑s yutnu uva ijan.
ʼN‑xajan ndee‑s ñuʼu yutnu uva nuu uni koon seyɨɨ,
xa kadatniu koio‑s nuu ñuʼu‑s,
te mee‑s n‑kee‑s.
Juaʼan‑s ɨɨn ñuu xika.
San Marcos 12:1-17
2 Na n‑xee yoo xichi uva,
n‑tundaʼa‑s ɨɨn se xinokuechi nuu‑s juaʼan‑s nuu se ka kidatniu nuu ñuʼu‑s,
xa tnɨɨ‑s uva xa kaneʼe‑s nuʼu nuu‑s.
3 Ko se ka kidatniu nuu ñuʼu‑s,
n‑ka tnɨɨ‑s se xinokuechi jan.
N‑ka janñaʼa‑s,
te n‑ka nakuijun ñaʼa‑s.
Ni ɨɨn xavidi yutnu uva,
ña n‑tnɨɨ xtoʼo‑tnu.
4 Ɨnka vuelta,
n‑tundaʼa xtoʼo‑tnu ɨnka se xinokuechi nuu‑s nuu se ñunuu yutnu uva‑s.
N‑ka janñaʼa‑s,
te n‑ka taʼu‑s dɨkɨ‑s.
Kuiʼa n‑ka jaʼan‑s nuu‑s.
5 Ɨnka ntuku se xinokuechi nuu‑s,
n‑tundaʼa ntuku‑s.
Se ijan,
n‑ka xaʼni‑s.
Te kueʼe ɨnka‑s.
Dava‑s n‑ka janñaʼa‑s,
te dava‑s n‑ka xaʼni ñaʼa‑s.
6 ʼIdinga seyɨɨ n‑ndoo xiʼin‑s.
Daʼya mani‑s kuu‑s.
N‑tundaʼa‑s daʼya‑s,
ndijun nga‑s juaʼan,
nuu se ka kidatniu nuu ñuʼu‑s.
N‑jaʼan‑s:
“Koo koio‑s xañuʼu nuu daʼya‑r.”
7 Ko se ka kidatniu nuu ñuʼu‑s,
n‑ka jaʼan nuu tnaʼa mee‑s:
“Se yaʼa vaxi xa tnɨɨ‑s ntdaa xaxii xtoʼo‑ro.
¡Na jɨʼɨn‑ro!
Kaʼni‑ro‑s,
te ndoo mee‑ro xiʼin ntdaa xaxii‑s.”
8 N‑ka tnɨɨ ñaʼa‑s,
te n‑ka xaʼni ñaʼa‑s.
N‑ka dajane‑s ndɨyɨ yata yuʼa yuú yutnu uva.
9 Te n‑xijan tnuʼu Jesús:
—Xijan kuu xa,
¿nax kada xtoʼo ñuʼu yutnu uva?
Jɨʼɨn‑s,
te danaa‑s se ka kidatniu nuu ñuʼu‑s.
Juñaʼa‑s ñuʼu yutnu uva nuu ɨnka ñayiu.
10 ʼ¿Ña n‑ka kaʼu‑n tnuʼu Ianyuux a?
Yodotnuni tnuʼu Ianyuux:
N‑ka kidavaʼa seyɨɨ ɨɨn veʼe.
Ɨɨn yuú n‑ka dajane‑s ɨɨn xio.
Ña n‑ka kutnuni ini‑s xa yuú jan
xá n‑kaxí Ianyuux xa kuu yuú kiʼna nuu.
11 Duʼa n‑kida Ianyuux,
te kuu ná kuu xa ndeʼa‑ro ɨɨn xa vii ɨɨn xa vaʼa ka.
12 Te se n‑ka teku nax n‑jaʼan Jesús,
n‑ka juini‑s xa tnɨɨ‑s‑ia,
ko n‑ka yuʼu‑s nuu kueʼe xa kueʼe ñayiu xyuku ijan.
Chi vaʼa n‑ka kutnuni ini‑s xa n‑jaʼan‑ia tnuʼu yaʼa xaxeʼe mee‑s.
N‑ka dandoo‑s‑ia,
te juaʼan‑s.
¿Vatuka xa chiyaʼu‑ro tvini impuestu?
13 Ijan n‑ka tundaʼa‑s dava se fariseu xiʼin se partido Herodes nuu tuu Jesús,
xa kunini‑s tnuʼu‑ia,
xa tekuechi‑s‑ia.
14 N‑ka xee‑s nuu nujuiin‑ia,
te n‑ka jaʼan‑s:
—Maestru,
ka xini‑r xa se ndaa anu kuu‑n,
ña yuʼu‑n ni ɨɨn nuu ñayiu.
Idini tnuʼu jaʼan‑n nuu ntdaa ñayiu.
Tnuʼu ndaa dakuaʼa‑n ñayiu ichi Ianyuux.
¿Vatuka xa chiyaʼu‑ro tvini impuestu xijan se kuu emperador,
se nani César,
a ñaʼa u?
¿Juñaʼa‑ro,
a ñaʼa u?
15 Ko xini Jesús xa ɨɨn xa jaʼan‑s te ɨnka xa kida‑s.
N‑jaʼan‑ia:
—¿Nax kuu xa xitotnuni ñaʼa‑n?
Kaneʼe ɨɨn tvini neʼe,
na kundeʼa‑r.
16 Xneʼe‑s ɨɨn tvini n‑xee nuu‑ia.
N‑xiaʼan‑ia:
—¿Jundu nuu ndenee nuu tvini yaʼa?
¿Jundu dɨu yodotnuni nuu tvini yaʼa?
N‑ka jaʼan‑s:
—Se kuu emperador,
se nani César.
17 N‑jaʼan Jesús:
—Najuñaʼa koio xa kuu xaxii César nuu César,
te najuñaʼa koio xa kuu xaxii Ianyuux nuu Ianyuux.
Te n‑ka yuʼu‑s‑ia.
Xandaa xa nandoto koio ndɨyɨ
18 Te n‑ka xee se saduceu nuu nujuiin Jesús.
Ka jaʼan mee‑s xa ma nandoto ndɨyɨ.
N‑ka xijan tnuʼu‑s‑ia:
San Marcos 12:18-44
19 —Maestru,
n‑chidotnuni Moisés xa ɨɨn seyɨɨ,
nux kuú‑s te ndoo ñadɨʼɨ‑s te ñayo daʼya‑s io xiʼin‑ña,
io xa natnundaʼa ñani‑s xiʼin viuda,
xa koo daʼya‑s xiʼin‑ña xaxeʼe ndɨyɨ.
20 Uxa seyɨɨ n‑xio.
Se kiʼna nuu n‑tnundaʼa xiʼin ñadɨʼɨ‑s.
N‑xiʼí‑s,
te ñayo daʼya‑s xiʼin‑ña n‑xio.
21 N‑natnundaʼa ñani‑s xiʼin‑ña,
te n‑xiʼí‑s,
te dɨuni ñayo daʼya‑s xiʼin‑ña n‑xio.
Dani ñani kuu uni‑s.
22 N‑uxa‑s n‑ka tnundaʼa xiʼin ñadɨʼɨ jan,
te ni ɨɨn‑s ña n‑xio daʼya‑s xiʼin‑ña.
Te dada n‑xiʼí mee‑ña tuku.
23 Xijan kuu xa kɨu na nandoto ndɨyɨ,
¿ndeda‑s ñadɨʼɨ kuu‑ña?
Chi n‑tnundaʼa‑ña xiʼin n‑uxa‑s.
24 N‑xiaʼan Jesús:
—Ka dandaʼu‑n mee‑n.
Ñatu ka kutnuni ini‑n nax jaʼan tnuʼu Ianyuux.
Dani ñatu ka kutnuni ini‑n nanda kuu xa taxnuni Ianyuux.
25 Na nandoto koio ñayiu,
ma tnundaʼa seyɨɨ ni ñadɨʼɨ.
Nani xtuu ángel,
ia ka xinokuechi nuu Ianyuux tuu andɨu,
dani kutuu koio ñayiu nandoto.
26 Ko xandaa xakuiti kuu xa nandoto koio ndɨyɨ.
¿Nuncas ña n‑ka kaʼu‑n nax n‑chidotnuni Moisés a?
N‑jaʼan Ianyuux nuu Moisés,
nuu nukoo ɨɨn yutnu koko te ña ndaʼva‑tnu.
N‑jaʼan‑ia:
“Mee‑r kuu Ianyuux jandixa Abraham,
kuu‑r Ianyuux jandixa Isaac,
kuu‑r Ianyuux jandixa Jacob.”
27 Ianyuux,
ña kuu‑ia Ianyuux ndɨyɨ.
Chi kuu‑ia Ianyuux ñayiu ndito.
Yo kueʼe ka dandaʼu‑n mee‑n.
Tnuʼu taʼu tniu taxnuni ka
28 Te nuu Jesús,
kuyatni ɨɨn se tuʼa vaʼa tnuʼu n‑chidotnuni Moisés.
N‑teku‑s xa ka jantnaʼa tnuʼu‑s xiʼin‑ia,
te n‑kutnuni ini‑s xa vaʼa jaʼan‑ia.
N‑xijan tnuʼu‑s‑ia:
—¿Ndeda tnuʼu taʼu tniu taxnuni ka?
29 N‑jaʼan Jesús:
—Tnuʼu taʼu tniu taxnuni ka kuu:
“Ñayiu Israel,
kunini koio‑n.
Taa‑ro Ianyuux,
idini Ianyuux kuu‑ia.
30 Io xa juemani koio‑n Taa‑ro Ianyuux.
Xiʼin nde yɨkɨ‑n,
nde tuchi‑n,
nde xaxtnuni‑n,
nde anu‑n,
juemani koio‑n‑ia.”
Xaʼa kuu tnuʼu taʼu tniu taxnuni ka.
31 Te duʼa jaʼan tnuʼu taʼu tniu kuu uu:
“Juemani koio‑n ñayiu,
nani xemani‑n mee‑n.”
Ña tuu ɨnka tnuʼu taʼu tniu taxnuni ka.
32 N‑xiaʼan se tuʼa vaʼa tnuʼu n‑chidotnuni Moisés:
—Io vaʼa ni,
Maestru.
Ndaa jaʼan‑n xa idini Ianyuux kuu‑ia te ñayo ɨnka Ianyuux io.
33 Ndaa jaʼan‑n,
xa xiʼin nde yɨkɨ‑ro,
nde tuchi‑ro,
nde xaxtnuni‑ro,
nde anu‑ro,
io xa juemani‑ro‑ia,
te io xa juemani‑ro ñayiu,
nani xemani‑ro mee‑ro.
Vaʼa ka xa jandixa‑ro tnuʼu yaʼa dada xa teñuʼu‑ro kɨtɨ doko‑ro nuu Ianyuux.
Vaʼa ka xa jandixa‑ro tnuʼu yaʼa dada ntdaa xa doko‑ro nuu‑ia.
34 Na n‑xini Jesús xa n‑kutnuni ini‑s tnuʼu‑ia te vaʼa n‑jaʼan‑s,
te n‑xiaʼan‑ia:
—Vax kuyatni xa xee kɨu xa kɨu mee‑n nuu taxnuni Ianyuux.
Te n‑ka yuʼu ñayiu xyuku ijan.
Ni ɨɨn se ijan ña n‑xijan tnuʼu ka‑ia.
¿Jundu daʼya kuu Cristu?
35 Ijan n‑dakuaʼa Jesús ñayiu xyuku veñuʼu kaʼnu.
N‑jaʼan‑ia:
—Se ka tuʼa vaʼa tnuʼu n‑chidotnuni Moisés,
¿nanda kuu xa ka jaʼan‑s xa Cristu,
Ia n‑tundaʼa Ianyuux,
kuu daʼya dana se kunxaʼnu ka nani David?
36 N‑kida Espíritu Ii xa mee David n‑jaʼan:
N‑jaʼan Ianyuux nuu Xtoʼo‑da:
“Nkoo yaʼa,
ndaʼa kuaʼa‑r,
nde na kada‑r xa taxnuni‑n nuu
se ka xini uʼu ñaʼa.”
37 N‑danani David se ijan Xtoʼo‑s.
¿Nanda kuu xa ɨɨn daʼya dana‑s kuu Xtoʼo‑s?
Te kueʼe xa kueʼe ñayiu xyuku ijan.
N‑ka kuvete‑i xa n‑ka kuvete‑i,
hora n‑ka teku‑i tnuʼu Jesús.
N‑jaʼan Jesús: “Koo koio‑n cuedado nuu se ka tuʼa vaʼa tnuʼu n‑chidotnuni Moisés”
38 Na n‑dakuaʼa Jesús ñayiu ijan,
n‑jaʼan‑ia:
—Koo koio‑n cuedado nuu se ka tuʼa vaʼa tnuʼu n‑chidotnuni Moisés.
Ka tna ini‑s xa kuikonuu‑s juiʼna‑s daʼma nani,
daʼma niʼno maestru.
Nuyaʼu ka juini‑s xa ntdaa ñayiu na jaʼan xañuʼu nuu‑s.
39 Ka tna ini‑s xa ku nukoo‑s silla nuu ka xko nukoo se taxnuni veñuʼu kuechi.
Te hora kaxi‑s dita ɨɨn viko,
ka tna ini‑s xa ku nukoo‑s nuu vaʼa ka.
40 Ka tnɨɨ nga‑s veʼe ñadɨʼɨ ka kuu viuda.
Te hora ka xijan taʼu‑s,
te naʼa ka xijan taʼu‑s,
xa kani ini koio ñayiu xa yo vaʼa xemani‑s Ianyuux.
Kueʼe ka kada uʼu Ianyuux mee‑s dada xa kada‑ia ɨnka ñayiu.
Viuda kundaʼu
41 Xiti veñuʼu jan nukoo Jesús yatni nuu katuu xatnu nuu ka dakeé ñayiu tvini ka doko‑i nuu Ianyuux.
Ndeʼa‑ia kueʼe ñayiu ka yaʼa ijan.
Kueʼe se kuika n‑ka dakeé kueʼe tvini.
42 Ijan n‑xee ɨɨn viuda yo kundaʼu.
Mee‑ña n‑dakeé uu ni tvini kuechi ka.
Yo itaʼu tvini kuu.
43 N‑kana Jesús se dakuaʼa‑ia,
te n‑xiaʼan‑ia: